1. (a) O le ā ua leva ona iloa e auauna a Ieova, ma e faapefea ona faatatau mai lenā manatu i aso nei? (e) O le ā o le a iloiloina i lenei mataupu?

UA LEVA ona iloa e auauna a Ieova le tāua o toleniga i le mauaina o le taulau manuia. Na faapotopoto e Aperaamo “ona tagata ua masani [po ua aʻoaʻoina] e tau” ina ia faasaoina Lota, ma na latou taulau manuia. (Kene. 14:14-16) I aso o le tupu o Tavita, “na aʻoaʻoina i pesega iā Ieova” tagata pepese sa iai i le fale o le Atua, ma na latou vivii atu i le Atua. (1 No. 25:7) I aso nei, o loo tatou tauina se taua faaleagaga faasaga iā Satani ma ana ʻau. (Efe. 6:11-13) E lē gata i lea, o loo tatou galulue mamafa e viia Ieova. (Epe. 13:15, 16) O lea, e pei o auauna i aso ua mavae, e tatau ona aʻoaʻoina pe e toleniina i tatou ina ia taulau manuia ai. I totonu o faapotopotoga, ua tuuina mai e Ieova i toeaina le tiute tauave o le toleniina lea o isi. (2 Timo. 2:2) O ā metotia ua faaaogā e toeaina tomai e toleni ai uso ina ia agavaa e leoleoina le lafu?

2. A o leʻi aʻoaʻoina e se uso ni tomai, o le ā e manaʻomia ona faia e se toeaina, ma aiseā?

² Ua faatusaina toeaina i se faifaatoʻaga. E tuu e se faifaatoʻaga  mea faalelei eleele i le palapala a o leʻi lūlūina i ai fatu laau ina ia lelei ai le ola o le laau. I se tulaga talitutusa, a o leʻi aʻoaʻoina e se uso e leai se poto masani ni tomai, e manaʻomia ona faasoa atu iā te ia ni manatu faale-Tusi Paia, e mafai ona sauniunia ai lona loto e tali mai ai i toleniga o le a ia mauaina.​—1 Timo. 4:6.

3. (a) E faapefea ona faaaogā fetalaiga a Iesu o loo i le Mareko 12:29, 30, pe a talanoa atu i sē o loo toleniina? (e) O le ā le aafiaga o le tatalo e faia e se toeaina i lē o loo toleniina?

³ Ina ia mafai ona iloa po o le ā le telē o le aafiaga o lē o loo toleniina i upu moni o le Malo, e mafai ona e fesili atu iā te ia, ʻUa faapefea i lou tuuina atu iā Ieova ona suia ai le auala e te ola ai?’ O lenā fesili e mafai ona taʻitaʻia ai i se talanoaga lelei, e faatatau i auala e tatou faia ai ma le lotoatoa la tatou auaunaga. (Faitau le Mareko 12:29, 30.) Atonu pe a māeʻa le talanoaga, e mafai ona e faia se tatalo e talosagaina ai Ieova e foaʻi mai lona agaga paia, i lē o loo toleniina ina ia faaiʻu ai lana toleniga. Maʻeu le pāʻia o le loto o le uso pe a faalogo i lau tatalo mai i le loto!

4. (a) Aumai ni faaaʻoaʻoga o tala faale-Tusi Paia e mafai ona fesoasoani i le tuputupu aʻe faaleagaga o lē o loo toleniina. (e) O le ā le sini e tatau ona iai i se toeaina pe a toleniina isi?

