1. O ā faataulaga ua faia e le toʻatele o tagata, ma aiseā?

E NAUNAU tagata e faia ni faataulaga mo mea e tāua iā i latou. E faaalu e mātua le taimi, tupe ma le malosi e tausia ai a latou fanau. E faaalu foʻi e i latou e fia taaalo i le Olimepeka le tele o le taimi e toleni ai, a o tafafao a latou uō. Na faia foʻi e Iesu ni faataulaga, mo mea sa tāua iā te ia. E leʻi naunau Iesu e faia sana fanau, pe maua foʻi se olaga sologa lelei. Nai lo o lea, sa ia faaaogāina atoatoa lona malosi e lagolago ai le Malo o le Atua. (Mata. 4:17; Luka 9:58) Sa faia foʻi e soo o Iesu le tele o faataulaga, auā sa matuā tāua iā i latou le Malo o le Atua. (Mata. 4:18-22; 19:27) O lea ia fesili ifo: ʻO le ā le mea e tāua i loʻu olaga?’

2. (a) O ā faataulaga tāua ua faia e Kerisiano moni? (e) O ā faataulaga faaopoopo ua faia e nisi Kerisiano?

² E faia e Kerisiano moni le tele o faataulaga tāua, ina ia maua ai se faiā lelei ma Ieova. O se faataʻitaʻiga, ua latou faaalu le taimi ma le malosi e faia ai tatalo, tapuaʻiga a le aiga, auai i sauniga ma le talaʻiga. * (Iosua 1:8; Mata. 28:19, 20; Epe. 10:24, 25) O a tatou taumafaiga ma le faamanuia a Ieova, ua televave ai le galuega talaʻi, ma amata ona lolofi mai ai tagata i le “mauga o le fale o Ieova.” (Isa. 2:2) Ua faia e nisi ni faataulaga e lagolago ai le Malo, e ala i le auauna i Peteli, fesoasoani i le fausia o Maota Fono ma Maota mo Sauniga, faamaopoopo tauaofiaga, ma faia galuega fesoasoani i ē na aafia i mala faalenatura. E lē faia nei faataulaga faaopoopo, ina ia maua ai le ola e faavavau. Peitaʻi, e tāua tele mo le lagolagoina o le Malo o le Atua.

3. (a) E faapefea ona tatou maua aogā mai le faia o faataulaga mo le Malo? (e) O ā fesili e tatau ona tatou iloiloina?

 ³ Ua sili atu ona manaʻomia le lagolagoina o le Malo o le Atua i le taimi lenei, nai lo o se isi lava taimi. Maʻeu le olioli i le mātauina o le lotomalilie o le toʻatele e faia faataulaga mo Ieova. (Faitau le Salamo 54:6.) E tatou te maua le fiafia, pe a tatou faia ni faataulaga a o faatalitali i le oo mai o le Malo o le Atua. (Teu. 16:15; Galu. 20:35) E tāua ona tatou fesili ifo: ʻPe e iai nisi vala e mafai ona ou faia ai ni faataulaga faaopoopo mo le Malo? O faapefea ona faaaogā loʻu taimi, tomai, tupe ma le malosi? O le ā e tatau ona ou manatua pe a faia ni faataulaga? O lea, seʻi o tatou aʻoaʻoina ni lesona mai i nisi o faaaʻoaʻoga o taulaga tauofo, lea e mafai ona tatou faataʻitaʻi i ai ma maua ai le fiafia.

4. O ā aogā na maua e tagata Isaraelu mai i le faia o taulaga?

⁴ Na ofo atu e tagata Isaraelu taulaga e faamagaloina ai a latou agasala. Sa tāua foʻi le faia o taulaga, ina ia maua ai le finagalo malie o Ieova. O nisi taulaga sa faatonuina e tatau lava ona fai, peitaʻi o nisi taulaga sa faatauofo. (Levi. 23:37, 38) O taulaga mū sa faia o se taulaga tauofo, po o se meaalofa iā Ieova. O se tasi o faaaʻoaʻoga o taulaga sa ofoina atu iā Ieova, sa faia i le faapaiaina o le malumalu a Solomona.​—2 No. 7:4-6.

