1, 2. E faapefea ona fesootaʻi mai Ieova i ana auauna?

I LE talafaasolopito o le Tusi Paia, e eseese auala na maua ai e tagata taʻiala mai iā Ieova. Sa fetalai mai le Atua i nisi e ala mai i agelu, pe ala mai i faaaliga po o miti, e faailoa mai ai iā i latou mea o le a tutupu i le lumanaʻi. Sa tofia atu foʻi e Ieova iā i latou ni galuega patino e fai. (Nu. 7:89; Eseki. 1:1; Tani. 2:19) Sa maua e isi le taʻitaʻiga e ala mai i tagata ua fai ma sui o Ieova, ia o loo auauna i le vaega faalelalolagi o lana faalapotopotoga. E tusa po o le ā le auala na maua ai e tagata o Ieova ana fetalaiga, ae sa faamanuiaina ē sa usiusitaʻi i ana faatonuga.

² I aso nei, o loo taʻitaʻia e Ieova ona tagata e ala mai i le Tusi Paia, lona agaga paia, ma le faapotopotoga. (Galu. 9:31; 15:28; 2 Timo. 3:16, 17) Talu ai e manino taʻiala e tatou te maua mai iā te ia, ua pei ai lava o loo ʻfaalogo atu o tatou taliga i le upu mai i o tatou tua o loo faapea mai: “O le ala lenei. Ia outou savavali ai.”’ (Isa. 30:21) E faaoo mai foʻi e Iesu iā i tatou le siʻufofoga o Ieova, a o ia taʻitaʻia le faapotopotoga e ala mai i le “pologa faamaoni ma le faautauta.” (Mata. 24:45) Talu ai e faalagolago lo tatou ola e faavavau i lo tatou usiusitaʻi, o lea, e ao ona tatou faatāua nei taʻitaʻiga ma faatonuga.​—Epe. 5:9.

3. O le ā e ono faigatā ai ona tatou tali atu i taʻiala a Ieova? (Tagaʻi i le ata i luga aʻe o le matua.)

³ E manaʻo Satani le Tiapolo ia faalēaogāina taʻiala faasaoola ia  e tatou te maua mai iā Ieova. E lē gata i lea, ona o o tatou ʻloto faaʻoleʻole,’ e ono faigatā ai ona tatou tali lelei atu i faatonuga a Ieova. (Iere. 17:9) O lea, seʻi o tatou talanoaina auala e mafai ai ona tatou manumalo mai i tulaga e faigatā ai ona faalogo atu i le siʻufofoga o Ieova. O le a tatou iloiloina foʻi pe faapefea i fesootaʻiga vavalalata ma Ieova, ona puipuia ai la tatou faiā ma ia e tusa po o ā o tatou tulaga.

4. Ua faapefea ona taumafai Satani e taaʻina mafaufauga o tagata?

⁴ E taumafai Satani e taaʻina mafaufauga o tagata, e ala i faamatalaga ma faasalalauga taufaasesē. (Faitau le 1 Ioane 5:19.) E lē gata i lomiga, ae ua matuā tumu foʻi le lalolagi atoa i faasalalauga e ala mai i leitiō, TV ma le Initaneti. E ui atonu e faasalalau mai i nei auala o faasalalauga ni faamatalaga mananaia, ae e masani ona latou lagolagoina amioga ma taʻiala e feteenaʻi ma taʻiala a Ieova. (Iere. 2:13) O se faaaʻoaʻoga, e faaalia i tala fou ma ata tifaga le faaipoipo o le itupā e tasi e pei o se mea e lelei, ma e manatu le toʻatele ua faasāsā naʻuā mea o loo taʻua i le Tusi Paia, e faatatau i faiga faatauatane ma tauafafine.​—1 Kori. 6:9, 10.

