Manatu i se isi mea e ono tupu: Na valaaulia e se ulugalii se tinā nofofua ma lana fanau e toʻalua i le la faapotopotoga, ina ia latou tafafao i se afiafi. Na matuā fiafia le fanau ina ua taʻu atu i ai e le tinā, ma na latou tulimataʻia lenā aso. Peitaʻi, a o leʻi oo i lenā afiafi, na faailoa atu e le ulugalii i le tinā o le a lē taunuu la latou fuafuaga, ona o se tuatuagia e lē maʻalofia. Mulimuli ane, na iloa e le tinā le māfuaaga na lē taunuu ai la latou fuafuaga. Ina ua māeʻa ona valaaulia o ia, sa valaaulia e ni uō a le ulugalii i laʻua e latou te tafafao i lenā lava afiafi, ma sa la taliaina.

E tatau iā i tatou o Kerisiano ona tausisi i a tatou upu, ma e lē tatau ona tatou faapea atu ʻioe ona toe fai atu lea e leai.’ (2 Kori. 1:18) Peitaʻi, e tusa ai ma faataʻitaʻiga e lua na taʻua, e lē tutusa le tulaga o mea i nisi taimi. Atonu e iai taimi e tatau ai ona tolopō se fuafuaga na faataatia. Na feagai le aposetolo o Paulo ma se tulaga faapena.

I le 55 T.A. a o iai Paulo i Efeso a o faagasolo lana malaga faamisionare lona tolu, na ia fuafua ai e ui atu i le Sami o Ainea e agaʻi atu i Korinito, ona malaga atu ai lea i Maketonia. A o agaʻi e toe foʻi atu i Ierusalema, na fuafua o ia e asiasi atu i le faapotopotoga i Korinito mo le taimi lona lua, ina ia aoao mai a latou meaalofa mo le ʻauuso i Ierusalema. (1 Kori. 16:3) E faamaonia lenā fuafuaga i le 2 Korinito 1:15, 16: “Na ou mautinoa foʻi lenei mea, o lea na ou fuafua muamua ai ou te alu atu iā te outou, ina ia maua se mea e tou te olioli faalua ai, pe a uma ona ou afe atu iā te outou i laʻu malaga i Maketonia, ma toe foʻi mai Maketonia iā te outou, ona outou momoli lea o aʻu i Iutaia.”

E foliga mai na faailoa atu e Paulo lana fuafuaga i uso i Korinito, e ala i se isi tusi na ia tusia muamua. (1 Kori. 5:9) E leʻi leva  ona uma ona tusia e Paulo lenā tusi, ae ia maua se lipoti mai i le aiga o Keloe e faapea, ua matuā feeseeseaʻi le faapotopotoga. (1 Kori. 1:10, 11) Na filifili Paulo e toe sui lana uluaʻi fuafuaga, ma ia tusia ai le tusi o le 1 Korinito. Na tusia ma le agalelei e Paulo fautuaga ma faasaʻoga ma faailoa atu foʻi ua sui lana fuafuaga. Na ia faailoa atu o le a malaga muamua i Maketonia ona sosoo lea ma Korinito.​—1 Kori. 16:5, 6. *

E foliga mai ina ua maua e uso i Korinito lana tusi, na tuuaʻia e “aposetolo silisili” o lenā faapotopotoga Paulo e faapea, e lē faamaoni ona o le lē tausisi i ana upu. Na fesili atu Paulo: “Ae ina ua ou faia lea fuafuaga, pe na ou manatu māmā ea i ai? O mea na ou fuafua e fai, pe na ou fuafua ea e tusa ma manatu faaletagata, ma ou fai atu ʻIoe, o lea lava’ ona ou toe fai atu lea e ʻLeai, e leai lava’?”​—2 Kori. 1:17; 11:5.

E tatou te ono fesili, Pe na “manatu māmā” moni lava Paulo i le mataupu? E leai. O le upu ua faaliliuina mai ai le upu “māmā,” e uiga atu i le femoumouaʻi, e pei ua lē faamaoni se tagata i ana folafolaga. Ina ua fesili atu Paulo “pe na ou fuafua ea e tusa ma manatu faaletagata?” sa tatau ona manino ai i manatu o Kerisiano i Korinito, o le suia o le fuafuaga a Paulo e lē faapea ai o ia o se tagata lē faamaoni.

