1-3. Aiseā na mautinoa ai e se tuafafine e silafia e Ieova ona manaʻoga?

E LĒ galo i se tuafafine paeonia e igoa iā Lana le aso na malaga ai i Siamani i le 2012. Na ia manatu sa tali mai Ieova i ana tatalo e lua. A o ia malaga i se nofoaafi agaʻi i le malae vaalele, sa ia talosaga i le fesoasoani a Ieova ina ia maua se tagata e talaʻi ai. E taunuu atu i le malae vaalele, ua tolopō lana faigāmalaga i le aso e sosoo ai. Sa ia talosaga iā Ieova mo le fesoasoani, ona ua toeitiiti uma lana tupe, ae e manaʻomia se mea e mālōlō ai i le pō.

² I le taimi na māeʻa ai lana tatalo, ae ia faalogoina loa se tasi o loo valaau mai, “Malo Lana, o le ā lau mea o loo fai i inei?” O le tama sa valaau mai, na la aʻoʻoga faatasi. Sa ō atu ma lona tinā ma le tinā o lona tinā, e faaee o ia e alu i Aferika i Saute. Sa valaaulia e le tinā o le tama ma le tinā o lona tinā Lana e latou te ō i le fale, ina ua uma ona faamatala i ai e Lana lona tulaga. Sa tele a laʻua fesili e faatatau i talitonuga a Lana, faapea lana auaunaga paeonia.

³ A o fai la latou mālū taeao i le aso na sosoo ai, sa taliina e  Lana le tele o a laʻua fesili e faatatau i le Tusi Paia. Sa tapa e Lana la laʻua tuatusi, ina ia mafai ona faafesootaʻi e se tasi i laʻua e faaauau la latou talanoaga. Sa toe foʻi ma le saogalemu Lana i lona aiga, ma o loo faaauau pea lana paeonia. Sa ia manatu na tali mai Ieova i ana tatalo, sa ia silafia ona manaʻoga, ma na ia fesoasoani mai.—Sala. 65:2.

4. O le ā o le a tatou iloiloina?

⁴ Pe a faafuaseʻi ona tulaʻi mai se faafitauli, e faigofie ona tatou tatalo iā Ieova mo le fesoasoani, ma e fiafia o ia e faafofoga mai. (Sala. 34:15; Faata. 15:8) Peitaʻi, o le tatalo faaaʻoaʻo a Iesu ua aʻoaʻoina ai i tatou i mea e sili ona tāua e tatalo ai. I lenei mataupu, o le a iloiloina ai le auala e fesoasoani ai talosaga mulimuli e fā o le tatalo faaaʻoaʻo iā i tatou e faamaoni ai iā Ieova.—Faitau le Mataio 6:11-13.

5, 6. Aiseā na aʻoaʻo ai e Iesu i tatou e tatalo mo a tatou meaʻai, e tusa pe e tele a tatou meaʻai?

⁵ Na aʻoaʻo e Iesu i tatou e tatalo mo a “[tatou] meaʻai,” nai lo o le faapea atu “laʻu meaʻai.” Na faapea mai Victor, o se ovasia matagaluega i Aferika: “E masani ona ma faafetai ma laʻu avā iā Ieova ona e ma te lē popole i se meaʻai, ma po o ai foʻi o le a totogiina le fale. E tausia ma le agalelei i maʻua e uso i aso taʻitasi. Peitaʻi, ou te tatalo ina ia mafai ona fesagaʻia e i latou o loo fesoasoani mai faigatā tau tamaoaiga.”

⁶ Atonu e tele a tatou meaʻai, peitaʻi o le toʻatele o o tatou uso e matitiva, po o loo aafia foʻi i mala faalenatura. E lē gata e mafai ona tatou tatalo mo i latou, ae e mafai foʻi ona tatou fesoasoani atu. O se faaaʻoaʻoga, e mafai ona faasoa atu iā i latou mea ua tatou maua. E mafai foʻi ona tatou faia e lē aunoa ni foaʻi mo le galuega i le lalolagi aoao mo tagata o Ieova. E tatou te iloa o nei foaʻi e mafai ona fesoasoani i manaʻoga o o tatou uso.—1 Ioa. 3:17.

