1-3. Aiseā na mautinoa ai e Paulo e mafai ona ia maufaatuatuaina Ieova? (Tagaʻi i le ata i luga aʻe o le matua.)

PE AFAI na e ola aʻe o se Kerisiano i Roma i le uluaʻi senituri, e mautinoa le mataʻutia tele o lenā vaitaimi. Na tuuaʻia Kerisiano i le susunuina o le aai i le 64 T.A., ma tuuaʻia e latou te feita i tagata. Sa avea soo o Keriso ma taulaʻiga o sauāga. O le toʻatele o Kerisiano na faafalepuipui ma sauāina. O nisi o uso ma tuafāfine na saeia e manufeʻai, pe na tutuʻi foʻi i luga o laau ona susunu ola ai lea ina ia faamalamalama ai le pō.

² Na faafalepuipui Paulo mo le taimi lona lua, a o faagasolo lenā vaitaimi faigatā. Atonu na taumānatu Paulo po o le a fesoasoani ona uso Kerisiano iā te ia ona o se mea na tupu muamua atu. Na ia tusi atu iā Timoteo: “I laʻu uluaʻi tali atu i le faamasinoga, e leai se tasi na ʻau mai iā te aʻu, ae na latou tuulafoaʻiina aʻu; tau ina ia lē faasalaina i latou e tusa ma lenei mea.” E ui i lea, na faailoa mai e Paulo sa ia maua le fesoasoani. Na ia tusi: “Ae na latalata mai le Alii ma foaʻi mai le mana iā te aʻu.” Na foaʻiina atu e Iesu iā Paulo le malosi na ia manaʻomia. O le  ā le aogā o lenā fesoasoani? Na ia faapea mai: “Na laveaʻiina aʻu mai i le gutu o le leona.”​—2 Timo. 4:16, 17. *

³ O le manatuaina o lenā mea na faamalosia ai Paulo. Na ia mautinoa ai o le a foaʻi mai e Ieova iā te ia le malosi e tumau ai i tofotofoga na ia fesagaʻia i lenā taimi, faapea faafitauli o le a aliaʻe mai i le lumanaʻi. O lea na ia faapea mai ai: “E laveaʻiina aʻu e le Alii mai i galuega leaga uma.” (2 Timo. 4:18) Na iloa e Paulo e tusa pe e lē mafai ona fesoasoani mai tagata, ae na ia maufaatuatuaina e mafai ona fesoasoani mai Ieova ma Iesu.

4, 5. (a) O ai e mafai ona tatou faalagolago i ai mo le fesoasoani? (e) E faapefea ona e faamalosia la oulua faiā ma Ieova?

⁴ Pe e iai se taimi na e lagona ai ua leai se tasi e fesoasoani iā te oe ina ua e feagai ma se tulaga faigatā? Atonu ua vāea oe mai i lau galuega, pe e feagai ma omiga i le aʻoga, o se maʻi tigā, po o se isi lava faafitauli faigatā. Pe atonu foʻi na e talosaga atu i se tasi mo se fesoasoani, ae na e faanoanoa ona e te leʻi mauaina le fesoasoani na e manaʻomia. O le mea moni, e iai faafitauli e lē mafai e tagata ona foʻia. Pe a feagai ma na tulaga, pe e mafai ona tatou faatatauina le fautuaga a le Tusi Paia ina ia “faatuatua iā Ieova”? (Faata. 3:5, 6) E mafai moni lava ona fesoasoani mai Ieova, ma o loo iai i le Tusi Paia le tele o faaaʻoaʻoga e tatou te mautinoa ai e mafai ona fesoasoani mai Ieova i ona tagata.

⁵ O lea, aua neʻi o tatou popole pe a lē mafai ona fesoasoani mai isi iā i tatou. Nai lo o lea, ia faaaʻoaʻo iā Paulo i le vaai i tofotofoga o se avanoa e mafai ona tatou maufaatuatuaina atoatoa ai Ieova, ma tatou tofo ai i lana tausiga alofa. O lenā vala e mafai ona faamalosia ai lau faiā ma lou maufaatuatuaina o Ieova.

