Na viiviia e Tavita Lē na foafoaina i tatou ina ua pese: “Loʻu Atua e, ou te fiafia e fai lou finagalo, ua i totonu foʻi iā te aʻu lau tulafono.” (Sala. 40:8) E ui sa feagai Tavita ma faigatā ma omiga, ae sa fiafia moni o ia i le faia o le finagalo o Ieova. Ae e lē na o Tavita le tagata tapuaʻi o Ieova sa fiafia i le auaunaga iā te Ia.

Sa faatatau atu e Paulo le Salamo 40:8 i le Mesia po o le Keriso. Na tusi Paulo: “Ina ua afio mai o ia [Iesu] i le lalolagi, ua ia fetalai mai: ʻ“O taulaga ma mea na ofoina atu ua e lē finagalo i ai, a ua e saunia se tino mo aʻu. E te leʻi fiafia foʻi i taulaga mū ma le taulaga o agasala.” Ona ou faapea atu lea, “Faauta! Le Atua e, ua ou sau e fai lou finagalo (auā ua tusia e uiga iā te aʻu i le tusi tāʻai).”’”​—Epe. 10:5-7.

A o iai Iesu i le lalolagi, sa fiafia e matamata i le foafoaga, faatasitasi ma uō, ma fai taumafataga faatasi ma isi. (Mata. 6:26-29; Ioa. 2:1, 2; 12:1, 2) Peitaʻi, sa sili atu ona tāua ma fiafia o ia i le faia o le finagalo o lona Tamā. Na fetalai Iesu: “O laʻu meaʻai, o le faia lea o le finagalo o lē na auina mai aʻu, ma faaiʻu lana galuega.” (Ioa. 4:34; 6:38) Na aʻoaʻoina e le ʻausoo mai i lo latou Matai o Iesu, le auala e maua ai le fiafia moni. O lea, ona o le matuā fiafia, na latou lotomalilie ai ma maelega e faalauiloa atu le feʻau o le Malo i isi.​—Luka 10:1, 8, 9, 17.

Na poloaʻia e Iesu ona soo e faapea: “Ia outou ō atu e fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia, ia aʻoaʻoina i latou ia tausi i mea uma ua ou poloaʻi atu ai iā te outou. Faauta! ou te faatasi ma outou i aso uma lava seʻia oo i le taufaaiʻuiʻuga o le faiga o mea a le lalolagi.” (Mata. 28:19, 20) O le usitaʻia o lenei poloaʻiga, e aofia ai le talaʻi atu i tagata i so o se mea e maua ai, toe asia  tagata fiafia, ma faia suʻesuʻega faale-Tusi Paia. E tatou te matuā fiafia pe a faia nei galuega.

E tusa pe fiafia pe e lē fiafia mai tagata i la tatou feʻau, ae o o tatou uiga faaalia o se vala autū lea i le mauaina o le fiafia i le faiva. Aiseā e tatou te talaʻi atu ai pea le tala lelei, e tusa pe e lē ano pe lē fiafia mai tagata? Auā ua tatou iloa, o le faia o se sao i le galuega talaʻi o le Malo ma le faia o isi ma soo, e faaalia ai lo tatou alolofa i le Atua ma tuaoi. Ua iai i se tulaga lamatia o tatou ola faapea ola o o tatou tuaoi. (Eseki. 3:17-21; 1 Timo. 4:16) Seʻi o tatou iloilo nisi o manatu ua fesoasoani i le toʻatele o uso ma tuafāfine, ina ia tumau ai pe toe faamalosia lo latou maelega i le faiva, a o galulue i oganuu faigatā.

E masani ona maua iʻuga lelei, pe a faaaogā fesili talafeagai i le faiva. I se tasi taeao, na mātauina ai e Amalia se tamāloa i se paka, o loo faitau lana nusipepa. Sa faalatalata atu Amalia ma fesili atu i ai po o ā ni tala mananaia i le nusipepa. Ina ua tali mai le tamāloa e leai ni tala, na faapea atu Amalia: “Ou te fia faailoa atu iā te oe le tala lelei e faatatau i le Malo o le Atua.” O lenā faamatalaga na faaosofia ai le naunau o le tamāloa, ma ia talia ai se suʻesuʻega faale-Tusi Paia. E tolu ni suʻesuʻega na mafai ona amata e Amalia i lenā paka.