5. E mafai faapefea ona tatou ʻalofia le taaʻina i faamatalaga pepelo a Satani?

⁵ E faapefea i ē e naunau i le amiotonu a le Atua, ona ʻalofia le taaʻina i faamatalaga pepelo a Satani i aso nei? E mafai faapefea ona latou iloa le eseesega o le lelei mai i le leaga? ʻE ala i le leoleoina pea o i latou e tusa ai ma le afioga a le Atua.’ (Sala. 119:9) O loo iai i le Afioga tusia a le Atua taʻiala tāua, e mafai ai ona tatou iloa le eseesega o faamatalaga moni mai i faamatalaga taufaasesē. (Faata. 23:23) Na sii mai e Iesu le mau o le Tusi Paia ina ua fetalai e faapea, ʻe ola le tagata i afioga uma e tulei mai i le fofoga o Ieova.’ (Mata. 4:4) E ao ona tatou iloa le auala e faatatau ai mataupu silisili o le Tusi Paia i o tatou olaga. O se faaaʻoaʻoga, a o leʻi taitai ona tusia e Mose le tulafono a Ieova e faatatau i le mulilua, sa iloa lelei e le talavou o Iosefa, o le mulilua o se agasala i le Atua. Sa taumafai le avā a Potifara e faatosina Iosefa e fai le mea sesē, ma o le tele o taimi na ia tauanau ai iā te ia. E ui i lea, e leʻi faatagaina e Iosefa le leo o le fafine e faataligatuli ai i le siʻufofoga o Ieova, ona e leʻi manaʻo lava e lē usitaʻi iā te ia. (Faitau le Kenese 39:7-9.) Ina ia iloa le eseesega o le saʻo mai i le sesē, e tāua tele ona faalogo atu i le siʻufofoga o Ieova, ae aua le faalogo i faamatalaga pepelo faifai pea a Satani.

6, 7. O le ā e tatau ona tatou faia ina ia ʻalofia ai fautuaga leaga a Satani?

⁶ Ua tumu le lalolagi i aʻoaʻoga ma talitonuga feteenaʻi a lotu, ma ua manatu ai le toʻatele e leai se aogā e saʻili ai fua mo le tapuaʻiga moni. Peitaʻi, ua matuā faamanino mai e Ieova ana taʻiala mo ē e lotomalilie e faatatauina. E tatau ona tatou filifili po o ai o le a tatou faalogo i ai. Talu ai e lē mafai ona tatou faalogo atu i ni leo se lua i le taimi e tasi, e ao la ona tatou ʻiloa le leo’ o Iesu ma faalogo atu iā te ia. Ua tofia o ia  e Ieova e leoleoina Ana mamoe.​—Faitau le Ioane 10:3-5.

⁷ Na fetalai Iesu: “Ia outou utagia mea ua outou faalogo i ai.” (Mare. 4:24) E manino ma saʻo fautuaga a Ieova, ae e tatau ona tatou uaʻi atu ma faalogo i ai, e ala i le sauniunia o o tatou loto e talia na fautuaga. Pe a lē faaeteete, e tatou te ono faalogo atu i fautuaga leaga a Satani nai lo o fautuaga alofa a Ieova. Seʻi aua lava neʻi pulea lou olaga i musika, vitiō, polokalame o le TV, tusi, aumea, faiaʻoga po o ē atamamai o lenei lalolagi.​—Kolo. 2:8.

8. (a) E faapefea i o tatou loto ona faapogaia i tatou e lolo atu i mailei a Satani? (e) O le ā e mafai ona tupu iā i tatou pe a lē amanaʻia faailoga e lapataʻia ai?

⁸ Ua iloa e Satani e iai o tatou faanaunauga agasala, ma ua ia taumafai e uunaʻia i tatou ia faamalieina. Pe a osofaʻia i tatou e Satani i lenei auala, o le a avea o se luʻi e matuā faigatā le tausisia o lo tatou faamaoni. (Ioa. 8:44-47) E mafai faapefea ona tatou manumalo i lenei luʻi? Seʻi manatu i le tulaga o se tagata o loo alu uma lona taimi i mea faafiafia, ma iʻu ai ina ia faia se mea sesē sa manatu e lē taitai ona ia faia. (Roma 7:15) Aiseā ua iʻu ai i lenei tulaga faanoanoa? Atonu sa faasolosolo ona ia lē lagona atu le siʻufofoga o Ieova. Atonu e na te leʻi mātauina pe e leʻi manaʻo foʻi e amanaʻia faailoga e lapataʻia ai, e tusa o le mea ua tupu i lona loto. O se faaaʻoaʻoga, atonu ua lē toe tatalo, seāseā talaʻi, pe amata foʻi ona fai ma misi sauniga. O le iʻuga, ua ia lolo atu i ona tuʻinanauga ma faia le mea sa ia iloa e sesē. E mafai ona tatou ʻalofia lenā mea sesē mataʻutia, pe afai e mātaʻitū pea so se faailoga e lapataʻia ai, ma vave ona gaoioi e faasaʻo mea ua sesē. E lē gata i lea, afai e tatou te faalogo i le siʻufofoga o Ieova, o le a tatou lē talia so o se manatu o ē ua liliuese mai i le upu moni.​—Faata. 11:9.

