1. O ā avanoa lelei ua maua e le toʻatele o talavou?

UA TATOU ola nei i se vaitaimi mataʻina. E leai lava se isi taimi i le talafaasolopito, ua sili ai ona lolofi mai le faitau miliona mai i atunuu uma i le tapuaʻiga moni. (Faaa. 7:9, 10) Ua fiafia le toʻatele o talavou e valaaulia isi e “ave fua le vai o le ola.” (Faaa. 22:17) O loo fesoasoani nei talavou i tagata e suʻesuʻe le Tusi Paia ma faaleleia o latou olaga. Ua talia e nisi talavou le avanoa e aʻoaʻo ai se gagana fou, ma faalauiloa atu le tala lelei i oganuu e ese gagana e tautatala ai. (Sala. 110:3; Isa. 52:7) E faapefea ona faia sou sao i lenei galuega e maua ai le faamalieina?

2. E faapefea i le faaaʻoaʻoga a Timoteo ona faaalia ai e finagalo Ieova e faasafua atu tiute tauave i talavou? (Tagaʻi i le ata i luga aʻe o le matua.)

² Talavou, e mafai ona e faia filifiliga tāua i le taimi lenei, ina ia maua ai avanoa e faalautele ai lau auaunaga. O se faaaʻoaʻoga, na faia e Timoteo filifiliga lelei. Atonu ina ua lata i le 20 o ona tausaga pe e sili atu, ae ua agavaa o ia e avea ma misionare. (Galu. 16:1-3) Atonu i ni nai masina mulimuli ane, na talosaga atu ai Paulo iā Timoteo ina ia malaga atu i le faapotopotoga fou i Tesalonia, lea na matuā sauāina ai uso. Na faamalosia Paulo ina ia tuua Tesalonia, ae na ia maufaatuatuaina Timoteo e faamalosiau i uso i inā. (Galu. 17:5-15; 1 Tesa. 3:1, 2, 6) Seʻi manatu i le fiafia tele o Timoteo ina ua ia maua lenā faaeaga.

3. O le ā le filifiliga e sili ona tāua i le olaga, ma o le ā le taimi e tatau ona faia ai lenā filifiliga?

³ O le taimi lenei e faia ai filifiliga e sili ona tāua a o e talavou. O le auauna iā Ieova, o le filifiliga lenā e sili ona tāua. O le ā le taimi e sili ona lelei e faia ai lenā filifiliga? Na fetalai mai Ieova: “Ia e manatua o Lē e Sili na Foafoaina oe i aso o lou tauleʻaleʻa.” (Fai. 12:1) E pau le auala e manatua ai Ieova o le auauna iā te ia ma lou lotoatoa. (Teu. 10:12) O le filifiliga sili lenā, auā e aafia ai lou olaga atoa.​—Sala. 71:5.

4. O ā filifiliga tāua e aafia ai le auala e te auauna ai i le Atua?

⁴ O le mea moni, e lē na o le filifiliga e auauna iā Ieova e aafia ai lou lumanaʻi. E manaʻomia foʻi ona filifili lau galuega, filifili pe e te faaipoipo, ma o ai e te faaipoipo i ai. E ui e tāua nei filifiliga, ae e atamai ona e filifili muamua e auauna iā Ieova ma lou lotoatoa. (Teu. 30:19, 20) Aiseā? Talu ai o nei filifiliga uma e iai le fesootaʻiga. E aafia le auala e te auauna ai i le Atua, i lau filifiliga i le faaipoipoga ma le galuega. O lou faanaunauga e auauna i le Atua, e aafia ai foʻi au filifiliga e faatatau i le faaipoipoga ma le galuega. (Faatusatusa i le Luka 14:16-20.) O lea, ia filifili mea e sili ona tāua i lou olaga.​—Fili. 1:10.

5, 6. Ia faataʻitaʻi pe faapefea i le faia o filifiliga saʻo ona maua ai avanoa e faalautele ai le auaunaga. (Tagaʻi i le mataupu “O Laʻu Filifiliga a o Tamaitiiti” o loo i lenei lomiga.)

