UA TATOU ola i taimi e sili ona faigatā i le talafaasolopito o tagata. (2 Timo. 3:1-5) E tofotofoina i aso uma lo tatou alofa mo Ieova, ma le maumauaʻi e ola e ōgatusa ma ana tapulaa amiotonu. Na muaʻi silafia e Iesu lenei vaitaimi leaga, ma sa ia faamautinoa atu i ona soo o le a latou maua faalaeiauga manaʻomia, ina ia tumau ai seʻia oo i le iʻuga. (Mata. 24:3, 13; 28:20) Na tofia e Iesu se pologa faamaoni e latou te saunia ʻmeaʻai faaleagaga i le taimi tatau,’ ina ia faamalosia ai ona soo.​—Mata. 24:45, 46.

Talu mai le 1919 lea na tofia ai le pologa faamaoni, e faitau miliona le “ʻaufaigaluega” mai i gagana uma, ua faapotopoto i le faalapotopotoga a le Atua ma o loo fafagaina faaleagaga. (Mata. 24:14; Faaa. 22:17) Peitaʻi, e lē o gagana uma o loo maua ai le tele o lomiga. E lē o tagata uma foʻi e mafai ona faitau i a tatou lomiga e ala i masini faaonapōnei. O se faataʻitaʻiga, e toʻatele e lē o mafai ona maua vitiō ma mataupu, lea e na o le tuatusi o le jw.org e maua ai. Po o lona uiga la o le a lē maua ai e nisi meaʻai faaleagaga e latou te manaʻomia, ina ia tumau ai ona malolosi faaleagaga? Ina ia maua le manatu saʻo, ia iloilo tali i ni fesili autū se fā.

Ina ua tofotofoina e Satani Iesu e liua maa e avea ma falaoa, na tali atu Iesu: “E lē na o meaʻai e ola ai le tagata, ae o afioga uma e tulei mai i le fofoga o Ieova.” (Mata. 4:3, 4) O loo faamauina afioga a Ieova i le Tusi Paia. (2 Pete. 1:20, 21) O lea, o le Tusi Paia o le vala autū lea o loo iai i a tatou meaʻai faaleagaga.​—2 Timo. 3:16, 17.

Ua saunia e le faalapotopotoga a Ieova le Tusi Paia​—O le Faaliliuga a le Lalolagi Fou, a lē o le Tusi Paia atoa pe e na o se vaega foʻi. O loo maua le Tusi Paia i le silia i le 120 gagana, ma o loo faaopoopo pea isi gagana i tausaga taʻitasi. E faitau piliona foʻi kopi o isi faaliliuga o le Tusi Paia, o loo maua atoa pe e na o se vaega i le faitau afe o gagana. O lenā faataunuuga mataʻina, ua ōgatusa ma le finagalo o Ieova “ia faaolaina ituaiga uma o tagata, ma ia maua le poto saʻo i le upu moni.” (1 Timo. 2:3, 4) Talu ai foʻi ʻe leai se foafoaga e lilo i le silafaga a Ieova,’ ua tatou mautinoa ai o le a ia tosina mai i lana faalapotopotoga i latou o loo “naunau i mea faaleagaga,” ma saunia mai meaʻai faaleagaga mo i latou.​—Epe. 4:13; Mata. 5:3, 6; Ioa. 6:44; 10:14.

Ina ia atiaʻe le faatuatua malosi o se tasi, e lē lava le tau ina faitau o le Tusi Paia. E tatau ona ia malamalama i mea o loo ia faitauina, ma faatatau mea ua ia aʻoaʻoina. (Iako. 1:22-25) Na iloa e le eunuka Aitiope i le uluaʻi senituri lenā mea moni. Na fesili atu Filipo le faievagelia iā te ia a o faitau i le Afioga a le Atua: “Po ua e malamalama i mea ua e faitauina?” Na tali le eunuka: “E faapefea ona ou malamalama pe a lē faasino mai e se tasi iā te aʻu?” (Galu. 8:26-31) Sa fesoasoani Filipo i le eunuka ina ia maua le poto saʻo i le Afioga a le Atua. Na matuā pāʻia le loto o le eunuka i mea na ia aʻoaʻoina ma papatisoina ai loa. (Galu. 8:32-38) I se tulaga talitutusa, ua fesoasoani lomiga faale-Tusi Paia ina ia tatou maua ai le poto saʻo i le upu moni. O na lomiga ua faagaeetia ma uunaʻia ai i tatou e faatatau mea ua aʻoaʻoina.​—Kolo. 1:9, 10.

Ua maua e auauna a Ieova le tele o meaʻai faaleagaga e ala mai i lomiga. (Isa. 65:13) O se faataʻitaʻiga, ua maua Le Olomatamata i le silia i le 210 gagana. Ua mafai ona faamatalaina ai valoaga o le Tusi Paia, faatuputeleina lo tatou malamalamaga o upu moni loloto faaleagaga, ma uunaʻia i tatou e ola e ōgatusa ma mataupu silisili o le Tusi Paia. O mekasini o le Ala Mai! lea ua lomia i le pe ā ma le 100 gagana, ua mafai ona faalauaʻitele ai lo tatou iloa o foafoaga a Ieova, ma faailoa mai auala e faatatauina ai fautuaga aogā o le Tusi Paia. (Faata. 3:21-23; Roma 1:20) Ua saunia e le pologa faamaoni lomiga faale-Tusi Paia i le silia i le 680 gagana. Po ua e faatulaga se taimi e faitau ai le Tusi Paia i aso taʻitasi? Pe e te faitau i mekasini ma lomiga fou uma e maua i lau gagana i tausaga taʻitasi?