9. Aiseā e tāua tele ai ona vave iloa ni faanaunauga agasala?

⁹ E ono faasaoina le ola o se tagata pe afai e vave ona ia iloa le faamaʻi. I se tulaga talitutusa, e mafai ona ʻalofia se iʻuga matuā faanoanoa, pe afai e vave ona tatou iloa ni faanaunauga e taʻitaʻia atu ai i faaosoosoga. O le taimi lava e iloa ai na faanaunauga, o se mea atamai le vave faia o se gaoioiga, a o leʻi ʻpuʻe ola i tatou e Satani ina ia fai lona loto.’ (2 Timo. 2:26) O le ā e tatau ona faia pe afai ua iloa ua faasolo ina mamao ese o tatou mafaufauga ma faanaunauga, mai i le mea o loo finagalo ai Ieova iā i tatou? E tatau ona toe foʻi atu ma le lotomaulalo iā te ia e aunoa ma le faatalatū, uaʻi atu i ana fautuaga, ma faalogo atu iā te ia ma o tatou lotoatoa. (Isa. 44:22) E tatau ona tatou iloa, o le faia o se filifiliga sesē, e ono telē se aafiaga lē lelei iā i tatou, ma mafatia ai i ni iʻuga mataʻutia i lenei faiga o  mea. Ua sili atu ai la ona tāua ona tatou ʻalofia le faasesēina, e ala i le vave gaoioi e ʻalofia le faia o lenā mea sesē matuiā.

10, 11. (a) E faapefea ona iloa le tagata faamaualuga? (e) O le ā le lesona ua tatou aʻoaʻoina mai i le ala leaga a Koru, Tatano ma Apiramo?

¹⁰ E tatau ona iloa e mafai e o tatou loto ona taaʻina ese i tatou. E matuā malolosi faanaunauga agasala i totonu o i tatou. O se faaaʻoaʻoga, o le faamaualuga ma le matapeʻapeʻa. Seʻi iloilo pe faapefea i nei uiga ona aafia ai la tatou faalogo i le siʻufofoga o Ieova, ma taʻitaʻia atu ai i se ala leaga. O le tagata faamaualuga e mafaufau e faapea e sili lava ona manatu. E ono manatu e iai lana aiā e fai ai so o se mea e manaʻo i ai, ma e leai se isi e taʻuina atu iā te ia le mea e tatau ona fai. O lea, e ono manatu o ia e na te lē manaʻomia le taʻitaʻiga ma fautuaga a isi Kerisiano, toeaina, ma le faalapotopotoga a le Atua. O se tagata faapena e toetoe lava ona ia lē lagona atu le siʻufofoga o Ieova.

¹¹ A o faimalaga le nuu o Isaraelu i le vao, sa fouvale Koru, Tatano ma Apiramo i le pule a Mose ma Arona. O lo latou faamaualuluga, na faia ai e le ʻaufouvale a latou lava faatulagaga e tapuaʻi atu ai iā Ieova. Na faapefea ona tali mai Ieova? Sa ia faaumatia uma i latou. (Nu. 26:8-10) Maʻeu se lesona tāua ua tatou aʻoaʻoina mai i lenei tala! O le fouvale faasaga iā Ieova e iʻu ai i le malaia. Ia manatua foʻi, “e muamua le faamaualuga i le paʻū.”​—Faata. 16:18; Isa. 13:11.

12, 13. (a) Faamatala mai se faaaʻoaʻoga e faaalia ai pe faapefea i le matapeʻapeʻa ona taʻitaʻia atu ai i le malaia. (e) Faamatala pe faapefea ona vave faatupulaʻia le matapeʻapeʻa pe afai e lē pulea.

