1, 2. O le ā le taimi na ono manatu le ʻauaposetolo e tatau ona faimalaga atu ai i Ierusalema?

ʻUA LAGI lelei le pō, ma ua vaaia foʻi le masina faatoʻā vaaia. E mautinoa na vaaia e tagata vāai i Ierusalema, le masina faatoʻā vaaia i le afiafi o le aso ua mavae. Ina ua latou logo atu i le ʻau Saniterini lenā vaaiga, ona latou faailoa lea o le amataga o le masina fou o Nisani, e ala i le faamūmū o afi i luga o mauga, pe auina atu ni avefeʻau i isi aai. E mautinoa na manaʻo Iesu e malaga atu i Ierusalema, a o leʻi oo i le aso o le Paseka.’

² Seʻi faaāta i o tatou mafaufau manatu o le ʻauaposetolo na iai faatasi ma Iesu i Perea (i le isi itu o le Ioritana), i le faigāmalaga mulimuli a Iesu i Ierusalema. (Mata. 19:1; 20:17, 29; Mare. 10:1, 32, 46) Pe a iloa le aso muamua o le masina o Nisani, ona amata tau mai lea o aso e 13 seʻia oo iā Nisani 14, lea e faia ai le Paseka pe a mavae le goto o le lā.

3. Aiseā e tāua ai le iloaina e Kerisiano o le aso e paʻū ai le Paseka?

³ E paʻū tonu lava le aso o le Talisuaga Afiafi a le Alii iā Aperila 14, 2014 pe a mavae le goto o le lā, lea e tutusa ma le aso o le Paseka. O se aso faapitoa lenā mo Kerisiano moni ma tagata fiafia, ona o mea o loo faamatalaina i le 1 Korinito 11:23-25: “I le pō a o leʻi faalataina le Alii o Iesu, na ia tago ai i le areto ma fai le faafetai, ona ia vaevaeina lea ma fai atu: ʻO le faatusa lenei o loʻu tino ou te avatu mo outou. Ia faia pea lenei mea e fai ma faamanatuga iā te aʻu.’ Na faapea foʻi ona fai i le ipu.”

4. (a) O ā fesili e ono lāgā e faatatau i le Faamanatuga? (e) E faapefea ona fua le aso e paʻū ai le Faamanatuga i tausaga taʻitasi? (Tagaʻi i le pusa  “Faamanatuga i le 2014.”)

⁴ O le Faamanatuga e na o le pau lea o le aso na faatonu e Iesu ona soo e faamanatu i tausaga taʻitasi, ma e mautinoa e tatou te fia auai ai. A o leʻi oo i le faamanatuga, ia fesili ifo: ʻE faapefea ona ou nofosauni  mo le Faamanatuga? O ā mea o le a faaaogā e faia ai le Faamanatuga? O ā taʻiala e mulimuli i ai a o faagasolo lenā sauniga? O le ā le tāua o le uaina ma le areto, faapea le Faamanatuga iā te aʻu?’

5. O ā mea na faatonuina e Iesu ona aposetolo e saunia mo le Paseka?

⁵ E leʻi finagalo Iesu e faia ni sauniuniga tetele, ina ua ia faatonuina le ʻauaposetolo e saunia se potu mo le taumafataga o le Paseka. Nai lo lea, na ia manaʻo i se potu e mamā ma talafeagai le telē mo ē na valaaulia. (Faitau le Mareko 14:12-16.) Na latou saunia mea na manaʻomia mo le taumafataga, e aofia ai falaoa e lē faafefeteina ma le uaina mūmū. Ina ua māeʻa le taumafataga o le Paseka, ona fetalai lea o Iesu e faatatau i le areto ma le uaina. O mea ia na faaaogā e fai ai le Faamanatuga.

6. (a) Ina ua māeʻa le taumafataga o le Paseka, o le ā na fetalai i ai Iesu e faatatau i le areto? (e) O le ā le ituaiga o areto e faaaogā i le Faamanatuga?