6. Aiseā e avea ai o se luʻi le maufaatuatuaina o Ieova pe a feagai ma se faafitauli faigatā?

⁶ Atonu na e feagai ma se faafitauli faigatā. Na faia au taumafaiga ina ia foʻia le faafitauli, ma tatalo foʻi iā Ieova mo le fesoasoani. Pe na e lagona le toʻafilemu ona o lou mautinoa e mafai ona ia fesoasoani mai iā te oe? O le tulaga moni lenā. (Faitau le Salamo 62:8; 1 Peteru 5:7.) E tāua ona tatou maufaatuatuaina Ieova pe a tatou mananaʻo e maua se faiā lelei ma ia. Ae o se luʻi foʻi lo tatou maufaatuatuaina o Ieova, o le a ia foaʻi mai mea e tatou te manaʻomia. Aiseā? O se tasi o māfuaaga, atonu e lē vave ona tali mai Ieova i a tatou tatalo i taimi uma.​—Sala. 13:1, 2; 74:10; 89:46; 90:13; Sapa. 1:2.

7. Aiseā e lē vave tali mai ai Ieova i a tatou tatalo i taimi uma?

⁷ Aiseā e lē vave tali mai ai Ieova i a tatou tatalo i taimi uma? Ua faapea mai le Tusi Paia e tai pei Ieova o se tamā. (Sala. 103:13) E lē avatuina e se tamā i sona alo mea uma e manaʻo i ai, pe e talia foʻi i le taimi lava lenā lona manaʻoga. E iloa e le tamā e vave ona uma le fiafia o le tamaitiiti i se mea. E lē gata i lea, e na te iloa le mea e lelei mo le tamaitiiti, faapea le aafiaga i isi. E na te iloaina foʻi manaʻoga o le tamaitiiti ma le taimi e faamalieina ai. Pe afai e avatu e le tamā i le tamaitiiti mea uma e manaʻo i ai, o le a pei la o ia o se auauna a le tamaitiiti. E alofa Ieova lo tatou Tamā i le lagi iā i tatou. I le avea ai o ia o Lē atamai na foafoaina mea uma, ua ia silafia o tatou manaʻoga, ma ua ia filifilia le taimi e sili ona lelei e tali mai ai i o tatou manaʻoga. E tāua la ona tatou  faatalitali ma iloa le auala e tali mai ai Ieova i a tatou tatalo.​—Faatusatusa i le Isaia 29:16; 45:9.

8. O le ā ua folafola mai e Ieova e faatatau i mea e gata ai lo tatou malosi?

⁸ O se tasi o vala, e silafia e Ieova le mea e gata ai lo tatou malosi. (Sala. 103:14) O lea, e na te lē faatalitalia i tatou e mafai ona tatou tumau i so tatou lava malosi, ma o le a ia fesoasoani mai. Ae e iai taimi, e tatou te lagona ai le faavaivai. Peitaʻi, ua folafola mai e Ieova pe a iai se tofotofoga e faigatā ona tatou fesagaʻia, ʻe saunia e Ia se auala e tatou te sao ai.’ (Faitau le 1 Korinito 10:13.) O lea, ua iai iā i tatou māfuaaga uma e tatou te talitonu ai e silafia e Ieova mea e mafai ona tatou tumau ai.

9. O le ā e tatau ona tatou faia pe a lē vave ona tali mai Ieova i a tatou tatalo?

⁹ Ia tatou onosaʻi pe a tatou tatalo iā Ieova mo le fesoasoani ae lē vave ona ia tali mai. Ia tatou manatua o loo naunau Ieova e fesoasoani mai, ma o loo ia faatalitali mo le taimi lelei e tali mai ai i o tatou manaʻoga. Ua faapea mai le Isaia 30:18: “O le a faatalitali ai pea Ieova ina ia agalelei atu iā te outou, o le a tulaʻi foʻi o ia ina ia alofa mutimutivale iā te outou. Auā o Ieova o le Atua e faamasinotonu. E fiafia i latou uma o ē e faatalitali iā te ia.”

10-12. (a) Aiseā e ono faigatā ai ona tausia se tagata maʻi o le aiga? (e) E faapefea i lo tatou faatuatuaina o Ieova i taimi faigatā ona aafia ai la tatou faiā ma ia? Aumai se faaaʻoaʻoga.

