NA TAGI masūsū Peteru ina ua uma ona ia faafitia Iesu. E ui sa manaʻomia ona tauivi le aposetolo ia toe maua le paleni faaleagaga, ae na finagalo Iesu e faaaogā o ia e fesoasoani i isi. O lea, na fetalai atu ai Iesu: “Pe a e toe foʻi mai, ia e faamalosi i ou uso.” (Luka 22:32, 54-62) Na iʻu ina avea Peteru ma poutū o le faapotopotoga Kerisiano i le uluaʻi senituri. (Kala. 2:9) I se tulaga talitutusa, atonu e mafai ona toe auauna se tane na avea muamua ma toeaina, ma olioli i le faamalosia o uso ma tuafāfine i le itu faaleagaga.

E iai nisi ua aveesea o latou faaeaga o ni ovasia, ma e ono mapuna aʻe ai faalogona lē taulau. Sa auauna muamua Iulio o se toeaina i Amerika i Saute mo le silia i le 20 tausaga. * Na ia taʻua: “Sa avea ma vaega tele o loʻu olaga le saunia o lauga, asiasi i uso, ma le leoleoina o sui taʻitasi o le faapotopotoga. Ae na faafuaseʻi lava ona leai uma atu na mea. I se aotelega, na avea lenā ma taimi sili ona faigatā iā te aʻu.” I le taimi nei, ua toe avea Iulio o se toeaina.

Na tusi Iakopo: “Oʻu uso e, ia outou manatu o se mea e olioli tele ai, pe a outou fesagaʻi ma tofotofoga eseese.” (Iako. 1:2) Sa faatatau atu upu a Iakopo i tofotofoga e oo i ai, ona o sauāga ma lo tatou tulaga lē lelei atoatoa. Na ia taʻua foʻi tuʻinanauga manatu faapito, le faailoga tagata ma isi uiga. (Iako. 1:14; 2:1; 4:1, 2, 11) Atonu e tatou te lagona le tigā pe a aʻoaʻia i tatou e Ieova. (Epe. 12:11) Peitaʻi, e lē tatau ona avea na tofotofoga ma itu e aveesea ai lo tatou olioli.

E tusa po ua aveesea so tatou faaeaga i le faapotopotoga, ae o loo maua pea le avanoa e iloilo ai le  malosi o lo tatou faatuatua, ma faaalia atu le alofa mo Ieova. E mafai foʻi ona manatunatu i le pogai ua tatou auauna ai iā te ia. Pe na māfua ona aapa atu i lenā faaeaga ona e mo so tatou lava lelei? Pe sa uunaʻia i tatou ona o le alofa i le Atua, ma le talitonu maumauaʻi o Ieova e ana le faapotopotoga ma e tatau ona tausia lelei? (Galu. 20:28-30) O uso na avea muamua ma toeaina o loo faaauau pea ona faia le auaunaga paia, ua latou faamaonia atu i tagata uma e aofia ai ma Satani, e moni lo latou alofa mo Ieova.

Ina ua aʻoaʻia le tupu o Tavita ona o ana agasala matuiā, na ia talia le aʻoaʻiga ma sa faamagaloina o ia. Na pese Tavita: “E fiafia le tagata ua faamagaloina lana solitulafono, o lē ua ufitia lana agasala. E fiafia foʻi le tagata e lē taʻusesēina e Ieova, ma e lē faaʻoleʻole lona loto.” (Sala. 32:1, 2) O le aʻoaʻiga na mafai ai ona faamamāina le tulaga o Tavita, ma na avea ai o ia ma leoleo mamoe e sili atu ona lelei mo tagata o le Atua.

O uso e toe auauna o ni toeaina, e masani lava ona avea ma leoleo mamoe e sili atu ona lelei nai lo o le taimi muamua. Na faapea mai se tasi o na toeaina: “Ua sili atu nei ona ou malamalama i le auala e feutagaʻi ai ma i latou na faia se mea sesē.” Na taʻua foʻi e se isi toeaina: “Ua sili atu ona ou faatāua i le taimi lenei loʻu faaeaga o le auauna i uso.”

