1. Aiseā e tatau ai ona faamalosia pea la tatou faiā ma Ieova?

PO O oe o se Molimau a Ieova ua uma ona papatisoina? Pe afai o lea, e iai la se mea tāua o loo iā te oe, o lau faiā lea ma le Atua. Peitaʻi, e osofaʻia pea la tatou faiā ma Ieova e ala mai i osofaʻiga a le lalolagi a Satani, ma o tatou tino lē lelei atoatoa. O luʻi na o loo feagai ma Kerisiano uma. O lea, e tatau ai ona matuā faamalosia la tatou faiā ma Ieova.

2. (a) O le ā le uiga o le upu faiā? (Tagaʻi i le faaopoopoga.) (e) E faapefea ona faamalosia la tatou faiā ma Ieova?

² Po o vavalalata la oulua faiā ma Ieova? Pe e te manaʻo e faamalosia lenā faiā? Ua faailoa mai i le Iakopo 4:8 le auala e faia ai lenā vala: “Ia outou mafuta vavalalata atu i le Atua, ona mafuta vavalalata mai lea o ia iā te outou.” E lua itu o la tatou faiā ma Ieova. * Pe a tatou faia gaoioiga e mafuta vavalalata ai iā Ieova, o le gaoioiga foʻi lenā o le a ia faia iā i tatou. O le tele e tatou te faia ai faapea, o le faamalosia foʻi lenā o la tatou faiā  ma Ieova. O le iʻuga, o le a moni ai iā i tatou lenā faiā. O le a iai iā i tatou le uiga mautinoa sa iā Iesu ina ua ia fetalai: ʻE iai moni lē na auina mai aʻu. Ua ou iloa o ia.’ (Ioa. 7:28, 29) O ā ni gaoioiga patino e tatau ona e faia ina ia mafuta vavalalata atu ai iā Ieova?

3. E faapefea ona tatou fesootaʻi ma Ieova?

³ O le iai o se fesootaʻiga e lē aunoa ma Ieova, o se vaega tāua o lo tatou mafuta vavalalata atu iā te ia. E faapefea ona e fesootaʻi atu i le Atua? E faapefea ona e fesootaʻi i sau uō e mamao se mea e nofo ai? Atonu e masani ona oulua fetusiaʻi pe talanoa i le telefoni. E tatou te talanoa iā Ieova e ala i le tatalo iā te ia e lē aunoa. (Faitau le Salamo 142:2.) Ae e tatou te faatagaina Ieova e talanoa mai iā i tatou, pe a faitau le Tusi Paia e lē aunoa, ma manatunatu loloto i ai. (Faitau le Isaia 30:20, 21.) O lea, seʻi o tatou iloiloina pe e faapefea i nei fesootaʻiga ona faamalosia ai la tatou faiā ma Ieova, ma atili ai ona moni la tatou faiā ma ia.

4, 5. Ua faapefea ona fesootaʻi mai Ieova iā te oe e ala i le Tusi Paia? Aumai se faaaʻoaʻoga.

⁴ E tatou te talitonu o loo iai i le Tusi Paia le feʻau a le Atua mo tagata uma. Peitaʻi, o loo faailoa mai foʻi i le Tusi Paia le auala e mafai ona e mafuta vavalalata ai iā Ieova. E faapefea? Pe a e faitauina ma suʻesuʻe e lē aunoa le Tusi Paia, ia mafaufau i le auala e te tali atu ai i mea o loo e faitauina, ma mafaufau i le auala e te faatatauina ai i lou tulaga. O le faia faapea, ua e faatagaina ai Ieova e talanoa mai iā te oe e ala mai i lana Afioga. O le auala lenā e te mafuta vavalalata atu ai iā te ia.​—Epe. 4:12; Iako. 1:23-25.