5. O le ā le sauniuniga alofa na mafai ai e tagata matitiva ona faia a latou taulaga?

⁵ Sa silafia e Ieova, e lē tutusa taulaga e mafai ona ofoina atu e tagata uma. O lea, na ia talosagaina ai tagata Isaraelu e ofo atu le mea e gafatia e le tagata. Na faatonuina i le Tulafono le faia o taulaga i manu, ma le sasaa ese o le toto o manu sa faaaogā. Sa avea na taulaga ma “ata o mea lelei i le lumanaʻi” lea e ala iā Iesu. (Epe. 10:1-4) Peitaʻi, na faia e Ieova se sauniuniga alofa ina ua ia saunia lenā tulafono. O se faaaʻoaʻoga, sa talia e Ieova le faaaogāina o manutagi e ofo atu ai taulaga, pe a lē gafatia se ʻoti po o se mamoe. O lea, sa mafai ai e tagata matitiva ona ofo atu ma le olioli  a latou taulaga. (Levi. 1:3, 10, 14; 5:7) Sa talia e Ieova le ofoina atu o taulaga i manu eseese. Peitaʻi, e lua mea na manaʻomia mai i tagata na ofoina atu taulaga tauofo.

6. O ā mea na manaʻomia pe a faia e se tasi se taulaga, ma aiseā na tāua ai ona utagia lenā faatulagaga?

⁶ Muamua, sa tatau ona ofoina atu e le tagata le mea sili i lana taulaga. E lē taliaina e Ieova le taulaga pe a maʻi pe manuʻa le manu. (Levi. 22:18-20) Lona lua, e tatau ona mamā le tagata e ofoina le taulaga, e pei ona faatonuina i le Tulafono. Afai e lē mamā le tagata, e tatau ona ia faia muamua a lē o le taulaga o le agasala, po o le taulaga o le nofosala ina ia maua ai le finagalo malie o Ieova. E pau lea o le auala e talia ai e Ieova lana taulaga tauofo. (Levi. 5:5, 6, 15) Sa tāua tele iā Ieova taulaga. O lea na faatonuina ai e Ieova, e tatau ona fasiotia so o se tasi e lē mamā e ʻai i se taulaga faifaatasi, lea e aofia ai ma taulaga tauofo. (Levi. 7:20, 21) Ae pe a mamā le tagata ma e leʻi ponā lana taulaga, o le a ia maua le olioli ma se lotofuatiaifo mamā.​—Faitau le 1 Nofoaiga a Tupu 29:9.

7, 8. (a) O le ā le olioli e maua mai i le faia o faataulaga mo le Malo? (e) O ā mea e mafai ona tatou faataulaga mo Ieova?

⁷ E fiafia le finagalo o Ieova i uso o loo lotomalilie e galulue mamafa mo le auaunaga. O le galue mamafa e fesoasoani i uso e maua ai le fiafia. Na faamatala e se uso lona fiafia tele ina ua galue i le fausiaina o Maota mo Sauniga, ma fesoasoani i ē na afātia i mala faalenatura. Na ia faapea mai: “Na tauia galuega fitā pe a vaaia le laufofoga fiafia ma le talisapaia e uso o Maota mo Sauniga fou, faapea fesoasoani mo ē na afātia i mala faalenatura.”

⁸ E saʻili e le vaega faalelalolagi o le faalapotopotoga a Ieova ni auala e lagolago ai le Malo. I le 1904, na faapea mai ai C. T. Russell, e tatau ona tatou faia le mea sili e faaaogā ai le taimi, tupe ma isi mea uma e faamamaluina ai Ieova. E ui i le tele o faataulaga e faia mo le auaunaga iā Ieova, peitaʻi e maua ai le  fiafia. (2 Samu. 24:21-24) Pe e mafai ona faaaogā tatau mea uma ua iā i tatou e faia ai faataulaga mo Ieova?

