1, 2. Aiseā na lē malamalama ai le toʻatele o le ʻaufaalogologo a Iesu i le uiga o ana fetalaiga?

PE A talanoa mai se tagata iā i tatou, atonu e tatou te lagona atu ana faamatalaga ma lona leo. Peitaʻi, e leai se aogā pe a tatou te lē malamalama i ana faamatalaga. (1 Kori. 14:9) I se tulaga talitutusa, e toʻatele na faalogo i fetalaiga a Iesu. Sa talanoa atu foʻi o ia iā i latou i se gagana e faigofie ona malamalama i ai. Peitaʻi, e leʻi malamalama le toʻatele i le uiga o ana fetalaiga. O le māfuaaga lea na faapea atu ai Iesu i lana ʻaufaalogologo: “Inā faalogo mai ia outou uma, ma ia malamalama i lona uiga.”​—Mare. 7:14.

² Aiseā na lē malamalama ai le toʻatele i le uiga o fetalaiga a Iesu? O nisi sa iai o latou lava manatu ma faanaunauga sesē. Na fetalai Iesu e faatatau iā i latou na: “Ua outou popoto i le tuuesea o poloaʻiga a le Atua, ina ia tausisi ai i a outou tū masani.” (Mare. 7:9) E leʻi taumafai nei tagata e malamalama i le uiga o fetalaiga a Iesu, pe e taumafai foʻi e suia o latou ala ma manatu. Sa faalogo o latou taliga, peitaʻi na maaa o latou loto. (Faitau le Mataio 13:13-15.) E faapefea ona faamautinoa o loo tatala pea o tatou loto, ina ia maua aogā mai i aʻoaʻoga a Iesu?

3. Aiseā na malamalama ai le ʻausoo i fetalaiga a Iesu?

³ E tatau ona tatou mulimuli i le faaaʻoaʻoga lotomaulalo a soo o Iesu. Na fetalai Iesu e faatatau iā i latou: “E fiafia outou auā ua vaavaai o outou mata ma faalogo o outou taliga.” (Mata. 13:16) Aiseā na latou malamalama ai ae e leʻi malamalama isi tagata? Muamua, sa latou naunau e fesili atu iā Iesu, ma saʻili le uiga moni o ana fetalaiga. (Mata. 13:36; Mare. 7:17) Lona lua, na latou naunau e aʻoaʻoina nisi mea fou, e faaopoopo atu i mea ua latou taliaina. (Faitau le Mataio 13:11, 12.) Lona tolu, na latou naunau e faatatau manatu na latou aʻoaʻoina, ma fesoasoani atu ai i isi.​—Mata. 13:51, 52.

4. O ā laasaga e tolu e tatau ona tatou faia, ina ia malamalama ai i talafaatusa a Iesu?

⁴ Pe a tatou fia malamalama i talafaatusa a Iesu, e manaʻomia ona tatou mulimuli i le faaaʻoaʻoga a ona soo faamaoni. O lea, e tolu vala e aofia ai. Muamua, e manaʻomia ona tatou naunau e faaalu se taimi e suʻesuʻe ma manatunatu loloto ai i fetalaiga a Iesu, ia faia ni saʻiliʻiliga ma ni fesili talafeagai e faatatau i le mataupu. O le faia faapea e maua ai le poto. (Faata. 2:4, 5) Lona lua, e manaʻomia ona tatou iloa le auala e fesootaʻi ai lenei poto ma mea ua tatou aʻoaʻoina, faapea aogā e tatou te maua mai ai. O le auala lenā e maua ai le malamalama. (Faata. 2:2, 3) Lona tolu, e tatau ona faatatau i o tatou olaga mea ua tatou aʻoaʻoina. O le faia faapea e atagia atu ai lo tatou atamai.​—Faata. 2:6, 7.

5. Faataʻitaʻi mai le eseesega o le poto, malamalama ma le atamai.

⁵ O le ā le eseesega o le poto, malamalama, ma le atamai? O le auala lenei e faataʻitaʻi ai: Seʻi faapea o loo e tū i le ogatotonu o le auala, ma o loo agaʻi mai se pasi i le mea o loo e tū atu ai. Muamua, o le poto e te iloa atu ai le pasi o loo agaʻi mai. O le malamalama e te iloa ai, o le a soʻa oe e le pasi pe afai e te tū ai pea i inā. Ae e iloa lou atamai, pe afai e te oso ese ma le auala. O le māfuaaga lea ua faapea mai ai le Tusi Paia, e manaʻomia ona tatou “taofimau i le atamai aogā,” auā e laveaʻia ai o tatou ola.​—Faata. 3:21, 22; 1 Timo. 4:16.

