1, 2. Na faapefea ona faamalosia e Iesu ona soo i le aso na toetū ai?

I LE aso na toetū ai Iesu, na savavali ai nisi o ona soo e toʻalua i se nuu e pe ā ma le 11 kilomita (7 maila) le mamao mai i Ierusalema. Sa matuā faanoanoa i laʻua ona o le maliu o Iesu, peitaʻi e la te leʻi iloaina ua toetū o ia. Sa faafuaseʻi ona faaali atu Iesu iā i laʻua ma latou savavali faatasi. Sa ia faamāfanafanaina ona soo. E faapefea? ʻSa ia faamatala atu mea o i Tusitusiga Paia e faatatau iā te ia, e amata mai i tusi a Mose ma le ʻau Perofeta.’ (Luka 24:13-15, 27) Sa faamāfanafanaina i laʻua ma amata ona mū o la loto, ona sa matuā “faamatala” atu e Iesu iā i laʻua Tusitusiga Paia.​—Luka 24:32.

² Sa toe foʻi nei soo i Ierusalema i lenā lava afiafi. Sa la faamatala atu le mea na tupu ina ua latou feiloaʻi ma le ʻauaposetolo. Sa faaali atu Iesu iā i latou, a o laʻua faamatalaina le mea na tupu. Peitaʻi, sa fefefe le ʻauaposetolo ma amata ona masalosalo o latou loto. Na faapefea ona faamalosia e Iesu i latou? Ua faapea mai le Luka 24:45: “Ona ia matuā faamatala atu lea iā i latou o Tusitusiga Paia, ina ia latou malamalama ai.”

3. O ā luʻi e tatou te ono fesagaʻia, ma o le ā e fesoasoani iā i tatou ina ia maua ai se vaaiga paleni i la tatou faiva?

³ E pei o le ʻausoo, e iai foʻi taimi e tatou te lotovaivai ai. E ui e tatou te pisi i le galuega a le Alii, ae e faavaivaia i tatou ona  o le leai o ni iʻuga lelei o la tatou faiva. (1 Kori. 15:58) Pe atonu e lē o matuā agaʻigaʻi i luma faaleagaga se tasi o loo tatou suʻesuʻe. E iai nisi sa tatou fesoasoani i ai ae ua fulitua iā Ieova. O le ā e tatau ona tatou faia ina ia maua ai se vaaiga paleni i la tatou faiva? O se tasi o vala e mafai ona fesoasoani iā i tatou, o le malamalama lelei lea i le uiga o talafaatusa a Iesu. Seʻi o tatou iloiloina nisi o ana talafaatusa e tolu, ma vaai po o ā ni lesona e tatou te aʻoaʻoina mai ai.

4. O le ā le uiga o le talafaatusa a Iesu i le tagata lūlū fatu sa moe?

⁴ Faitau le Mareko 4:26-29. O le ā le uiga o le talafaatusa a Iesu i le tagata lūlū fatu sa moe? O le tagata i le talafaatusa, ua faaāta mai ai tagata talaʻi o le Malo. O le fatu, ua faaāta mai ai le feʻau o le Malo o loo talaʻia atu i tagata lotofaamaoni. I aso faisoo o le olaga, o le tagata lūlū fatu e ʻmoe i le pō ae ala i le ao.’ E manaʻomia se taimi ina ia tupu aʻe ai le fatu, lea e amata mai i le taimi e totō ai seʻia oo ina selesele. O lenā vaitaimi e amata ona ʻtupu ma ola ai le fatu.’ E “tupu fua” le fatu, ma e faasolosolo foʻi ona tupu. I se tulaga talitutusa, e faasolosolo foʻi ona tuputupu aʻe faaleagaga se tagata. Pe a agaʻigaʻi i luma se tasi ma filifili e auauna iā Ieova, o le a ia fuaina mai ni fua, e ala i le tuuina atu iā Ieova ma papatisoina.

5. Aiseā na faia ai e Iesu le talafaatusa i le tagata lūlū fatu sa moe?

⁵ Aiseā na faia ai e Iesu lenei talafaatusa? Ua fesoasoani mai Iesu ina ia tatou iloa, o Ieova e faatupuina le upu moni i loto o “ē ua saunia o latou loto.” (Galu. 13:48; 1 Kori. 3:7) E tatou te totō ma faasūsū, ae e lē mafai ona tatou pulea ma faamalosia le tuputupu aʻe o se tasi. E pei o le tagata i le talafaatusa, e tatou te lē iloa le auala e tuputupu aʻe ai le fatu i se tasi. A o tatou pisi i aso faisoo o le olaga, e tatou te lē mātauina le auala o loo tuputupu aʻe ai le fatu o le Malo. Ae a o faagasolo taimi, e mafai ona fua mai lenā fatu i se tasi, ma e mafai foʻi ona tatou galulue ma lenā soo fou i le galuega o le seleselega.—Ioa. 4:36-38.