¹⁰ Pe a tatou feagai ma tulaga faigatā, atonu e taitutusa o tatou faalogona ma Paulo, ma ua manaʻomia ona laveaʻia i tatou mai i “le gutu o le leona.” O taimi faapena e matuā luʻia ai lo tatou maufaatuatuaina o Ieova, ae o le taimi tonu lenā e tāua ai ona tatou faia faapea. O se faaaʻoaʻoga, atonu o loo e tausia se tagata maʻi o le aiga. Ua e tatalo iā Ieova ina ia foaʻi mai iā te oe le atamai ma le malosi. * E te lagona le toʻafilemu pe a manatua o loo silasila mai Ieova ma malamalama iā te oe ma lou tulaga. O le a ia fesoasoani mai foʻi iā te oe ina ia tumau ma faamaoni iā te ia.​—Sala. 32:8.

¹¹ E iai taimi e foliga mai ai e lē o fesoasoani mai Ieova. Atonu ua feeseeseaʻi manatu o fomaʻi i le togafitiga e tatau ona fai. Pe atonu na e faatalitalia ou tauaiga e faamāfanafana mai iā te oe, peitaʻi ua atili ai ona faigatā le tulaga o mea. Ia faalagolago pea iā Ieova mo le fesoasoani, ma ia mafuta vavalalata atu pea iā te ia. (Faitau le 1 Samuelu 30:3, 6.) Mulimuli ane, pe a e iloa le auala na fesoasoani ai Ieova iā te oe, o le a atili ai ona faamalosia lau faiā ma ia.

¹² O le mea lenā sa tupu iā Linda. * Sa ia tausia ona mātua mo se taimi umi na mamaʻi ai a o leʻi maliliu. Na ia faapea mai: “E iai taimi na faigatā ai iā i maʻua ma laʻu tane faapea loʻu tuagane ona iloa le mea e fai, ma mafaufau ai e lē mafai ona maua se fesoasoani. Ae pe a ou toe nofo ma mafaufau i lenā taimi, ona matou iloa lelei ai lea sa fesoasoani mai Ieova iā i matou. Sa ia faamalosia i matou ma foaʻi mai mea na matou manaʻomia, e ui e iai taimi sa matou lē iloa ai le gaoioiga e fai.”

13. Na faapefea i le faatuatuaina o Ieova ona fesoasoani i se tuafafine na feagai ma ni tulaga faigatā i lona olaga?

¹³ O le faatuatuaina atoatoa o Ieova e mafai foʻi ona tatou tumau ai i taimi faigatā. O le tulaga lenā sa tupu iā Rhonda. Sa talosaga lona toʻalua e lē o se Molimau a Ieova  e tatala la laʻua faaipoipoga. Ae o le taimi foʻi lenā na aafia ai lona tuagane i se maʻi tigāina e taʻua o le lupus. I nai masina mulimuli ane, na maliu ai le avā a lona tuagane. I le taimi na amata ona toe sologa lelei le tulaga o mea, na amata lona lana paeonia sauatoa. E leʻi umi lava ae maliu loa lona tinā. O le ā na fesoasoani iā Rhonda e tumau ai i na taimi faigatā? Na ia faapea mai: “Na ou fesootaʻi iā Ieova i aso taʻitasi, e tusa po ou te faia ni filifiliga lāiti. O le faia faapea na moni ai Ieova iā te aʻu. Na ou aʻoaʻoina ai e tatau ona ou faalagolago iā te ia nai lo o le faalagolago iā te aʻu po o isi tagata. E moni le fesoasoani na ia tuuina mai, ma na ia tausia oʻu manaʻoga uma. O le iʻuga, ua ma galulue faatasi ma Ieova.”

