1, 2. (a) Aiseā ua taatele ai faiga taufaasesē i aso nei? (e) O ā faamatalaga e faatatau i Molimau a Ieova ua faasalalau e le toʻatele? (Tagaʻi i le ata i luga aʻe o le mau autū.)

UA TAATELE i le lalolagi le pepelo ma faiga taufaasesē, ma e lē faateʻia ai i tatou. Ua taʻua i le Tusi Paia o Satani le Tiapolo o lē e taufaasesē, ma o le pule o lenei lalolagi. (1 Timo. 2:14; 1 Ioa. 5:19) O le a atili ona lotoa Satani a o lata mai le iʻuga o lenei faiga o mea, auā ua ia iloa ua “puupuu lona taimi.” (Faaa. 12:12) O lea, e tatou te faatalitalia o le a faateteleina le lē faamaoni o i latou ua faasesēina e le Tiapolo. E lē gata i lea, o le a latou taumafai e faasesēina isi tagata aemaise ai auauna a Ieova.

² E faasalalau i nisi taimi i nusipepa, polokalame i televise faapea le Initaneti, faamatalaga sesē e faatatau i Molimau a Ieova ma o latou talitonuga. O le iʻuga, ua faasesēina ai i latou ua talitonu i na faamatalaga sesē, e aunoa ma le iloaina o le mea moni.

3. O le ā e mafai ona puipuia ai i tatou mai i faiga taufaasesē?

³ E tatou te lotofaafetai, ona ua mafai ona puipuia i tatou mai i faiga taufaasesē a Satani, e ala i le Tusi Paia lea e ʻaogā e faasaʻo ai mea.’ (2 Timo. 3:16) O le ā e tatou aʻoaʻoina mai i tusi a Paulo i Kerisiano i Tesalonia, lea na taaʻina i faamatalaga sesē. Na ia faalaeiauina i latou ʻe aua neʻi vave fenuminumiaʻi o latou mafaufau.’ (2 Tesa. 2:1, 2) O ā lesona e tatou te aʻoaʻoina mai le fautuaga agalelei a Paulo, ma e faapefea ona tatou faatatauina na fautuaga?

4. Na faapefea ona lapataʻia Kerisiano i Tesalonia e faatatau i le aso o Ieova, ae faapefea aso nei?

⁴ I le tusi muamua a Paulo i Kerisiano i Tesalonia,  na ia lapataʻia ai i latou e faatatau i le “aso o Ieova.” E leʻi manaʻo o ia e fenuminumiaʻi uso ma lē nofosauni. O lea na ia taʻua ai i latou o “atalii o le malamalama,” ma uunaʻia i latou e “mataala ma faaauau ona mafaufau lelei.” (Faitau le 1 Tesalonia 5:1-6.) O loo tatou faatalitalia i aso nei le faaumatiaga o lotu sesē uma, ma o le amataga lenā o le aso tele o Ieova. Ua tatou malamalama i le auala o le a faataunuu ai le finagalo o Ieova. Ua tatou maua e ala mai i le faapotopotoga i taimi uma faamanatuga talafeagai, e sauniunia ai i tatou mo le aso o Ieova. O lea, o le uaʻi atu pea i na lapataʻiga, e faamalosia ai lo tatou faanaunauga e ʻfaia le auaunaga paia ma le mafaufau lelei.’​—Roma 12:1.

5, 6. (a) O le ā na tusi atu ai Paulo i lana tusi lona lua i Tesalonia? (e) O le ā ua toe o se aga ona faia lea e Iesu, ma o ā fesili e tatau ona tatou manatunatu i ai?

⁵ Na tusi atu Paulo i lana tusi lona lua i Tesalonia, e faatatau i le puapuaga tele lea o le a aumaia ai e Iesu le iʻuga “i ē e lē iloa le Atua, ma ē e lē usiusitaʻi i le tala lelei.” (2 Tesa. 1:6-8) I le tusi lenei a Paulo, na ia taʻua ai le “atuatuvale” o nisi Kerisiano, ona sa latou manatu ua matuā latalata mai le aso o Ieova. (Faitau le 2 Tesalonia 2:1, 2.) E leʻi malamalama lelei uluaʻi Kerisiano, i le auala e faataunuu ai le finagalo o Ieova. Na tusi Paulo i le 1 Korinito 13:9, 10: “E lē atoatoa lo tatou poto, ma e lē atoatoa foʻi a tatou valoaga; ae a taunuu mai le mea atoatoa, ona faalēaogāina lea o le mea e lē atoatoa.” Peitaʻi o lapataʻiga a Paulo, Peteru ma isi Kerisiano faauuina, na faamalosia ai le faatuatua o uso.