⁵ Pe a e filifili e auauna iā Ieova, ia manatunatu i mea o loo ia faafinagaloina, ona filifili lea o le auala e te auauna ai iā te ia. Na tusi se uso mai i Iapani e faapea: “I le 14 o oʻu tausaga, na ma talaʻi faatasi ai ma se toeaina o le faapotopotoga na ia mātauina le leai o soʻu naunau i le talaʻiga. Na ia faapea mai ma le agalelei: ʻYuichiro, ia alu i le fale, nofo i lalo ma mafaufau lelei i mea ua faia e Ieova mo oe.’ Na ou faia faapea. O le mea moni, na faaauau ona ou mafaufau ma tatalo mo ni nai aso. Na faasolosolo ina suia oʻu faalogona. E leʻi umi ae oʻu iloaina, ou te maua le fiafia i le auauna iā Ieova. Sa ou fiafia e faitau i tala e faatatau i misionare. O lea, na amata ai ona ou mafaufau e auauna i le Atua ma le lotoatoa.”

⁶ Na amata ona faia e Yuichiro filifiliga lelei, ma mulimuli ane auauna iā Ieova i se isi atunuu. Na ia taʻua: “O se faataʻitaʻiga, na ou filifili e aʻoaʻoina le gagana Peretania. Ina ua uma laʻu aʻoga, ona ou filifilia lea o se galuega faavaitaimi e aʻoaʻo ai isi i le gagana Peretania, ina ia mafai ai ona ou paeonia. I le 20 o oʻu tausaga, na amata ai ona ou aʻoaʻoina le gagana Mongolia, ma maua le avanoa e asiasi ai i se vaega o tagata talaʻi Mongolia. I le lua tausaga mulimuli ane ai i le 2007, na ou asiasi ai i Mongolia. A o oʻu talaʻi faatasi ma nisi o paeonia, na ou mātauina ai le naunau o le toʻatele e saʻilia le upu moni, ma na ou naunau ai loa ou te galue ai i inā. Na ou toe foʻi i Iapani e faamautū aʻu fuafuaga, ma na amata ona ou paeonia i Mongolia iā Aperila i le 2008. E lē faigofie le olaga i inei. Peitaʻi, o loo talia e tagata le tala lelei, ma ua mafai ona ou fesoasoani iā i latou e faalatalata atu iā Ieova. Ua ou iloa o le olaga sili lea ua ou filifilia.”

7. O ā filifiliga e tatau ona faia e le tagata lava ia, ma o le ā e tatou te aʻoaʻoina mai iā Mose?

⁷ E tatau ona e faia au lava filifiliga pe faapefea ona faaaogā lou olaga e auauna ai iā Ieova. (Iosua 24:15) E lē mafai ona matou faapea atu iā te oe pe e tatau ona e faaipoipo, o ai e te faaipoipo i ai ma o le ā foʻi le galuega e tatau ona e saʻilia. Po o le a e filifilia se galuega e itiiti ni toleniga e manaʻomia? E nonofo nisi talavou Kerisiano i nuu matitiva, ae nonofo nisi i aai e tele ai le tamaoaiga. E matuā eseese foʻi uiga, agavaa,  poto masani, o mea e fiafia ai, ma sini faaleagaga. E eseese tulaga o talavou i aso nei, e pei ona eseese tulaga o talavou Eperu sa i Aikupito ma le tulaga o Mose. Na matuā tele le tamaoaiga na maua e Mose, ae o isi talavou Eperu sa avea ma pologa. (Eso. 1:13, 14; Galu. 7:21, 22) Sa latou ola i se vaitaimi mataʻina e pei foʻi o oe i le taimi lenei. (Eso. 19:4-6) Peitaʻi, na filifili le tagata lava ia pe auauna ma le lotoatoa iā Ieova pe leai. Na faia e Mose le filifiliga saʻo ina ia faia ai le finagalo o Ieova.​—Faitau le Eperu 11:24-27.

