Pe na e faitauina māeʻaeʻa lomiga fou o Le Olomatamata? Seʻi vaai pe mafai ona e taliina fesili o loo mulimuli mai:

O le ā le taimi o le aso e fasia ai le mamoe mo le Paseka iā Nisani 14?

I nisi faaliliuga o le Tusi Paia, e faaaogā ai faaupuga e pei o le “afiafi pogipogi” po o le “goto ifo o le lā.” O lea, e tatau ona fasia le mamoe i le amataga o le aso o Nisani 14, pe a goto le lā a o malamalama pea. (Eso. 12:6)​—12/15, itulau e 18-19.

O ā mataupu silisili o le Tusi Paia e mafai ona faaaogā e talavou, ina ia faia ai ni filifiliga atamai?

E tolu mataupu silisili: (1) Ia saʻili muamua le Malo ma le amiotonu a le Atua. (Mata. 6:19-34) (2) E maua le fiafia i le auauna atu i isi. (Galu. 20:35) (3) Ia fiafia e auauna iā Ieova a o talavou. (Fai. 12:1)​—1/15, itulau e 19-20.

O ai tagata tiʻetiʻe solofanua e toʻafā ua amata a latou tiʻetiʻega talu mai le 1914?

O Iesu o lē o loo tiʻetiʻe i le solofanua paʻepaʻe, sa gaoioi e aveesea Satani ma ana temoni mai i le lagi. O lē o loo tiʻetiʻe i le solofanua mūmū, ua faaāta mai ai taua ia o loo aafia ai tagata. O lē o loo tiʻetiʻe i le solofanua uliuli e faaāta mai ai oge. O lē o loo tiʻetiʻe i le solofanua samasama vaivai, e na te aumaia le oti e ala i faamaʻi oti ia ua maliliu ai le faitau miliona o tagata. (Faaa. 6:2-8)​—2/1, itulau e 6-7.

O afea e faia ai le “faaipoipoga a le Tamaʻi Mamoe”? (Faaa. 19:7)

E faia le “faaipoipoga a le Tamaʻi Mamoe” pe a māeʻa le manumalo aʻiaʻi o le Tupu, o Iesu Keriso. O lona uiga, pe a mavae le faaumatiaga o Papelonia le Aai Tele, ma ua māeʻa le taua iā Amaketo.​—2/15, itulau e 10.

O ā māfuaaga na “faatalitali” ai tagata Iutaia i le uluaʻi senituri, i le oo mai o le Mesia? (Luka 3:15)

E tatou te lē o mautinoa pe na malamalama tagata Iutaia i le uluaʻi senituri i le valoaga a Tanielu e faatatau i le Mesia, e pei o i tatou. (Tani. 9:24-27) Peitaʻi, atonu sa latou faalogo e faatatau i le faalauiloaga a le agelu i nisi o leoleo mamoe, po o mea na taʻua e le perofeta fafine o Ana ina ua vaai i le pepe o Iesu i le malumalu. E lē gata i lea, sa ō mai le ʻau saʻili fetu e saʻili “lē ua fanau mai o le tupu o tagata Iutaia.” (Mata. 2:1, 2) Mulimuli ane, na faailoa atu e Ioane le Papatiso ua lē o toe umi ona aliaʻi mai lea o le Keriso.​—2/15, itulau e 26-27.

E faapefea ona ʻalofia le avea o la tatou upu Ioe ma Leai? (2 Kori. 1:18)

O le mea moni, e ono iai ni tulaga e lē maʻalofia e lē mafai ai ona faataunuu sa tatou fuafuaga po o se folafolaga. Peitaʻi, afai ua tatou faia se folafolaga po o se maliega, e tatau ona tatou faia le mea sili e faataunuu ai lenā folafolaga.​—3/15, itulau e 32.

E mafai faapefea ona tatou teena le faaosoosoga ia matamata i ata matagā?

E tolu auala: (1) Ia vave ona liliuese o tatou mata pe a faafuaseʻi ona vaai atu i ni ata matagā. (2) Ia pulea o tatou manatunatuga e ala i le taulaʻi atu i mea lelei ma tatalo i le Atua. (3) Ia pulea o tatou ala, e ala i le ʻalofia o le matamata i ata po o tuatusi i le Initaneti o loo faaali mai ai ata matagā.​—4/1, itulau e 10-12.

O ā iʻuga e leʻi faatalitalia e ono tulaʻi mai, pe afai e tuua e se Kerisiano lona aiga ae alu i se isi atunuu mo le saʻilia o tupe?

Pe a filifili mātua e lē nonofo faatasi ma fanau o se aiga, o le a mafatia fanau i le itu tau faalogona ma aafia ai tapulaa tau amio. Atonu o le a latou feita ai i se matua po o mātua. O le nonofo valavala ma le paaga, e ono faaosoosoina ai i le faia o amioga lē mamā i fafo atu o le faaipoipoga.​—4/15, itulau e 19-20.

Aiseā na gauia ai vae o pagota na faatautauina i luga o laau?

Na faasalaina i le oti e tagata Roma nisi o tagata solitulafono, e ala i le faatautau i luga o laau. Na talosaga e tagata Iutaia le gauia o vae o tagata solitulafono na faatautau i autafa o Iesu. O lenā faiga o le a vave ai ona maliliu ona ua faigatā ona mānava. O lea, e leʻi tuua le tino o se tasi ua faasalaina i le oti i luga o le laau i le pō atoa. (Teu. 21:22, 23)​—5/1, itulau e 11.

O ā fesili e fā e tatau ona tatou manatua a o talanoa atu i tagata i la tatou faiva?

O ai i latou? O fea o loo oʻu talanoa atu ai iā i latou? O ā taimi talafeagai e talanoa ai i tagata? E faapefea ona ou talanoa atu iā i latou?​—5/15, itulau e 12-15.

O le ā le tele ua oo i ai aafiaga o le ulaula tapaa?

I le senituri ua mavae, e 100,000,000 tagata na maliliu ona o le tapaa. I aso nei, e tusa ma le 6,000,000 soifua e maʻimau i tausaga taʻitasi.​—6/1, itulau e 3.