7. Na faapefea ona aʻoaʻo e Iesu i tatou e ʻaua neʻi popole mo le aso a taeao’?

⁷ Na māeʻa loa ona aʻoaʻo mai e Iesu le tatalo faaaʻoaʻo, ona ia aʻoaʻoina lea o i tatou e aua le uaʻi atu i meafaitino. Na ia faapea mai pe afai e faaofuina e le Atua laau o le vao, “pe e lē sili ea ona ia faaofuina outou o ē faatuatua itiiti? O lea, ia aua lava neʻi outou popole ma faapea ane, . . . ʻO le ā foʻi se mea tatou te oofu ai?’” Na faaiʻu lana faamatalaga i le fautuaga tāua lenei: “Ia aua neʻi outou popole mo le aso a taeao.” (Mata. 6:30-34) E lē tatau ona tatou popole i o tatou manaʻoga i le lumanaʻi. Nai lo o lea, ia tatou lotomalilie i mea ua tatou maua i aso taʻitasi. O se faaaʻoaʻoga, e mafai ona tatou tatalo mo se nofoaga e nonofo ai, se galuega e tausi ai o tatou aiga, ma le atamai e faia ai filifiliga lelei e faatatau i le soifua mālōlōina. Peitaʻi, e iai se mea e sili atu ona tāua e manaʻomia ona tatou tatalo ai.

8. O le ā ua faamanatu mai i fetalaiga a Iesu e faatatau i a tatou meaʻai i aso taʻitasi? (Tagaʻi i le ata i luga aʻe o le matua.)

⁸ O fetalaiga a Iesu e faatatau i a tatou meaʻai i aso taʻitasi, ua faamanatu mai ai o tatou manaʻoga faaleagaga. Na ia fetalai: “E lē na o meaʻai e ola ai le tagata, ae o afioga uma e tulei mai i le fofoga o Ieova.” (Mata. 4:4) O lea, e tatau ona tatou tatalo e faaauau ona fafaga i tatou e Ieova i meaʻai faaleagaga i le taimi tatau.

9. Aiseā ua pei ai a tatou agasala o ni “aitalafu”?

⁹ Na fetalai Iesu: “Ia faamagalo a matou agasala.” Ae aiseā na ia fetalai ai i se isi  taimi, ina ia “faamagalo mai i a matou aitalafu”? (Luka 11:4; Mata. 6:12, fpl.) Na māfua ona ia fetalai faapea, ona o a tatou agasala e tai pei o ni aitalafu. Na faamatala i Le Olomatamata i le 1951, e tai pei e tatou te nofo aitalafu iā Ieova pe a tatou faia se agasala. E faatalitalia e Ieova i tatou e alolofa ma usiusitaʻi iā te ia. O lea, pe a tatou agasala i le Atua, ua tatou lē avatuina la iā te ia mea o loo ia faatalitalia mai iā i tatou. Pe a finagalo i ai Ieova, e mafai ona ia faamutaina la tatou faigāuō. Na taʻua atili i le mekasini: “O le faia o le agasala, o le lē alofa lea i le Atua.”—1 Ioa. 5:3.

10. Aiseā ua mafai ai ona faamagaloina e Ieova i tatou, ma o ā ni o tatou faalogona e faatatau i lenā tulaga?

¹⁰ Maʻeu lo tatou lotofaafetai ona ua saunia e Ieova le taulaga togiola a Iesu e faamagalo ai a tatou agasala! E tatou te manaʻomia le faamagaloga a Ieova i aso taʻitasi. Na maliu Iesu mo i tatou i le pe ā ma le 2,000 tausaga ua mavae, ma ua tatou maua ai aogā i aso nei. E tatau la ona tatou faafetai e lē aunoa iā Ieova mo lenei meaalofa tautele. E leai se tasi o i tatou e mafai ona faia le togiola lea e faasaʻoloto mai ai i tatou mai i le agasala ma le oti. (Faitau le Salamo 49:7-9; 1 Peteru 1:18, 19.) O faaupuga i le tatalo faaaʻoaʻo “ia faamagalo a matou agasala,” ua faamanatu mai ai e tatou te manaʻomia le togiola, ma e faapena foʻi o tatou uso ma tuafāfine. E finagalo Ieova e tatou te manatunatu i le itu faaleagaga o isi. E aofia ai le vave ona faamagalo atu pe a latou agasala mai. E masani lava o ni masei lāiti, ae pe a tatou faamagalo atu i o tatou uso, e faailoa atu ai e tatou te alolofa iā i latou. E faailoa atu ai foʻi lo tatou lotofaafetai iā Ieova mo le faamagaloina o i tatou.—Kolo. 3:13.