8. O ā fesoasoani ua maua e talavou ina ia faia ai filifiliga atamai?

⁸ Ua saunia e Ieova fautuaga e fesoasoani iā te oe i le faia o filifiliga atamai. Ua ia aʻoaʻoina oe i mataupu silisili o le Tusi Paia e mafai ona e faatatauina, e tusa po o le ā lou tulaga. (Sala. 32:8) Pe afai e te lē o mautonu i le auala e faatatau ai na taʻiala, ia fesili atu i ou mātua po o toeaina mo le fesoasoani. (Faata. 1:8, 9) Seʻi o tatou iloiloina ni taʻiala faale-Tusi Paia se tolu, e mafai ona fesoasoani iā te oe e faia ai filifiliga atamai.

9. (a) Ua faapefea ona faamamaluina e Ieova talavou, i le tuuina i ai o le saʻolotoga e filifili ai? (e) O ā avanoa e te mauaina pe a saʻili muamua le Malo?

⁹ Ia saʻili muamua le Malo ma le amiotonu a le Atua. (Faitau le Mataio 6:19-21, 24-26, 31-34.) Ua faamamaluina e Ieova talavou e ala i le tuuina atu iā i latou o le saʻolotoga e filifili ai. E lē o faapea mai Ieova e tatau ona faaalu uma lou taimi i le talaʻiga. Peitaʻi, ua aʻoaʻoina e Iesu i tatou i le tāua o le saʻili muamua o le Malo o le Atua. E tele avanoa e te maua pe a e saʻilia muamua le Malo. O se faataʻitaʻiga, o le a e maua le tele o avanoa e faailoa ai lou alofa mo Ieova ma ou tuaoi, faapea lou talisapaia o le faamoemoe o le ola e faavavau. Po o atagia mai i au filifiliga e faatatau i le faaipoipoga ma le galuega, e sili atu ona tāua iā te oe au meafaitino nai lo o le “saʻili muamua [o] le malo ma le amiotonu a le Atua”?

10. Na faapefea ona maua e Iesu le fiafia, ma o le ā e tatau ona e faia ina ia maua ai le fiafia?

¹⁰ E maua le fiafia i le auauna atu i isi. (Faitau le Galuega 20:20, 21, 24, 35.) O se tasi lea o taʻiala o le olaga, ma sa silafia e Iesu lenā vala. O lea, na ia auauna ai i lona Tamā e ala i le faia o lona finagalo, ma auauna atu i isi e ala i le aʻoaʻoina o i latou i le tala lelei. O le faia faapea na ia maua ai le fiafia. (Luka 10:21; Ioa. 4:34) Atonu e faapena foʻi lou fiafia pe a e auauna atu i isi. O lea, ia faavae au filifiliga i taʻiala na aʻoaʻo mai e Iesu. O le faia faapea o le a e maua ai le fiafia ma faafiafiaina ai foʻi Ieova.​—Faata. 27:11.

11. Aiseā na mou atu ai le fiafia o Paruka, ma o le ā le fautuaga na avatu e Ieova iā te ia?

¹¹ E sili atu le fiafia e maua mai i le auauna iā Ieova. (Faata. 16:20) Na iai le taimi na mou atu ai le fiafia o Paruka le failautusi a Ieremia, ina ua faasili i lona mafaufau mea na ia manaʻo ai nai lo o le finagalo o Ieova. O lea, na fetalai atu ai Ieova iā Paruka, ina ia aua neʻi “saʻilia pea mea tetele” mo ia lava. Sa faapefea ona ono maua e Paruka le fiafia? Po o le faia o le mea na ia manaʻo iai ma faaumatia, po o le faia o le finagalo o Ieova ma faasaoina ai mai i le faaumatiaga? (Iako. 1:12) O le usitaʻi o Paruka na faasaoina ai o ia mai i le faaumatiaga o Ierusalema.​—Iere. 45:3, 5.