⁴ I le amataga o le toleniga, ia talanoaina ni tala faale-Tusi Paia e mafai ona fesoasoani i lē o loo toleniina e iloa le manaʻomia ona faaalia le naunau, maufaatuatuaina ma le lotomaulalo. (1 Tu. 19:19-21; Nee. 7:2; 13:13; Galu. 18:24-26) E tāua nei uiga i lē o loo toleniina, e pei ona tāua o le mea faalelei eleele i le palapala. E mafai ona vave ai lona tuputupu aʻe faaleagaga. Ua faapea mai Jean-Claude, o se toeaina mai Falani: “O loʻu sini autū pe a toleniina se tasi, o le fesoasoani iai ina ia maua le mafaufau faaleagaga. Ou te vaai i avanoa e mafai ona ma faitauina faatasi ai se mau patino, ina ia ʻfaapupulaina ai mata’ o lē o loo toleniina ʻi mea ofoofogia’ o loo i le Afioga a le Atua.” (Sala. 119:18) O ā nisi o auala e mafai ona faamalosia ai lē o loo toleniina?

5. (a) O le ā le tāua o le talanoa i lē o loo toleniina e faatatau i sini faaleagaga? (e) Aiseā e tatau ai i toeaina ona toleni i latou o loo talavou pea? (Tagaʻi i le faaopoopoga.)

⁵ Ia fesili atu i lē o loo toleniina, ʻO ā ni ou sini faaleagaga?’ Pe afai e leai ni ona sini, ia fesoasoani iā te ia e faatū se sini talafeagai ma e mafai ona ausia. Ia faailoa atu iā te ia se sini faaleagaga patino sa e faatūina, ma faamatala atu i se auala faaoso naunau lou olioli ina ua mafai ona e ausia lenā sini. E ui i le faigofie o lenā auala, peitaʻi e iai sona aafiaga tele. Ua faapea mai Victor, o se toeaina ma o se paeonia i Aferika: “A o oʻu laʻitiiti, sa faia mai e se toeaina ni fesili na filifilia lelei e faatatau i oʻu sini. O na fesili na fesoasoani iā te aʻu e amata ona ou manatu mamafa ai i laʻu faiva.” Ua faamatilatila foʻi e toeaina ua lava le poto masani le tāua o le amata o toleniga i le taimi e talavou ai, e ala i le tuu atu i ai o faaeaga e talafeagai ma o latou tausaga. O na toleniga e fesoasoani i talavou e uaʻi atu i sini faaleagaga a o faasolosolo ina matutua, o le taimi lea o le a tele ai faatosinaga.​—Faitau le Salamo 71:5, 17. *

6. O le ā se tasi o vala tāua o le auala na toleni ai e Iesu isi?

⁶ E mafai ona faaosofia le naunau o lē o  loo toleniina ina ia auauna e ala i le faamatala i ai e lē na o mea e fai, ae o le māfuaaga foʻi e fai ai. O lou avatuina o māfuaaga, ua e faataʻitaʻi ai iā Iesu le Faiaʻoga Sili. O se faaaʻoaʻoga, a o leʻi avatuina e Iesu i ona soo le faatonuga ina ia talaʻi, sa ia faailoa atu iā i latou le māfuaaga e tatau ai ona latou usitaʻi. Na ia fetalai: “Ua tuuina mai iā te aʻu le pule uma i le lagi ma le lalolagi.” Na ia toe faaopoopo atu: “O le mea lea, ia outou ō atu e fai tagata o nuu uma lava ma soo.” (Mata. 28:18, 19) E faapefea ona e faaaʻoaʻo i le auala na toleni ai e Iesu isi?

7, 8. (a) E faapefea ona faaaʻoaʻo toeaina i le auala na toleni ai e Iesu isi? (e) O le ā le tāua o le faamālō atu i se tasi o loo toleniina? (i) O ā fautuaga e mafai ona fesoasoani i toeaina ina ia toleni ai isi? (Tagaʻi i le pusa “Auala e Toleni ai Isi.”)