⁵ O se faaaʻoaʻoga, ia faitau ma manatunatu loloto i upu a Iesu ia “aua tou te toe faaputuina mo outou ʻoa o le lalolagi.” Pe a e iloa o loo faamuamua pea le Malo i lou olaga, e te lagona o loo e faafiafiaina Ieova. Ae i le isi itu, pe a e iloa e manaʻomia ona faafaigofie lou olaga ma uaʻi atu ai i manaʻoga o le Malo, o lenā ua faailoa atu e Ieova se vala e mafai ona e galue i ai ina ia mafuta vavalalata atu ai iā te ia.​—Mata. 6:19, 20.

6, 7. (a) O le ā le aafiaga o le suʻesuʻeina o le Tusi Paia i lo tatou alolofa iā Ieova ma lona alofa mai iā i tatou? (e) O le ā lo tatou sini e tatau ona iai pe a suʻesuʻeina le Tusi Paia?

⁶ O le suʻesuʻeina o le Tusi Paia, e faailoa  mai ai se vala e mafai ona tatou agaʻigaʻi ai i luma faaleagaga. Ae e sili atu i lenā, e faaloloto ai foʻi lo tatou talisapaia o ala o Ieova, ma atili ai ona tatou alolofa iā te ia. Pe a tuputupu pea lo tatou alolofa i le Atua, o le a faalolotoina foʻi lona alofa mo i tatou, ma faamalosia ai la tatou faiā ma Ieova.​—Faitau le 1 Korinito 8:3.

⁷ E manaʻomia ona saʻo le māfuaaga e tatou te suʻesuʻeina ai le Tusi Paia, ina ia mafuta vavalalata atu ai iā Ieova. Ua faapea mai le Ioane 17:3: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.” O lea, ia avea ma o tatou sini e lē gata o le ave i fale o le poto, ae ia tatou “iloa” lelei foʻi Ieova.​—Faitau le Esoto 33:13; Sala. 25:4.

8. (a) O le ā atonu e mafaufau i ai nisi i le auala na feutagaʻi ai Ieova ma le tupu o Asaraia? (e) O ā ni o tatou faalogona i le auala na gaoioi ai Ieova, pe afai e tatou te iloa lelei o ia?

⁸ Pe a tatou iloa lelei Ieova e pei o se Uō vavalalata, o le a tatou lē popole ai pe a lē faamatalaina i le Tusi Paia le māfuaaga e faia ai e Ieova se gaoioiga. O se faaaʻoaʻoga, o ā ni ou faalogona i le auala na feutagaʻi ai Ieova ma le tupu o Iuta o Asaraia? (2 Tu. 15:1-5) Sa ʻfaia e le nuu o taulaga ma faamū taulaga i mea maualuluga,’ ae sa faaauau pea ona faia e Asaraia o “mea ua tonu i le silafaga a Ieova.” E ui i lea, ʻna taia e Ieova le tupu i se mala, ma ua avea ai pea o ia ma lepela e oo lava i le aso na oti ai.’ Aiseā? E lē o faamatalaina mai i le tala le mea na tupu. Pe e avea lenā ma itu e tatou te mafaufau ai na faasala e Ieova Asaraia e aunoa ma se māfuaaga tatau? E leai. Pe afai e tatou te iloa lelei Ieova, ona tatou iloa lea sa tonu le faasalaga. E tatau ona tatou iloa e masani ona “aʻoaʻi faatatau” e Ieova tagata pe a ia aumaia faasaʻoga. (Iere. 30:11) O le iloaina o lenā mea e tatou te maufaatuatuaina ai le tonu o le faamasinoga a Ieova, e ui e tatou te lē iloa le māfuaaga na ia faasalaina ai Asaraia.

