INA ua ō ese tagata o le Atua mai i Papelonia i le 537 T.L.M., sa manatu mamafa Ieova i le ala o le a uia e ona tagata agaʻi i Ierusalema. Na fetalai o ia: “Ia teu le ala mo le nuu. Inā atiaʻe ia, ia atiaʻe le ala tele. Ia aveese maa.” (Isa. 62:10) Atonu sa iai se vaega o tagata Iutaia na ō muamua, ina ia faalaulelei auala gaoā ma omoomo. O lenā faiga na fesoasoani i o latou uso na mulimuli atu i le ala e agaʻi i lo latou nuu.

I se tulaga talitutusa, o loo tatou savalia se ala a o faataunuu faaeaga eseese i le auaunaga iā Ieova. E finagalo Ieova i ana auauna uma ia uia lenā ala, e aunoa ma le faia o se gaoioiga e atili faigatā ai le olaga. Ua timaʻi mai lana Afioga: “Ia faalaulelei le ala o ou vae, ma tau ina ia matuā faatumauina ou ala uma.” (Faata. 4:26) E tusa po o oe o se talavou pe leai, ae e mafai ona e faamaonia le atamai o lenei fautuaga mai le Atua.

Ua taʻua i le Faataoto 20:29: “O le matagofie o tauleleʻa o lo latou malosi lea.” O le toʻatele o talavou, e lelei lo latou soifua mālōlōina, vave le mafaufau, ma e naunau ia taulau manuia. E masani ona mātauina e tagata matutua agavaa ma taleni o talavou, ma e latou te faamoemoe ia ausia e talavou mea uma e mafai ona latou faia. Pe a faaaogā e se talavou ana taleni, tomai ma le malosi e auauna ai iā Ieova, o le a mafai ona ia ausia sini faaleagaga ma maua le fiafia moni.

E matuā faatāua e le lalolagi tomai ma agavaa o o tatou talavou. Pe a atamai se talavou Molimau a Ieova i le aʻoga, e ono uunaʻia o ia e faiaʻoga po o aumea i le aʻoga e tuliloa isi aʻoaʻoga maualuluga. Pe atonu foʻi e taumafai isi e uunaʻia talavou Molimau a Ieova e lelei i mea tau taaloga, ina ia tuliloa  sini tau taaloga. Atonu o loo e fesagaʻi ma se omiga faapena, po o se tasi e te silafia. O le ā e fesoasoani i se Kerisiano ina ia faia filifiliga atamai?

E fesoasoani taʻiala o le Tusi Paia iā i tatou, a o mulimuli i le ala lea e mafai ona taulau manuia ai i le auaunaga iā Ieova. Ua faapea mai le Failauga 12:1: “Ia e manatua o Lē e Sili na Foafoaina oe i aso o lou tauleʻaleʻa.” E faapefea iā te oe po o se isi talavou e te iloaina ona manatua Ieova?

Seʻi manatu i le mea na tupu iā Eliki, * o se uso talavou e nofo i Aferika i Sisifo, ma e fiafia i le taaloga o le soka. Ina ua 15 ona tausaga, sa filifilia o ia e taalo i le ʻau a le atunuu, ma na faatalitalia o le a lē umi ae ia mauaina toleniga e sili ona lelei i Europa, ma iʻu ai ina lauiloa ma maua le tele o tupe. Ae na faapefea ona ia faatatauina le fautuaga “ia e manatua o Lē e Sili na Foafoaina oe”? O le ā se lesona mo oe po o nisi o au aumea talavou?

A o iai i le aʻoga, sa suʻesuʻe e Eliki le Tusi Paia ma Molimau a Ieova. Na ia aʻoaʻoina ai o le a foʻia e faavavau e le Atua faafitauli o tagata. O lea, na malamalama ai Eliki i le tāua o le faaaogā o lona taimi ma le malosi e faia ai le finagalo o le Atua. O le iloaina o lenā mea moni, na filifili ai loa e papatiso ma agaʻigaʻi i luma faaleagaga, nai lo o le tuliloaina o sini tau taaloga. Na avea o ia ma auauna o le faiva, ma mulimuli ane valaaulia i le Aʻoga Faale-Tusi Paia mo Uso Nofofua.

Pe ana tuliloa e Eliki sini tau taaloga, semanū e na te mauaina le tamaoaiga ma se tulaga taʻutaʻua. Peitaʻi, sa ia iloa le moni o le mataupu silisili e faapea: “O le oloa tāua a lē e mauʻoa o lona aai malosi lea, ua pei o se pā malupuipuia i lona lava manatu.” (Faata. 18:11) E lē mafai ona maua se puipuiga moni mai i tupe, ae e mafai ona faasesēina ai tagata. E lē gata i lea, o i latou o loo sulu ma le ulu i le saʻilia o le tamaoaiga, ua ʻtuia i latou e i latou lava i le tele o tigā.’​—1 Timo. 6:9, 10.