Na matuā faasaʻo e Paulo a latou tuuaʻiga ina ua tusi e faapea: “Ae e faamaoni le Atua, na matou lē fai atu iā te outou, ʻIoe, ona toe fai atu lea e Leai.’” (2 Kori. 1:18) E mautinoa sa matuā naunau Paulo mo le lelei o uso ma tuafāfine i Korinito ina ua suia lana fuafuaga. I le 2 Korinito 1:23, na suia e Paulo lana uluaʻi fuafuaga ʻina neʻi atili ai ona mafatia’ uso i Korinito. Na tuu i ai e Paulo le avanoa e faasaʻo ai mea a o leʻi feiloaʻi mai i latou. A o iai Paulo i Maketonia, sa faamatala atu i ai e Tito le avea o lana tusi ma uunaʻiga lelei na faaalia ai e uso le salamō. O le mea lenā sa faatalitalia e Paulo ma na matuā faafiafiaina ai o ia.​—2 Kori. 6:11; 7:5-7.

O le tuuaʻiga e faapea o Paulo e lē faamaoni, na ono manatu ai e lē mafai ona maufaatuatuaina lana galuega talaʻi pe afai na lē tausisi o ia i ana upu i aso faisoo. Peitaʻi, na faamanatu atu e Paulo i uso i Korinito, sa ia talaʻi atu iā i latou e faatatau iā Iesu Keriso. “O Keriso Iesu le Alo o le Atua, lea na matou talaʻiina atu iā te outou, o aʻu, ma Siluano, ma Timoteo, e leʻi avea o ia ma Ioe ma toe Leai, ae na o le Ioe lava.” (2 Kori. 1:19) Pe sa iai se vala na lē faamaoni ai Iesu Keriso, o lē na faaaʻoaʻo i ai Paulo? E leai. Sa tautala ma le faamaoni Iesu i lona olaga atoa ma i lana faiva foʻi. (Ioa. 14:6; 18:37) Pe afai sa moni ma faamaoni mea uma na talaʻia e Iesu, ma o le feʻau foʻi lenā sa talaʻia e Paulo, o lona uiga la sa maufaatuatuaina foʻi le talaʻiga a le aposetolo.

O Ieova o “le Atua faamaoni.” (Sala. 31:5) E faamaonia lenā mea ina ua tusi Paulo, “po o le ā lava le tele o folafolaga a le Atua, a ua Ioe uma ona o ia,” po o Keriso. O le faamaoni atoatoa o Iesu a o iai i le lalolagi, e tatou te mautinoa ai e maufaatuatuaina folafolaga a Ieova. Na faapea atili mai Paulo: “E ala iā te ia, ua tatou faapea atu ai ʻAmene’ i le Atua ina ia tatou faamamaluina o ia.” (2 Kori. 1:20) O Iesu o le “Amene,” po o lē e faamaonia ai o le a faataunuu moni lava folafolaga uma a Ieova le Atua.

E pei lava ona faamaoni pea Ieova ma Iesu, sa faapena foʻi ona faamaoni pea Paulo i ana upu. (2 Kori. 1:19) Sa faamaoni  Paulo ma e na te leʻi faia ni folafolaga e tusa ai ma “manatu faaletagata.” (2 Kori. 1:17) Nai lo lea, sa ia ʻsavali i la le agaga.’ (Kala. 5:16) O le auala sa ia feutagaʻi ai ma isi, sa atagia ai lona matuā naunau mo lo latou lelei. Sa tausisi o ia i lana Ioe.

I aso nei, ua fai ma masani a tagata le fai o folafolaga, ona sui lea pe a tulaʻi mai ni faafitauli lāiti pe ua iai foʻi se mea e sili atu ona manaia e auai i ai. E lē masani ona tausisi tagata i le “ioe” pe a feagai ma mataupu faapisinisi, e tusa pe ua māeʻa ona faia se maliega tusitusia. E toʻatele ua lē o toe faatāuaina le tautoga o le faaipoipoga o se feagaiga mo le olaga atoa. Nai lo lea, o le faateleina o talagā faaipoipoga, ua faaalia ai e manatu le toʻatele o tagata o le faaipoipoga o se faatasiga e lē tumau, ma e faigofie ona faamuta.​—2 Timo. 3:1, 2.

Po o avea lau upu Ioe ma Ioe? E pei ona faatomua atu i lenei mataupu, e te ono suia se fuafuaga na e faia ona o tulaga lē maʻalofia ae e lē faapea ua e lē faamaoni. Ae afai ua e faia se folafolaga po o se maliega, e tatau ona e faia le mea sili ina ia faataunuu lenā folafolaga. (Sala. 15:4; Mata. 5:37) O lou faia faapea, o le a mātaulia ai oe o sē e maufaatuatuaina, o sē e savali i ana upu ma e tautala faamaoni i taimi uma. (Efe. 4:15, 25; Iako. 5:12) Pe a iloa e tagata e te faamaoni i meafai i aso uma, atonu o le a latou naunau ai e faalogo mai pe a e faailoa atu le upu moni e faatatau i le Malo o le Atua. O lea, ia faamautinoa o loo tatou tausisi i la tatou Ioe.