1. O le ā le eseesega o le manatu masani i pologa ma le fautuaga i le Roma 12:11?

O LE manatu o tagata, o pologa o ni ē e pulea ma le sauā ma faileagaina. Peitaʻi, e ese mai ai le avea ma pologa a le Atua. Ua faapea mai le Tusi Paia, e mafai ona filifili se Kerisiano pe avea o ia ma pologa a le Matai alofa. Ina ua faalaeiauina e Paulo uluaʻi Kerisiano e ʻpologa mo Ieova,’ sa ia uunaʻia i latou e faia le auaunaga paia ona o le alolofa i le Atua. (Roma 12:11) O le ā e aofia ai i le avea ma pologa a le Atua? E faapefea ona ʻalofia le avea o i tatou ma pologa a Satani ma lana lalolagi? O ā faamanuiaga e maua mai le avea ma pologa faamaoni a Ieova?

2. (a) Aiseā na lē fia saʻoloto ai nisi pologa? (e) Aiseā na tāua ai le tuiina o le taliga o se pologa?

² I le Tulafono na tuuina atu iā Isaraelu, e tatou te malamalama ai i mea e manaʻomia ina ia avea ai ma se pologa a le Atua. Na faatoʻā maua e se pologa Eperu le saʻolotoga pe a māeʻa tausaga e fitu. (Eso. 21:2) Peitaʻi, na iai pologa na alolofa i o latou matai ma mananaʻo e auauna pea iā i latou. O lea na saunia ai e Ieova se sauniuniga mataʻina mo i latou. Sa tatau i le matai ona aumaia le pologa e faatū i le faitotoʻa po o le pou o le faitotoʻa, ona tui lea o lona taliga i se mea maʻai. (Eso. 21:5, 6) Sa iai se māfuaaga na tui ai le taliga o se pologa. I le gagana Eperu, o le uiga o le upu usitaʻi e fesootaʻi atu i le faalogo po o le lagona o se mea. Pe a tui le taliga o se pologa, e faailoa mai ai ua lotomalie e auauna pea i lona matai. E fesoasoani nei vala iā i tatou, e malamalama ai i mea e aofia ai i lo tatou tuuina atu. O lo tatou  alolofa mo Ieova e tatou te lotomalilie ai e usiusitaʻi iā te ia.

3. Aiseā e faia ai e se Kerisiano se tuuina atu?

³ A o leʻi papatisoina i tatou, ua uma ona tatou filifili e avea i tatou ma pologa a Ieova. E tatou te tuuina atu ona o lo tatou faanaunauga e usiusitaʻi iā Ieova ma faia lona finagalo. E lē faamalosia e se tasi i tatou e faia lenā mea. E oo foʻi i talavou, e latou te papatiso pe a māeʻa ona latou tuuina atu iā Ieova, ae lē ina ia faafiafia ai mātua. E māfua ona faia e se Kerisiano le tuuina atu ona o lona alofa mo Ieova lona Matai. Ua faapea mai le 1 Ioane 5:3, “o le alofa lenei i le Atua, ia tatou tausi i ana poloaʻiga.”

4. O le ā e manaʻomia ona fai ina ia avea ai i tatou ma “pologa a le amiotonu”?

⁴ E maʻeu lo tatou lotofaafetai iā Ieova ona o le mafai ona avea i tatou ma ana pologa. O lo tatou faatuatua i le taulaga togiola a Iesu, ua mafai ona faasaʻoloto ai i tatou mai le nofo pologa i le agasala. E ui i lo tatou tulaga lē lelei atoatoa, ae ua tatou lotomalilie e mulimulituʻi i le pulega a Ieova ma Iesu. Na faapea mai Paulo: “Ia outou manatu ua oti outou e tusa ai ma le agasala, ae ua ola mo le Atua e ala iā Keriso Iesu.” Ona ia lapataʻi mai lea: “Pe e tou te lē iloa ea, afai tou te tuuina atu outou i se tasi e fai ma pologa e usiusitaʻi i ai, o outou o ana pologa auā ua outou usiusitaʻi iā te ia, a lē o le agasala e iʻu ai i le oti, po o le usiusitaʻi e iʻu ai i le amiotonu? Ae faafetai i le Atua, ona sa fai outou ma pologa a le agasala, a ua outou usiusitaʻi ma o outou loto i lenā aʻoaʻoga na tuuina atu iā te outou. Talu ai ua tuusaʻoloto outou mai i le agasala, ua avea ai outou ma pologa a le amiotonu.” (Roma 6:11, 16-18) Mātau, na taʻua e le aposetolo le ʻusiusitaʻi ma o outou loto.’ O lea, o lo tatou tuuina atu iā Ieova, e avea ai i tatou ma “pologa a le amiotonu.”