E lē gata i lomiga, ae ua saunia foʻi e le faalapotopotoga a Ieova auivi mo lauga o loo faia i a tatou sauniga, fonotaga ma tauaofiaga. Pe e te fiafia i lauga, tala faatino, faataʻitaʻiga, ma faatalanoaga o loo faia i na faatasiga? E mautinoa ua saunia e Ieova se faigaʻai faaleagaga mo i tatou!​—Isa. 25:6.

E leai. E lē tatau foʻi ona faateʻia i tatou, ona atonu e iai taimi e tele atu ai meaʻai faaleagaga e maua e isi auauna a Ieova nai lo o isi. Aiseā? Seʻi manatu i le ʻauaposetolo. Sa tele atu taʻiala na latou maua nai lo o isi soo i le uluaʻi senituri. (Mare. 4:10; 9:35-37) E ui i lea, e leʻi matelāina ai faaleagaga na soo, ona na latou maua mea na latou manaʻomia.​—Efe. 4:20-24; 1 Pete. 1:8.

E tāua foʻi ona mātau, o le tele o fetalaiga a Iesu ma mea na ia faia a o iai i le lalolagi, e lē o faamauina i tusi o Evagelia. Na tusi le aposetolo o Ioane: “O le mea moni, e tele isi mea na faia e Iesu, ou te manatu afai e tusia nei mea uma i ni tusi tāʻai, e lē mafai ona ofi nei tusi tāʻai uma i le lalolagi.” (Ioa. 21:25) E ui lava e tele atu faamatalaga na iloa e le ʻausoo i le uluaʻi senituri e faatatau i le tagata lelei atoatoa o Iesu nai lo o i tatou, ae e lē faapea ai e lē o lava faamatalaga ua tatou maua e uiga iā te ia. Ua faamautinoa e Ieova ua lava saunia faamatalaga e mafai ona tatou iloa e faatatau iā Iesu, ina ia mulimulituʻi ai i ona tulagāaao.​—1 Pete. 2:21.

Seʻi manatu foʻi i tusi na auina atu e aposetolo i faapotopotoga i le uluaʻi senituri. A itiiti mai e tasi le tusi na tusia e Paulo e lē o faamauina i le Tusi Paia. (Kolo. 4:16) Po ua lē lava a tatou meaʻai faaleagaga ona e tatou te lē o mauaina lenā tusi? E leai. E silafia e Ieova mea e tatou te manaʻomia, ma o loo lava ma totoe mea mo i tatou ina ia faaauau ai ona malolosi faaleagaga.​—Mata. 6:8.

I aso nei, e iai nisi vaega o auauna a Ieova o loo maua le tele o meaʻai faaleagaga nai lo o isi. Pe e te tautala i se gagana e itiiti ni lomiga o loo maua ai? Afai o lea, ia e iloa e manatu mamafa Ieova mo oe. Ia suʻesuʻe lomiga ua e maua, ma pe a talafeagai, ia auai i sauniga o se gagana e te malamalama i ai. Ia mautinoa o le a tausia pea oe e Ieova ina ia e malosi faaleagaga.​—Sala. 1:2; Epe. 10:24, 25.

O loo faasalalau i la tatou tuatusi i le Initaneti, kopi o a tatou mekasini ma isi lomiga faale-Tusi Paia mo suʻesuʻega. Ua saunia ai foʻi mataupu e fesoasoani i ulugalii, talavou ma i latou e iai fanau iti. E maua e aiga aogā pe afai e latou te iloiloina nei mataupu i a latou Tapuaʻiga a le Aiga. O loo iai foʻi lipoti o polokalame faapitoa e pei o le faauuga mai i le Aʻoga a Kiliata ma le fonotaga faaletausaga. O lenei tuatusi, e mafai ona iloa ai e o tatou uso i le lalolagi aoao, ni mala faalenatura ma mataupu tau tulafono o loo aafia ai tagata o Ieova. (1 Pete. 5:8, 9) Ua avea le tuatusi i le Initaneti o se meafaigaluega e sili ona aogā mo le talaʻiga, lea ua mafai ai ona oo atu le tala lelei i atunuu o loo faasā ai le galuega.

Peitaʻi, e mafai ona e maua pea le malosi faaleagaga, e tusa pe e mafai ona e tilofaʻia le tuatusi i le Initaneti pe e leai. Ua galue mamafa le pologa ina ia lava ma totoe lomiga, e faaauau ai ona fafagaina lelei faaleagaga sui taʻitasi o le ʻaufaigaluega. O lea, e lē tatau ona e mafaufau e ao ona faatau se masini faaonapōnei, ina ia mafai ai ona e tilofaʻia le tuatusi jw.org. Atonu e lomia e nisi ni lomiga o loo i la tatou tuatusi, ona tuu atu lea i ē e lē o mafai ona tilofaʻia le Initaneti. Peitaʻi, e lē faapea ai e tatau ona faia faapea e faapotopotoga.

E tatou te lotofaafetai iā Iesu i le tausisi i lana folafolaga, e tausia o tatou manaʻoga faaleagaga. A o faaloloʻi mai le iʻuga o nei aso faigatā, e tatou te mautinoa o le a faaauau ona saunia mai e Ieova ʻmeaʻai faaleagaga i le taimi tatau.’