⁶ Ina ia faasaʻo manatu o uso, na tusi ai Paulo o le a iai ē e fulitua mai i le upu moni, ma le “tagata o le amioleaga” a o leʻi oo mai le aso o Ieova. * A māeʻa lenā, ona “faaumatia” lea e Iesu  i le taimi atofaina i latou uma o le a faasesēina. Na faapea mai Paulo, e māfua lenā faaumatiaga ona “e leʻi faaalia lo latou naunau i le upu moni.” (2 Tesa. 2:3, 8-10) Ia tatou fesili ifo: ʻO faapeʻī loʻu naunau i le upu moni? Po o oʻu suʻesuʻe pea ina ia malamalama lelei i malamalamaga fou o loo aumaia i a tatou lomiga faale-Tusi Paia?’

7, 8. (a) O ā nisi o lamatiaga na fesagaʻia e uluaʻi Kerisiano? (e) O le ā se lamatiaga mo Kerisiano i aso nei?

⁷ E lē na o aʻoaʻoga a i latou ua liliuese mai i le upu moni ua avea ma lamatiaga i Kerisiano. Na tusi atu Paulo iā Timoteo, “o le manaʻo tele i tupe o le pogai lea o mea leaga eseese uma, ma o le manaʻo tele i ai, ua ō ese ai nisi mai le faatuatua, ma tuia ai i latou e i latou lava i le tele o tigā.” (1 Timo. 6:10) E mafai foʻi ona avea “galuega a le tino” ma lamatiaga.​—Kala. 5:19-21.

⁸ Na lapataʻi malosi atu Paulo i uso i Tesalonia e faatatau i “aposetolo pepelo.” O nisi o i latou ua “faauiga sesē mea, ina ia fetoso ese ai soo e mulimuli atu iā i latou.” (2 Kori. 11:4, 13; Galu. 20:30) Na viviia e Iesu le faapotopotoga i Efeso ona o lo latou lē “faapalepale i tagata leaga.” Na faamaonia e uso i Efeso o nei tane o ni aposetolo pepelo. (Faaa. 2:2) Na avatu e Paulo i lana tusi lona lua i Tesalonia le fautuaga malosi lenei: “O la matou faatonuga lenei iā te outou le ʻauuso e, i le suafa o le Alii o Iesu Keriso, ia ō ese mai i so o se uso e faalogogatā.” Na sosoo ai ma lona taʻua o Kerisiano ʻe lē fia galulue.’ (2 Tesa. 3:6, 10) O lea, pe afai e tatau ona ʻalofia i latou e paiē ma lē fia galulue, e sili atu la le tatau ona ʻalofia i latou ua amata ona fulitua i le upu moni. Sa tatau ona ʻalofia le faifaimea faatasi ma i latou na, auā na avea o se lamatiaga, ma e faapena foʻi i aso nei.​—Faata. 13:20.

9. Aiseā e tatau ai ona tatou mataala i se tasi e faitio, ma taumatemate mea e lē o faamatalaina i le Tusi Paia?

⁹ Ua lata mai le puapuaga tele ma le iʻuga o lenei faiga leaga o mea. O lea, e matuā tāua tele mo i tatou i aso nei le fautuaga na avatu i Kerisiano i le uluaʻi senituri. E tatou te lē mananaʻo e ʻmisia le fuafuaga’ o le “agalelei faifua o le Atua,” neʻi melea ai lo tatou avanoa mo le ola e faavavau. (2 Kori. 6:1) E tatau ona tatou mataala i so o se tasi e auai i sauniga, ua latou taumatemate mea e lē o faamatalaina i le Tusi Paia, ma faitio i toeaina ma isi i le faapotopotoga.​—2 Tesa. 3:13-15.

