NA FAATEʻIA se fafine mativa ua oti lana tane, a o ia fusiina lana tama e toʻatasi. E leʻi leva talu ona ia fusiina le tino oti o lana tama. Peitaʻi, o lea ua ia vaai atu ua toe faatūina o ia ma sagisagi fiafia mai. Na faapea atu lana mālō iā te ia, “tagaʻi o lea ua ola lau tama.”

Ua toetoe 3,000 tausaga ua mavae talu ona tupu lenā toetū, ma e mafai ona e faitau iai i le 1 Tupu mataupu e 17. O le mālō a le fafine o le perofeta a le Atua o Elia, ma o lenei fafine ua oti lana tane e nofo i le aai o Sarefata. O le toetū mai o lana tama, o se tasi o mea na faamalosia ai lona faatuatua, ma o le a tatou aʻoaʻoina mai ai ni lesona tāua.

Na finagalo Ieova e faaoo se lāmala umi i le taimi o le nofoaiga a Aapo, le tupu leaga o Isaraelu. Ina ua māeʻa ona faasilasila atu e Elia le lāmala, ona faalafi lea e le Atua Elia mai iā Aapo, ma fafagaina faavavega le perofeta i falaoa ma aano o manu na auina atu e oreva. Mulimuli ane, na fetalai atu Ieova iā Elia: “Inā tulaʻi ia, ma alu atu i Sarefata o le aai o Saitonu, ma e nofo ai i inā. Faauta! ou te poloaʻi atu i se fafine ua oti lana tane o i inā, e saunia mo oe se meaʻai.”​—1 Tu. 17:1-9.

Ina ua taunuu Elia i Sarefata, na ia iloa atu se fafine mativa ua oti lana tane o loo fai fafie. Po o ia lea o le fafine o le a saunia meaʻai mo le perofeta? E faapefea ona ia faia faapea ae o ia o se tagata mativa? E ui i ni atugaluga atonu sa iai iā Elia, ae na ia faapea atu i le fafine: “Inā aumai ia sina ipu vai seʻi oʻu inu ai.” A o ia agaʻi atu e aumai se vai, na toe faapea atu Elia: “Faamolemole, seʻi uu mai lava ma sina fasi falaoa ma aʻu.” (1 Tu. 17:10, 11) Sa faigofie i le fafine ona avatu se vai i lenei tagata ese nai lo o se falaoa.

 Na tali mai le fafine: “O loo soifua Ieova lou Atua, e leai saʻu falaoa lapotopoto, ua na o se luuga o falaoamata o loo i le fagu lapoʻa, ma sina suāuu o loo i le fagu laʻitiiti; o lea ou te sau e fai atu ni nai fafie, e sauni ai se mea mo i maʻua ma laʻu tama, e ma te aai ai ona ma oti ai lea.” (1 Tu. 17:12) Seʻi o tatou iloiloina le talanoaga a Elia ma lenei fafine.

Na mātauina e lenei fafine o Elia o se tagata Isaraelu e mataʻu i le Atua. E faamaonia lenā i ana upu “o loo soifua Ieova lou Atua.” E foliga mai sa itiiti sona malamalamaga i le Atua o Isaraelu, ae e leʻi matuā talitonu iā te ia auā na ia faapea atu iā Elia o “lou Atua.” Sa nofo o ia i Sarefata, o “se aai” sa ola faalagolago i le aai o Saitonu i le vaipanoa o Foinie. Sa nofoia Sarefata e tagata e tapuaʻi iā Paala. E ui i lea, na mātauina e Ieova se mea lelei i lenei fafine ua oti lana tane.

E ui na siʻomia lenei fafine mativa e tagata ifo i tupua, ae sa ia faaalia le faatuatua. Na auina atu e Ieova Elia e fesoasoani i le fafine, ma fesoasoani foʻi lenei fafine i le perofeta. E mafai ona tatou aʻoaʻoina se lesona tāua mai i lenei mea.

E lē o tagata uma i Sarefata na tapuaʻi iā Paala, e matuā leaga lava. O le auina atu o Elia i lenei fafine, e faaalia ai le naunau o Ieova i tagata taʻitoʻatasi e lē o auauna iā te Ia, ae iai ni uunaʻiga lelei. O lea, “o lē e mataʻu iā te ia [Atua] i nuu uma lava, ma fai le amiotonu, e talia e ia.”​—Galu. 10:35.