⁶ Na iai le aposetolo o Mataio i lenā afiafi. Na ia tusi e faapea: “Ona tago lea o Iesu i le areto, ua faia le faafetai, ona ia vaevae lea ma avatu i ona soo, ma faapea atu: ʻIa outou aai.’” (Mata. 26:26) Sa faaaogā le “areto” po o le falaoa e lē faafefeteina, lea sa faaaogā foʻi i le Paseka. (Eso. 12:8; Teu. 16:3) Na faia le areto i le falaoamata enaena ma le vai. E leai se mea faafefete, se masima po o se isi lava mea e faaopoopo i ai, ma e manutinuti foʻi. I aso nei, a o leʻi oo i le Faamanatuga, e ono talosagaina e toeaina o le faapotopotoga se tasi e saunia le areto e faia i le falaoamata enaena ma le vai, ona tao lea i se apa ua faagaʻo i sina gaʻo itiiti. (Afai e lē maua le falaoamata enaena, e ono faaaogā le falaoamata e maua mai i le araisa, karite, saga po o se fatu e talitutusa ma le saito.) E ono faaaogā foʻi le masi e lē faafefeteina (matzoth) lea e faaaogā e tagata Iutaia, e lē avea i ai se molo, fuāmoa po o se aniani.

7. (a) O le ā sa i totonu o le ipu na faaaogā e Iesu i le Talisuaga Afiafi a le Alii? (e) O le ā le ituaiga o uaina e faaaogā i le Faamanatuga?

⁷ Na faapea atili mai Mataio: “Ua ia [Iesu] tago foʻi i le ipu, ua faia le faafetai, ma avatu iā i latou, ua faapea atu: ʻInā inu  ia outou uma i ai.’” (Mata. 26:27, 28) Na iai le uaina mūmū i le ipu na faaaogā e Iesu. (E lē o se sua fou o vine, auā ua leva ona mavae le taimi o le seleselega.) E leʻi faaaogāina le uaina i le uluaʻi taumafataga o le Paseka i Aikupito. Peitaʻi, e leʻi teena e Iesu le faaaogāina o le uaina i le Paseka, lea sa ia faaaogā foʻi i le Talisuaga Afiafi a le Alii. E faaaogā foʻi e Kerisiano le uaina i le Faamanatuga. E lelei atoatoa le toto o Iesu. O lea, e lē manaʻomia ai ona suia pe filogia le uaina e faaaogā i le Faamanatuga. E mafai foʻi ona faaaogā se uaina mūmū mai i le faleoloa e pei o le Beaujolais, Burgundy, po o le Chianti.

8. Aiseā e naunau ai Kerisiano e iloa le uiga o le areto ma le uaina?

⁸ Na taʻua manino e Paulo, e tatau foʻi i Kerisiano uma ona faamanatu le Talisuaga Afiafi a le Alii. Na tusi Paulo i uso i Korinito e faapea: “Ua ou maua mai i le Alii le mea na ou tuuina atu foʻi iā te outou, . . . na ia [Iesu] tago ai i le areto ma fai le faafetai, ona ia vaevaeina lea ma fai atu: ʻO le faatusa lenei o loʻu tino ou te avatu mo outou. Ia faia pea lenei mea e fai ma faamanatuga iā te aʻu.’” (1 Kori. 11:23, 24) Talu ai na faatonuina Kerisiano e faia le Faamanatuga i tausaga taʻitasi, o lea e tatou te naunau ai e iloa le uiga o le areto ma le uaina.

9. O le ā le talitonuga sesē o nisi e faatatau i le areto na faaaogā e Iesu?

⁹ E manatu nisi tagata lotu, na fetalai moni Iesu: ʻO loʻu tino lenei.’ O lea, e latou te talitonu ai na faavavega ona liua le tino o Iesu e avea ma areto. Peitaʻi, e lē o le mea lenā na tupu, auā na iai i luma o Iesu ma ona aposetolo faamaoni le areto. * E manino mai, na fetalai Iesu o le areto o le faatusa lea o lona tino, ma sa masani ona  faaaogā e Iesu faatusatusaga faapena pe a aʻoaʻo atu.​—Ioa. 2:19-21; 4:13, 14; 10:7; 15:1.

10. O le ā e faaāta mai i le areto lea e faaaogā i le Faamanatuga?

¹⁰ O le areto sa i luma o le ʻauaposetolo, o le faatusa o le tino o Iesu. I se tasi taimi, na manatu Kerisiano o loo faasino atu le areto i le faapotopotoga o Kerisiano faauuina, e pei ona taʻua i le Tusi Paia o le “tino o Keriso.” O lo latou talitonuga lenā, ona sa vaevae e Iesu le areto i vaega, ae e leʻi gauia ona lava ivi. (Efe. 4:12; Roma 12:4, 5; 1 Kori. 10:16, 17; 12:27) Peitaʻi, ina ua māeʻa ni saʻiliʻiliga loloto, na latou iloa ai o le areto e faaāta mai ai le tino o Iesu. E masani ona taʻua i le Tusi Paia na “mafatia Keriso i le tino,” lea na oo lava ina fasiotia ai i le laau e faapuapuagatia ai. O lea, o le areto e faaaogā i le Faamanatuga, e faaāta mai ai le tino o Iesu na faataulagaina mo a tatou agasala.​—1 Pete. 2:21-24; 4:1; Ioa. 19:33-36; Epe. 10:5-7.