⁷ Ia faamatala i lē o loo toleniina māfuaaga faale-Tusi Paia o mea o loo talosagaina o ia e fai. O lenā auala e aʻoaʻoina ai o ia e mafaufau i mataupu silisili o le Tusi Paia. O se faaaʻoaʻoga, seʻi faapea o loo e talosaga atu i se uso ina ia faamamā le auala e agaʻi ai i totonu o le Maota mo Sauniga, ina ia foliga mamā ai ma saogalemu. E mafai ona e faitau atu le Tito 2:10, ma faamatala atu o lona faamamāina o le Maota mo Sauniga, e ʻfaamamaluina ai aʻoaʻoga a le Atua lo tatou Faaola.’ Ia fai atu foʻi i le uso e mafaufau i aogā o le auala e faataunuu ai lona tiute tauave i uso ma tuafāfine matutua o le faapotopotoga. O lenā talanoaga o le a fesoasoani i lē o loo toleniina ina ia uaʻi atu i isi nai lo o tulafono. O le a ia mauaina le fiafia i le vaai atu i auala ua mafai ona maua ai e uso ma tuafāfine aogā mai i galuega o loo ia faatinoina.

⁸ E lē gata i lea, ia faamālō atu i lē o loo toleniina i ana taumafaiga e faatatau au fautuaga. O le ā le tāua o lenā vala? O le aogā o le vai e fesoasoani i le tuputupu aʻe o le laau. E faapena foʻi le aogā o le avatu o se faamālō faamaoni, e fesoasoani i le agaʻigaʻi i luma o se tasi i le auaunaga iā Ieova.​—Faatusatusa i le Mataio 3:17.

9. (a) O le ā le luʻi ua feagai ma nisi o toeaina i atunuu e lelei le tamaoaiga? (e) Aiseā ua lē faamuamuaina ai le upu moni i olaga o nisi talavou?

⁹ O se isi luʻi o loo feagai ma toeaina i atunuu e lelei le tamaoaiga, o le taumafai lea e faalaeiau uso talavou ua papatiso, ina ia auai i meafai a le faapotopotoga. Sa fesiligia nisi o toeaina ua lava le poto masani mai i le pe ā ma le 20 atunuu, po o le ā le māfuaaga e faigatā ai i nisi o uso talavou ona talia faaeaga i le faapotopotoga. O le toʻatele o i latou na faapea mai a o  tuputupu aʻe nisi talavou, e leʻi faalaeiauina i latou e mātua e tuliloa sini faaleagaga. Ae i nisi tulaga, na faanaunau nisi talavou e faatutū sini faaleagaga, peitaʻi na faalaeiauina e o latou mātua e tuliloa sini i le lalolagi. E leʻi faamuamuaina le upu moni i olaga o nei talavou.​—Mata. 10:24.

10, 11. (a) E faapefea ona faasolosolo ona fesoasoani se toeaina i se uso e foliga mai e lē naunau i mea faaleagaga? (e) O ā manatu faale-Tusi Paia e mafai ona faaaogā e se toeaina e fesoasoani ai i se uso faapena, ma aiseā? (Tagaʻi i le faaopoopoga.)

¹⁰ Pe a foliga mai e lē naunau se uso i mea faaleagaga, e tele taumafaiga e fai ma e manaʻomia ai le onosaʻi i le taumafai e sui le auala e mafaufau ai. Peitaʻi, e mafai lava ona fai. E faasaʻo e se faifaatoʻaga le tuputupu aʻe o se laau e ala i le faasaʻosaʻo mālie o lālā o le laau. E faapena foʻi ona faasolosolo mālie ona fesoasoani i se uso e iloa le manaʻomia ona suia o ona manatu e faatatau i le taliaina o faaeaga. Ae e faapefea ona faia lenā mea?

¹¹ Ia faaalu se taimi e atiaʻe ai se faauōga ma le uso, ma faailoa i ai o loo manaʻomia o ia e le faapotopotoga. A o faagasolo taimi, ia nonofo i lalo ma le uso ma fetufaaʻi i ni mau patino ma fesoasoani iā te ia e mafaufau i lona tuuina atu iā Ieova. (Fai. 5:4; Isa. 6:8; Mata. 6:24, 33; Luka 9:57-62; 1 Kori. 15:58; 2 Kori. 5:15; 13:5) Ia fesili atu iā te ia, ʻO le ā na e folafola atu iā Ieova ina ua tuuina atu lou ola iā te ia?’ Ia taumafai e pāʻia lona loto e ala i le fesili atu: ʻO ā ni faalogona o Ieova ina ua e papatiso?’ (Faata. 27:11) ʻO ā ni faalogona o Satani i lenā taimi?’ (1 Pete. 5:8) O le faitauina o se mau e filifilia lelei, e mafai ona matuā pāʻia ai le loto o se uso.​—Faitau le Eperu 4:12. *

12, 13. (a) O ā uiga na faaalia e Elisaia? (e) Na faapefea ona tauia e Ieova lona faamaoni?

