1, 2. O ā ni eseesega i o tatou aiga ma le auala na tatou maua ai le upu moni?

O IEOVA na faavaeina le faatulagaga o le aiga. (Efe. 3:14, 15) E ui na e ola aʻe ai i totonu o se aiga, ae e ese ou uiga ma lou tulaga mai i isi sui o le aiga. O nisi o i tatou sa mafuta ma mātua. A o nisi atonu ua maliliu o latou mātua ona o se maʻi, faalavelave faafuaseʻi, po o se isi lava māfuaaga. Peitaʻi, o nisi e latou te lē iloa po o ai moni o latou mātua.

² I le avea ai o i tatou ma vaega o le ʻauaiga o le Atua, e eseese uma auala na tatou maua ai le upu moni. Atonu na tausia oe e ni mātua na toleniina oe i taʻiala a le Tusi Paia. (Teu. 6:6, 7) Pe atonu o oe o se tasi mai le faitau afe o i latou na aʻoaʻoina le upu moni, mai le talaʻiga a nisi o auauna a Ieova.​—Roma 10:13-15; 1 Timo. 2:3, 4.

3. O ā vala e tatou te tutusa uma ai?

³ E ui i le eseese o o tatou talaaga, peitaʻi e iai mea e tatou te tutusa uma ai. Ua tatou aafia uma i le tulaga lē lelei atoatoa, agasala ma le oti ona o le lē usitaʻi o Atamu i le Atua. (Roma 5:12) E ui i lea, o le avea o i tatou ma tagata tapuaʻi moni, ua mafai ai ona tatou taʻua Ieova o ʻlo tatou Tamā.’ I aso anamua, na  mafai ai e tagata o le Atua ona faapea atu i upu o loo i le Isaia 64:8: “Ieova e, o oe o lo matou Tamā.” E lē gata i lea, na amata e Iesu lana tatalo i le faapea mai: “Lo matou Tamā e o i le lagi, ia faapaiaina lou suafa.”​—Mata. 6:9.

4, 5. O ā vala o le a tatou iloiloina, o le a faaloloto ai lo tatou alolofa mo Ieova lo tatou Tamā faalelagi?

⁴ Ua mafai ona aumaia e lo tatou Tamā o Ieova, le puipuiga ma le tausiga o loo manaʻomia e ona tagata tapuaʻi moni. Ua faapea mai le Salamo 91:14: “Ona ua ia [se tagata tapuaʻi moni] alofa mai iā te aʻu, ou te saunia ai se mea e sao ai o ia, ou te puipuia foʻi o ia ona ua ia iloa loʻu igoa.” E lē o mafai ona tafiesea tagata o Ieova, ona o loo Ia laveaʻia ma puipuia ma le alofa i latou mai i o latou fili.

⁵ Ina ia faaloloto lo tatou alofa mo lo tatou Tamā o Ieova, o lea seʻi o tatou iloilo ai le auala ua avea ai o ia ma Sē e (1) Foaʻi maia mea, (2) e Puipuia i tatou, ma (3) o se Uō sili. A o iloiloina nei vala e tolu, ia tatou mafaufau i la tatou faiā ma Ieova, ma aʻoaʻoina po o ā auala e tatou te faamamaluina ai lo tatou Tamā. E lē gata i lea, ia tatou mafaufau foʻi i faamanuiaga ua folafola mai e Ieova iā i latou e faalatalata atu iā te ia.​—Iako. 4:8.

6. O le ā se mea e faamaonia ai o Ieova o Lē e Foaʻia maia “meaalofa lelei uma”?

⁶ Na tusi mai le soo o Iakopo: “O meaalofa lelei uma ma mea uma e atoatoa ona lelei, e mai i lugā, auā e sau mai i le Tamā o le malamalama.” (Iako. 1:17) O le ola o se meaalofa matagofie mai le Atua. (Sala. 36:9) O le faaaogā o o tatou ola e faia ai le finagalo o Ieova, o le a tatou maua ai faamanuiaga i le taimi lenei ma le ola e faavavau i le lalolagi fou. (Faata. 10:22; 2 Pete. 3:13) E faapefea ona tupu lenā mea, ae ua tuufaasolo mai iā i tatou le tulaga lē lelei atoatoa, agasala ma le oti mai iā Atamu?