11. Aiseā e tāua ai ona faamagalo atu i isi?

¹¹ O lo tatou tulaga lē lelei atoatoa, atonu e faigatā ai i nisi taimi ona tatou faamagalo atu i ē e faatigā mai. (Levi. 19:18) Pe a amata ona tatou talanoa e faatatau i mea na faia e isi iā i tatou, o le a aafia ai ma isi i le faapotopotoga ma lepetia ai le autasi o le faapotopotoga. Pe a faaauau ona tupu lenā mea, e faailoa atu ai e lē tāua iā i tatou le meaalofa a le Atua o le togiola, ma o le a tatou lē maua ai ona aogā. Pe a tatou te lē  faamagalo atu i isi, o le a lē faamagaloina foʻi i tatou e Ieova. (Faitau le Mataio 6:14, 15; Mata. 18:35) Pe a tatou mananaʻo e faamagaloina i tatou e Ieova, e tatau ona ʻalofia le faia o agasala matuiā.—1 Ioa. 3:4, 6.

12, 13. (a) O le ā na tupu iā Iesu ina ua māeʻa lona papatisoga? (e) Aiseā e lē tatau ai ona tuuaʻia isi pe a tatou lolo atu i se faaosoosoga? (i) O le ā na faamaonia e Iesu i lona faamaoni seʻia oo i le oti?

¹² O faaupuga i le tatalo faaaʻoaʻo ia “aua foʻi neʻi tuua i matou e lolo atu i faaosoosoga,” ua faamanatu mai ai le mea na tupu iā Iesu ina ua faatoʻā uma ona papatiso. Sa taʻitaʻia o ia e le agaga paia o le Atua i le toafa ina ia “faaosoosoina ai o ia e le Tiapolo.” (Mata. 4:1; 6:13) Aiseā na faataga ai e Ieova lenā mea e tupu? Na teena e Atamu ma Eva le pule a Ieova. Sa lāgā ai e Satani fesili na manaʻomia se taimi umi e tali ai. O se faaaʻoaʻoga, pe e iai se mea na sesē i le auala na foafoaina ai e Ieova le tagata? Pe e mafai ona tumau faamaoni iā Ieova se tagata lelei atoatoa pe a faaosoosoina e “lē o loo leaga”? Pe e sili atu foʻi ona lelei pe a pulea e tagata i latou lava? (Kene. 3:4, 5) O le faamaoni o Iesu i le Atua ua faamaonia ai le pepelo o le Tiapolo. Pe a taliina nei fesili uma i le lumanaʻi, o le a iloa ai e foafoaga uma i le lagi ma le lalolagi, e sili atu ona lelei le pule a Ieova.

¹³ E paia Ieova, ma e na te lē faaosoosoina i tatou e faia se mea leaga. Peitaʻi, o le Tiapolo “o Lē e faaosooso.” (Mata. 4:3) Ua taumafai Satani e faaosoosoina i tatou i le tele o auala. Peitaʻi, e tatou te faia le filifiliga pe e teena le faaosoosoga, po o le lolo atu foʻi i ai. (Faitau le Iakopo 1:13-15.) Sa vave lava ona teena e Iesu faaosoosoga ma sii atu mau mai i le Afioga a le Atua, ina ua faaosoosoina o ia e Satani. Sa ia faamaoni i le Atua. Peitaʻi, e leʻi faavaivai ai Satani. Sa ia faatalitali “seʻia oo i se isi taimi talafeagai.” (Luka 4:13) Po o ā lava taumafaiga a Satani, ae sa usitaʻi pea Iesu i le Atua o lona pule. Sa ia faamaonia atu e mafai e le tagata lelei atoatoa ona faamaoni iā Ieova e tusa pe e feagai ma tulaga e sili ona faigatā. Peitaʻi, e taumafai foʻi Satani e faaosoosoina i tatou o soo o Iesu, ina ia lē usiusitaʻi iā Ieova.

14. O le ā e manaʻomia ona tatou faia ina ia teena ai faaosoosoga?

¹⁴ O loo manaʻomia lava ona taliina fesili na lāgā e Satani e faatatau i le pule a Ieova. O lea, o loo faataga pea e Ieova Satani e faaosoosoina i tatou. E lē tuuina atu e Ieova i tatou i le faaosoosoga. E na te silafia e mafai ona tatou faamaoni iā te ia, ma e finagalo o ia e fesoasoani mai. Peitaʻi, e lē faamalosia e Ieova i tatou e faia le mea saʻo, auā e na te amanaʻia lo tatou saʻolotoga e filifili ai. O lea, ua ia tuuina mai iā i tatou le filifiliga e faamaoni pe e lē faamaoni foʻi iā te ia. O mea nei e lua e manaʻomia ona tatou faia ina ia ʻalofia ai le lolo atu i faaosoosoga: ia mafuta vavalalata iā Ieova, ma ia tatalo atu pea mo le fesoasoani. E faapefea ona tali mai Ieova i la tatou tatalo ina ia teena faaosoosoga?