6. O ā fesili e fā o le a taliina a o iloilo talafaatusa e fitu a Iesu? (Tagaʻi i le  pusa.)

⁶ I lenei mataupu ma le mataupu o loo mulimuli mai, o le a tatou iloiloina ai talafaatusa e fitu a Iesu. A o iloiloina nei talafaatusa, o le a taliina ai fesili o loo mulimuli mai: O le ā le uiga o le talafaatusa? (O le a maua ai le poto.) Aiseā na faia ai e Iesu lenei talafaatusa? (O le a maua ai le malamalama.) E faapefea ona fesoasoani lenei manatu iā te aʻu ma isi tagata? (O le a maua ai le atamai.) Ae o le vala mulimuli, o le ā e tatou te aʻoaʻoina mai ai e faatatau iā Ieova ma Iesu?

7. O le ā le uiga o le talafaatusa i le fatu o le sinapi?

⁷ Faitau le Mataio 13:31, 32. O le ā le uiga o le talafaatusa a Iesu i le fatu o le sinapi? O le fatu o le sinapi e faaāta mai ai le feʻau o le Malo o loo tatou talaʻia, ma le faapotopotoga Kerisiano. O le fatu o le sinapi o se fatu “e sili ona itiiti i lo o fatu uma.” Sa faapena foʻi ona itiiti le amataga o le faapotopotoga Kerisiano i le 33 T.A. Peitaʻi i se taimi puupuu, sa vave ona faatuputupulaʻia le faapotopotoga, ma o se mea e leʻi faatalitalia. (Kolo. 1:23) Sa iai le aogā o lenā faatelega, auā na fetalai Iesu o le a momoe “manufelelei o le lagi i ona lālā.” O  nei manufelelei ua faaāta mai ai tagata taʻitoʻatasi lotofaamaoni, ua mauaina meaʻai faaleagaga ma le lafitaga i le faapotopotoga Kerisiano.​—Faatusatusa i le Esekielu 17:23.

8. Aiseā na faia ai e Iesu le talafaatusa i le fatu o le sinapi?

⁸ Aiseā na faia ai e Iesu lenei talafaatusa? Sa ia faaaogā le mataʻina o le ola o le fatu o le sinapi, e faaāta mai ai le mana o le Malo o le Atua e mafai ai ona faalautele atu, puipuia, ma faatoʻilalo so o se teteega. Talu mai le 1914, ua matuā mataʻina le tuputupu aʻe o le vaega vaaia o le faalapotopotoga a le Atua. (Isa. 60:22) O i latou uma ua auaufaatasi ma lenei faalapotopotoga, ua latou mauaina le puipuiga faaleagaga. (Faata. 2:7; Isa. 32:1, 2) E lē gata i lea, e lē mafai ona taofia le faalauteleina atu o manaʻoga o le Malo, ma ua manumalo i so o se teteega.​—Isa. 54:17.

9. (a) O le ā se lesona e tatou te aʻoaʻoina mai i le talafaatusa i le fatu o le sinapi? (e) O le ā e tatou te aʻoaʻoina mai ai e faatatau iā Ieova ma Iesu?

⁹ O le ā e tatou te aʻoaʻoina mai i le talafaatusa i le fatu o le sinapi? Atonu e tatou te nonofo i se vaipanoa e lē toʻatele ai ni Molimau a Ieova, pe e lē vave foʻi ona iai ni iʻuga lelei o la tatou galuega talaʻi. O le manatuaina e mafai ona manumalo le Malo o le Atua i so o se teteega, e mafai ona faamalosia ai i tatou e tutumau. O se faaaʻoaʻoga, ina ua taunuu le uso o Edwin Skinner i Initia i le 1926, e lē toʻatele ni Molimau a Ieova sa iai i le atunuu. E leʻi telē se agaʻigaʻi i luma o le galuega ma sa faigatā. Peitaʻi, sa faaauau ona ia talaʻi ma vaaia le manumalo o le feʻau o le Malo i teteega faigatā. O le taimi lenei, ua silia i le 37,000 Molimau a Ieova i Initia, ma e silia i le 108,000 ē na auai i le Faamanatuga i le tausaga ua mavae. O le tausaga na taunuu ai le uso o Skinner i Initia, sa amata ai foʻi le galuega i Zambia. Ua silia nei i le 170,000 tagata talaʻi i inā, ma e 763,915 ē na auai i le Faamanatuga i le 2013. I se fuafaatatau, e 1 i le 18 tagata i Zambia na auai i le Faamanatuga. Maʻeu se faatelega mataʻina!