6. O le ā e tatau ona tatou iloa e faatatau i le tuputupu aʻe faaleagaga o se tagata suʻesuʻe?

⁶ O le ā e tatou te aʻoaʻoina mai i lenei talafaatusa? Muamua, e tatau ona tatou iloa e lē mafai ona tatou puleaina le tuputupu aʻe faaleagaga o se tagata suʻesuʻe. O le iloaina o le mea e gata ai lo tatou mafai, o le a tatou lē faamalosia ai se tagata suʻesuʻe e papatiso, ae e tatou te fesoasoani ma lagolagosua iā te ia. O le lotomaulalo foʻi e tatou te iloa ai, o le tuuina atu i le Atua, o se filifiliga e fitoitonu i le tagata lava ia. O le tuuina atu e tatau ona sau mai i le loto o se tasi ona o lona alofa mo Ieova, auā o le mea lenā e na te taliaina.​—Sala. 51:12; 54:6; 110:3.

7, 8. (a) O ā isi lesona e tatou te aʻoaʻoina mai i le talafaatusa i le tagata lūlū fatu sa moe? Aumai se faataʻitaʻiga. (e) O le ā ua tatou aʻoaʻoina mai ai e faatatau iā Ieova ma Iesu?

⁷ Lona lua, o le malamalama i le lesona mai i lenei talafaatusa, o le a tatou lē lotovaivai ai pe a leai ni iʻuga o a tatou galuega i le taimi muamua. E manaʻomia ona tatou onosaʻi. (Iako. 5:7, 8) E iai taimi e lē fua mai ai le fatu, ae pe a tatou faia le mea sili e fesoasoani ai i le tagata suʻesuʻe, e lē tatau la ona tatou manatu ua tatou lē faamaoni. E faatupu e Ieova le fatu o le upu moni, i loto o tagata lotomaulalo e naunau e faia suiga i o latou olaga. (Mata. 13:23) O lea, e lē tatau ona fuaina le taulau manuia o la tatou faiva i iʻuga e maua mai. I le silafaga a Ieova, e lē fuaina lo tatou taulau manuia i le  faiva, i le tali mai a tagata o loo tatou suʻesuʻe. Nai lo o lea, e sili atu ona tāua iā te ia a tatou taumafaiga faamaoni.​—Faitau le Luka 10:17-20; 1 Korinito 3:8.

⁸ Lona tolu, e tatou te lē iloa atu i nisi taimi suiga e tutupu i le loto o se tagata. O se faaaʻoaʻoga, sa faailoa atu e se ulugalii i le misionare sa latou suʻesuʻe, ua fia avea i laʻua ma tagata talaʻi e leʻi papatiso. Sa faamanatu atu e le misionare i le ulugalii, e tatau ona tuu muamua le la ulaula tapaa ina ia agavaa ai. Sa faateʻia o ia ina ua faapea mai le ulugalii, ua atoa ni nai masina talu ona la lē toe ulaula. Aiseā? Sa la iloaina o loo silafia mai e Ieova o loo la ulaula, ma e inosia e ia le faagutugutulua. O lea na la filifili ai pe e ulaula pea i luma o le misionare, po o le tuu loa o le ulaula. O lo laʻua alolofa mo Ieova lea ua amata ona tuputupu aʻe, na uunaʻia ai i laʻua e faia le filifiliga saʻo. Sa la tuputupu aʻe faaleagaga, e ui e leʻi iloa atu e le misionare le suiga sa la faia.

9. O le ā le uiga o le talafaatusa i le upega?

⁹ Faitau le Mataio 13:47-50. O le ā le uiga o le talafaatusa a Iesu i le upega? Sa faatusa e Iesu le talaʻiina atu o le tala lelei o le Malo i tagata, i le lafoina lea o se upega telē i le sami. E pei ona maua i se upega telē le tele o ʻituaiga o iʻa eseese,’ ua faapena foʻi le auala ua tosina mai ai le faitau miliona o tagata eseese ona o le galuega talaʻi. (Isa. 60:5) Ua faamaonia lenā vala i le faitau miliona o tagata e auai i a tatou tauaofiaga ma Faamanatuga i tausaga taʻitasi. O nisi o nei iʻa faafaatusa e “lelei,” ma ua aoaoina i le faapotopotoga Kerisiano. Ae o nisi iʻa e “leaga,” auā e lē o tagata uma e aoaoina mai e talia e Ieova.