¹² Uso talavou, o loo manaʻomia e le faapotopotoga la outou fesoasoani. O ā uiga e fesoasoani iā te outou ina ia taulau manuia ai i le auaunaga iā Ieova? Ina ia maua le tali, seʻi o tatou iloiloina ni mea sa tutupu i le olaga o sē na ia mauaina foʻi toleniga i aso ua mavae.

¹³ I le toetoe 3,000 tausaga ua mavae, na valaaulia ai e le perofeta o Elia le talavou o Elisaia ina ia avea ma ana auauna. Sa talia e Elisaia le valaaulia ma auauna faamaoni i lenei toeaina matua e ala i le faia o se galuega faatauvaa. (2 Tu. 3:11) Ina ua mavae le ono tausaga o le toleniga a Elisaia, na ia iloa ai ua toeitiiti māeʻa le galuega a Elia i Isaraelu. O le taimi lenā na uunaʻia ai e Elia lona soātau ua aʻoaʻoina lelei ina ia aua neʻi toe mulimuli atu iā te ia. Peitaʻi, e faatolu ona faapea atu Elisaia iā Elia: “Ou te lē tuua lava oe.” Na ia maumauaʻi e mafuta pea ma lona faiaʻoga e tusa po o le ā le umi. Na tauia e Ieova le faamaoni ma le faatuatua o Elisaia, e ala i lona molimauina o le aveina aʻe faavavega o Elia.​—2 Tu. 2:1-12.

14. (a) E faapefea ona faaaʻoaʻo i latou o loo toleniina i aso nei iā Elisaia? (e) Aiseā e tāua ai i lē o loo toleniina ona faaalia le faamaoni?

¹⁴ E faapefea ona e faaaʻoaʻo iā Elisaia? Ia vave ona talia faaeaga, e aofia ai ma tiute tauave faatauvaa. Ia vaai i lau faiaʻoga o sau uō, ma faailoa atu iā te ia lou talisapaia o mea ua ia faia mo oe. O le auala foʻi e te tali atu ai, e tai pei lava o loo e fai atu iā te ia: “Ou te lē tuua lava oe.” Ae sili atu i lenā, ia faamaoni i so o se faaeaga e tuuina atu iā te oe. Aiseā e tāua ai lenā vala? O le taimi lava e faamaonia ai lou faamaoni, ma e mafai ona maufaatuatuaina oe, ona iloa lea e toeaina ua finagalo Ieova e tuuina atu isi  faaeaga i le faapotopotoga iā te oe.​—Sala. 101:6; faitau le 2 Timoteo 2:2.

15, 16. (a) O ā auala na faaalia ai e Elisaia le faaaloalo i lona faiaʻoga? (Tagaʻi i le ata i luga aʻe o le matua.) (e) Aiseā na maufaatuatuaina ai e isi perofeta Elisaia?