12. O le ā le filifiliga na faia e Ramiro na ia maua ai le fiafia?

¹² Na maua e Ramiro le fiafia i le auauna atu i isi. Na ia faapea mai: “Na ou ola aʻe i se aiga mativa i se nuu i Polivia i atumauga o Andes. Sa ou maua se avanoa e lē aumaua, ina ua ofo mai loʻu uso matua o le a ia faatupeina laʻu aʻoga i le iunivesite. Peitaʻi, ua faatoʻā uma lava ona ou papatiso,  ma sa valaaulia aʻu e se paeonia e ma te talaʻi faatasi i se aai laʻitiiti. Na ou malaga atu i inā ma ou aʻoaʻoina ai le auala e ʻoti ai ulu, ma tatala ai se fale ʻoti ulu e lagolagoina ai laʻu auaunaga.” Sa talia e le toʻatele o tagata i lenā aai ni suʻesuʻega faale-Tusi Paia. Mulimuli ane, na faavae ai se faapotopotoga fou i le gagana a lenā vaipanoa. O lea, na ia filifili ai e galue i lenā faapotopotoga, ma ua sefulu nei tausaga o ia auauna i le auaunaga faataimi atoa i inā. Na ia faapea mai, e leai se isi galuega e mafai ona ia maua ai le fiafia, nai lo o le fesoasoani i tagata e aʻoaʻoina le Tusi Paia i a latou lava gagana.

13. Aiseā e sili ai ona lelei le taimi o le talavou e auauna ai iā Ieova ma le lotoatoa?

¹³ Ia maua le fiafia i le auaunaga iā Ieova a o talavou. (Faitau le Failauga 12:1.) Aua neʻi e manatu e tatau ona maua muamua sau galuega lelei, ona e amata ai lea i le auaunaga paeonia. A o talavou, o le taimi lelei lenā e amata ai ona auauna ma le lotoatoa iā Ieova, a o leʻi tele ni tiute tauave faaleaiga. E lē gata i lea, o loo e maua foʻi le malosi ma lelei le soifua mālōlōina e taulima ai faaeaga faigatā. O le ā se mea e te manaʻo e fai mo Ieova? Atonu o lou sini ia paeonia, po o le talaʻi atu i tagata i oganuu maotua. Pe atonu e mafai ona e faia nisi mea e sili atu e auauna ai i lau faapotopotoga. Po o le ā lava lou sini, e manaʻomia ona iai se galuega e lagolagoina ai lau auaunaga. Ia fesili ifo iā te oe lava: ʻO le ā se galuega ou te filifilia, ma o le ā le tele o le taimi e manaʻomia ina ia agavaa mo lenā galuega?’

14. O le ā e tatau ona e faaeteete i ai pe a saʻilia se galuega?

¹⁴ O taʻiala faale-Tusi Paia na tatou talanoaina, o le a fesoasoani iā te oe e filifilia ai  se galuega e talafeagai. Atonu e te iloa mai i lou faiaʻoga, o au uō po o faasalalauga i le nusipepa ni galuega o loo iai i le nofoaga o loo e nofo ai, po o se isi vaipanoa o loo e fia auauna ai. Atonu e mafai ona fesoasoani nei tagata iā te oe, peitaʻi e tatau ona e faaeteete. O tagata e lē alolofa iā Ieova, e latou te ono taumafai e totō i lou loto le manaʻo i le lalolagi. (1 Ioa. 2:15-17) Aua neʻi galo, e faigofie lava ona faasesēina oe i mea o loo ofoina mai e le lalolagi.​—Faitau le Faataoto 14:15; Iere. 17:9.

15, 16. O ai e mafai ona avatuina iā te oe fautuaga atamai e faatatau i galuega?