10. Aiseā na faia ai e Iesu le talafaatusa i le upega?

¹⁰ Aiseā na faia ai e Iesu lenei talafaatusa? O le tuueseeseina o iʻa i le talafaatusa, e lē o faasino atu i le faamasinoga faaiʻu lea e faia a o faagasolo le puapuaga tele. Peitaʻi, o loo faamatilatila mai ai le mea o le a tupu a o faagasolo aso e gata ai o lenei faiga o mea. Na faailoa mai e Iesu e lē o tagata uma e tosina mai i le upu moni o le a avea ma auauna a Ieova. E toʻatele ua auai i a tatou sauniga, po o loo tatou suʻesuʻe foʻi. Peitaʻi, e latou te lē o lotomalilie e tuuina atu o latou ola iā Ieova. (1 Tu. 18:21) O nisi ua tatou lē o toe faifaimea faatasi i le faapotopotoga. Ae o nisi talavou na tausi aʻe e mātua Kerisiano, peitaʻi, e latou te lē o matuā naunau i tapulaa a Ieova. Po o le ā lava le tulaga, ae na faamatilatila mai e Iesu e tatau ona faia le filifiliga a le tagata lava ia. Pe a tatou faia le filifiliga saʻo, o le a silasila Ieova iā i tatou o ni mea “ua manaʻomia mai i atunuu uma.”​—Ha. 2:7.

11, 12. (a) O ā aogā e tatou te maua mai i le talafaatusa a Iesu i le upega? (e) O le ā e tatou te aʻoaʻoina mai ai e faatatau iā Ieova ma Iesu?

¹¹ O ā aogā e tatou te maua mai i le talafaatusa i le upega? O le malamalama i le lesona mai i lenei talafaatusa, o le a fesoasoani iā i tatou e ʻalofia ai le matuā faanoanoa pe a lē manaʻo se tagata suʻesuʻe po o a tatou fanau e auauna iā Ieova. E mafai ona tupu lenei mea, e tusa po o le ā le tele o a tatou taumafaiga e fai. O le lotomalie o se tasi e faia sana suʻesuʻega, po o le tausia aʻe foʻi i le upu moni, e lē otometi ai ona atiaʻe se faiā malosi a se tasi ma Ieova. E lē mafai ona avea se tasi ma auauna a Ieova, pe a lē lotomalie e gauaʻi i Lana pule.

¹² Po o lona uiga e lē mafai ona toe talia i le faapotopotoga i latou ua tuua le  upu moni? Pe e faavavau foʻi ona faavasega se tasi e leʻi filifili e auauna iā Ieova, o sē e “leaga”? E leai. O loo latou maua pea le avanoa a o leʻi gāpā le puapuaga tele. E tai pei o loo valaau mai Ieova iā i latou: “Ia foʻi mai iā te aʻu ona ou foʻi atu lea iā te outou.” (Mala. 3:7) O loo faamatilatila lenei manatu i le talafaatusa a Iesu i le uii faamaumauʻoa.​—Faitau le Luka 15:11-32.

13. O le ā le uiga o le talafaatusa a Iesu i le uii faamaumauʻoa?

¹³ O le ā le uiga o le talafaatusa a Iesu i le uii faamaumauʻoa? O le tamā alofa mutimutivale i lenei talafaatusa, ua faaāta mai ai lo tatou Tamā alofa o Ieova. O le atalii na talosaga mo lona tofi lea na alu ma faamaumau, ua faaāta mai ai i latou ua tuua le faapotopotoga. Ua avea i latou ma vaega o le lalolagi a Satani, lea e pei o se “atunuu mamao” ua vavaeese mai iā Ieova. (Efe. 4:18; Kolo. 1:21) Mulimuli ane, e toe sagatonu mafaufau o nisi ma iloa le matuiā o a latou agasala, ma filifili ai e toe foʻi mai i le faalapotopotoga a Ieova, e ui e lē faigofie. O nei tagata lotomaulalo ua faaalia le salamō, ua faamagalo ma talia fiafia e lo tatou Tamā.​—Isa. 44:22; 1 Pete. 2:25.