5. O le ā le tauiviga o loo tatou fesagaʻia, ma aiseā?

⁵ E lua tauiviga o loo tatou fesagaʻia a o tatou ola ai e ōgatusa ma lo tatou tuuina atu. Muamua, na faapea mai Paulo: “Ou te matuā naunau i le tulafono a le Atua e tusa ma le tagata i totonu, ae ua ou iloa i loʻu tino se isi tulafono, o loo feteenaʻi ma le tulafono a loʻu mafaufau, ma ua faapologaina ai aʻu i le tulafono a le agasala o loo i loʻu tino.” (Roma 7:22, 23) E tatou te aafia i lo tatou tulaga lē lelei atoatoa. O lea, e tatou te tauivi ai pea ma tuʻinanauga o le tino. Ua faalaeiau mai le 1 Peteru 2:16: “Ia amioaʻi e pei o tagata saʻoloto, ma ia tausisi i lo outou saʻolotoga, e lē ina ia ufiufia ai mea leaga, ae o ni pologa a le Atua.”

6, 7. Ua faapefea ona taumafai Satani e faatosina i tatou i lana lalolagi?

⁶ Lona lua, o loo tatou tauivi ma lenei lalolagi ua pulea e temoni. O loo taumafai Satani le pule o lenei lalolagi e lepetia lo tatou faamaoni iā Ieova ma Iesu. O loo ia taumafai foʻi e avea i tatou ma ana pologa e ala i le lolo atu i ana taaʻiga leaga. (Faitau le Efeso 6:11, 12.) O se isi auala ua faia ai faapea e Satani, o le taumafai lea e faatosina i tatou i lana lalolagi. Na tusi Ioane: “Afai e manaʻo se tasi i le lalolagi, e lē o i totonu iā te ia le alofa o le Tamā; auā o mea uma o i le lalolagi, o tuʻinanauga o le tino, ma tuʻinanauga o mata, ma le faalialiavale o meafaitino a se tasi, e lē mai i le Tamā ae e mai i le lalolagi.”​—1 Ioa. 2:15, 16.

⁷ Ua tatou vaaia i le lalolagi le naunau o tagata e maua le tele o meafaitino. Ua uunaʻia e Satani le toʻatele e talitonu o le tele o tupe e maua ai le fiafia. Ua faatupulaʻia le anoanoaʻi o faleoloa tetele. Ua faaauiluma e faasalalauga faapisinisi le naunau i meafaitino ma le fiafia i faafiafiaga. Ua ofoina mai foʻi  avanoa e malaga ai i isi atunuu, ae tele ina malaga faatasi ai ma tagata o le lalolagi. O mea a le lalolagi ua faaauiluma ai le maua o se olaga sologa lelei, e tusa ai ma manatu o le lalolagi.

8, 9. O le ā le lamatiaga ua iai i le lalolagi, ma aiseā?

⁸ Na lapataʻia e Peteru uluaʻi Kerisiano na amata ona aafia i manatu o le lalolagi e faapea: “Ua latou manatu o se mea fiafia le ola i se olaga soonafai i le ao. Ua pei i latou o ila ma pona, ua soona fiafia e faasesē isi i a latou lava aʻoaʻoga taufaasesē, a o faia a latou faigaʻai faatasi ma outou. Ua latou tautatala i upu faasausili e lē aogā, ma e ala i tuʻinanauga o le tino ma masaniga matagā, ua latou faaosoosoina ai o ē ua faatoʻā sosola ese mai i tagata fai mea sesē. Ua latou folafola atu iā i latou le saʻolotoga, a o i latou lava ua avea ma pologa a le iʻuvale. Auā o sē e faatoʻilaloina e se tasi, ua avea o ia ma pologa a lenā tagata.”​—2 Pete. 2:13, 18, 19.

⁹ O le faamalie o “tuʻinanauga o mata” e lē maua ai se saʻolotoga. Nai lo o lea, o le a nofo pologa ai se tasi i le matai o le lalolagi, o Satani le Tiapolo. (1 Ioa. 5:19) E lamatia tele pe a faapologaina se tasi i le matapeʻapeʻa, auā o le a faigatā ona toe vavaeese mai ai.

10, 11. O ai ua avea ma taulaʻiga autū a Satani i aso nei, ma ua faapefea ona avea aʻoaʻoga maualuluga o se luʻi?

¹⁰ E pei ona sa faia e Satani i le faatoʻaga i Etena, o loo ia osofaʻia foʻi i latou e leai se poto masani i aso nei. Ua avea talavou ma taulaʻiga autū a Satani. E ʻinoʻino Satani pe a tuuina atu se talavou po o se tasi e pologa mo Ieova. E manaʻo le fili o le Atua ina ia lē taulau ma lē faamaoni i latou ua tuuina atu o latou ola i le Atua.