¹⁵ O le taimi lava e te iloa ai se galuega e mafai ona e faigaluega ai, o le taimi foʻi lenā e te manaʻomia ai ni fautuaga aogā. (Faata. 1:5) O ai e mafai ona fesoasoani iā te oe e faaaogā taʻiala faale-Tusi Paia e filifilia ai se galuega? Ia faalogo i tagata e alolofa iā te oe ma Ieova, ma malamalama lelei iā te oe ma lou tulaga. O le a latou fesoasoani iā te oe e iloilo po o le ā le ituaiga galuega e talafeagai ma oe, ma le uunaʻiga e te fia faigaluega ai. Atonu o a latou fautuaga o le a fesoasoani iā te oe e toe mafaufau ai i ou sini. E mafai ona telē se fesoasoani a ou mātua iā te oe, pe afai e alolofa iā Ieova. E mafai foʻi ona fesoasoani iā te oe fautuaga lelei a toeaina i le faapotopotoga. Ia fesili atu foʻi i paeonia po o ovasia femalagaaʻi. Aiseā na latou filifili ai e auai i le auaunaga faataimi atoa? Na faapefea ona amata la latou auaunaga paeonia? O le ā se galuega na latou faia e lagolagoina ai la latou auaunaga? O ā ni faamanuiaga ua latou mauaina?​—Faata. 15:22.

¹⁶ E avatu e i latou e malamalama lelei iā te oe fautuaga atamai. O se faataʻitaʻiga, ua e lē toe fia aʻoga ae amata ona paeonia, ona e te lē fiafia i le tele o meaaʻoga faigatā. E faigofie ona iloa e le tagata e alofa iā te oe, le pogai ua e lē toe fia aʻoga ai. O le a ia fesoasoani iā te oe e malamalama, e tāua ona faaauau pea le aʻoga auā o le a aʻoaʻoina ai oe ia aua le fiugofie. E tāua lenā uiga pe afai e te manaʻo e auauna iā Ieova e faavavau.​—Sala. 141:5; Faata. 6:6-10.

17. O le ā le ituaiga o galuega e tatau ona e ʻalofia?

¹⁷ E fesagaʻia e auauna a Ieova tulaga e mafai ona faavaivaia ai lo latou faatuatua, ma tafetafea ese ai mai iā Ieova. (1 Kori. 15:33; Kolo. 2:8) Atonu e iai isi galuega e sili atu ai ona lamatia lou faatuatua nai lo o isi galuega. Atonu ua e mātauina nisi ua ʻfaavaatuʻia lo latou faatuatua,’ ona o se ituaiga o galuega na latou filifilia. (1 Timo. 1:19) E atamai ona ʻalofia so o se ituaiga o galuega e mafai ona faaleagaina ai lau faiā ma Ieova.​—Faata. 22:3.

18, 19. O le ā e mafai ona e faia pe afai e te leʻi mafaufau e faalautele lau auaunaga iā Ieova?

¹⁸ Pe afai o lou faanaunauga moni lava e auauna iā Ieova, ia faaaogā lelei avanoa ua Ia tuuina mai a o e talavou pea. Ia faia filifiliga e te maua ai le avanoa e auauna ai i le Atua i lenei taimi e sili ona tāua.​—Sala. 148:12, 13.

¹⁹ Ae faapefea pe afai e te leʻi mafaufau e faalautele lau auaunaga iā Ieova? Aua le faavaivai ae taumafai e atiaʻe se faatuatua malosi iā Ieova. Na faamatala e Paulo taumafaiga na ia faia ina ia maua ai faamanuiaga a Ieova. Na ia taʻua: “Afai foʻi e ese so outou manatu i se isi mea, e faaalia lava e le Atua le manatu saʻo iā te outou. O lea la, po o le ā lava le tele o lo tatou agaʻigaʻi i luma, ae seʻi o tatou faaauau ona savavali ma le maopoopo e tusa ma lea lava masani.” (Fili. 3:15, 16) Ia manatua e alofa Ieova iā te oe, ma e sili atu ona lelei ana fautuaga. Ia faataga Ieova e fesoasoani iā te oe e faia le filifiliga sili i le taimi lenei a o e talavou.