10. O le ā le uiga o le talafaatusa i le mea faafefete?

¹⁰ Faitau le Mataio 13:33. O le ā le uiga o le talafaatusa i le mea faafefete? O lenei talafaatusa e faasino atu foʻi i le feʻau o le Malo, ma le auala e suia ai e lenā feʻau olaga o tagata. O le “paluga atoa” e faaāta mai ai atunuu uma, ae o le faagasologa o le faafefeteina e faaāta mai ai le salalau atu o le feʻau o le Malo e ala i le galuega talaʻi. E vave ona mātauina le tuputupu aʻe o le fatu o le sinapi. Peitaʻi, e iloagatā le salalau atu o le mea faafefete i totonu o le paluga, ae e faatoʻā iloa lelei i se taimi mulimuli ane.

11. Aiseā na faia ai e Iesu le talafaatusa i le mea faafefete?

¹¹ Aiseā na faia ai e Iesu lenei talafaatusa? Na faailoa mai e Iesu e iai le mana i le feʻau o le Malo e oo atu ai i “tuluʻiga uma o le lalolagi,” ma faapogaia ai suiga i loto o tagata. (Galu. 1:8) E lē iloagofie i le taimi muamua nei suiga. Peitaʻi, o loo iai lava suiga, e lē gata o le faatoʻateleina o tagata e talia le feʻau o le Malo, ae o le suia foʻi e le mana o lenā feʻau o olaga o tagata.​—Roma 12:2; Efe. 4:22, 23.

12, 13. Aumai ni faaaʻoaʻoga o le auala ua faateleina ai le galuega talaʻi, e pei ona faamatalaina i le talafaatusa i le mea faafefete?

¹² E masani ona faatoʻā iloa aafiaga o le talaʻiga, i tausaga mulimuli ane talu ona faalogo tagata i le feʻau. O se faaaʻoaʻoga, o le ulugalii o Franz ma Margit, ua auauna nei i se isi lālā, ae sa auauna i le 1982 i le ofisa o le lālā i Pasili. Sa la talaʻi i se nuu maotua i lenā atunuu. Sa la faia ni suʻesuʻega faale-Tusi Paia, e aofia ai ma se tinā ma lana fanau e toʻafā. E 12 tausaga o le tama matua i lenā taimi. Sa matamuli o ia ma e masani ona taumafai e lafi a o leʻi faia le suʻesuʻega. Sa suia le faaeaga o le ulugalii, ma na la lē toe faia ai le suʻesuʻega. Ae ina ua mavae le 25 tausaga, sa la toe asiasi atu ai i lenei aai. Seʻi faaāta le fiafia o lenei ulugalii ina ua toe foʻi mai ua iai se faapotopotoga e 69 tagata talaʻi, 13 paeonia sauatoa, ma e faia a latou sauniga i le Maota mo Sauniga fou. Ae faapefea le tama matamuli? Ua avea nei o ia ma sooupu o le ʻautoeaina. E pei lava o le mea faafefete i le talafaatusa a Iesu, ua salalau atu le feʻau o le Malo ma suia ai olaga o tagata.

¹³ Ua faamaonia foʻi le mana o le feʻau o le Malo e suia ai olaga o tagata, i atunuu e lē o saʻoloto atoatoa ai le faia o le galuega talaʻi. E faigatā ona iloa le mamao ua oo i ai le galuega i na atunuu, ae e masani ona faateʻia i tatou i iʻuga e maua mai ai. O se faaaʻoaʻoga o le atunuu o Cuba. Sa oo atu le feʻau o le Malo i inā i le 1910, ae o le 1913 na asiasi atu ai le uso o Russell i lenā atunuu. E leʻi vave le agaʻigaʻi i luma o le galuega i inā i le taimi muamua. Ae ua faapefea le taimi lenei? Ua silia i le 96,000 tagata talaʻi, ae e 229,726 na auai i le Faamanatuga i le 2013. I se fuafaatatau, e 1 i le 48 tagata o le atunuu na auai. E oo lava i atunuu e lē o faasāina ai le galuega, ua oo atu le feʻau o le Malo i oganuu na manatu Molimau i na atunuu, atonu e lē oo atu i ai le feʻau. *​—Fai. 8:7; 11:5.

14, 15. (a) O ā aogā e tatou te maua mai i le lesona o le talafaatusa i le mea faafefete? (e) O le ā ua tatou aʻoaʻoina mai ai e faatatau iā Ieova ma Iesu?

