Pe na e faitauina māeʻaeʻa lomiga fou o Le Olomatamata? Seʻi vaai pe mafai ona e taliina fesili o loo mulimuli mai:

O anafea na ʻtalaʻi atu ai Iesu i agaga i le falepuipui’? (1 Pete. 3:19)

E foliga mai na talaʻi Iesu ina ua mavae lona toe faatūina mai, na ia talaʻia i nei agelu leaga le faasalaga talafeagai o le a oo iā i latou.​—6/15, itulau e 23.

O ā luʻi e tolu e faafaigatā ai ona taulau manuia le faaipoipoga a se tasi pe a toe faaipoipo?

O vala nei: e faigatā ona faagalo mea lelei sa tutupu i lau faaipoipoga muamua, e faigatā ona faamasani i uō a lau paaga ua iai, e faigatā ona maufaatuatuaina lau paaga ua iai ona o le lē faamaoni o lou toʻalua muamua.​—7/1, itulau e 9-10.

O afea e faamasino ai e Iesu tagata e pei o ni mamoe ma ʻoti? (Mata. 25:32)

Pe a afio mai Iesu e faamasino tagata a o faagasolo le puapuaga tele, pe a mavae le faaumatiaga o lotu sesē.​—7/15, itulau e 6.

O afea o le a tagiauē ma lilivau ai nifo o tagata amioleaga, o loo taʻua i le talafaatusa i le saito ma le vao leaga? (Mata. 13:36, 41, 42)

A o faagasolo le puapuaga tele, ina ua latou iloa e lē mafai ona latou sosola ese mai i le faaumatiaga.​—7/15, itulau e 13.

O anafea na faataunuu ai upu a Iesu i le pologa faamaoni ma le faautauta? (Mata. 24:45-47)

E leʻi amata ona faataunuuina i le Penetekoso 33 T.A., peitaʻi na amata ina ua mavae le 1914. O le 1919, na tofia ai e Iesu le pologa e vaavaaia le ʻaufaigaluega, po o Kerisiano uma o loo fafagaina faaleagaga.​—7/15, itulau e 21-23.

O afea e tofia ai e Iesu le pologa faamaoni e vaavaaia ana mea uma?

I le lumanaʻi a o faagasolo le puapuaga tele, pe a maua e le pologa faamaoni lo latou tofi faalelagi.​—7/15, itulau e 25.

Pe e lē o taʻua igoa o isi tagata i le Tusi Paia, ona o ni tagata leaga pe e lē tāua foʻi?

E lē tatau ona tatou manatu faapena. E lē o taʻua i le Tusi Paia igoa o nisi tagata lelei ma nisi o tagata leaga. (Ruta 4:1-3; Mata. 26:18) E na o le lua agelu faamaoni o loo taʻua igoa i le Tusi Paia.​—8/1, itulau e 10.

E ese mai i le mana o le Atua, o le ā na fesoasoani i Molimau e 230 na savavali i se savaliga umi, mai le nofoaga o faasalaga i Sachsenhausen?

E ui na aafia i latou uma i le fia aai ma faamaʻi, ae na faaauau ona faalaeiau le tasi i le isi ina ia faaauau ai pea.​—8/15, itulau e 18.

Aiseā e faalaeiauina ai i tatou i le tala e faatatau i le savalia e Isaraelu o le vaitafe o Ioritana, ina ua ō atu i le Nuu Folafolaina?

E ui i le tatafe o le vai, ae na mafai ona taofia e Ieova le vai ina ia savavali ai tagata. O lea, na faamalosia ai lo latou faatuatua ma le maufaatuatuaina o Ieova, ma e faamalosia ai foʻi i tatou i lenā tala.​—9/15, itulau e 16.

O le ā ua faamaonia mai i le faaaogāina o lanu i le Tusi Paia?

O le auala e faaaogā ai e le Tusi Paia lanu, e faailoa mai ai e silafia e le Atua e iai le aafiaga o o tatou faalogona i lanu e tatou te vaaia, ma e fesoasoani foʻi lanu iā i tatou e manatua ai mea.​—10/1, itulau e 14-15.

Ua faapefea ona faataunuu i aso nei le valoaga i le Mika 5:5 e faatatau i alo alii ma leoleo mamoe?

Ua tatou iloa o ʻleoleo mamoe e toʻafitu ma alo alii e toʻavalu’ i le Mika 5:5, e faasino atu i toeaina i faapotopotoga, lea o loo faamalosia tagata o le Atua mo se osofaʻiga ua faailoa mai, o le a oo iā i latou i le lumanaʻi.​—11/15, itulau e 20.

O ā nisi māfuaaga e tatou te manaʻomia ai le Atua?

E tatou te manaʻomia taʻiala aogā ma vaifofō o o tatou faafitauli, lea ua saunia mai e le Atua. Ua ia fesoasoani foʻi iā i tatou ina ia maua se olaga lelei ma fiafia, ma o le a ia faia faapea pe a ia faataunuu ana folafolaga o loo i lana Afioga.​—12/1, itulau e 4-6.