10. O ā “mea” na fautuaina Kerisiano i Tesalonia ina ia mulimuli i ai?

¹⁰ Na fautuaina e Paulo uso i Tesalonia ina ia “tutū mausalī,” ma faatatau pea mea na latou aʻoaʻoina. (Faitau le 2 Tesalonia 2:15.) O ā “mea” na aʻoaʻoina ai i latou? E lē o tū na aʻoaʻoina e lotu sesē. Peitaʻi, o aʻoaʻoga a Iesu ma manatu na faagaeeina e le Atua Paulo ma isi e tusia. O lea, na viiviia ai e Paulo Kerisiano i Korinito ina ua tusi atu: “Ua outou mafaufau mai iā te aʻu i mea uma lava, ma ua outou tausia mea uma lava e pei ona ou tuuina atu iā te outou.” (1 Kori. 11:2) E tatau ona tatou talitonuina na aʻoaʻoga, auā e ala mai i se puna e maufaatuatuaina.

11. O ā auala e mafai ona aafia ai se tasi pe a faasesēina?

 ¹¹ I le tusi a Paulo i Kerisiano Eperu, na ia taʻua ai vala e lua e mafai ona vaivai ai le faatuatua o se tasi, ma lē faamaoni ai iā Ieova. (Faitau le Eperu 2:1; 3:12.) Na ia taʻua le “tuulafoaʻia “ ma le “tafetafea ese” o se tasi mai iā Ieova. E faigatā ona iloa ua tafetafea ese se vaa mai le aloalo, auā e faifai mālie lava ona tafetafea ese atu. Peitaʻi, e ese mai i le tūlei ese e se tasi o le vaa mai le aloalo. O nei faaaʻoaʻoga e lua, e iloa ai aafiaga o se tasi ua faasesēina, ma faatagaina le mou atu o lona maufaatuatuaina o le upu moni.

12. E faapefea ona faaleagaina la tatou faauōga ma Ieova?

¹² Na faasesēina nisi i le faapotopotoga i Tesalonia. Pe e mafai ona tupu lenā mea iā i tatou? E tele meafai o le olaga e alu ai le taimi. Seʻi mafaufau i le tele o le taimi e faaalu e nisi i galuega e fai i taimi paganoa, siakiina o tuatusi, imeli faapea tala o taaloga i le Initaneti. O nei vala, e mafai ona tosina ese ai se Kerisiano, ma mou atu ai le maelega mo le auaunaga. O le ā le iʻuga? Atonu o le a lē toe tatalo ai iā Ieova mai le loto, pe itiiti ai foʻi le taimi e suʻesuʻe ai le Tusi Paia, auai i sauniga, faapea le talaʻia o le tala lelei. E faapefea ona ʻalofia le vave fenuminumiaʻi o o tatou mafaufau?

13. O ā manatu o le toʻatele o tagata na valoia i le Tusi Paia, ma e faapefea ona puipuia lo tatou faatuatua?

¹³ E tatau ona tatou manatua ua lata mai le iʻuga o le lalolagi a Satani. O lea, e lamatia i tatou pe a faifaimea faatasi ma tagata e lē talitonu, ua tatou ola i aso e “gata ai.” Na tusi Peteru e faatatau i manatu o tagata i aso e gata ai: “E ō mai ai tagata tauemu ma latou faatauemu mai, ma ua latou faia faapea e tusa ai ma o latou lava tuʻinanauga ma faapea ane: ʻNa folafola mai o ia e faatasi mai, ae o fea o iai? Auā e mai lava i le aso na maliliu ai o tatou augātamā, e leai lava se mea o suia talu mai le foafoaga o le lalolagi.’” (2 Pete. 3:3, 4) O le faitauina o le Tusi Paia i aso taʻitasi ma suʻesuʻe e lē aunoa, e fesoasoani iā i tatou e manatua ai ua tatou ola i “aso e gata ai.” O le liliuese mai le upu moni lea na valoia i le Tusi Paia, ua leva ona tupu ma o loo faaauau mai pea i aso nei. O loo tetee atu pea foʻi le “tagata o le amioleaga” i auauna a Ieova. O lea, ia aua neʻi galo iā i tatou ua latalata mai le aso o Ieova.​—Sefa. 1:7.