¹⁴ O ā aogā e tatou te maua mai i manatu na aʻoaʻo e Iesu i le talafaatusa i le mea faafefete? Pe a manatunatu loloto i  le uiga o le talafaatusa a Iesu, e tatou te iloa ai e lē manaʻomia ona tatou popole i le auala e oo atu ai le feʻau o le Malo, i le faitau miliona o tagata e leʻi faalogo. O loo faatonutonu e Ieova le tulaga o mea. Ae o le ā la tatou galuega e tatau ona fai? Ua faapea mai le Failauga 11:6: “Ia e lūlū fatu i le taeao ma aua neʻi mālōlō lou lima seʻia oo i le afiafi; auā e te lē iloa po o lē fea e taulau manuia, a lē o i inei po o i inā, pe tutusa ona lelei o ia mea e lua.” E tatau foʻi ona tatou tatalo pea mo le faamanuia a Ieova i le galuega talaʻi, aemaise lava i atunuu e lē o saʻoloto atoatoa ai le galuega.​—Efe. 6:18-20.

¹⁵ E lē tatau foʻi ona tatou lotovaivai pe a lē vave ona maua ni iʻuga lelei o la tatou galuega. E lē tatau ona tatou lē fiafia i le “aso o mea iti.” (Saka. 4:10) E tatou te ono vaaia ni iʻuga e sili atu ona lelei e tatou te leʻi faatalitalia.​—Sala. 40:5; Saka. 4:7.

16. O le ā le uiga o talafaatusa i le tagata faatauʻoa na faimalaga, ma le oloa sa natia?

¹⁶ Faitau le Mataio 13:44-46. O le ā le uiga o talafaatusa i le tagata faatauʻoa na faimalaga, ma le oloa sa natia? I aso o Iesu, sa faimalaga mamao nisi o tagata faatauʻoa i le Vasa Initia, ina maua mai penina e sili ona lelei. O le tagata faatauʻoa i lenei talafaatusa, ua faaāta mai ai tagata lotofaamaoni ua latou saʻili i so o se mea mo le upu moni. O le “penina tautele” ua faaāta mai ai upu moni tautele o le Malo. O le iloaina o le tāua o lenā penina, na lotomalie ai le tagata faatauʻoa e faatau atu “loa” ana mea uma, ina ia faatau mai lenei penina. Na taʻua foʻi e Iesu se tagata sa galue i le fanua ma ia mauaina ai le oloa sa “natia.” E ese mai i le tagata faatauʻoa, e leʻi saʻilia e lenei tagata galue le oloa sa “natia.” Ae e pei o le tagata faatauʻoa, na lotomalie lenei tagata e faatau atu ana “mea uma” ina ia maua ai le oloa.

17. Aiseā na faia ai e Iesu talafaatusa e faatatau i le tagata faatauʻoa ma le oloa sa natia?

¹⁷ Aiseā na faia ai e Iesu nei talafaatusa e lua? Na ia faailoa mai e eseese auala e maua ai le upu moni. O nisi tagata e latou te saʻilia le upu moni, ma latou faia ai le tele o faataulaga. A o nisi tagata, e latou te leʻi saʻilia le upu moni, ae na latou mauaina ona atonu na talaʻi i ai se isi. Po o le ā lava le tulaga, ae na iloa e tagata o loo taʻua i nei talafaatusa le tāua o mea na laʻua mauaina. O lea, na la faia ai le tele o faataulaga ina ia maua ai na mea tāua.

18. (a) O ā aogā e tatou te maua mai i nei talafaatusa e lua? (e) O le ā ua tatou aʻoaʻoina mai ai e faatatau iā Ieova ma Iesu?

¹⁸ O ā aogā e tatou te maua mai i nei talafaatusa e lua? (Mata. 6:19-21) Ia tatou fesili ifo: ʻPe e tutusa laʻu vaaiga ma nei tagata? Pe e faapena le auala ou te faatāuaina ai le upu moni? Po o oʻu faia ni faataulaga ina ia maua ai le upu moni, po o lea ou te faatagaina isi mea e pei o meafai o le olaga i aso taʻitasi, e taaʻina ese ai aʻu?’ (Mata. 6:22-24, 33; Luka 5:27, 28; Fili. 3:8) Pe a tatou faatāuaina le upu moni, o le a uunaʻia ai i tatou e faamuamua pea le upu moni i o tatou olaga.

19. O le ā o le a iloiloina i le mataupu o loo sosoo mai?

¹⁹ Seʻi faaauau pea ona faailoa atu o loo tatou faalogo ma malamalama lelei i le uiga o nei talafaatusa uma e faatatau i le Malo. Ia manatua, e tatou te faia faapea e ala i le iloa o le uiga o talafaatusa, faapea foʻi le faatatauina o ona lesona. I le mataupu o loo sosoo mai, o le a tatou iloiloina ai isi talafaatusa e tolu, faapea lesona e tatou te aʻoaʻoina mai ai.