Ua taʻua i le Salamo 103:9: “E lē vaavaai masei pea o ia [Ieova] i taimi uma.” O lea, ia aua neʻi o tatou manatu e lē mafai ona toe maufaatuatuaina e Ieova, se tasi na faia se mea sesē matuiā. O Risati o sē na aveesea ona faaeaga o se toeaina, ina ua mavae le tele o tausaga o auauna ai. Na ia taʻua: “Sa ou matuā lē fiafia i aʻu lava mea sesē na fai. Ua tele tausaga o taofia aʻu mai i le toe auauna atu i uso o se ovasia, ona o faalogona lē agavaa. Sa ou lē mautinoa pe mafai ona toe faamaonia atu e mafai ona maufaatuatuaina aʻu. Ae ona sa ou fiafia e fesoasoani i isi, sa mafai ai ona ou faia ni suʻesuʻega faale-Tusi Paia, faalaeiau uso i le Maota mo Sauniga, ma galulue ma i latou i le faiva i le fanua. Sa fesoasoani lenā ou te toe maua ai le mautinoa, ma ua ou toe auauna nei o se toeaina.”

O le teuloto pea o le ita, e mafai ona taofia ai se uso mai i le auauna o se toeaina. O se mea lelei le  faataʻitaʻi i le auauna a Ieova o Tavita, o lē na sola ese mai i le tupu lotoleaga o Saulo! Na musu Tavita e taui atu le leaga o Saulo, e ui lava sa ia maua avanoa e faia ai faapea. (1 Samu. 24:4-7; 26:8-12) Ina ua maliu Saulo i le taua, sa faanoanoa tele Tavita ma manatu iā Saulo ma lona atalii o Ionatana, o ni tagata “agaalofa ma tausaafia.” (2 Samu. 1:21-23) E leʻi teuloto pea e Tavita ni mea leaga.

Pe a e manatu e leʻi saʻo le auala na taulima ai pe na faauiga sesē e isi au gaoioiga, ia aua neʻi faatagaina le ita e pulea ou manatu. O se faataʻitaʻiga, sa aveese tiute tauave o Viliamu o se toeaina, ina ua mavae le pe ā ma le 30 tausaga o auauna ai i Peretania. Sa ita o ia i nisi o toeaina. O le ā sa fesoasoani iā te ia e toe maua ai se tulaga paleni? Na ia taʻua: “Na faalaeiauina aʻu ina ua ou faitau i le tusi o Iopu. Pe afai sa fesoasoani Ieova iā Iopu e fai se faaleleiga ma ana aumea e toʻatolu, e mautinoa foʻi la o le a ia fesoasoani mai iā te aʻu, ina ia ou faia se faaleleiga ma toeaina Kerisiano!”​—Iopu 42:7-9.

Pe afai sa e filifili e mālōlō mai i le leoleoina o le lafu a le Atua, e lelei pe a iloilo le māfuaaga na e faia ai faapea. Pe sa lofitūina oe ona o ni faafitauli e patino iā te oe lava? Pe sa sili atu ona tāua isi mea i lou olaga? Pe sa faavaivaia oe ona o tulaga lē lelei atoatoa o isi? Po o le ā lava le tulaga, ia manatua sa avea oe ma lē e fesoasoani i isi i le tele o auala, a o e auauna ai o se toeaina. Na faamalosia i latou i au lauga, faalaeiauina i lau faaaʻoaʻoga lelei, ma sa fesoasoani foʻi au asiasiga faaleoleo mamoe e latou te tutumau ai a o feagai ma tofotofoga. Sa faafiafiaina le finagalo o Ieova i au galuega o se toeaina faamaoni, e pei foʻi ona sa faafiafiaina ai oe.​—Faata. 27:11.

Ua fesoasoani Ieova i tane ia toe maua le olioli ma le naunautaʻiga e taʻimua i le faapotopotoga. Pe afai sa e filifili e mālōlō pe na aveese lou faaeaga o se toeaina, e mafai ona e toe ʻaapa atu e avea ma se ovasia.’ (1 Timo. 3:1) E ʻleʻi mapu ona tatalo’ Paulo mo Kerisiano i Kolose, ina ia faatumulia i latou i le poto saʻo i le finagalo o le Atua, “ina ia savavali ai e tusa ma le finagalo o Ieova, ma iʻu ina matuā faafiafiaina ai o ia.” (Kolo. 1:9, 10) Pe afai e te toe maua le faaeaga e auauna ai o se toeaina, ia vaai atu iā Ieova mo le malosi, onosaʻi ma le olioli. Ua manaʻomia e tagata o le Atua i nei aso e gata ai, le lagolagosua faaleagaga a leoleo mamoe alolofa. Pe e mafai ma po o e naunau e faamalosia ou uso?