Ua maua e le toʻatele o talavou le olioli ma le puipuiga tumau, ona o le auai i le auaunaga faataimi atoa. Na taʻua e Eliki: “Ua ou auai i se ʻau e toʻatele o auauna faataimi atoa a Ieova. O le ʻau sili lea e tatau ona ou iai, ma ou te faafetaia Ieova i lona faailoa mai o lenei ala tutasi e tau atu i le fiafia moni, ma taulau manuia ai i le olaga.”

Ae faapefea oe? Nai lo o le tuliloaina o sini o le lalolagi, aiseā e te lē taumafai ai e faamautū “ou ala” iā Ieova, e ala i le faia o sou sao i le auaunaga faapaeonia?​—Tagaʻi i le pusa “ Mauaina o Aogā e Lē Mafai Ona Maua i le Iunivesite.”

A o asiasi atu se ulugalii i le ofisa o le lālā i le Iunaite Setete, na la mātauina le fiafia o tagata na auauna iā Ieova i le Peteli. Na tusi mulimuli ane le tuafafine e faapea: “Sa faifaimālie o ma olaga.” O lea, na filifili ai loa le ulugalii e faaavanoa lo la taimi ma le malosi mo nisi faaeaga i le auaunaga.

Peitaʻi, sa foliga mai na faigatā ona faia suiga na mananaʻo ai lenei ulugalii. Ae i se tasi aso, na la tomānatu ai i fetalaiga a Iesu i le Ioane 8:31: “O outou o oʻu soo moni pe a outou tumau i aʻu upu.” O le mafaufau i na upu, na la manatu ai e faapea: “Po o ā lava faataulaga e tatau ona ma faia, ae e tele aogā e ma te maua mai ai.” O lea, na la faatau ese atu ai lo la fale telē, aveese isi mea e lē manaʻomia, ma siitia atu i se faapotopotoga na manaʻomia le fesoasoani. Ua auauna nei i laʻua o ni paeonia, fesoasoani i le fausiaina o Maota mo Sauniga, ma galulue tauofo i tauaofiaga itumalo. Na la faapea mai: “E ma te maofa i le olioli ua ma maua ona o le faafaigofie o o ma olaga, ae faataunuu mea e manaʻo le faalapotopotoga a Ieova e ma te faia.”

Na tusi Solomona: “O ou mata, ia vaai saʻo i luma, ioe, o ou mata e ao ona pulatoʻa i luma.” (Faata. 4:25) E pei lava ona manaʻomia e se avetaavale ona taulaʻi i luma o le auala, e tatau foʻi ona tatou ʻalofia mea e faalavelavea ai i tatou mai i le faatutūina o sini faaleagaga, ma ausia na sini.

O ā ni sini faaleagaga e te ono faatutūina ma ausia? O se tasi o sini o le auai i le auaunaga faataimi atoa, pe auauna foʻi i se faapotopotoga e lata ane, o loo manaʻomia ni tagata talaʻi tomai e fesoasoani e talaʻia oganuu tetelē. Atonu foʻi o loo  toʻatele ni tagata talaʻi lelei i se faapotopotoga, ae toʻalaiti toeaina ma auauna o le faiva. Pe e mafai ona e fesoasoani atu i se tasi o na auala? Aiseā e te lē talanoa atu ai i le ovasia matagaluega, pe ono mafai ona e fesoasoani atu? Pe afai e te naunau e auauna i se isi vaipanoa mamao, e mafai ona e talosaga mo ni faamatalaga e faatatau i faapotopotoga o loo manaʻomia le fesoasoani. *

Seʻi o tatou toe tepa i le vaaiga o loo i le Isaia 62:10. Atonu na galulue mamafa nisi tagata Iutaia e faalaulelei le auala, ina ia mafai ai ona ui atu tagata o le Atua ma taunuu i Ierusalema. Pe afai o loo e taumafai malosi e ausia sini i le auaunaga paia, ia aua le faavaivai. E ala i le fesoasoani a le Atua, o le a mafai ai foʻi ona e ausia na sini. Ia faaauau ona ōle atu iā Ieova mo le atamai, a o e taumafai e aveese mea e taofia ai lou agaʻigaʻi i luma. O le iʻuga, o le a mafai ai ona e mātauina le auala o loo fesoasoani ai Ieova iā te oe, e “faalaulelei le ala o ou vae.”​—Faata. 4:26.