1. I taimi o taua, na faapefea ona tali atu faifeʻau o lotu ua faapea mai o Kerisiano?

PE E finagalo le Atua i Kerisiano ia auai i taua ma fasiotia tagata o se isi atunuu? I le 100 tausaga ua mavae, o le mea lenā sa faia e le toʻatele o ē ua faapea mai o Kerisiano. E faamanuia e faifeʻau Katoliko ʻautau ma a latou meatau, pe a auai i taua faasaga i tagata Katoliko o loo i isi atunuu e tetee mai. O le tulaga lava foʻi lenā e tasi i faifeʻau Porotesano. O le Taua Lona Lua a le Lalolagi, o se faataʻitaʻiga lenā o iʻuga o fasiotiga tagata.

2, 3. O le ā le tulaga o Molimau a Ieova a o faagasolo le Taua Lona Lua a le Lalolagi ma mulimuli ane, ma aiseā?

² O le ā na faia e Molimau a Ieova i lenā taimi o le taua? Ua faaalia i faamaumauga o le talafaasolopito, sa tutumau i latou i lo latou tulaga o le solitū faa-Kerisiano. O le mea autū sa faavae ai lo latou solitū, o le faaaʻoaʻoga ma aʻoaʻoga a Iesu. Na fetalai Iesu: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioa. 13:35) Sa latou talia atoatoa foʻi le faatatauga o le manatu na tusi atu ai Paulo i Kerisiano i Korinito.​—Faitau le 2 Korinito 10:3, 4.

³ O lea, o Kerisiano ua aʻoaʻoina o latou lotofuatiaifo i le Tusi  Paia, e latou te lē aʻoaʻo pe auai i taua. O le iʻuga, e faitau afe Molimau talavou ma matutua, tane ma fafine, ua sauāina ona o le maumaututū i lenei tulaga faa-Kerisiano. E toʻatele ua sauāina i nofoaga mo faasalaga mamafa ma falepuipui. O nisi sa oo lava ina fasiotia i le taimi o le pulega a Nasi i Siamani. E ui lava i sauāga ogaoga na fesagaʻi ma Molimau a Ieova i Europa, ae e leʻi galo iā i latou lo latou tofiga ia talaʻi atu le tala lelei o le Malo o Ieova. Sa latou faia ma le faamaoni lenei galuega a o iai i falepuipui, nofoaga o faasalaga, ma nofoaga na faaaunuua ai. * Mulimuli ane, e leʻi auai Molimau i le taua i le va o ituaiga lea na fasiotia ai le toʻatele o tagata i Rwanda i le 1994. Sa tumau foʻi ona latou solitū i taimi o le faamasaatoto lea na tupu talu ai nei, a o fevaevaeaʻi atunuu sa taʻua muamua o Yugoslavia.

4. O le ā le aafiaga o le solitū o Molimau a Ieova i ē e mātauina i latou?

⁴ O le maumauaʻi o Molimau a Ieova e solitū, ua faatalitonuina ai le faitau afe o ē e mātauina i latou i le lalolagi aoao, o loo faaalia e Molimau le alofa moni i le Atua ma o latou tuaoi. I nisi faaupuga, o loo latou faatinoina le faa-Kerisiano moni. Peitaʻi, e iai isi vala o la tatou tapuaʻiga ua faatalitonuina ai le toʻatele, o i tatou o Kerisiano moni.

5. O le ā le suiga sa tatau ona faia e uluaʻi soo o Iesu?

⁵ Sa faamamafa e Iesu le tāua o le folafola atu o le tala lelei o le Malo o le Atua, talu mai le amataga o lana faiva. Sa ia filifilia soo e toʻa 12 e fesoasoani e faataatia le faavae mo le talaʻiga i le lalolagi aoao, ma mulimuli ane, sa ia toleniina isi soo e toʻa 70. (Luka 6:13; 10:1) Sa aʻoaʻoina i latou nei e talaʻi atu le tala lelei i isi, ae e muamua i tagata Iutaia. Ae na iai se mea na faateʻia ai! Sa tatau i soo o Iesu ona folafola atu le tala lelei i tagata o nuu ese e leʻi peritomeina. Maʻeu se suiga sa tatau ona faia e soo maelega i Iutaia!​—Galu. 1:8.

6. Na faapefea ona iloa e Peteru e lē faailoga tagata Ieova?

⁶ Sa auina atu le aposetolo o Peteru i le fale o Konelio, o se tagata mai Nuu Ese e leʻi peritomeina, ma na iloa ai e Peteru e lē faailoga tagata le Atua. Sa papatisoina Konelio ma lona ʻauaiga. Ua oo atu nei le faa-Kerisiano i se oganuu fou e telē, ma ua mafai e tagata o atunuu uma ona faalogo ma talia le upu moni. (Galu. 10:9-48) I le taimi nei, ua tatala atu le oganuu i le lalolagi aoao.