14. E faapefea ona fesoasoani Ieova iā te oe pe a faateʻaina se tasi o lou aiga?

¹⁴ Seʻi mafaufau i se isi tulaga faigatā. Seʻi faapea ua faateʻaina se tasi o lou aiga e pele iā te oe, ma ua e malamalama foʻi mai i au suʻesuʻega mai i le Tusi Paia, i le auala e feagai ai ma le tagata faateʻaina. (1 Kori. 5:11; 2 Ioa. 10) Peitaʻi, o lou alofa i lenā tagata e te mafaufau ai e faigatā ona e usitaʻia le faatonuga a le Tusi Paia. * Po o le a e maufaatuatuaina lou Tamā i le lagi, o le a ia foaʻiina mai iā te oe le malosi e usitaʻi ma faamaoni ai? Po o le a e vaai i ai o se avanoa lelei lenā e te mafuta vavalalata ai iā Ieova?

15. Aiseā na lē usitaʻi ai Atamu iā Ieova?

¹⁵ Seʻi mafaufau i le uluaʻi tagata o Atamu. Pe na ia mafaufau e mafai ona ia lē usiusitaʻi iā Ieova ma ola pea? E leai, auā “e leʻi ʻolegia foʻi Atamu.” (1 Timo. 2:14) Aiseā  la na ia lē usiusitaʻi ai? Sa ʻaina e Atamu le fua o le laau na avatu e lana avā iā te ia, ona sa sili atu lona alofa i lana avā nai lo o Ieova. Sa ia faalogo i le leo o lana avā, nai lo o le usitaʻi i le faatonuga a Ieova.​—Kene. 3:6, 17.

16. O ai e tatau ona sili ona tatou alolofa i ai, ma aiseā?

¹⁶ Po o le uiga o lenei manatu e lē tatau ona tatou alolofa i o tatou tauaiga? E leai. Peitaʻi, e tatau ona sili atu ona tatou alolofa iā Ieova nai lo o se isi lava. (Faitau le Mataio 22:37, 38.) O le faia faapea, o le auala sili lenā e te fesoasoani ai i ou tauaiga o loo auauna pe e lē o auauna foʻi iā Ieova. Ia faamalosia pea lau faiā ma Ieova ma maufaatuatuaina o ia. Ae pe a e popole i se tagata faateʻaina o lou aiga, ia tatalo iā Ieova ma faamatala uma atu iā te ia ou faalogona. * (Roma 12:12; Fili. 4:6, 7) E ui e faigatā, ae ia faaaogā lenā avanoa e faamalosia ai lau faiā ma Ieova. O le iʻuga, o le a e maufaatuatuaina o ia ma maua ai iʻuga aogā.

¹⁷ Aiseā na laveaʻia ai e Ieova Paulo “mai i le gutu o le leona”? Na faapea mai Paulo: “Ina ia faia ma le māeʻaeʻa le talaʻiga e ala iā te aʻu ma ia faalogo ai nuu uma.” (2 Timo. 4:17) E pei o Paulo, pe a tatou maelega i le galuega talaʻi, e mafai ona tatou mautinoa o le a “faaopoopoina” mai e Ieova mea e tatou te manaʻomia. (Mata. 6:33) I le avea ai ma tagata talaʻi o le Malo, o i tatou “o ē e tatau i ai le avega tauave o le talaʻia o le tala lelei,” ma ua silasila Ieova iā i tatou o se “ʻaufaigaluega” faatasi ma ia. (1 Tesa. 2:4; 1 Kori. 3:9) O lo tatou maelega i le galuega a le Atua, o le a faigofie ai ona tatou faatalitali i le taimi e tali mai ai Ieova i a tatou tatalo.

18. O ā auala e mafai ona atiaʻe ai lo tatou maufaatuatuaina o Ieova ma faamalosia ai la tatou faiā ma ia?

¹⁸ Ia tatou faaaogā le taimi lenei e faamalosia ai la tatou faiā ma Ieova. Pe a tulaʻi mai se tulaga e faapopoleina ai i tatou, ia vaai i ai o se avanoa e tatou te mafuta vavalalata ai iā Ieova. Ia faitau, suʻesuʻe ma manatunatu loloto i le Tusi Paia. Ia faaauau ona tatalo iā Ieova ma pisi i le auaunaga iā te ia. O le faia faapea, e mafai ai ona tatou mautinoa o le a fesoasoani mai Ieova iā i tatou, e tumau i so o se tofotofoga e tatou te fesagaʻia i le taimi lenei ma le lumanaʻi.