7. Ua faapefea ona saunia e Ieova se auala e tatou te maua ai se faiā vavalalata ma ia?

⁷ I le avea o Ieova o Lē Sili e Foaʻi maia mea, e lē mafaatusalia le tele o auala ua ia foaʻi mai ai le tele o mea. O le agalelei faifua o le Atua, ua uunaʻia ai o ia e laveaʻia i tatou. Ua tuufaasolo mai iā i tatou le tulaga lē lelei atoatoa ma le agasala mai iā Atamu. (Roma 3:23) Peitaʻi, o le alofa o Ieova ua ia saunia ai se auala e mafai ai ona tatou maua se faiā vavalalata ma ia. Na tusi Ioane: “O le mea lenei ua faaalia mai ai le alofa o le Atua iā i tatou, auā na auina mai e le Atua lona Atalii e toʻatasi i le lalolagi, ina ia tatou maua ai le ola e ala iā te ia. O le alofa lava lenei, e lē ona ua tatou alolofa i le Atua, ae ona ua alofa mai o ia iā i tatou ma auina mai lona Alo e fai ma taulaga o le leleiga ma le Atua mo a tatou agasala.”​—1 Ioa. 4:9, 10.

8, 9. Na faapefea ona avea Ieova ma Lē Sili e Foaʻi maia mea i aso o Aperaamo ma Isaako? (Tagaʻi i le ata i luga aʻe o le matua.)

⁸ I le pe ā ma le 1,900 tausaga a o leʻi fanau mai Iesu, na iai se mea na tupu i le olaga o Aperaamo, na faailoa mai ai le auala o le a aumaia ai e le Atua le ola e faavavau i tagata usiusitaʻi. Ua faapea mai le Eperu 11:17-19: “O le faatuatua na semanū e ofo atu ai e Aperaamo Isaako ina ua tofotofoina o ia ma o le tagata na talia ma le fiafia le folafolaga, na taumafai o ia e ofoina atu lona atalii e toʻatasi, e ui lava na faapea atu iā te ia: ʻO lē e taʻua o “lau fanau” e ala mai iā Isaako.’ Ae na manatu o ia e mafai e le Atua ona toe faatūina o ia mai i le oti, ma o lea foʻi na maua ai o ia i se auala faafaatusa.” E pei ona lotomalie Aperaamo e ofo atu lona atalii o Isaako e fai ma taulaga, na faapena foʻi ona lotomalie Ieova e foaʻi mai lona Alo o Iesu Keriso e laveaʻia le fanau a tagata.​—Faitau le Ioane 3:16, 36.

 ⁹ Pe e mafai ona tatou faaāta le fiafia o Isaako ina ua ia iloa o le a lē fasiotia o ia? E mautinoa na ia lotofaafetai iā Ieova ina ua suia le taulaga na fai i se mamoe na latalata ane. (Kene. 22:10-13) O lea na faaigoa ai e Aperaamo lea nofoaga o Ieova-irae, o lona uiga “E faia e Ieova, pe e saunia mea e Ieova.”​—Kene. 22:14; fpl.

10, 11. O ai o loo taʻimua i le “faiva o le leleiga,” ma ua faapefea ona latou faia faapea?

¹⁰ O le manatunatu i le auala ua avea ai Ieova o Lē Sili e Foaʻi maia mea, ua tatou iloa ai e lē mafai ona avea i tatou ma uō a le Atua pe ana le seanoa le taulaga a Iesu. Na tusi Paulo: “O lo matou manatu lenei, e toʻatasi lē na maliu mo tagata uma; ma ua feoti uma ai; ma na maliu o ia mo tagata uma, ina ia lē toe ola i latou mo i latou lava, ae ia ola mo ia o lē na maliu mo i latou ma toe faatūina mai.”​—2 Kori. 5:14, 15.

¹¹ O le alolofa o Kerisiano i le uluaʻi senituri i le Atua, ma talisapaia lo latou faaeaga e auauna ai iā te Ia, na latou talia fiafia ai le “faiva o le leleiga.” O la latou faiva, o le galuega talaʻi lea na mafai ai ona maua e tagata lotofaamaoni se leleiga ma le Atua, olioli ai i se faauōga ma Ia, ma avea ai i latou ma ona atalii faaleagaga. I aso nei, o loo faia foʻi e auauna faauuina a Ieova le galuega lava lea e tasi. Ua avea i latou ma sāvali a le Atua ma Keriso. O la latou galuega talaʻi lea ua mafai ai e tagata faamaoni ma lotomaulalo ona tosina atu i le Atua, ma avea ai ma ana auauna.​—Faitau le 2 Korinito 5:18-20; Ioa. 6:44; Galu. 13:48.

12, 13. E faapefea ona faaalia atu lo tatou talisapaia o mea uma ua foaʻi mai e Ieova iā i tatou?