7, 8. O le ā le galuega ua taulamua ai le faalapotopotoga a Ieova? (Tagaʻi i le ata i luga aʻe o le matua.)

⁷ A o faagasolo le talafaasolopito o Molimau a Ieova i aso nei, ua faaauiluma ma le maelega e i latou o loo taʻimua, le talaʻiga ma le aʻoaʻoina atu o le tala lelei i le lalolagi aoao. E toetoe valu miliona Molimau maelega o loo faia le mea e latou te mafaia, e folafola atu ai le feʻau a Keriso i le silia i le 600 gagana, ma e iai nisi gagana o le a faaopoopo mai. E vave ona mātaulia Molimau a Ieova i la latou talaʻiga mai i lea fale i lea fale, ma nofoaga faitele lea e faaaogā ai i nisi taimi laulau ma taavale toso e faaali ai lomiga ma mekasini.

⁸ E silia i le 2,900 le ʻaufaaliliu ua latou maua se toleniga faapitoa, ina ia faaliliu ai le Tusi Paia ma lomiga faale-Tusi Paia. E lē o gata mai la latou galuega i gagana ia atonu e manatu i ai o gagana autū. Peitaʻi, o loo aofia ai foʻi le faitau selau o gagana e lē o lauiloa i le toʻatele, ae o loo tautatala ai le faitau miliona o tagata. O se faataʻitaʻiga, i Sepania, e faitau miliona tagata Catalonia e tautatala i aso taʻitasi i le gagana Catalan. I se taimi lata  mai nei, na toe olaola mai ai lenā gagana ma ona vaega eseese i vaipanoa o Andorra, Alicante, Balearic Islands, ma Valencia. Ua saunia nei e Molimau a Ieova lomiga faale-Tusi Paia i le gagana Catalan, ma ua faia sauniga i le gagana e pele i loto o tagata Catalonia.

9, 10. O ā faaaʻoaʻoga e iloa ai o loo naunau le faalapotopotoga a le Atua, i manaʻoga faaleagaga o tagata uma?

⁹ O loo mulimuli le tele o atunuu i lenei auala e faia ai le galuega faaliliu ma le aʻoaʻo atu. O Mekisikō o se atunuu e tautatala i le gagana Sipaniolo, ae e toʻatele tagatānuu moni o le atunuu e tautatala i isi gagana. O tagata Maya o se tasi o na vaega toʻatele o tagata. Ua tofia e le lālā i Mekisikō se vaega e faaliliu i le gagana Maya, e nonofo i se vaega o le atunuu e mafai ona tautatala ma faalogo ai i le gagana i aso taʻitasi. O se isi faaaʻoaʻoga o le gagana Nepali, o se tasi o gagana e tautatala ai tagata i Nepal, lea e silia i le 29 miliona tagata e nonofo ai. E pe ā ma le 120 nisi gagana e tautatala ai tagata o le atunuu, ae e silia i le sefulu miliona e tautatala i le gagana Nepali, ma e faaaogā e le toʻatele e avea ma a latou gagana lona lua. Ua saunia foʻi a tatou lomiga faale-Tusi Paia i lenā gagana.

¹⁰ Ua faaalia le matuā faatāua e le faalapotopotoga a Ieova o le tofiga, ia talaʻi atu le tala lelei o le Malo i le lalolagi aoao, e ala i le fesoasoani atu i le ʻaufaaliliu i le lalolagi aoao. E faitau miliona sāvali, polosiua ma mekasini ua tufatufaina atu e aunoa ma se totogi, i tauiviga e faia i le lalolagi aoao. Ua faatupeina lenei galuega i foaʻi tauofo a Molimau a Ieova, o ē o loo mulimuli i le faatonuga a Iesu: “Ia outou avatu fua, auā ua outou maua fua.”​—Mata. 10:8.

11, 12. Ua faapefea i le galuega talaʻi o loo faia e Molimau a Ieova i le lalolagi aoao, ona iai se aafiaga lelei i isi?