¹⁵ O le tala iā Elia ma Elisaia e faailoa mai ai foʻi auala e faaalia ai e uso le faaaloalo talafeagai i toeaina ua lava le poto masani. Ina ua māeʻa ona asiasi Elia ma Elisaia i se vaega o perofeta i Ieriko, ona la savavali ai lea i le vaitafe o Ioritana. Ina ua oo i inā, “ona tago lea o Elia i lona ofu tele, ua taataʻai ma tā ai le vai, ona vaeluaina lea o le vai.” Ina ua māeʻa ona sopoʻia le ilitivai mātūtū, ona laʻua ʻsavavali lea ma talatalanoa.’ E oo ane lava i lenā taimi, e leʻi mafaufau Elisaia ua ia iloa mea uma. E oo lava i le taimi na alu ese ai Elia, sa teuloto pea e Elisaia upu uma a lona faiaʻoga. Na sosoo ai ma le aveina aʻe o Elia i le asiosio. Mulimuli ane, na toe foʻi Elisaia i le vaitafe o Ioritana ma ia tā ai le vai i le ofu tele o Elia, ma alaga: “O fea ea o iai Ieova le Atua o Elia?” O le iʻuga, sa toe vaeluaina ai le vai.​—2 Tu. 2:8-14.

¹⁶ Pe e te mātauina e tutusa lelei le vavega na faia e Elisaia ma le vavega mulimuli na faia e Elia? Aiseā e tāua ai lenā vala? E leʻi manatu Elisaia ona o ia lea ua tuuina atu i ai le tofiga, ua tatau loa ona ia suia le auala e faia ai mea. Nai lo o lea, sa faaauau pea ona ia mulimuli i le auala na faia ai le faiva a Elia. Na faaalia e Elisaia le faaaloalo mo lona faiaʻoga, o lea na mafai ai ona maufaatuatuaina o ia e isi perofeta. (2 Tu. 2:15) Ae a o faagasolo le 60 tausaga o le faiva faaperofeta a Elisaia, e tele vavega na faaaogā ai e Ieova o ia e faatinoina, nai lo o vavega na faia e Elia. O le ā le lesona e mafai ona aʻoaʻoina mai ai e i latou o loo mauaina toleniga i aso nei?

17. (a) E faapefea ona mulimuli i latou o loo mauaina toleniga i aso nei i le faaaʻoaʻoga a Elisaia? (e) A o faagasolo taimi, o le ā le auala o le a faaaogā ai e Ieova ē faamaoni o loo toleniina?

¹⁷ Aua e te manatu o le taimi lava e tuuina atu ai iā te oe ni tiute tauave i le faapotopotoga, ona e suia atoatoa lea o le auala e faia ai mea. E lē tatau ona fai suiga ona o lou faanaunauga ina ia faia ni suiga, ae e tatau ona fua i manaʻoga o le faapotopotoga ma taʻiala e maua mai i le faalapotopotoga a Ieova. O le mulimuli o Elisaia i auala na faaaogā e Elia, na faaalia ai lona faaaloalo i lona faiaʻoga, ma mafai ai ona maufaatuatuaina o ia e isi perofeta. E mafai foʻi ona avatu se faamautinoaga i uso talitonu ma faaalia le faaaloalo i toeaina, e ala i le mulimuli pea i auala faale-Tusi Paia o loo latou faaaogāina. (Faitau le 1 Korinito 4:17.) Peitaʻi, a o faasolo ina e mauaina le poto masani, e mautinoa o le a iai sou sao i le faia o suiga e fesoasoani i le faapotopotoga ina ia piiama ai i le faalapotopotoga a Ieova o loo agaʻi pea i luma. E pei o Elisaia, e iai le taimi o le a faaaogā ai e Ieova ē faamaoni o loo toleniina e faia galuega e sili atu nai lo o latou faiaʻoga.​—Ioa. 14:12.

18. Aiseā e matuā tāua ai le toleniina o uso i faapotopotoga i aso nei?

¹⁸ E matou te faamoemoe o le a fesoasoani manatu mai i lenei mataupu ma le mataupu ua mavae e uunaʻia ai toeaina e faatulaga se taimi ina ia toleni ai uso. E matou te faamoemoe foʻi o le a naunau uso ua agavaa e faaaogā lelei nei toleniga, a o latou fesoasoani i le tausiaina o mamoe a Ieova. O le faia faapea o le a faamalosia ai faapotopotoga i le lalolagi aoao, ma fesoasoani ai le tasi i le isi ina ia tumau faamaoni a o faagasolo mea mataʻina o le a oo mai.