15, 16. (a) O ā nisi o faaosoosoga e manaʻomia ona tatou teena? (e) O ai e tuuaʻia pe a tatou lolo atu i faaosoosoga?

¹⁵ Ua foaʻi mai e Ieova lona agaga paia e fesoasoani iā i tatou e teena ai faaosoosoga a Satani. Ua ia saunia mai foʻi le Tusi Paia ma le faapotopotoga e lapataʻia ai i tatou e faatatau i lamatiaga. O se faaaʻoaʻoga, ua ia lapataʻia i tatou e aua le faaaogāina le tele o le taimi, tupe ma le malosi i mea e  tatou te lē manaʻomia moni. E nonofo Espen ma Janne i se atunuu tamaoaiga i Europa. Sa la paeonia sauatoa mo le tele o tausaga, i se vaipanoa na telē ai le manaʻoga. Ae na laʻua lē toe paeonia ina ua fanau la laʻua tama, ma i le taimi lenei ua toʻalua la laʻua fanau. Ua faapea mai Espen: “E masani ona ma tatalo iā Ieova, ina ia aua neʻi maʻua lolo atu i le faaosoosoga, ma faaitiitia ai lo maʻua taimi e faaalu i mea faaleagaga, nai lo o le taimi muamua. E ma te tatalo iā Ieova e fesoasoani mai e faatumau lo maʻua malolosi faaleagaga, ma le maelega i le faiva.”

¹⁶ O se isi faaosoosoga e manaʻomia ona teena o le matamata i ata matagā taufeusuaʻiga. Pe a tatou lolo i lenā faaosoosoga, e lē tatau ona tatou tuuaʻia Satani. Aiseā? Auā e lē faamalosia e Satani ma lana lalolagi i tatou e fai se mea e tatou te lē mananaʻo e fai. Ua matamata nisi i nei ata matagā, ona o le lē teena o mafaufauga sesē. Peitaʻi, ua teena e le toʻatele o o tatou uso ma tuafāfine lenei faaosoosoga, ma e mafai foʻi ona tatou faia faapea.—1 Kori. 10:12, 13.

17. (a) E faapefea ona tatou ola e ōgatusa ma le talosaga e ʻlaveaʻi i tatou mai i lē o loo leaga’? (e) O le ā le mapusaga ua toeitiiti ona tatou maua?

¹⁷ Ina ia ola e ōgatusa ma le talosaga e “laveaʻi iā i matou mai i lē o loo leaga,” e tatau ona taumafai ia lē avea i tatou “o ni tagata o le lalolagi [a Satani]” ma “aua le manaʻo i le lalolagi [a Satani] po o mea o iai i le lalolagi.” (Ioa. 15:19; 1 Ioa. 2:15-17) Maʻeu se mapusaga o le a tatou maua pe a aveesea e Ieova Satani, ma faaumatia lenei lalolagi leaga. A o leʻi oo atu i lenā taimi, ia tatou manatua le lotoa tele o Satani, auā ua ia iloa ua puupuu lona taimi. O le a ia faia mea uma e taofia ai i tatou mai i le auauna atu iā Ieova. O lea, e tatau ona tatou tatalo pea iā Ieova ina ia puipuia i tatou mai iā Satani.—Faaa. 12:12, 17.

18. O le ā e tatau ona tatou faia pe a tatou mananaʻo e faasaoina i tatou mai i le iʻuga o le lalolagi a Satani?

¹⁸ Pe e te fia ola i se lalolagi e aunoa ma Satani? O lea, ia faaauau ona tatou tatalo ia oo mai le Malo o le Atua, ia faapaiaina le suafa o le Atua, ma ia faia lona finagalo i le lalolagi. Ia faaauau ona tatou faalagolago i le tausiga a Ieova, ma o le a ia foaʻi mai mea e tatou te manaʻomia ina faamaoni ai iā te ia. O lea, ia tatou faia mea uma ina ia ola ai e ōgatusa ma le tatalo faaaʻoaʻo.