Sa faaaogā e Janice lana fale faigaluega e fai ma ana oganuu e talaʻi ai. Ina ua faaalia e se sikulatī ma se isi tagata faigaluega le fiafia i se mataupu na lomia i Le Olomatamata, na ofo atu Janice o le a ia aumaia mo i laʻua ni mekasini pe a maua lomiga fou. Sa ia faia foʻi faapea i se isi tagata faigaluega, o lē sa fiafia i mataupu eseese i Le Olomatamata ma le Ala Mai! Na mātauina foʻi e se isi tagata faigaluega, ma talosaga atu mo ni ana mekasini. Na taʻua e Janice: “O se faamanuiaga lenei mai iā Ieova!” E toʻa 11 tagata na fai ma ana alāmekasini i le galuega.

Na fautua mai se ovasia femalagaaʻi e faapea, pe a talaʻi mai lea fale i lea fale, e lē tatau i se tagata talaʻi ona faaiʻu se talanoaga ma le tagata o le fale, i le tau ina faapea atu o le a toe asiasi mai i se isi aso. Nai lo o lea, ia fesili i le tagata o le fale: “Pe e te manaʻo e faataʻitaʻi atu le auala e fai ai se suʻesuʻega faale-Tusi Paia?” pe, “O le ā se aso ma le taimi e te manaʻo ou te toe foʻi mai ai, e faaauau le ta talanoaga?” Na taʻua e le ovasia, e 44 suʻesuʻega faale-Tusi Paia na amata i le vaiaso e tasi, e uso ma tuafāfine i se faapotopotoga na asiasi ai, ona o le faaaogāina o lenei auala.

E iai foʻi iʻuga lelei o le toe vave foʻi e fai asiga, e tusa pe i ni nai aso talu ona mavae le uluaʻi asiasiga. Auā o le faia faapea, e faaalia ai e tatou te naunau moni lava e fesoasoani i ē lotofaamaoni, ia malamalama i le Tusi Paia. Ina ua fesiligia se fafine pe aiseā na ia taliaina ai se suʻesuʻega  faale-Tusi Paia ma Molimau a Ieova, na ia faapea mai, “talu ai sa latou faaalia le naunau ma le alofa moni iā te aʻu.”

E leʻi leva talu ona māeʻa ona auai Madaí i le Aʻoga mo le Auaunaga Paeonia, ae ia faia ni suʻesuʻega faale-Tusi Paia se 15, ma e lima isi suʻesuʻega na ia tuuina atu i isi o le ʻautalaʻi. O nisi o ana suʻesuʻega na auai e lē aunoa i sauniga. O le ā na fesoasoani iā Madaí e amata ai le tele o suʻesuʻega? Sa ia aʻoaʻoina mai i le aʻoga mo paeonia, le tāua o le faaauau ona toe foʻi e fai asiga seʻia oo ina maua lē na muaʻi faaalia le fiafia. Na taʻua e se isi Molimau na fesoasoani i le toʻatele e aʻoaʻoina upu moni o le Tusi Paia: “Na ou aʻoaʻoina o le auala autū e fesoasoani ai i tagata e fia iloa Ieova, o le faaauau lea ona faia o toe asiga.”

O le faia o toe asiga ma suʻesuʻega faale-Tusi Paia, e manaʻomia ai taumafaiga maumauaʻi. Peitaʻi, e lē mafaatusalia faamanuiaga e tatou te maua pe a filigā e talaʻi le Malo, ina ia fesoasoani i isi e “maua le poto saʻo i le upu moni,” ma maua le faaolataga. (1 Timo. 2:3, 4) O le iʻuga, o le a matuā faamalieina i tatou ma maua le fiafia.