E toʻafia nisi i lau oganuu e pei o le fafine ua oti lana tane i Sarefata? E ui ina siʻomia i latou e tagata o lotu sesē, ae atonu o loo latou saʻilia se mea e sili atu ona lelei. Atonu e itiiti lo latou malamalama e faatatau iā Ieova, ma e latou te manaʻomia le fesoasoani ina ia talia ai le upu moni. Po o e saʻilia na tagata ma fesoasoani iā i latou?

Seʻi mafaufau i le mea na talosaga atu ai Elia i lenei fafine e fai. Sa faatoʻā uma lava ona taʻu atu e le fafine, pe a māeʻa se la ʻaiga mulimuli ma lana tama ona la feoti lea. Peitaʻi, na faapea atu Elia: “Aua e te fefe. Inā alu ia ma fai e tusa ma lau upu. Ae muamua lava ia e faia se tamaʻi falaoa lapotopoto mo aʻu i mea o iai, ma aumai iā te aʻu, ae mulimuli ane ona e faia lea o se mea mo oe ma lau tama. Auā o le mea lenei ua fetalai mai ai Ieova le Atua o Isaraelu, ʻE lē uma le falaoamata i le fagu lapoʻa, e lē faaitiitia foʻi le suāuu i le fagu laʻitiiti, seʻia oo i le aso e faatotō ifo ai e Ieova le timu i luga o le laueleele.’”​—1 Tu. 17:11-14.

Pe a talosaga atu faapena se tasi iā te oe, atonu e te faapea atu: ʻE faapefea ona ofo atu le matou ʻaiga mulimuli o loo totoe?’ Peitaʻi, e leʻi manatu faapena lenei fafine. E ui sa itiiti lona malamalama e faatatau iā Ieova, ae na ia talitonu iā Elia ma talia lana talosaga. E ui na matuā tofotofoina ai lona faatuatua, peitaʻi sa ia faia se filifiliga atamai.

E leʻi tuulafoaʻia e Ieova lenei fafine mativa. E pei ona sa folafola e Elia, sa faateleina meaʻai na tausia ai o ia, o lana tama ma le perofeta seʻia oo ina māeʻa le lāmala. O le mea moni, “e leʻi uma lava le falaoamata i le fagu lapoʻa, e leʻi faaitiitia foʻi le suāuu i le fagu laʻitiiti, e tusa ai ma le afioga  a Ieova na ia fetalai atu ai e ala iā Elia.” (1 Tu. 17:16; 18:1) Pe ana lē talitonu lenā fafine, semanū e avea le tamaʻi falaoa ma ana ʻaiga mulimuli. Nai lo lea, sa ia maufaatuatuaina Ieova, gaoioi ma le faatuatua ma saunia muamua le meaʻai mo Elia.

O se lesona e tatou te aʻoaʻoina mai ai, e faamanuia e le Atua i latou e faaalia le faatuatua. Pe a e faaalia le faatuatua pe a tofotofoina lou faamaoni, o le a fesoasoani Ieova iā te oe. E avea o ia ma Lē e saunia mea, o Sē e puipuia oe, ma o se Uō e fesoasoani iā te oe e fesagaʻia faigatā.​—Eso. 3:13-15.

O se lesona mai i lenei tala, o loo faamatalaina i le Zion’s Watch Tower i le 1898: ʻPe ana faaalia e le fafine le faatuatua e ala i le usitaʻi, semanū e manatu le Alii e talafeagai ona fesoasoani iā te ia e ala i le Perofeta. Ae pe afai e lē faatuatua, atonu e maua e se isi fafine ua oti lana tane faamanuiaga. E faapena foʻi i tatou, o le a tatou maua faamanuiaga pe a faaalia le faatuatua, ae a leai o le a tatou melea na faamanuiaga.’