9. Aiseā na taia ai e Ieova Asaraia i le lepela?

⁹ Peitaʻi, e iai isi faamatalaga e faatatau i lea mataupu o loo taʻua i le Tusi Paia. O le tupu o Asaraia e iloa foʻi o le tupu o Usia. (2 Tu. 15:7, 32) O loo taʻua i le tala i le 2 Nofoaiga a Tupu 26:3-5, 16-21, na faia e Usia mea na tonu i le silafaga a Ieova, ae mulimuli ane “ona faamaualuga lea o lona loto ua oo lava ina malaia ai o ia.” O lona faamaualuga, na ia taumafai ai e faia tiute o ositaulaga. Na taumafai ositaulaga e toʻa 81 e faasaʻo o ia. O le ā le auala na tali atu ai Usia? O lona faamaualuga, na ia “matuā ita” ai i ositaulaga. E lētioa taia o ia e Ieova i le lepela.

10. (a) Aiseā e lē manaʻomia ai ona tatou iloa uma faamatalaga e faatatau i le auala e gaoioi ai Ieova? (e) E faapefea ona faamalosia lo tatou mautinoa i ala amiotonu o Ieova?

¹⁰ O le ā le lesona tāua e tatou te aʻoaʻoina mai ai? E tusa ai ma le tala i le tupu o Asaraia, o loo iai ni nai faamatalaga e tatou te iloa ai le māfuaaga na faasala ai e Ieova o ia. Ae o le ā la tatou gaoioiga e fai, pe a lē aumaia i le Tusi Paia faamatalaga uma e faatatau i se mea na tupu? Po o le a e taumānatu pe na faia e Ieova le gaoioiga tonu? Po o le a e mafaufau o loo iai i le Tusi Paia faamatalaga uma e tatou te mautinoa ai e faia e Ieova le gaoioiga tonu? (Teu. 32:4) A o faasolo ina tatou iloa lelei Ieova, o le a atili ai ona tuputupu aʻe lo tatou talisapaia ma le naunau i ona ala, ma lē fesiligia ai ana gaoioiga. E mafai ona tupu lenā mea, pe a tatou suʻesuʻe ma manatunatu loloto i le Tusi Paia. (Sala. 77:12, 13)  O le iʻuga, o le a faamalosia la tatou faiā ma Ieova, ma atili ai ona moni iā i tatou lenā faiā.

11-13. E faapefea ona tatou iloa e faafofoga mai Ieova i tatalo? (Tagaʻi i le ata i luga aʻe o le matua.)

¹¹ O le tatalo e tatou te mafuta vavalalata atu ai iā Ieova. E tatou te vivii ma faafetai atu ai iā te ia, ma talosagaina ai foʻi lana fesoasoani. (Sala. 32:8) Ae ina ia moni la tatou faiā ma Ieova, e tatau ona tatou talitonu o loo ia faafofoga mai i a tatou tatalo.

¹² E manatu nisi tagata e pau le aogā o le tatalo e tau ina faaleleia ai o tatou faalogona. E latou te manatu e fesoasoani le tatalo iā te oe e mafaufau lelei ai i lou faafitauli, ma maua ai se vaifofō. E moni e mafai ona fesoasoani le tatalo iā te oe i na vala. Peitaʻi, e faafofoga mai Ieova iā te oe, pe a e talanoa atu iā te ia i le tatalo. E faapefea ona tatou mautinoa i lenā tulaga?

¹³ Seʻi mafaufau i le tulaga lenei: A o leʻi soifua Iesu o se tagata, sa ia mātauina le auala na tali mai ai Ieova i tatalo a ana auauna faamaoni. A o faagasolo le faiva a Iesu i le lalolagi, sa ia faaaogā le tatalo e faailoa atu ai ona faalogona i lona Tamā. O se tasi o taimi na ia tatalo ai i le pō atoa. Po o le a ia faia faapea pe ana ia iloa e lē o faafofoga mai Ieova i tatalo? (Luka 6:12; 22:40-46) Po o le a ia aʻoaʻoina foʻi ona soo e tatalo, pe ana faapea o le tatalo ua na o se mea e faaleleia ai o tatou faalogona? E mautinoa sa silafia e Iesu o le tatalo e fesootaʻi ai iā Ieova. I se tasi o taimi, na ia faapea atu ai: “Loʻu Tamā e, ou te faafetai atu iā te oe ona ua e faafofoga mai iā te aʻu. E moni ua ou iloa, e te faafofoga mai pea iā te aʻu.” E tatou te mautinoa foʻi o Ieova o le “Faafofoga tatalo.”​—Ioa. 11:41, 42; Sala. 65:2.