11, 12. (a) O le ā le fetalaiga a Iesu e faatatau i le uaina? (e) O le ā e faaāta mai e le uaina e faaaogā i le Faamanatuga?

¹¹ O le iloaina o le mea o loo faaāta mai e le areto, e fesoasoani iā i tatou e malamalama ai i le uiga o le fetalaiga a Iesu e faatatau i le uaina. Ua taʻua i le 1 Korinito 11:25: “Na faapea foʻi ona fai i le ipu ina ua uma le talisuaga afiafi, ona ia faapea atu lea: ʻO lenei ipu, o le faatusa lea o le feagaiga fou e ala i loʻu toto.’” E talitutusa faamatalaga a le tele o isi Tusi Paia ma le faaliliuga o le Tusi Paia Samoa i le 1969 e faapea: “O lenei ipu o le feagaiga fou o loʻu toto.” (O upu matamatatetele e ā matou.) Pe na faasino atu le feagaiga fou i le ipu na uuina e Iesu? E leai, na faasino atu i le uaina sa i totonu o le ipu. Na fetalai Iesu o le uaina e faaāta mai ai lona toto, lea o le a faamaligiina.

¹² Na fetalai Iesu: “O le faatusa lenei o loʻu ʻtoto o le feagaiga,’ o le a faamaligiina mo tagata e toʻatele.” (Mare. 14:24) Ae i le Mataio 26:28, o loo taʻua ai le toto o Iesu o le a “faamaligiina mo tagata e toʻatele e faamagalo ai agasala.” O lea, o le uaina mūmū e faaāta mai ai le toto o Iesu. O lona toto e saunia ai le togiola, lea e mafai ona faamagaloina ai a tatou agasala.​—Faitau le Efeso 1:7.

13. Faamatala le auala e faamanatu ai le maliu o Keriso i tausaga taʻitasi.

¹³ O le ā e te faatalitalia, pe a e auai i le Faamanatuga a Molimau a Ieova mo le uluaʻi taimi? E faia le Faamanatuga i se nofoaga faigofie, mamā ma talafeagai le telē mo tagata uma o le a auai. Atonu o le a iai ni teu fugālaau ma e lē teuanoaʻi e pei o se faiga patī. O le a faia e se toeaina agavaa se lauga faale-Tusi Paia i se auala manino ma faaaloalo, mo le Talisuaga Afiafi a le Alii. O le a ia faamatala atu na maliu Iesu e fai ma taulaga, ina ia tatou maua ai le ola.​—Faitau le Roma 5:8-10.

14. O ā faamoemoe e lua o le a faamatala e le failauga i le taimi o le Faamanatuga?

¹⁴ E faailoa atu e le failauga faamoemoe e lua o loo faamatalaina i le Tusi Paia. O se tasi o na faamoemoe, o le maua lea o le avanoa e pule faatasi ai ma Iesu i le lagi. Ua na o se vaega toʻaitiiti o Kerisiano e pei o aposetolo faamaoni o Iesu, e latou te mauaina lenā faamoemoe. (Luka 12:32; 22:19, 20; Faaa. 14:1) O le toʻatele o Kerisiano faamaoni, e latou te mauaina le isi faamoemoe o le ola e faavavau i le lalolagi parataiso. Pe a taunuu lenā faamoemoe, ona faataunuu loa lea o le finagalo o le Atua i le lalolagi, lea e masani ona tatalo i ai Kerisiano. (Mata. 6:10) O loo faamatalaina i le Tusi Paia le olaga fiafia o le a maua e Kerisiano e oo i le faavavau.​—Isa. 11:6-9; 35:5, 6; 65:21-23.

15, 16. O le ā e faia i le areto i le taimi o le Faamanatuga?