14. E faapefea i le maelega i le talaʻiga ona puipuia ai i tatou?

¹⁴ O se tasi o auala e ʻalofia ai le vave fenuminumiaʻi o o tatou mafaufau, o le faia e lē aunoa o se sao i le talaʻiga. Na avatu e Iesu fautuaga e puipuia ai ona soo, ina ua ia faatonuina i latou e fai tagata o nuu uma ma soo, ma aʻoaʻo i latou e tausi i mea ua aʻoaʻoina. (Mata. 28:19, 20) E tatou te usiusitaʻi i le faatonuga a Iesu, e ala i le maelega i le galuega talaʻi. O le ā sou manatu, pe na faia e uso i Tesalonia le talaʻiga e pei o se galuega e tau ina fai? Ia manatua, na tusi atu Paulo iā i latou: “Aua neʻi outou tineia le mumū o le agaga. Aua le manatu faatauvaa i valoaga.” (1 Tesa. 5:19, 20) E tatou te maua le  fiafia i valoaga o loo tatou suʻesuʻeina ma faasoa atu i isi.

15. O ā nisi mataupu e mafai ona talanoaina i le tapuaʻiga a le aiga?

¹⁵ E tatou te naunau e faaleleia tomai o o tatou aiga i le faiva i le fanua. O lea, e faaaogā ai e nisi se vaega o le tapuaʻiga a le aiga, e faataʻitaʻi ai le auala e faia ai le talaʻiga. Atonu e mafai ona sauniuni ai le auala e faia ai toe asiga. O le ā se mataupu e talanoaina pe a toe foʻi e fai se toe asiga? O le ā se faamatalaga e fai atu e faaosofia ai le naunau o le tagata e ona le fale? O le ā se taimi lelei e faia ai toe asiga? E faaaogā e nisi se vaega o le tapuaʻiga a le aiga, e sauniuni ai mo le sauniga. Pe e mafai ona faia faapea e lou aiga? O le faia o se sao i le sauniga, e faamalosia ai lou faatuatua, ma ʻalofia ai le vave fenuminumiaʻi o lou mafaufau. (Sala. 35:18) O le tapuaʻiga a le aiga, e puipuia ai i tatou mai i le masalosalo ma le taumatemate, o mea e lē o faamatalaina mai i le Tusi Paia.

16. O le ā ua fesoasoani i le vaega totoe e ʻalofia ai le fenuminumiaʻi o o latou mafaufau?

¹⁶ Ua faamanuia e Ieova ona tagata i le faatuputeleina o lo latou malamalamaga i valoaga o le Tusi Paia. O lenei vala, ua faamautinoa mai ai iā i tatou lo tatou taui matagofie i le lumanaʻi. E tulimataʻia e le vaega totoe le taimi e faatasi ai ma Iesu i le lagi. O lenā faamoemoe, ua uunaʻia ai i latou e ʻalofia le vave fenuminumiaʻi o o latou mafaufau. E fetaui lelei iā i latou le faamatalaga lenei a Paulo na avatu i uso i Tesalonia: ʻMatou te faafetai atu pea i le Atua mo outou le ʻauuso e, o ē ua alofagia e Ieova, auā ua filifilia outou e le Atua e ala i le faapaiaina o outou i le agaga, ma i lo outou faatuatua i le upu moni.’​—2 Tesa. 2:13.

17. E faapefea ona faalaeiauina oe i le 2 Tesalonia 3:1-5?

¹⁷ E tatau ona ʻalofia e i latou e faamoemoe e ola e faavavau i le lalolagi, le vave ona fenuminumiaʻi o o latou mafaufau, e pei ona faia e le ʻaufaauuina. Pe afai o lou faamoemoe o le ola e faavavau i le lalolagi, e tāua ona usitaʻia le fautuaga agalelei sa avatu e Paulo i uso faauuina i Tesalonia. (Faitau le 2 Tesalonia 3:1-5) E tatau ona tatou talisapaia lenā fautuaga agaalofa. O tusi na avatu i uso i Tesalonia, ua lapataʻia ai i tatou i le taumatemate o mea e lē o faamatalaina i le Tusi Paia, ma le talitonu i manatu e lē faavaea. E tatou te talisapaia na lapataʻiga, auā ua tatou ola i siʻui o lenei faiga o mea.