Pe a tatou fesagaʻia tofotofoga patino, e manaʻomia ona saʻilia taʻiala mai le Atua o loo i le Tusi Paia, faapea a tatou lomiga faale-Tusi Paia. E tatau ona tatou gaoioi e ōgatusa ma faatonuga a Ieova, e tusa pe ono faigatā ona taliaina. E mautinoa o le a tatou maua faamanuiaga, pe a gaoioi e ōgatusa ma lenei faataoto atamai: “Ia e faatuatua iā Ieova ma lou lotoatoa, ae aua le faalagolago i lou lava malamalama. Ia e manatua o ia i ou ala uma, ona ia faasaʻoina lea o ou ala.”​—Faata. 3:5, 6.

Sa iai se isi mea na tofotofoina ai le faatuatua o le fafine Sarefata. Ua faapea mai le Tusi Paia: “Ae ina ua mavae nei mea, ona maʻi ai lea o le tama a le fafine, o le matai fafine o le aiga, ma ua matuā tigāina lava lona maʻi, ua lē toe iai se mānava iā te ia.” Na tōmanatu lenei fafine mafatia i le māfuaaga ua tupu ai lenei mea, ma faapea atu iā Elia: “Le tagata e, o le Atua moni, aiseā ua e faia ai lenei mea iā te aʻu? Ua e sau e faamanatu mai i aʻu mea sesē, ma faaoo ai le oti i laʻu tama.” (1 Tu. 17:17, 18) O le ā le uiga o na faaupuga tigā?

Pe na tōmanatu le fafine i se agasala na ōia ai lona lotofuatiaifo? Pe na ia manatu o le oti o lana tama, o se faasalaga mai i le Atua e ala mai iā Elia lana avefeʻau? E lē o taʻua mai i le Tusi Paia. Peitaʻi, e leʻi tuuaʻia e le fafine le Atua ona o ni faiga lē tonu.

Na faateʻia Elia i le maliu ai o le tama a lenei fafine, ma le manatu o le fafine o ia ua māfua ai ona mafatiaga. Na ave e Elia le tino maliu o lenei tamaitiiti i le potu pito i luga o le fale, ma alaga atu e faapea: “Ieova e, loʻu Atua, po ua e faatigā ea foʻi i lenei fafine ua oti lana tane, o lē o loo ou aumau ai i le faaooina o le oti i lana tama?” Sa faigatā ona talia e le perofeta le upuia o le suafa o le Atua, pe a faataga e Ieova lenei fafine talimālō ma agalelei e mafatia pea. O lea, na ʻaiʻoi atu ai Elia: “Ieova e, loʻu Atua, faamolemole ia e toe faafoʻisia mai le ola o lenei tamaitiiti.”​—1 Tu. 17:20, 21.

Na faafofogaina e Ieova lana talosaga. Na faaalia e le fafine le faatuatua ma saunia meaʻai mo le perofeta. Atonu na faataga e le Atua le maʻi o le tamaitiiti seʻia oo ina oti, e faaalia ai o le a mafai ona toe faatūina mai o ia. O le uluaʻi toetū lenā o loo faamauina i le Tusi Paia, ma e mafai ona maua ai e tupulaga fai mai le faamoemoe. Seʻi manatu i le olioli o le fafine ina ua faapea atu Elia: “Tagaʻi o lea ua ola lau tama.” O lea, na faapea atu ai le fafine iā Elia: “O lenei, ua ou iloa o oe lava o le tagata o le Atua, ma e moni foʻi le afioga a Ieova ua e fai mai ai.”​—1 Tu. 17:22-24.

E lē o taʻua mai i le 1 Tupu mataupu e 17 se isi faamatalaga e faatatau i lenei fafine. E tusa ai ma le manatu o Iesu i lenei fafine, atonu na avea o ia ma auauna faamaoni a Ieova seʻia oo ina maliu. (Luka 4:25, 26) Ua tatou aʻoaʻoina mai i lenei tala e faamanuia e le Atua i latou e agalelei i ana auauna. E faamaonia ai foʻi e saunia e Ieova mea mo ana auauna faamaoni, e oo lava i tulaga faigatā. (Mata. 6:25-34; 25:34-40) E lē gata i lea, e finagalo Ieova e toe faatutū mai ē ua maliliu. (Galu. 24:15) O nei māfuaaga lelei e mautinoa e tatou te manatua ai le fafine Sarefata.