 ¹⁵ Pe a māeʻa ona faamatala faamoemoe e lua, ona faailoa atu lea e le failauga ua oo i le taimi e faia ai le gaoioiga sa faia e Iesu i le Talisuaga Afiafi a le Alii. O loo i ona autafa se laulau o loo iai le areto e lē faafefeteina ma le uaina mūmū. E faitau e le failauga se mau faale-Tusi Paia e faamatala ai le gaoioiga na faia e Iesu i le areto. E ono faitau le Mataio 26:26: “Ona tago lea o Iesu i le areto, ua faia le faafetai, ona ia vaevae lea ma avatu i ona soo, ma faapea atu: ʻIa outou aai. Auā o le faatusa lenei o loʻu tino.’” Na vaevae e Iesu le areto ona tufa atu lea i nisi o ona aposetolo. I le Faamanatuga iā Aperila 14, o le a e vaaia ai le faaaogāina o le areto i lenā sauniga.

¹⁶ E muaʻi faia e se uso se tatalo puupuu a o leʻi tufaina atu le areto. Ia lava ipu e faaaogā e tufa ai le areto, ina ia faasaoina ai le taimi ma faia ai i se auala maopoopo. E leai ni tū faapitoa e faia i le taimi e tufa ai le areto. E pei lava o le Faamanatuga i le tausaga ua mavae, o nisi faapotopotoga e toʻaitiiti pe leai foʻi se tasi e taumafaina le areto.

17. E faapefea ona tatou mulimuli i le faaaʻoaʻoga a Iesu i le tufaina o le uaina?

¹⁷ E faitauina foʻi e le failauga le gaoioiga na faia e Iesu i le uaina: “Ua ia tago foʻi i le ipu, ua faia le faafetai, ma avatu iā i latou, ua faapea atu: ʻInā inu ia outou uma i ai; auā o le faatusa lenei o loʻu toto o le “toto o le feagaiga,” e faamaligiina mo tagata e toʻatele e faamagalo ai agasala.’” (Mata. 26:27, 28) E faia se isi tatalo ona tufa atu lea o le uaina mūmū e pei ona sa faia e Iesu.

18. Aiseā e tāua ai ona tatou auai pea i le Faamanatuga, e tusa pe toʻaitiiti pe leai foʻi se tasi e taumafaina le areto ma le uaina?

¹⁸ E na o i latou o le a pule faatasi ma Iesu i le lagi, o le a taumafaina le areto ma le uaina. O lea, o le toʻatele e auai i le Faamanatuga, o le a na o le maimoaina o le areto ma le uaina a o tufaina atu. (Faitau le Luka 22:28-30; 2 Timo. 4:18) E ui e lē taumafaina e le toʻatele o Kerisiano le areto ma le uaina, ae e tāua ona auai pea i le Faamanatuga, e faailoa ai lo latou matuā faatāuaina o le taulaga a Iesu. A o faia le Faamanatuga, e latou te manatunatu i faamanuiaga ua mafai ona maua mai i le taulaga a Iesu. O se faataʻitaʻiga, o le faamoemoe o le avea ma vaega o le “motu o tagata e toʻatele,” o le a faasaoina mai i le “puapuaga tele.” O le faatuatua i le taulaga togiola a Iesu, o le a silasila ai le Atua iā i latou o ni ē amiotonu e pei “ua tatā o latou ofu talaloa, ma faapaʻepaʻeina i le toto o le Tamaʻi Mamoe.”​—Faaa. 7:9, 14-17.

19. O le ā e tatou te faia ina ia sauniuni ma maua ai aogā mai le Faamanatuga?

¹⁹ E faapefea ona sauniuni Molimau a Ieova i le lalolagi aoao mo le Faamanatuga? I nai vaiaso a o lumanaʻi le Faamanatuga, e tatou te valaaulia le toʻatele e mafai ai ina ia auai. E tatou te faitauina foʻi le Tusi Paia i nai aso a o leʻi oo i lenā sauniga faapitoa, e faatatau i gaoioiga na faia e Iesu ma mea na tutupu a o leʻi oo i le Talisuaga Afiafi a le Alii i le 33 T.A. Ia sauniuni mamao ina ia mafai ona auai i le Faamanatuga. Ia vave ona taunuu i le maota e faia ai le sauniga e faafeiloaʻi le ʻauvalaaulia, ma ia auai i le sauniga atoa. O le a tatou maua faatasi ma le ʻauvalaaulia aogā, pe a mulimuli i le Tusi Paia a o faitau ma faamatalaina e le failauga mau o le a faaaogā. Ae sili atu i lenā, o le auai i le Faamanatuga, e faailoa atu ai lo tatou talisapaia loloto o le taulaga a Iesu, ma usiusitaʻi i lana faatonuga: “Ia ​faia pea lenei mea e fai ma faamanatuga iā te aʻu.”​—1 Kori. 11:24.