NA OLA aʻe Katherine i le Iunaite Setete, ma na papatiso o se Molimau a Ieova ina ua 16 ona tausaga. Sa maelega o ia i lana faiva, peitaʻi e toʻaitiiti na talilelei mai i le feʻau o le Malo i le vaipanoa sa ia talaʻi ai. Na ia taʻua: “Sa ou faitau i tala o mea na tutupu e faatatau i tagata na tatalo i le Atua, ina ia auina mai se tasi e fesoasoani e aʻoaʻo i latou e faatatau iā te Ia. Sa masani ona ou naunau ia maua se tagata o loo tatalo faapea i le Atua, ae sa leai se tasi.”

Ina ua mavae le tele o tausaga na talaʻi ai Katherine i le Iunaite Setete, na amata loa ona mafaufau e siitia atu i se isi vaipanoa, e toʻatele ai tagata e talia le feʻau o le Malo. Ae sa tomānatu o ia pe mafai ona ia faia faapea. Sa na o le faatasi ona alu ese mai i lona aiga, ma e na o le lua vaiaso na alu ese ai, ae sa ia matuā misia lona aiga i aso uma. E ui i lea, sa sili atu lona naunau ia fesoasoani i tagata o loo saʻili iā Ieova. Ina ua māeʻa ona iloilo nisi o vaipanoa e mafai ona siitia atu i ai, ona tusi atu lea i le lālā i Guam ma maua mai ai faamatalaga sa ia manaʻomia. Iā Iulai 2007 ina ua 26 tausaga o Katherine, na siitia atu ai i Saipan, o se motu i le Vasa Pasefika e pe ā ma le 6,000 maila le mamao mai i lona aiga. O ā ni mea na tutupu ina ua siitia atu o ia i inā?

E leʻi leva talu ona taunuu Katherine i lana faapotopotoga fou, ae feiloaʻi loa i se fafine na talia se suʻesuʻega faale-Tusi Paia, e igoa iā Doris, ua 40 ma ona tupu ona tausaga. Ina ua māeʻa ona la suʻesuʻeina uluaʻi mataupu e tolu o le tusi Aʻoaʻoga Moni, ae amata loa ona popole Katherine. Na ia taʻua: “O Doris o se tagata aʻoga e lelei tele, ma ou te leʻi manaʻo e faalēaogā ni ana taumafaiga. Ou te leʻi faia muamua lava se suʻesuʻega faale-Tusi Paia e faaauau pea, ma na ou lagona ai e tatau ona faia e se isi tuafafine e sili atu lona tomai le suʻesuʻega a Doris, pe atonu o se tuafafine e la te tupulaga faatasi.” Na tatalo Katherine iā Ieova ina ia maua se tuafafine talafeagai e faia le suʻesuʻega a Doris, ona mafaufau lea e talanoa atu iā Doris e faatatau i le suiga o lana faiaʻoga.

Na faapea mai Katherine: “A o oʻu leʻi talanoa atu e faatatau i le suiga, sa fia talanoa mai Doris iā te aʻu e faatatau i se faafitauli. Ina ua uma ona ou faalogologo atu i lona faafitauli, sa ou taʻu atu i ai le auala na fesoasoani mai ai Ieova iā te aʻu, e fesagaʻia se faafitauli o le olaga e talitutusa ma lona faafitauli. Sa ia faafetaia aʻu mo le fesoasoani.” Sa faapea mai Doris iā Katherine: “Ua faaaogā e Ieova oe e fesoasoani mai iā te aʻu. O le aso muamua na e sau ai i loʻu fale, sa ou faitauina le Tusi Paia mo le tele o itula. Sa ou  tagi ma ōle atu i le Atua e auina mai se tasi, e faamalamalama mai iā te aʻu le Tusi Paia. Ae teʻi ua e tuʻituʻi mai i loʻu faitotoʻa. Na talia e Ieova laʻu tatalo!” Na tau maligi loimata o Katherine a o ia faamatalaina lenā tala faamomoiloto. Na ia taʻua: “O le faamatalaga a Doris, o le tali lenā i laʻu tatalo. Na faailoa mai ai e Ieova iā te aʻu, e mafai ona ou faaauauina lana suʻesuʻega.”