9. O le ā e tatou te aʻoaʻoina mai i le Luka 10:2-4, e faatatau i le faaaogāina o le taimi?

⁹ Taimi. E tele le taimi e faaalu i le faaliliuina ma le lomia o lomiga, fausia o Maota mo Sauniga ma Fonotaga, faamaopoopoina o tauaofiaga, fesoasoani i ē na aafia i mala faalenatura, ma isi galuega. Na aumaia e Iesu se taʻiala i le auala e faaaogā tatau ai le taimi, auā e na o le 24 itula o le aso. Ina ua auina atu ona soo e talaʻi, na fetalai atu ia aua neʻi “fusi ma ofo alofa atu i se tasi tou te feiloaʻi i le auala.” (Luka 10:2-4) Aiseā na avatu ai e Iesu lenā faatonuga? I faafeiloaʻiga i aso o Iesu, e lē na o le ifo atu ma faatalofa, ae aofia ai le fusi ma ifo toʻele i le palapala. E mautinoa e telē le taimi e alu ai. Peitaʻi, e leʻi faatonuina e Iesu ona soo e aua neʻi lē faaaloalo. Ae sa ia fesoasoani iā i latou e faaaogā tatau le taimi mo mea e sili ona tāua. (Efe. 5:16) Pe e mafai ona tatou faatatauina lenā taʻiala ina ia faatele ai le taimi e lagolagoina ai le Malo?

10, 11. (a) O ā nisi o auala ua faaaogā ai foaʻi tauofo? (e) O le ā le taʻiala i le 1 Korinito 16:1, 2 e mafai ona fesoasoani i le faia o foaʻi?

¹⁰ Tupe. E tele tupe e manaʻomia mo le lagolagoina o le galuega i le lalolagi aoao. E faaalu le faitau miliona i tausaga taʻitasi, e lagolago ai le galuega a ovasia matagaluega, paeonia faapito ma misionare. Talu mai le 1999, ua silia i le 24,500 Maota mo Sauniga ua fausia i atunuu e itiiti le tamaoaiga. Peitaʻi, e pe ā ma le 6,400 Maota o loo manaʻomia pea ona fausia. E lomia le 100 miliona kopi o le Olomatamata ma le Ala Mai! i masina taʻitasi. O loo lagolagoina uma nei galuega i a tatou foaʻi tauofo.

¹¹ Na faagaeeina e Ieova Paulo ina ia tusia se taʻiala i le auala e faia ai foaʻi tauofo. (Faitau le 1 Korinito 16:1, 2.) Na ia faalaeiauina uso i Korinito, e aua le faatalitali i le faaiʻuga o le vaiaso po o ā ni mea e totoe e faia ai a latou foaʻi. Peitaʻi, e tatau ona filifili i le amataga o le vaiaso le aofaʻiga e tatau ona foaʻi atu. O le auala foʻi lenā ua fuafua mamao ai e uso a latou foaʻi i aso nei. (Luka 21:1-4; Galu. 4:32-35) E tautele iā Ieova le agaga foaʻi o ona tagata.

12, 13. (a) O le ā ua taofia ai nisi mai i le faaaogāina o tomai ma le malosi i le auaunaga? (e) Ua faapefea ona fesoasoani mai Ieova iā i tatou?

¹² Tomai ma le malosi. E fesoasoani Ieova i a tatou taumafaiga e faaaogā le tomai ma le malosi i le auaunaga. Ua ia folafola mai e fesoasoani mai iā i tatou pe a itiiti lo tatou malosi. (Isa. 40:29-31) Pe e tatou te mafaufau e leai ni o tatou tomai e lagolago ai le Malo, pe e sili atu ona agavaa isi nai lo o i tatou? Ia manatua, e mafai ona fesoasoani mai Ieova e faaleleia o tatou tomai, e pei ona sa ia faia iā Oliavu ma Pesaleli.—Eso. 31:1-6; tagaʻi i le ata i luga aʻe o le mau autū.

¹³ Ua faalaeiauina e Ieova i tatou e faia le mea sili i le auaunaga. (Faata. 3:27) Ina ua toe fausia le malumalu i Ierusalema, na faatonuina e Ieova tagata Iutaia ina ia manatunatu i ni auala e lagolagosua ai i le galuega. (Ha. 1:2-5) Peitaʻi, na tosina ese o latou mafaufau, ma e leʻi faamuamuaina le galuega a Ieova i o latou olaga. O lea ia  tatou fesili ifo: ʻPo o avea le faia o le finagalo o Ieova ma mea e sili ona tāua i loʻu olaga? Pe e mafai ona faia ni fetuunaʻiga i o tatou olaga, ina ia faatele ai se sao i le lagolagoina o le Malo?’