¹¹ Seʻi o tatou toe foʻi i le faaaʻoaʻoga i le pologa na tuiina lona taliga. Atonu e na te lagona le tigā mo se taimi puupuu, ae o le a tumau le faailoga e avea ai pea o ia ma pologa. I se tulaga talitutusa, atonu e faigatā i se talavou ona filifilia se lumanaʻi e ese mai i ana uō. Ua taumafai Satani e faaauiluma le manatu, o le filifilia o se lumanaʻi i le lalolagi e faamalieina ai. Peitaʻi e tatau i Kerisiano ona manatua le tāua o le faamalieina o manaʻoga faaleagaga. Na fetalai Iesu i le Mataio 5:3: “E fiafia o ē e naunau i mea faaleagaga.” E faia e Kerisiano tuuina atu le finagalo o le Atua nai lo o le manaʻo o Satani. E latou te fiafia i le tulafono a Ieova, ma manatunatu i ai i le aso atoa. (Faitau le Salamo 1:1-3.) Peitaʻi, o  le tele o aʻoaʻoga maualuluga i aso nei, e itiiti ai le taimi mo se auauna a Ieova e manatunatu loloto ma faamalie ai ona manaʻoga faaleagaga.

12. O le ā le filifiliga ua fesagaʻia e le toʻatele o talavou i aso nei?

¹² Sa leʻi faigofie ona auauna se pologa Kerisiano i se matai e lē auauna iā Ieova. I le uluaʻi tusi a Paulo i Korinito, na ia fesili ai: “Pe na valaauina oe a o fai ma pologa?” O lea na ia fautua mai ai: “Aua neʻi e popole ai i lenā mea; ae afai foʻi e mafai ona faasaʻolotoina oe, ia talia lea avanoa lelei.” (1 Kori. 7:21) Sa sili atu i le pologa Kerisiano ona ia maua le saʻolotoga. O le tele o atunuu i aso nei, e iai tausaga faatapulaa e tatau ona oo iai aʻoaʻoga a fanau, ona faia lea o le filifiliga a le tamaitiiti. O le faaauau o aʻoaʻoga a se tasi e saʻilia ai se lumanaʻi i le lalolagi, e faaitiitia ai lona saʻolotoga e faia lana auaunaga faataimi atoa.​—Faitau le 1 Korinito 7:23.

13. O ā ituaiga o aʻoaʻoga e sili ona aogā mo Kerisiano?

¹³ Na lapataʻia e Paulo Kerisiano i Kolose: “Ia faaeteete: ina neʻi maileia outou e se tasi i filosofia ma manatu taufaasesē e lē aogā e tusa ma tū masani a tagata, e tusa ma mataupu faavae a le lalolagi, ae e lē tusa ma aʻoaʻoga a Keriso.” (Kolo. 2:8) Ua aʻoaʻo e le toʻatele o faiaʻoga “filosofia ma manatu taufaasesē e lē aogā, e tusa ma tū masani a tagata.” E lē o taulau le tele o aʻoaʻoga maualuluga i le saunia o tomai e aogā mo le olaga i aso faisoo. Peitaʻi, ua filifilia e Kerisiano aʻoaʻoga e latou te maua ai tomai e mafai ona latou ola ai i se olaga faigofie, ma auauna ai i le Atua. E tāua iā i latou le fautuaga lenei a Paulo iā Timoteo: “E moni, e tele mea e maua mai le faamaoni i le Atua ma le lotomalie. O lea, afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.” (1 Timo. 6:6, 8) Nai lo o le saʻilia o ni faailoga maualuluga, e galulue mamafa Kerisiano i le saʻilia o “tusi e taʻuleleia,” po o ē na latou fesoasoani i ai e avea ma soo o Keriso. E latou te faia faapea, e ala i le faia o mea sili i le faiva.​—Faitau le 2 Korinito 3:1-3.

14. I le Filipi 3:8, o le ā e tatou te aʻoaʻoina mai le vaaiga a Paulo i le avea ma pologa a le Atua ma Iesu?

¹⁴ Seʻi o tatou mafaufau i le tulaga o Paulo. Sa aʻoaʻoina o ia e Kamalielu le faiaʻoga o Tulafono a Iutaia. E taitutusa aʻoaʻoga sa  maua e Paulo ma aʻoaʻoga i iunivesite i aso nei. Peitaʻi, o le ā le manatu o Paulo i na aʻoaʻoga, ina ua ia faatusatusa i le mamalu e maua mai i le avea ma pologa a Ieova ma Iesu? Na ia tusi: “Ua ou lotomalie e lafoaʻi ia mea ona o le silisili ese o le poto o Keriso Iesu loʻu Alii. O ia foʻi, ua ou lafoaʻia ai nei mea uma ma ua ou manatu o otaota ia mea, ina ia ou maua Keriso.” (Fili. 3:8) O le vaaiga sa iā Paulo, e mafai ona fesoasoani i mātua ma fanau Kerisiano, e faia ai se filifiliga atamai e faatatau i aʻoaʻoga. (Tagaʻi i ata.)