¹¹ I le avea ai ma Kerisiano tuutoina atu e talaʻi ma aʻoaʻo atu, ua matuā talitonu Molimau a Ieova ua latou maua le upu moni. O le pogai lea ua latou faia ai le tele o faataulaga, ina ia taʻu atu le feʻau i tagata o isi atunuu ma ituaiga eseese. Ua faafaigofie e le toʻatele o latou olaga, aʻoaʻo se isi gagana ma faamasani i se aganuu fou, ina ia mafai ona faia se sao i lenei galuega tāua faa-Kerisiano. O lenei galuega talaʻi ma le aʻoaʻo atu faavaomalo, o se isi lea vala ua talitonu ai le toʻatele, o Molimau a Ieova o soo moni o Iesu Keriso.

¹² E faia e Molimau nei mea uma ona ua  talitonu ua latou maua le upu moni. Ae o ā isi mea ua faatalitonuina ai le faitau miliona o tagata, o loo iai i Molimau a Ieova le upu moni?​—Faitau le Roma 14:17, 18.

13. Ua faapefea ona tausisia e Molimau le mamā o le faalapotopotoga?

¹³ E tatou te maua aogā mai i faamatalaga a Kerisiano tuutoina atu i o tatou aso, o ē ua talitonu ua latou maua le upu moni. Na faaleo mai e sē ua loa tausaga o auauna iā Ieova, ona faalogona e faapea: “Ua faia taumafaiga uma ina ia tumau ona mamā tau amio ma ia lē taʻuleagaina le faalapotopotoga a Ieova, e tusa lava po o ai e manaʻomia ona fautuaina pe aʻoaʻia.” Ua faapefea ona ausia lenei tapulaa maualuga tau amio? E ala i le mulimuli i tapulaa o le Afioga a le Atua, ma le faaaʻoaʻoga na faataatia e Iesu ma ona soo. O lea, i le talafaasolopito o Molimau a Ieova i aso nei, e iai nisi ua lē o toe aufaatasi ma Kerisiano, ona e latou te lē o ola e tusa ai ma tapulaa a le Atua. Ae o le toʻatele lava, e aofia ai ma nisi sa ola i se auala e inosia e le Atua ae ua faia suiga, o loo tausisi i se olaga mamā ma avea ma faaaʻoaʻoga lelei.​—Faitau le 1 Korinito 6:9-11.

14. O le ā ua faia e le toʻatele o ē na faateʻaina, ma o ā iʻuga?

¹⁴ Ae faapefea i latou sa tatau ona tuuesea mai i le faapotopotoga, ina ia usitaʻia ai le taʻiala a le Tusi Paia? E faitau afe ē ua salamō mai i a latou gaoioiga e lē faa-Kerisiano, ma ua toe talia fiafia i le faapotopotoga. (Faitau le 2 Korinito 2:6-8.) O le usitaʻia o tapulaa maualuluga o le Tusi Paia, ua iʻu ai i se faapotopotoga Kerisiano e mamā, lea e maua ai le mautinoa ma le maufaatuatuaina. O loo tausisia e Molimau a Ieova tapulaa a le Atua, lea e matuā tuufaafeagai ma uiga tuufau o loo taatele i lotu. O lea, ua talitonu ai le toʻatele o loo faatino e Molimau a Ieova le upu moni.

15. O le ā na faatalitonuina ai se tasi o uso ua ia maua le upu moni?

¹⁵ Aiseā ua talitonu ai isi Molimau ua iai le poto masani e faapea, ua latou maua le upu moni? Na faapea mai se uso ua silia i le 50 ona tausaga: “Talu mai a o oʻu laʻitiiti, ou te talitonu o loo faavae loʻu faatuatua i poutū nei e tolu: (1) o loo soifua le Atua; (2) sa ia faagaeeina le Tusi Paia; ma lona (3) o loo ia faaaogā ma faamanuia le faapotopotoga Kerisiano a Molimau a Ieova i aso nei. A o oʻu suʻesuʻe i le tele o tausaga, ou te taumafai pea e iloilo na poutū ma fesili ifo iā te aʻu lava, po o mausalī le faavae o na poutū. E faatupulaʻia pea faamaoniga a o faagasolo tausaga, ma ua faamalosia ai loʻu faatuatua ma atili ai ona ou talitonu, ua tatou maua le upu moni.”