14, 15. (a) E faapefea ona faalaeiauina i tatou i le faaaʻoaʻoga a uso i atunuu matitiva? (e) O le ā ua uunaʻia i tatou e fai?

¹⁴ E nonofo le toʻatele i nofoaga e faigatā ai le soifuaga ma taatele ai le mativa. O loo taumafai le faalapotopotoga a Ieova e fesoasoani i uso o loo nonofo i na atunuu. (2 Kori. 8:14) Peitaʻi, e oo lava i o tatou uso e lē tele ni meafaitino, e tāua iā i latou le faia o foaʻi. E fiafia le finagalo o Ieova pe a ia mātauina, o loo foaʻi ma le fiafia e na uso mea e latou te gafatia.​—2 Kori. 9:7.

¹⁵ I se tasi atunuu mativa i Aferika, e tuuesea e nisi uso se vaega o a latou togālaau ʻaina e faatau atu, ina ia maua ai tupe e faia ai a latou foaʻi mo le galuega i le lalolagi aoao. Na mananaʻo uso ma tuafāfine i lenā atunuu e fesoasoani i le fausiaina o se Maota mo Sauniga. Peitaʻi, o le vaitaimi lenā e pisi ai i le totōina o a latou faatoʻaga. E ui i lea, na latou maumauaʻi e fesoasoani i le fausiaina o le Maota mo Sauniga, ae faatoʻā galulue i a latou faatoʻaga i le afiafi. Maʻeu se agaga faataulaga na faaalia e na uso. E talitutusa i latou ma uso i Maketonia, na latou “matuā matitiva” ae na latou talosaga atu pea iā Paulo e fia faia ni a latou foaʻi. (2 Kori. 8:1-4) O lea, ia tatou foaʻi le mea e tatou te gafatia, e faaalia ai lo tatou talisapaia o faamanuiaga a Ieova mo i tatou.​—Faitau le Teuteronome 16:17.

16. E faapefea ona faamautinoa e talia e Ieova a tatou faataulaga?

¹⁶ Pe a faia faataulaga, e lē tatau ona tatou faalēano i isi mea tāua e pei o o tatou aiga. E pei o Isaraelu anamua, e tatau ona faamautinoa e talia e Ieova a tatou faataulaga. Ia manatua, e tāua le faiā a o tatou aiga ma Ieova. E lē gata i lea, o la tatou faiā foʻi ma Ieova. E lē tatau ona tatou faatalalē i le tausiga faaleagaga po o le tausiga faaletino o o tatou aiga, pe a faaalu o tatou taimi ma meafaitino e fesoasoani ai i isi. O le māfuaaga, o le a tatou foaʻi atu ai se mea e tatou te lē gafatia. (Faitau le 2 Korinito 8:12.) E lē gata i lea, e tatau ona faamalosia la tatou lava faiā ma Ieova. (1 Kori. 9:26, 27) E maua le fiafia i a tatou faataulaga, pe a tatou ola e ōgatusa ma taʻiala a le Tusi Paia. E lē gata i lea, e faamalieina i tatou i le iloaina o loo “talileleia” i tatou e Ieova.

17, 18. O ā o tatou faalogona iā i latou o loo faia faataulaga mo le Malo, ma o le ā e tatau ona tatou manatunatu i ai?

¹⁷ E faaalu ma le lē manatu faapito e le toʻatele o uso ma tuafāfine o latou taimi, malosi ma alagāʻoa e lagolagoina ai le Malo. (Fili. 2:17) E tatou te talisapaia i latou o loo faaalia le agaga faataulaga. Ia tatou talisapaia foʻi le agaga faataulaga o lo o faaalia e avā ma fanau, a i latou o loo taʻimua i le auaunaga.

¹⁸ E tele taumafaiga o loo faia e lagolagoina ai galuega o le Malo. O lea, seʻi o tatou tatalo ma manatunatu loloto pe faapefea ona tatou faia le mea sili mo Ieova. O le faia faapea, o le a tatou maua ai le tele o faamanuiaga i le taimi lenei, faapea le lumanaʻi.​—Mare. 10:28-30.