IĀ APERILA 28, 2013, na faia ai se fono faapitoa i Nagoya i Iapani, na faateʻia ai le aofia i se faasilasilaga na faia e Anthony Morris o se sui o le Vaega Pule, e tatala ai se lomiga fou i le gagana Iapani ua faamatuaina Le Tusi Paia—​O le Evagelia a Mataio. Na umi se taimi o patipati le silia i le 210,000 i latou na auai pe matamata tuusaʻo e ala i le Initaneti.

E mataʻina lenei faaliliuga o le Evagelia a Mataio lea e 128 ona itulau, na toe lomia mai i le Faaliliuga a le Lalolagi Fou i le gagana Iapani. Na faamatala e le uso o Morris na saunia lenei lomiga mo “tagata o le oganuu i Iapani.” O ā ni vala mataʻina o lenei lomiga? Aiseā na saunia ai? O le ā le tali mai a tagata i le oganuu?

Na maofa le aofia i le auala o loo tusia ai le tusi o Mataio. O le gagana Iapani e mafai ona faitau mai i luga agaʻi i lalo. E mafai foʻi ona faitau agaʻi i le faalava, ma o le auala lea ua tusia ai le tele o lomiga, e aofia ai ma nisi o a tatou lomiga fou. Ae peitaʻi o faamatalaga i lenei lomiga fou ua faatulaga e faitau mai i luga e agaʻi i lalo, e pei ona masani ai nusipepa ma tusi. Ua manatu le toʻatele o tagata Iapani o lenei faiga e faigofie ai ona faitau. I le Tusi Paia tuai, na tusia ulutala i le pito i luga o itulau. Peitaʻi i lenei lomiga fou, ua tuu i totonu o le itulau e fai ma tamaʻi ulutala, ina ia faigofie ai ona iloa e le tagata faitau le manatu autū.

Na maua loa e uso ma tuafāfine le lomiga ona latou faitau loa lea i ai. Ua faapea mai se tuafafine ua silia i le 80 ona tausaga: “I le taimi muamua, e masani ona ou faitau i le tusi o Mataio, ae ua aogā tele le auala fou ua faatulaga ai mataʻitusi ma ulutala, ou te malamalama atoatoa ai i le lauga i luga o le mauga.” Na tusi se tuafafine talavou: “E tasi le aso na ou faitauina ai le tusi o Mataio. Ua ou masani i le auala tuai e pei ona tusia ai a tatou lomiga, ae e toʻatele tagata Iapani e fiafia i le auala fou.”

Aiseā ua talafeagai lelei ai lenei lomiga fou i le oganuu a Iapani? E ui e lē masani le toʻatele o tagata Iapani i le Tusi Paia, ae e latou te naunau lava e faitau i ai. O lenei faaliliuga o le Evagelia a Mataio, o le a maua ai e i latou e leʻi vāai i se Tusi Paia le avanoa e maua ai se vaega o lenei faaliliuga ma faitau i ai.

Aiseā ua filifilia ai le tusi o Mataio? O le toʻatele o tagata Iapani a taʻu loa le “Tusi Paia,” e vave ona mafaufau iā Iesu Keriso. Na filifilia le tusi o Mataio ona o loo faamaumauina ai le gafa o Iesu, o lona soifua mai, o lana lauga i luga o le mauga, ma ana valoaga e uiga i aso e gata ai, o mataupu ia e fiafia i ai le toʻatele o tagata Iapani.

 Na maelega tagata talaʻi o le Malo i Iapani e tufatufa atu lenei lomiga fou i le talaʻiga ma toe asiga. Na tusi mai se tuafafine: “Ua tele nei avanoa e tufa atu ai le Afioga a le Atua i tagata o le oganuu. Na mafai ona ou ofoina se kopi o le Mataio i lenā lava aoauli sa faia ai le fono.”

Na faapefea ona faatomua e tagata talaʻi le tusi o Mataio? E masani le toʻatele o tagata Iapani i faaupuga e pei o le “faitotoʻa vaitiiti,” “aua neʻi lafoina a outou penina i puaa,” ma “ia aua neʻi outou popole mo le aso a taeao.” (Mata. 6:34; 7:6, 13) Ua faateʻia i latou i le iloaina o upu nei a Iesu Keriso. Ina ua faitau le toʻatele i faaupuga nei i le Evagelia a Mataio, ona latou faapea mai lea: “Ua leva ona matou toe fia faitau i le Tusi Paia.”

Pe a toe asia e le ʻautalaʻi i latou na taliaina le tusi o Mataio, e masani ona faapea mai tagata o aiga na vave lava ona latou faitauina. Na faamatala e se tamāloa i se tagata talaʻi: “Na ou faitau faafia i ai ma na faamāfanafanaina ai aʻu. Faamolemole ia aʻoaʻo atili aʻu e uiga i le Tusi Paia.”

Na ofo atu le tusi o Mataio i le talaʻiga i nofoaga faitele. Na tuu e se tuafafine lana imeli i se fafine talavou na taliaina le tusi o Mataio, a o faia sona sao i lenā galuega. Ina uma mavae le itula, na imeli mai le fafine i le tuafafine ma faapea mai sa ia faitauina ni vaega o le Tusi Paia, ma ua fia malamalama atili i ai. Ina ua mavae le vaiaso, ona faia lea o lana suʻesuʻega faale-Tusi Paia muamua, ma e leʻi umi ae auai i sauniga.

E silia i le 1,600,000 kopi o le Tusi Paia​—O le Evagelia a Mataio na aauina atu i faapotopotoga i Iapani, ma i masina taʻitasi e ofo atu ai e Molimau le faitau afe o kopi. O le faatomuaga o lenei lomiga ua faaalia ai faalogona o i latou na lomiaina e faapea: “E matou te faamoemoe o le faitauina o lenei lomiga o le a faalolotoina ai lou naunau i le Tusi Paia.”