¹² Seʻi mafaufau foʻi i le uiga lenei o le matapeʻapeʻa. O le tagata e matapeʻapeʻa, e masani ona fai le mea e manaʻo i ai ma sopotapulaa i amioga e tatau ona iai. Ina ua uma ona faamālōlō le taʻitaʻiʻau Suria o Naamanu mai i lona maʻi lepela, sa ia ofo atu meaalofa i le perofeta o Elisaia, ae e na te leʻi taliaina. Peitaʻi, sa manaʻonaʻo le auauna a Elisaia, o Kiasi, i na meaalofa. Na faapea ifo Kiasi iā te ia lava: ʻO loo soifua Ieova, ou te tuliloa iā Naamanu ina ia ou maua mai se mea iā te ia.’ E aunoa ma le iloa e Elisaia, sa tamoʻe atu Kiasi e tuliloa Naamanu ma matuā pepelo i ai, ina ia maua “se taleni siliva ma ni ofu se lua.” O le ā na tupu ina ua faia e Kiasi lenei gaoioiga ma pepelo i le perofeta a Ieova? Sa pipii atu le lepela a Naamanu ia Kiasi o lē e matapeʻapeʻa.​—2 Tu. 5:20-27.

¹³ E ono amata ona matapeʻapeʻa i sina mea itiiti, ae afai e lē pulea, o le a faasolo ina tuputupu aʻe ma iʻu ina pulea ai se tagata. Ua faataʻitaʻi mai i le tala iā Akana le malosi o lenei uiga o le matapeʻapeʻa. Seʻi mātau le vave ona tuputupu aʻe o le uiga matapeʻapeʻa o Akana. Na ia faapea mai: “Ina ua ou vaaia i le vete se ofu matagofie taugatā mai i Senara, ma tupe siliva e lua selau sekeli, ma le auro e lima sefulu sekeli lona mamafa, ona ou manaʻo lea i ai ma ou aveina.” Nai lo o le teena o le faanaunauga sesē, sa gaoia ma le matapeʻapeʻa e Akana ʻoa ma nanā i lalo o lona faleʻie. Ina ua faaalia le mea sesē a Akana, sa taʻu atu i ai e Iosua o le a aumaia e Ieova le malaia iā te ia. O le aso lava lenā na fetogi ai i maa Akana ma lona aiga ma feoti ai. (Iosua 7:11, 21, 24, 25) E faaauau pea ona avea le matapeʻapeʻa o se lamatiaga mo i tatou. O lea, seʻi ʻleoleo iā i tatou i le manaʻo tele.’ (Luka 12:15) Talu ai e ono iā i tatou ni mafaufauga lē lelei pe faaāta i mafaufau mea lē mamā, e tāua tele ona pulea o tatou mafaufau, ma aua neʻi faatagaina tuʻinanauga ia oo atu i se tulaga e tatou te faia ai se agasala.​—Faitau le Iakopo 1:14, 15.

14. O le ā e tatau ona fai pe a mātauina ua tatou lolo atu i faanaunauga faamaualuga ma le matapeʻapeʻa?

¹⁴ O le faamaualuga ma le matapeʻapeʻa e mafai ona iʻu ai i mafatiaga. O le mafaufau i iʻuga o le uia o se ala sesē, o le a fesoasoani iā i  tatou e ʻalofia ai le faataga o na faanaunauga, e lē lagona ai le siʻufofoga o Ieova. (Teu. 32:29) O loo taʻu mai e le Atua moni i le Tusi Paia le ala saʻo, ma faamatala mai aogā e maua pe a savavali i lenā ala, faapea iʻuga e iʻu i ai pe a savavali i le ala sesē. Pe a uunaʻia i tatou e o tatou loto e fai se mea ona o le faamaualuga po o le matapeʻapeʻa, o se gaoioiga atamai le mafaufau i iʻuga e oo i ai. E tatau ona iloilo pe faapefea i se gaoioiga sesē ona aafia ai i tatou, o ē e pele iā i tatou, ae sili ai o la tatou faiā ma Ieova.