Na papatiso Doris i le 2010. I le taimi nei ua tele ni suʻesuʻega faale-Tusi Paia o loo ia faia. Na tusi Katherine e faapea: “Maʻeu loʻu fiafia ona ua mafai ona ou fesoasoani i se tagata lotofaamaoni, e avea ma auauna a Ieova, o se mea ua leva ona ou faanaunau i ai.” Ua auauna nei ma le fiafia Katherine o se paeonia faapito i Kosrae, o se motu i le Pasefika.

E silia i le selau uso ma tuafāfine mai i isi atunuu (e amata mai i le 19 i le 79 tausaga), ua auauna i vaipanoa o loo tele ai le manaʻoga i Maikoronesia. Na faamatala manino mai e Erica faalogona o na auauna maelega. Na siitia atu Erica i Guam i le 2006 ina ua 19 ona tausaga. Na ia taʻua: “E ese loʻu fiafia e talaʻi i se vaipanoa o loo galala faaleagaga ai tagata mo le upu moni. Ou te faafetaia Ieova ona o le fesoasoani mai iā te aʻu e auai i lenei vala o le auaunaga, auā o le auala sili lea o le olaga.” O loo auauna nei Erica o se paeonia faapito i Ebeye, o se motu i le Marshall Islands. Peitaʻi, e iai lava luʻi a o auauna ai i se isi atunuu. Seʻi o tatou iloiloina ni luʻi se tolu, ma vāai pe na faapefea iā i latou na siitia atu i Maikoronesia ona taulima na luʻi.

Auala e ola ai. Ina ua taunuu Simon e 22 ona tausaga i Palau i le 2007, na vave ona ia mātauina e faapea, pe a fua i lona totogi sa maua i lona atunuu i Egelani, e na o sina vaega lea e na te mauaina mai i lona totogi i lana galuega i Palau. “Sa manaʻomia ona ou aʻoaʻoina e lē tatau ona ou faatauina so o se mea ou te manaʻo i ai. I le taimi nei, ua ou filifili ma le faaeteete meaʻai e tatau ona faatau, ma asiasi i isi faleoloa ina ia maua oloa taugofie. Pe a leaga se mea ma ua manaʻomia ona faaleleia, ona ou alu lea i faleoloa e taugofie ai mea, e faatau mai ai le vaega lea e manaʻomia ona faaleleia, ma suʻe se tasi e fesoasoani mai iā te aʻu e faaleleia lenei mea.” O le ā se aafiaga o le taumafai e faafaigofie le olaga? Na faapea mai Simon: “Na fesoasoani iā te aʻu ou te iloa ai mea e sili ona tāua i le olaga, ma le auala e faafaigofie ai le olaga. Sa ou mautinoa na fesoasoani mai Ieova iā te aʻu i le tele o mea. A o faagasolo le fitu tausaga o laʻu auaunaga i inei, e leai se taimi na faapea ai ua leai saʻu meaʻai ma se fale ou te moe ai.” Ioe, e lagolagoina e Ieova i latou e faafaigofie o latou olaga, ona e latou te mananaʻo e saʻili muamua le Malo.​—Mata. 6:32, 33.

Misia le aiga ma uō. Ua faapea mai Erica: “Ou te māfana tele i loʻu aiga, ma sa ou popole ina neʻi avea loʻu misia o loʻu aiga ma itu e aafia ai laʻu faiva.” O le ā na ia faia ina ia sauniunia ai o ia lava? “A o oʻu leʻi siitia atu, sa ou faitau i le Olomatamata e faatatau i mataupu o le misia o le aiga. Sa mafai ai ona sauniunia loʻu loto e feagai ma lenā luʻi. I se tasi o mataupu, na faamautinoa  atu ai e se tinā i lana tama teine e uiga i le tausiga a Ieova e faapea, ʻE sili atu ona lelei le tausiga a Ieova iā te oe nai lo o laʻu tausiga.’ O lenā faamautinoaga na matuā faamalosia ai aʻu.” O loo auauna Hannah ma lana tane o Patrick i Majuro i le Marshall Islands. Sa foʻia e Hannah le luʻi o le misia o lona aiga ma ana uō, e ala i le uaʻi atu i uso ma tuafāfine o le la faapotopotoga. Ua ia taʻua: “Ou te faafetaia e lē aunoa Ieova mo le ʻauuso i le lalolagi atoa, auā o i latou foʻi o loʻu aiga. Pe ana lē seanoa la latou lagolagosua alofa, semanū e lē mafai ona ou auauna i le mea o loo tele ai le manaʻoga.”