15, 16. O ā aʻoaʻoga ua saunia e le faalapotopotoga a Ieova, ma o le ā le fuafuaga autū?

¹⁵ O le ā le tulaga masani i le tele o aʻoaʻoga maualuluga i aso nei? O le toʻatele o tagata i na aʻoaʻoga, e aafia i amioga lē mamā ma le inu tele i le ʻava malosi. E faaauiluma foʻi i na aʻoga le aʻoaʻoga o le evolusione. (Efe. 2:2) Peitaʻi, ua aumaia e Ieova aʻoaʻoga e sili ona lelei i le faapotopotoga, o se nofoaga filemu. Ua tatou maua aogā i vaiaso taʻitasi mai i le Aʻoga o le Faiva Faatiokarate. Ae tele foʻi isi aʻoaʻoga e mafai ona tatou maua mai ai aogā. O se faataʻitaʻiga, ua iai le aʻoga mo uso paeonia nofofua e taʻua o le Aʻoga Faale-Tusi Paia mo Uso Nofofua. Ua iai foʻi le aʻoga mo ulugalii paeonia ua taʻua o le Aʻoga Faale-Tusi Paia mo Ulugalii Kerisiano. O nei aʻoga uma ua fesoasoani iā i tatou e usiusitaʻi ai i lo tatou Matai faalelagi o Ieova.

¹⁶ E tele isi upu moni tautele e mafai ona tatou maua mai le Faasino Mataupu o loo i le pito i tua, o Olomatamata o Tesema 15 i tausaga taʻitasi, po o le Watchtower Library i le CD-ROM i le faa-Peretania. O le fuafuaga autū o aʻoaʻoga faale-Tusi Paia, o le faaleleia atili o le auala e tatou te tapuaʻi ai iā Ieova. E aʻoaʻoina ai foʻi i tatou i auala, e fesoasoani ai i isi ia avea ma uō a le Atua. (2 Kori. 5:20) E mafai ai foʻi e i latou o loo tatou aʻoaʻoina, ona aʻoaʻo atu i isi.​—2 Timo. 2:2.

17. O ā faamanuiaga e maua mai le filifilia o aʻoaʻoga e sili ona lelei?

¹⁷ I le talafaatusa a Iesu i taleni, na faamālō atu le matai i pologa faamaoni e toʻalua ma latou fiafia faatasi ai. Na maufaatuatuaina foʻi i laʻua ma tuu atu iai isi galuega. (Faitau le Mataio 25:21, 23.) E mafai ona tatou maua le fiafia ma se olaga taulau manuia, pe a tatou filifilia aʻoaʻoga e sili ona lelei. O se faataʻitaʻiga, na lelei aʻoaʻoga a Michael. Na talanoa faiaʻoga iā te ia ma faailoa i ai le telē o le avanoa, e mafai ona ia auai ai i se iunivesite. Na latou maofa i lona lē filifilia o aʻoaʻoga maualuluga. Nai lo o lea, na ia filifilia ni aʻoaʻoga e aʻoaʻoina ai tomai faapitoa, e itiiti le taimi e alu ai. O le faia faapea na mafai ai ona tausia o ia ma fai lana paeonia. Pe sa ia mafaufau na sesē lana filifiliga? Na ia taʻua, na sili atu ona tautele iā te ia aʻoaʻoga na ia maua mai le Tusi Paia, faapea le avea o ia ma toeaina. Na ia faapea mai: “O faamanuiaga ma faaeaga ua ou olioli ai, e lē mafai ona faatusaina i ni tupe sa mafai ona ou mauaina. Na ou matuā fiafia i loʻu lē filifilia o aʻoaʻoga maualuluga.”

18. Aiseā e tatau ai ona tatou filifilia aʻoaʻoga e sili ona lelei?

¹⁸ E tatou aʻoaʻoina le finagalo o le Atua mai aʻoaʻoga e sili ona lelei, ma fesoasoani iā i tatou e avea ma Ana pologa. E aumaia ai iā i tatou le faamoemoe o le ʻsaʻoloto mai i le faapologaina i mea leaga,’ ona maua mulimuli ai lea o le “saʻolotoga mamalu o le fanau a le Atua.” (Roma 8:21) Ae e sili ai ona tāua le maua o le avanoa, e faailoa atu ai lo tatou alolofa i lo tatou Matai o Ieova.​—Eso. 21:5.