15. O le ā e tatou te aʻoaʻoina e faatatau i fesootaʻiga, mai i le faaaʻoaʻoga a Iesu?

¹⁵ E finagalo Ieova mo le mea e sili ona lelei mo i tatou. (Sala. 1:1-3) E na te saunia mai le tele o taʻiala pe a tatou manaʻomia. (Faitau le Eperu 4:16.) E ui lava sa lelei atoatoa Iesu, ae sa faalagolago pea o ia i ana fesootaʻiga ma Ieova ma tatalo e lē aunoa. E mataʻina auala na lagolagoina ma taʻitaʻia ai e Ieova Iesu. Sa auina mai e Ieova agelu e auauna atu iā te ia, saunia mai Lona agaga paia e fesoasoani iā te ia, ma taʻitaʻia a o filifilia ona aposetolo e toʻa 12. Sa lagona atu le siʻufofoga o Ieova o fetalai mai i le lagi, e faailoa mai lona lagolagoina ma lona finagalo malie iā Iesu. (Mata. 3:17; 17:5; Mare. 1:12, 13; Luka 6:12, 13; Ioa. 12:28) I le pei o Iesu, e ao ona sasaa atu o tatou loto i le Atua e ala i le tatalo. (Sala. 62:7, 8; Epe. 5:7) E mafai ona tatou maua se fesootaʻiga vavalalata ma Ieova e ala i le tatalo, ma mafai ai ona ola i se olaga e faamamaluina ai o ia.

16. E mafai faapefea ona tatou maua le fesoasoani a Ieova, ina ia mafai ai ona faalogo atu i lona siʻufofoga?

¹⁶ E ui lava e aumaia e Ieova ana taʻiala i so o se tasi, ae e na te lē faamalosia so o se tasi e mulimuli i ai. E manaʻomia ona tatou ōle atu mo lona agaga paia, ma o le a ia matuā foaʻiina mai. (Faitau le Luka 11:10-13.) Peitaʻi, e tāua ona ʻuaʻi atu i la tatou faalogo.’ (Luka 8:18) O se faaaʻoaʻoga, afai e ōle atu iā Ieova e fesoasoani mai ia tatou manumalo i se faanaunauga i faiga lē mamā, ae o loo faaauau ona matamata i ata matagā taufeusuaʻiga po o ata tifaga lē mamā, o lona uiga ua tatou faagutugutulua. E manaʻomia ona tatou iai i nofoaga po o tulaga o loo iai le agaga o Ieova. Ua tatou iloa e iai le agaga o Ieova i sauniga a le faapotopotoga. Ua ʻalofia e le toʻatele o auauna a Ieova tulaga mataʻutia, e ala i le faalogo atu i le siʻufofoga o Ieova i taimi o sauniga. O le iʻuga, ua latou nofouta ai i faanaunauga sesē e mapuna aʻe i o latou loto, ma faasaʻo o latou ala.​—Sala. 73:12-17; 143:10.

17. Aiseā o se lamatiaga ai le faalagolago iā i tatou lava?

¹⁷ Seʻi manatu i le tupu o Isaraelu anamua, o Tavita. A o talavou, sa tau o ia ma manumalo i le Filisitia tinoese o Koliata. Sa avea Tavita ma fitafita, o se tupu, o sē e puipuia ma faia faaiʻuga mo se nuu. Peitaʻi, ina ua faalagolago iā te ia lava, sa faasesēina o ia e lona loto ma faia se agasala matuiā ma Patesepa, ma oo lava ina ia faia se fuafuaga e fasiotia ai le tane a Patesepa, o Uria. Ina ua aʻoaʻia Tavita, sa ia taʻutino atu ma le lotomaulalo lana agasala, ma toe faaleleia le la faiā ma Ieova.​—Sala. 51:4, 6, 10, 11.

18. O le ā e fesoasoani iā i tatou ina ia faalogo ai pea i le siʻufofoga o Ieova?

¹⁸ Seʻi o tatou utagia le fautuaga o loo i le 1 Korinito 10:12, ia aua neʻi soona mautinoa naʻuā. Talu ai e lē mafai ona tatou ʻfaatonuina le mea e tatou te ui ai,’ e iʻu ai ina tatou faalogo atu a lē o le siʻufofoga o Ieova, po o le leo o lona Fili Sili. (Iere. 10:23) Tau ina ia tatou tatalo e lē aunoa, mulimuli i le taʻitaʻiga a le agaga paia, ma faalogologo lelei pea i le siʻufofoga o Ieova.