16. O le ā se mea na matuā fiafia ai se tasi tuafafine e faatatau i le upu moni?

¹⁶ Na faapea mai se tuafafine ua faaipoipo  ma o loo auauna i le ofisa ulu i Niu Ioka, e faatatau i le faalapotopotoga a Ieova: “E na o le pau lea o le faalapotopotoga o loo faaauau ona faalauiloa atu le suafa o Ieova. Maʻeu le talafeagai o lenei manatu, pe a toe tomānatu i le pe ā ma le 7,000 taimi o loo faaaogā ai le suafa o le Atua i le Tusi Paia! Ou te talisapaia le faalaeiauga o loo i le 2 Nofoaiga a Tupu 16:9: ʻE silasila solo fofoga o Ieova i le lalolagi uma, ina ia faaali atu lona malosi iā i latou e atoatoa o latou loto iā te ia.’” Ua ia toe faapea mai: “Ua faaalia mai e le upu moni iā te aʻu le auala e maua ai se loto e atoatoa, ina ia mafai ona faaalia mai e Ieova lona malosi iā te aʻu. E sili ona pele iā te aʻu la ma faiā ma Ieova. Ou te talisapaia foʻi le matafaioi a Iesu i le saunia mai o le poto saʻo e uiga i le Atua, lea e faatumauina ai aʻu.”

17. O le ā na faatalitonuina ai se tamāloa e leʻi talitonu muamua i le Atua, ma aiseā?

¹⁷ Na taʻutino mai e se tamāloa e leʻi talitonu muamua i le Atua e faapea: “O le foafoaga ua faatalitonuina ai aʻu e finagalo le Atua ia fiafia tagata, ma o le a ia lē faatagaina mafatiaga e faaauau pea ona iai. E lē gata i lea, o loo agaʻigaʻi pea i luma tagata o Ieova i le faatuatua, maelega ma le alofa, a o taatele i le lalolagi amioga faalēmataʻu. E na o le agaga o Ieova ua mafai ai ona faia lenei vavega i aso nei.”​—Faitau le 1 Peteru 4:1-4.

18. O ā ni ou faalogona e tusa ai o manatu na faamatala mai e ni uso se toʻalua?

¹⁸ Na taʻua e se tasi ua loa tausaga o avea ma Molimau, māfuaaga ua ia talitonu ai i le upu moni lea o loo tatou talaʻia: “Ua faatalitonuina aʻu mai i aʻu suʻesuʻega i le tele o tausaga, ua faia e Molimau ni taumafaiga fitā e toe mulimuli i le faaaʻoaʻoga na faataatia e Kerisiano i le uluaʻi senituri. A o oʻu faimalaga i le lalolagi, ua ou vaaitino i le autasi o Molimau a Ieova i le lalolagi aoao. Ua ou maua le faamalieina ma le fiafia ona o le upu moni mai i le Tusi Paia.” Ina ua fesiligia se uso ua silia i le 60 tausaga pe aiseā na talitonu ai ua ia maua le upu moni, sa ia taulaʻi atu iā Iesu Keriso i le faapea mai: “Sa tatou matuā suʻesuʻeina le soifuaga ma le faiva a Iesu, ma talisapaia lana faaaʻoaʻoga. Ua tatou faia fetuunaʻiga i le olaga ina ia atili ai ona vavalalata atu i le Atua, e ala iā Iesu Keriso. Ua tatou iloa o le taulaga togiola a Keriso o le faavae lea mo le faaolataga, ma na toetū mai o ia i le oti. Ua iā i tatou faamatalaga a molimau maufaatuatuaina na vāaitino i lenā mea moni.”​—Faitau le 1 Korinito 15:3-8.

19, 20. (a) O le ā le tiute tauave na faamatilatila atu e Paulo i le faapotopotoga i Roma? (e) I le avea ai ma Kerisiano ua tuuina atu, o le ā lo tatou faaeaga ua iai?

¹⁹ Talu ai o i tatou o Kerisiano e alolofa i tuaoi, e lē mafai la ona taofiofia iā i tatou lava le malamalamaga tāua e faatatau i le upu moni. Sa faapea atu Paulo i ona uso i le faapotopotoga i Roma: “Afai e te faalauiloa atu i luma o tagata ʻlenā upu i lou lava gutu’ o Iesu o le Alii, ma faatuatua i lou lava loto ua faatūina o ia e le Atua mai i le oti, e faaolaina ai oe. Auā o le loto e faatuatua ai e maua ai le amiotonu, a o le gutu e taʻutino atu ai i luma o tagata, e maua ai le faaolataga.”—Roma 10:9, 10.

²⁰ I le avea ai ma Molimau a Ieova ua tuuina atu, ua faatalitonuina i tatou ua tatou maua le upu moni, ma iloa lelei lo tatou faaeaga o le aʻoaʻo o isi i le tala lelei e uiga i le pulega a le Malo o le Atua. A o faataunuu lo tatou tofiga o le talaʻi atu, tau ina ia faafiafiaina isi i mea o loo tatou aʻoaʻo atu mai le Tusi Paia, faapea lo tatou talitonu maumauaʻi i ai.