¹² O le lotofaafetai o isi mamoe i le foaʻi maia e Ieova o mea uma, ua latou aufaatasi atu ai i le ʻaufaauuina i le talaʻia o le tala lelei. E tatou te faaaogā i le galuega talaʻi le Tusi Paia, o se tasi o meaalofa a le Atua. (2 Timo. 3:16, 17) O le faaaogāina lelei o le Tusi Paia ua mafai ona maua ai e isi le ola e faavavau. Ua foaʻi mai e Ieova le agaga paia, ma e tatou te faalagolago i le agaga paia pe a tatou auai i le faiva. (Saka. 4:6; Luka 11:13) Ua faaalia i Tusi Tausaga a Molimau a Ieova iʻuga mataʻina o le galuega talaʻi i tausaga taʻitasi. O se faaeaga le faia o so tatou sao i lenei galuega, e viiviia ai lo tatou Tamā ma Lē e Foaʻi maia mea.

¹³ Talu ai ua foaʻi mai e Ieova le tele o mea lelei mo i tatou, e tatau ai ona tatou fesili ifo: ʻPo o oʻu faia le mea sili i le faiva, e faailoa atu ai iā Ieova loʻu talisapaia o mea uma ua ia foaʻi mai iā te aʻu? E faapefea ona faaleleia atili oʻu tomai i le galuega talaʻi?’ O le talisapaia o mea uma ua foaʻi mai e Ieova, o le a tatou faamuamua ai le Malo i o tatou olaga. O le faia faapea, e mautinoa o le a foaʻi mai ai e Ieova mea uma e tatou te manaʻomia. (Mata. 6:25-33) O le alofa o le Atua ua tatou naunau ai e faia mea uma e faafiafia ai lona finagalo.​—Faata. 27:11.

14. Ua faapefea ona avea Ieova o Sē e Laveaʻia ona tagata?

¹⁴ Na pese le faisalamo o Tavita: “A ua ou puapuagatia ma mativa. E manatu mai foʻi Ieova iā te aʻu. O oe o loʻu fesoasoani ma o Lē e na te saunia se mea ou te sao ai.” (Sala. 40:17) E tele taimi na avea ai Ieova o Sē e Laveaʻi i ona tagata o se vaega, aemaise lava i taimi na matuā sauāina ai i latou e o latou fili. E tatou te faafetaia ai Ieova i lona foaʻi maia o mea uma e tatou te manaʻomia, ina ia tutumau ai i taimi faigatā.

15. Aumai se faaaʻoaʻoga o le auala na puipuia ai e se tamā alofa lona atalii.

¹⁵ O se tamā alofa e lē gata e na te tausia lana fanau, ae e na te puipuia foʻi i latou.  E vave ona ia gaoioi e laveaʻi i latou pe a aafia i se tulaga faigatā. E manatua e se tasi uso le auala na laveaʻi ai e lona tamā o ia a o laʻitiiti. Sa la uia ma lona tamā se vaitafe ina ua māeʻa le talaʻiga. Sa mamafa timuga i lenā taeao ma amata ai ona tatafe le vai. E pau le auala na mafai ai ona la asā le vaitafe, o le puna mai i le isi maa lapoʻa i le isi maa. A o ia muamua i luma o lona tamā, sa faafuaseʻi ona lē paleni lana savali ma paʻū ai i le vaitafe. Maʻeu le lotofaafetai o le tamaitiiti i lona tamā, ina ua ia aapa atu ma vave laveaʻia o ia. I se tulaga talitutusa, ua laveaʻia e lo tatou Tamā faalelagi i tatou mai i tulaga mataʻutia o lenei lalolagi leaga, ma lona pule o Satani. O Ieova o lo tatou Laveaʻi sili.​—Mata. 6:13; 1 Ioa. 5:19.

16, 17. Na faapefea ona fesoasoani ma puipuia e Ieova Isaraelu ina ua latou tau ma tagata Amaleka?

¹⁶ Na puipuia ma le alofa e Ieova ona tagata i le 1513 T.L.M. Na ia laveaʻia le fanauga a Isaraelu mai i le nofo pologa i Aikupito, ma puipuia i latou a o savavali i le Sami Ulaula. Ina ua māeʻa ona latou savavali i le toafa ma agaʻi atu i le Mauga o Sinai, ona latou taunuu lea i Refiti.

¹⁷ E tusa ai ma le valoaga i le Kenese 3:15, atonu na lē manofo Satani i le tau saʻilia o se avanoa e osofaʻia ai le fanauga a Isaraelu, lea na foliga mai e leʻi malupuipuia. Sa ia faia faapea e ala i le faaaogā o tagata Amaleka lea na avea ma fili o tagata o le Atua. (Nu. 24:20) Na faapefea ona puipuia e Ieova ona tagata e ala mai iā Iosua, Mose, Arona ma Huro? A o tau Iosua ma ona tagata faasaga i tagata Amaleka, sa iai Mose, Arona ma Huro i se mauga na lata ane. O le umi lava na sisii ai e Mose ona lima, o le malolosi foʻi lenā o tagata Isaraelu e ala i le fesoasoani a Ieova. Ina ua amata ona pepē lima o Mose, ona  ō mai lea o Arona ma Huro e fesoasoani iā te ia e sisii i luga ona lima. O le fesoasoani ma le puipuiga a Ieova, na “faatoʻilaloina ai e Iosua o Amaleka ma tagata ua ʻau faatasi ma i latou.” (Eso. 17:8-13) Ina ua māeʻa, ona faia lea e Mose se fata faitaulaga i inā ma faaigoa o “Ieova-nese,” o lona uiga “O Ieova o loʻu faailoilo.”​—Faitau le Esoto 17:14, 15; fpl.