14, 15. (a) O le ā le tāua o le faamaʻoti o a tatou tatalo? (e) Na faapefea ona fesoasoani le tatalo i se tasi o tuafafine e faamalosia ai la laʻua faiā ma Ieova?

¹⁴ Atonu e lē faigofie ona tatou iloa le auala e taliina ai a tatou tatalo. Ae pe a faamaʻoti a tatou tatalo, o le a mafai ona tatou  iloa lelei le auala e tali mai ai Ieova, ma atili ai ona moni o ia iā i tatou. Pe a e faailoa atu iā Ieova mea uma o loo e popole ai, o le a atili ai ona Ia mafuta vavalalata mai iā i tatou.

¹⁵ Seʻi mafaufau i le faaaʻoaʻoga a Katerina. * E leʻi fiafia i le galuega talaʻi, e ui sa faia e lē aunoa sona sao. Na ia faapea mai: “Ou te leʻi fiafia i le auaunaga i le fanua. Ae ina ua ou litaea mai i laʻu galuega, sa faalaeiau mai se tasi o toeaina ina ia avea aʻu o se paeonia sauatoa, ma ia tuuina mai foʻi se pepa talosaga. Na ou filifili ou te paeonia, ma tatalo i aso taʻitasi iā Ieova ina ia mafai ona ou fiafia i le auaunaga i le fanua.” Pe na tali Ieova i ana tatalo? Ua ia faapea mai: “Ua tolu nei tausaga o oʻu paeonia. O le tele o le taimi e auai ai i le faiva, ma aʻoaʻoina mea mai i isi tuafāfine, o le faasolosolo foʻi lenā ona faaleleia oʻu tomai e molimau atu ai. O le taimi lenei, ua ou matuā fiafia lava i le auaunaga i le fanua. Ae o le vala tāua, ua sili atu ona vavalalata la maʻua faiā ma Ieova i le taimi lenei.” O tatalo a Katerina na mafai ona moni ai la laʻua faiā ma Ieova.

¹⁶ O le atiaʻe o se faiā vavalalata ma Ieova e aafia ai le olaga atoa. E tatau ona tatou uia laasaga e mafuta vavalalata ai i le Atua, pe a tatou mananaʻo e mafuta vavalalata mai o ia iā i tatou. O lea, seʻi faaauau ona tatou fesootaʻi e lē aunoa i le Atua e ala i le suʻesuʻeina o le Tusi Paia ma le tatalo. O le iʻuga, o le a faamalosia pea la tatou faiā ma Ieova, ma o le a fesoasoani iā i tatou e fesagaʻia ai ma le taulau manuia tofotofoga.

16, 17. (a) O le ā e tatau ona tatou faia ina ia faamalosia ai pea la tatou faiā ma Ieova? (e) O le ā le luʻi faigatā o le a iloiloina i le mataupu o loo sosoo mai?

¹⁷ Peitaʻi, e avea o se luʻi faigatā lo tatou tauivi pea ma faafitauli, e ui i a tatou tatalo faatauanau. I taimi faapena, atonu e mafai ona mou atu ai lo tatou maufaatuatuaina o Ieova. Atonu ua amata ona tatou taumānatu po o ia faafofoga mai i a tatou tatalo, ma po o avea moni i tatou ma ana uō. E faapefea ona tatou taulimaina na tulaga ma le mautinoa, e moni la tatou faiā ma Ieova? O le a fesoasoani mai le mataupu o loo sosoo mai iā i tatou.