14. Aiseā na faia ai e Iesu le talafaatusa i le uii faamaumauʻoa?

¹⁴ Aiseā na faia ai e Iesu lenei talafaatusa? Na faailoa mai e Iesu e naunau Ieova e toe foʻi mai i latou na tuua o ia. I le talafaatusa, sa faamoemoe pea le tamā e toe foʻi mai lona atalii. I le taimi na toe foʻi mai ai le atalii, sa iloa “mamao” atu o ia e le tamā. E ui i lea, sa vave ona gaoioi le tamā e toe talia o ia. O lenei talafaatusa e uunaʻia ai i latou ua tuua le upu moni, ina ia toe vave foʻi mai iā Ieova. Atonu ua latou matuā vaivai faaleagaga, e faigatā ona toe foʻi mai ma e lagona le māsiasi. Peitaʻi, e tauia a latou taumafaiga, auā e oo lava i le lagi o le a olioli pe a latou toe foʻi mai.​—Luka 15:7.

15, 16. (a) O ā lesona e tatou te aʻoaʻoina mai i le talafaatusa a Iesu i le uii faamaumauʻoa? Aumai ni faaaʻoaʻoga. (e) O le ā e tatou te aʻoaʻoina mai ai e faatatau iā Ieova ma Iesu?

¹⁵ O ā aogā e tatou te maua mai i le talafaatusa i le uii faamaumauʻoa? E tatau ona tatou faataʻitaʻi i le faaaʻoaʻoga a Ieova. E lē tatau ona tatou fia “amiotonu naʻuā,” ma lē mananaʻo ai e toe talia tagata agasala ua faaalia le salamō. O le  faia faapea, e iʻu atu ai i le “faafanoina” faaleagaga o i tatou. (Fai. 7:16) E iai se isi lesona e tatou te aʻoaʻoina mai i lenei tala. O i latou ua tuua le faapotopotoga, e tatau ona vaai i ai o ni ʻmamoe ua leiloloa,’ ae e lē faapea ua lē toe aogā i ai se fesoasoani. (Sala. 119:176) Pe a tatou feiloaʻi ma se tasi ua tafetafea ese mai i le faapotopotoga, pe e tatou te fesoasoani iā te ia ina ia toe foʻi mai? Pe e mafai ona tatou vave faailoa atu i toeaina, ina ia mafai ona avatu i ai se fesoasoani talafeagai? E tatou te faia faapea, pe a tatou faatatauina lesona mai i le talafaatusa a Iesu i le uii faamaumauʻoa.

¹⁶ Seʻi mātau le auala na faaalia ai e nisi o uii faamaumauʻoa i aso nei, lo latou talisapaia o le alofa mutimutivale o Ieova, faapea le alofa ma le lagolagosua a le faapotopotoga. Na faapea mai se uso na faateʻaina mo le 25 tausaga: “O loo oʻu olioli pea talu ona ou toe faaaʻe mai, talu ai ua ou maua le ʻtaimi e toe faafouina ai’ mai iā Ieova. (Galu. 3:19) E alolofa ma lagolagosua mai le toʻatele, ma e ese le matagofie o loʻu aiga faaleagaga.” Na faapea mai foʻi se tuafafine e lima tausaga e leʻi toe faifaimea faatasi ma le faapotopotoga: “E lē mafai ona faamatala oʻu faalogona ina ua ou tofo totino i le alofa lea sa taʻua e Iesu. O se faaeaga le avea ma vaega o le faalapotopotoga a Ieova!”

17, 18. (a) O ā lesona e tatou te aʻoaʻoina mai i talafaatusa e tolu na tatou iloiloina? (e) O le ā ua tatou maumauaʻi e fai?

¹⁷ O ā lesona e tatou te aʻoaʻoina mai i nei talafaatusa e tolu? Muamua, e tatau ona tatou iloa e lē mafai ona tatou puleaina le tuputupu aʻe faaleagaga. O le matafaioi lenā a Ieova. Lona lua, e lē tatau ona tatou faatalitalia o i latou uma o loo tatou auaufaatasi ma suʻesuʻe, o le a filifili e auauna iā Ieova. Lona tolu, e tusa pe e tuua e se tasi le upu moni ma fulitua iā Ieova, e lē tatau ona mou atu lo tatou faamoemoe o le a ia toe foʻi mai. Ae pe a toe foʻi mai, seʻi o tatou talia o ia i se auala e atagia atu ai le silafaga a Ieova.

¹⁸ Seʻi faaauau pea ona tatou saʻilia le poto, malamalama ma le atamai. A o faitauina talafaatusa a Iesu, ia tatou fesili ifo: O le ā lona uiga? O le ā le māfuaaga ua faamauina ai i le Tusi Paia? E faapefea ona tatou faatatauina ona lesona? O le ā e tatou te aʻoaʻoina mai ai e faatatau iā Ieova ma Iesu? O le faia faapea, e faaalia atu ai ua tatou malamalama lelei i le uiga o fetalaiga a Iesu.