I LE 1870, na amata ai ona saʻiliʻili i le Tusi Paia se vaega toʻaitiiti i Pittsburgh (Allegheny) i Pennsylvania i le Iunaite Setete. Na taʻitaʻia e Charles Taze Russell lenei vaega, ma na latou suʻesuʻeina le togiola a Keriso, ma latou iloa ai lona tāua i fuafuaga a Ieova. Maʻeu lo latou fiafia i le iloaina o le togiola ua tatala ai le avanoa mo le faaolataga, e oo lava iā i latou e leʻi faalogo iā Iesu! O lo latou lototalisapaia na uunaʻia ai i latou e faamanatu le maliu o Iesu i tausaga taʻitasi.—1 Kori. 11:23-26.

Sa lomia e Russell le Zion’s Watch Tower, lea na faamatilatila ai o le togiola, o se faailoaga sili o le alofa o le Atua. Na taʻua e le Watch Tower le faamanatuina o le maliu o Keriso o se “vaitau tāua,” ma uunaʻia ai le ʻaufaitau e auai i le Faamanatuga i Pittsburgh, po o se isi nofoaga. “E tusa pe e toʻalua, toʻatolu pe e toʻatasi foʻi se tagata faatuatua e auai, ae o loo latou faatasi lava ma le Alii.”

I tausaga taʻitasi, e toʻatele i latou na auai i le Faamanatuga i Pittsburgh. Na taʻua i le tusi valaaulia, “E valaaulia ma le māfana outou e auai mai.” Na lotomalilie Tagata Aʻoga o le Tusi Paia e fafaga faaleagaga o latou uso ma tuafāfine. I le 1886, na faia ai se tauaofiaga mo ni nai aso, a o faagasolo le vaitaimi o le Faamanatuga. Na uunaʻia e le Watch Tower tagata: “Ia ō mai ma ia faatumulia o outou loto i le alofa mo le Matai ma ona uso, faapea le upu moni.”

I le tele o tausaga, na faia ai e Tagata Aʻoga i Pittsburgh tauaofiaga mo i latou e talitonu i le togiola, lea na auai i le Faamanatuga i inā. A o faatupulaʻia le aofaʻi o Tagata Aʻoga o le Tusi Paia, o le faatupulaʻia foʻi lenā o le aofaʻi o i latou e auai i le Faamanatuga i le lalolagi aoao. Sa auai Ray Bopp i le faapotopotoga i Chicago, ma na ia manatua vaitausaga o le 1910, e umi se taimi e tufa ai le areto ma le uaina, ona e toetoe o i latou uma e auai e taumamafa i le Faamanatuga.

O ā mea sa faaaogā i le Faamanatuga? E ui sa faaaogā e Iesu le uaina i le Talisuaga a le Alii, ae sa fautuaina e le Watch Tower le faaaogāina o le sua fou o le vine, ina ia aua ai neʻi faaosoosoina i latou sa “vaivai i le tino.” Peitaʻi, sa saunia le uaina mo i latou na manatu “e tatau ona faaaogā le uaina e filogia.” Ae sa iloa mulimuli ane e Tagata Aʻoga o le Tusi Paia, o le uaina mumū e lē filogia, sa talafeagai ona faaāta ai le toto o Iesu.

O le faamanatuina o le maliu o Iesu, o se avanoa lelei lea e manatunatu loloto ai. Peitaʻi, o nisi faapotopotoga sa matuā faavauvau lava, ma e māeʻa  ane le polokalame ua tau lē tautatala. I le 1934, na taʻua ai i le tusi Jehovah, e lē tatau ona faia le Faamanatuga i se auala “faanoanoa” ona o le maliu tigā o Iesu, ae e tatau ona “olioli” ona ua avea o ia o se Tupu talu mai le 1914.

Na iai se suiga mataʻina i le 1935, na aafia ai le auala e faia ai Faamanatuga, ina ua faamalamalama atili le uiga o le “motu o tagata e toʻatele” o loo taʻua i le Faaaliga 7:9. A o leʻi oo i lenā taimi, sa manatu auauna a Ieova i lenei vaega o ni Kerisiano tuuina atu e lē maelega tele. Peitaʻi i aso nei, ua mātauina lenei vaega o ni tagata tapuaʻi faamaoni e faamoemoe e ola i le lalolagi parataiso. O lenei faamalamalamaga faatasi ai ma isi suʻesuʻega loloto, na faapea mai ai Russell Poggensee: “E leʻi musumusuina aʻu e le agaga o Ieova mo le faamoemoe faalelagi.” Na amata ai loa ona lē toe taumamafa i le areto ma le uaina le uso o Russell ma isi tagata faamaoni, ae na auai pea i le Faamanatuga.

A o faagasolo lenā “vaitau tāua,” sa faia tauiviga faapitoa i le talaʻiga e maua ai e tagata le avanoa e faaalia ai le lototalisapaia mo le togiola. I le Bulletin i le 1932, na uunaʻia ai Kerisiano e lē tatau ona avea i latou ma “tagata paia i le Faamanatuga, e taumamafa i le Faamanatuga ae “lē galulue” i le talaʻia o le feʻau o le upu moni. I le 1934 na talosaga mai ai le Bulletin mo ni paeonia “lagolago,” ma na aumaia ai le fesili: ʻPe e mafai ona tauofo mai se toʻa 1,000 i le taimi o le Faamanatuga?’ Na aumaia i le Informant se manatu e faatatau i le ʻaufaauuina: “E atoatoa lo latou olioli pe a molimau atu i le Malo.” Sa talafeagai foʻi lenā manatu iā i latou e mauaina le faamoemoe i le lalolagi. *

O le faamanatuga, o se pō e sili ona paia i tagata o Ieova. E latou te faamanatuina, e tusa pe feagai ma tulaga faigatā. I le 1930, na savavali ai le tuafafine o Pearl English ma lona uso o Ora, i le pe ā ma le 80 km (50 maila) ina ia auai i le Faamanatuga. A o falepuipui le uso misionare o Harold King i Saina, sa ia tusia ai ni pese ma solo e faatatau i le Faamanatuga, ma faia areto ma uaina mai i vine mamago ma le araisa. I Europa Tutotonu faasolo atu ai i Amerika Tutotonu ma Aferika, na lototetele Kerisiano e faamanatu le maliu o Keriso, e ui i taua ma faasāsāaga. E tusa po o fea e tatou te i ai, ma po o ā foʻi o tatou tulaga, ae e tatou te faapotopoto faatasi e faamamaluina Ieova le Atua ma Iesu Keriso, a o faagasolo le vaitau o le Faamanatuga.