Atiaʻe ni faauōga. Na faapea mai Simon: “Pe a e taunuu i se isi atunuu, e toetoe o mea uma e ese i lau vaai. O nisi taimi ou te misia le faia o ni tala mālie, ma malamalama lelei tagata i le uiga o aʻu tala.” Ua faapea mai Erica: “I le taimi muamua, sa ou lagona le tuua toʻatasi, ae sa fesoasoani lenā e iloilo ai le māfuaaga na ou siitia mai ai. Na ou siitia mai e faalautele laʻu auaunaga iā Ieova, ae e lē ina ia ou maua ai ni aogā mo aʻu lava. Mulimuli ane, sa ou atiaʻe ni faauōga lelei ia e pele iā te aʻu.” Sa taumafai malosi Simon e aʻoaʻoina le gagana Palau, ina ia mafai ai ona ʻfaalautele atu lona loto’ i uso ma tuafāfine o le faapotopotoga. (2 Kori. 6:13) O ana taumafaiga e aʻoaʻoina le gagana, na alofagia ai o ia e uso ma tuafāfine. Pe a galulue faatasi ē ua siitia atu ma le faapotopotoga, o le a latou maua uma ai ni faauōga māfana i le faapotopotoga. O ā nisi taui e maua e i latou ua lotomalilie e ofo atu i latou lava, e auauna i vaipanoa o loo tele ai le manaʻoga?

Na faapea mai Paulo: “O lē e tele ana fatu e lūlū, e tele foʻi ana e selesele mai.” (2 Kori. 9:6) O lenei mataupu silisili e mafai ona faatatau atu i ē o loo faalautele atu la latou faiva. O ā ni iʻuga lelei ua latou “selesele mai” a o auauna ai i Maikoronesia?

O loo tele pea avanoa i Maikoronesia e amata ai ni suʻesuʻega faale-Tusi Paia, ma iloa ai le agaʻigaʻi i luma faaleagaga o tagata aʻoga taʻitoʻatasi, pe a latou aʻoaʻoina ma faatatau upu moni o le Afioga a le Atua. Sa talaʻi foʻi Patrick ma Hannah i Angaur, o se motu laʻitiiti e 320 tagata e nonofo ai. Ina ua mavae le lua masina na la talaʻi ai i inā, sa la feiloaʻi ai i se tinā nofofua. Na vave ona talia e lenei tinā se suʻesuʻega, matuā talisapaia upu moni o le Tusi Paia, ma faia suiga e tele i lona olaga. Ua faapea mai Hannah: “O aso uma e māeʻa ai le suʻesuʻega a lenei tinā, a o ma tuumuli ese atu i a ma uila vilivae, e ma te tilotilo le tasi i le isi ma faapea atu: ʻFaafetai lava Ieova!’ Ou te iloa atonu e iai se isi auala e ono tosina mai ai e Ieova lenei fafine iā te ia. Ae ona o le auauna i le mea o loo tele ai le manaʻoga, sa mafai ai ona ma maua lenei fafine e pei o se mamoe, ma fesoasoani i ai ina ia iloa Ieova. O se tasi lea o taui sili ua ma tofo i ai i o ma olaga.” E pei ona taʻua e Erica: “Pe a e fesoasoani i se tasi ia iloa Ieova, o le a e maua le olioli e lē mafaatusalia.”

O le tele o vaipanoa o loo iai le manaʻoga mo nisi tagata talaʻi o le Malo. Pe e mafai ona e siitia atu i nisi vaipanoa o loo manaʻomia ai se fesoasoani? Ia tatalo iā Ieova ina ia faamalosia lou faanaunauga e faalautele atu lau faiva. Ia faailoa atu lenā mataupu i toeaina o le faapotopotoga, le ovasia o le matagaluega, po o i latou sa maua le faaeaga e auauna i se vaipanoa sa manaʻomia ai le fesoasoani. Pe a amata au fuafuaga, ia tusi atu i le lālā o loo vaavaaia oganuu o loo e fuafua e auauna ai, ma talosaga atu mo nisi faamatalaga. * Atonu e mafai ona e aofia ai i le faitau afe o uso ma tuafāfine, o ē matutua ma talavou, faaipoipo pe nofofua, ua lotomalilie e ofo atu i latou lava, ma tofo i le tele o le olioli ua latou selesele mai i le auaunaga.