18, 19. Ua faapefea ona puipuia e Ieova ana auauna i aso nei?

¹⁸ E puipuia e Ieova i latou e alolofa ma usiusitaʻi iā te ia. E pei ona sa faia e tagata Isaraelu i Refiti, e tatou te faalagolago iā Ieova e puipuia i tatou mai i o tatou fili. E puipuia e Ieova i tatou o se faalapotopotoga, ma tatou saogalemu ai i osofaʻiga a Satani. O se faaaʻoaʻoga, e tele taimi na puipuia ai e Ieova ona tagata na sauāina ona o le solitū o ni Kerisiano. Na tupu lenā mea i Siamani ma isi atunuu na i lalo o pulega a le ʻau Nasi. O le faitau ma manatunatu i talaaga o soifuaga, ma tala o loo i Tusi Tausaga e faatatau i le puipuiga a Ieova i na taimi o sauāga, e faamalosia ai lo tatou maufaatuatuaina o Ieova.​—Sala. 91:2.

¹⁹ Ua puipuia foʻi e Ieova i tatou e ala i le aumaia o faamanatuga, e ala mai i lomiga ma lana faalapotopotoga. I tausaga talu ai nei, seʻi mafaufau i le auala ua puipuia ai i tatou i nei faamanatuga. Ua matuā aafia le lalolagi i faiga lē mamā, pulea e le ʻava malosi ma ata matagā taufeusuaʻiga. Peitaʻi ua aumaia vave e Ieova nei faamanatuga patino, e puipuia ai i tatou mai i le faia o mea e faaleagaina ai la tatou faiā ma Ia. O se faaaʻoaʻoga, na aumaia talu ai nei e lo tatou Tamā faalelagi fautuaga, e ʻalofia ai lo tatou aafia i le mailei o aumea leaga i luga o upega tafailagi. *​—1 Kori. 15:33.

20. O le ā le taʻitaʻiga ma le puipuiga e tatou te maua i totonu o le faapotopotoga?

²⁰ E faapefea ona faaalia atu o loo tatou utagia nei faamanatuga, ma o loo “aʻoaʻoina e Ieova” i tatou? E ala i lo tatou usitaʻia o ana faatonuga. (Isa. 54:13) O faapotopotoga o se nofoaga e tatou te maua ai le puipuiga ma le taʻitaʻiga. O loo iai toeaina e mafai ona aumaia fesoasoani ma fautuaga mai i le Tusi Paia. (Kala. 6:1) Ua faaaogā e Ieova nei “meaalofa i tagata” e tausia ai i tatou i se auala alofa. (Efe. 4:7, 8) O lea, o le ā e tatau ona tatou faia pe a aumaia e toeaina fautuaga? E tatau ona tatou lotomalilie e usiusitaʻi iā i latou. O le faia faapea, e faamanuia ai i tatou e Ieova.​—Epe. 13:17.

21. (a) O le ā e tatau ona tatou maumauaʻi e fai? (e) O le ā o le a iloiloina i le mataupu o sosoo mai?

²¹ O lea seʻi o tatou faalagolago pea i le fesoasoani a le agaga paia, ma talia le taʻitaʻiga a lo tatou Tamā faalelagi. E tatau foʻi ona tatou manatunatu i le olaga o Iesu, ma faia le mea sili e mulimuli ai i lana faaaʻoaʻoga mataʻina. Na ia maua se taui sili ona o lona “usiusitaʻi e oo i le oti.” (Fili. 2:5-11) O le a tatou maua foʻi faamanuiaga pe a faatuatua ma le lotoatoa iā Ieova. (Faata. 3:5, 6) O lea, seʻi faaauau ona tatou faalagolago pea iā Ieova o Lē Sili e foaʻi maia mea, ma puipuia i tatou. O le auauna iā te ia o se faaeaga e aumaia ai le fiafia moni. Ae faapefea ona avea Ieova ma a tatou Uō sili? O le a faalolotoina lo tatou alolofa iā te ia, a o taliina lenā fesili i le mataupu o sosoo mai.