1, 2. I Tusitusiga Eperu, o le ā sa faasino atu i ai le faaupuga “le mea e tū ai oʻu vae”?

NA FAALAUILOA mai e Ieova: “O le lagi o loʻu nofoālii lea, a o le lalolagi o le mea lea e tū ai oʻu vae.” (Isa. 66:1) Na ia toe fetalai: “Ou te faamamaluina foʻi le mea e tū ai oʻu vae.” (Isa. 60:13) E faapefea ona ia faia lenā mea, ma o le ā le uiga o lenā mea iā i tatou o loo nonofo i le ʻmea e tū ai vae’ o le Atua?

² I Tusitusiga Eperu, o le faaupuga “le mea e tū ai oʻu vae,” e lē gata e faasino atu i le lalolagi, ae e faaaogā foʻi e faamatala ai le malumalu sa faaaogā e tagata Isaraelu anamua. (1 No. 28:2; Sala. 132:7) O lenā malumalu sa tū i le lalolagi, ma na avea ma taulaʻiga o le tapuaʻiga moni. O le māfuaaga lenā sa matagofie ai i le silafaga a le Atua. O lea, o lenā malumalu sa faamamaluina ai le mea na tū ai aao o Ieova.

3. O le ā le malumalu sili faaleagaga o le Atua, ma o anafea na faavaeina ai?

³ I aso nei, ua lē toe avea se malumalu faaletino ma taulaʻiga o le tapuaʻiga moni. Peitaʻi, ua iai se malumalu faaleagaga ua faamamalu ai Ieova, lea e sili atu nai lo o se isi lava fale. O lenei malumalu faaleagaga o le faatulagaga lea ua  mafai ona maua ai se leleiga ma le Atua, e ala i le faiva faaositaulaga ma le taulaga a Iesu Keriso. Na faavaeina lenei faatulagaga ina ua papatiso Iesu i le 29 T.A., ma faauuina ai e avea ma Ositaulaga Sili i le malumalu sili faaleagaga o Ieova.—Epe. 9:11, 12.

4, 5. (a) Ua faapefea ona faamatala mai i le Salamo e 99 le faanaunauga sili o auauna tapuaʻi moni a Ieova? (e) O le ā le fesili e tatau ona tatou fesili ifo ai?

⁴ O le talisapaia o le faatulagaga o le malumalu faaleagaga, e tatou te faalauiloa atu ai le suafa o Ieova, ma viiviia o ia ona o lana sauniuniga alofa o le togiola. Maʻeu le faafiafiaina o i tatou i le iloaina ua silia i le valu miliona Kerisiano moni o loo faamamaluina Ieova! E ese mai i latou mai i tagata lotu o loo mafaufau e latou te faamamaluina le Atua pe a tuua le lalolagi ma ō atu i le lagi. Ae ua iloa e Molimau a Ieova e tatau ona latou viia Ieova i inei i le lalolagi i le taimi lenei.

⁵ O loo tatou mulimuli i le faaaʻoaʻoga a auauna faamaoni a Ieova o loo faamatalaina i le Salamo 99:1-3, 5. (Faitau.) E pei ona faailoa mai i lenā salamo, sa lagolagoina atoatoa e Mose, Arona ma Samuelu le faatulagaga mo le tapuaʻiga moni. (Sala. 99:6, 7) I aso nei, a o leʻi oo i le taimi e auauna ai le vaega totoe faauuina o ni ositaulaga ma Iesu i le lagi, o loo latou auauna ma le faamaoni i le taimi lenei i le lotoā faalelalolagi o le malumalu faaleagaga. E faitau miliona foʻi “isi mamoe” o loo lagolagoina i latou. (Ioa. 10:16) E ui e eseese faamoemoe o nei vaega e lua, peitaʻi o loo latou tapuaʻi ma le autasi iā Ieova i le mea o loo tū ai ona aao. Ia taʻitoʻatasi i tatou ma fesili ifo: ʻPo o oʻu lagolagoina atoatoa le faatulagaga a Ieova mo le tapuaʻiga moni?’

6, 7. O le ā le faafitauli na aliaʻe mai i uluaʻi Kerisiano, ae o le ā le vala tāua na tupu i senituri na mulimuli ane?

⁶ E leʻi atoa le 100 tausaga talu ona faavae le faapotopotoga Kerisiano, ae aliaʻe mai loa ē na liliuese mai i le upu moni e pei ona valoia mai. (Galu. 20:28-30; 2 Tesa. 2:3, 4) Sa faasolo ina matuā faigatā ona iloa po o ai moni na auauna i le Atua i lona malumalu faaleagaga. Ae i senituri na mulimuli ane, ua oo i le taimi a Ieova e faamanino mai ai le tulaga o mea, e ala mai i le Tupu fou o Iesu Keriso.

⁷ E oo ane i le 1919, ua manino mai i latou na faamaonia e Ieova ma auauna i le malumalu faaleagaga. Ua faamamāina faaleagaga i latou ina ia talia ai e le Atua la latou auaunaga iā te ia. (Isa. 4:2, 3; Mala. 3:1-4) Ua iai se faataunuuga itiiti o le vaaiga na vaaia e Paulo i senituri na muamua atu.

8, 9. Faamatala vala e tolu o le “parataiso” na vaaia e Paulo.

⁸ O le vaaiga na vaaia e Paulo o loo faamatalaina i le 2 Korinito 12:1-4. (Faitau.) E mataʻina mea na vaaia e Paulo i le faaaliga. Peitaʻi, e leʻi faataunuuina i aso o Paulo, ae o le a tutupu i le lumanaʻi. O le ā le “parataiso” na ia vaaia, ina ua ʻave faafuaseʻi o ia i le lagi lona tolu’? O le parataiso na taʻua e Paulo e iai sona faataunuuga faaletino, faaleagaga ma le faalelagi, lea o le a faataunuuina uma i le lumanaʻi. E mafai ona faasino atu i le tulaga faaletino, le Parataiso i le lalolagi lea o le a oo mai. (Luka 23:43) E mafai foʻi ona faasino atu i le parataiso faaleagaga, lea o le a faataunuuina atoatoa i le lalolagi fou. E lē gata i lea, e mafai ona faasino atu i le tulaga faamanuiaina i le lagi, le “parataiso a le Atua.”—Faaa. 2:7.

 ⁹ Ae aiseā na faapea mai ai Paulo sa ia “faalogo i upu e lē tatau ona taʻua, e sā foʻi ona tautala i ai se tagata”? Auā e leʻi oo i le taimi e na te faamatala auʻiliʻili ai mea mataʻina na ia vaaia. Peitaʻi, ua mafai ona tatou talanoa i aso nei i faamanuiaga ua mauaina e tagata o le Atua.

10. Aiseā e lē tutusa ai le faaupuga “parataiso faaleagaga” ma le “malumalu faaleagaga”?

¹⁰ Ua masani ona tatou faaaogāina le faaupuga “parataiso faaleagaga.” Ua faaaogā e faamatala ai le tutasi ma le tamaoaiga faaleagaga o le siʻomaga ma le tulaga, ua mafai ona tatou olioli ai i le filemu ma le Atua ma o tatou uso. Peitaʻi, e lē tatau ona tatou manatu e tutusa le faaupuga “parataiso faaleagaga” ma le “malumalu faaleagaga.” O le malumalu faaleagaga, o le faatulagaga lea a le Atua mo le tapuaʻiga moni. Ae o le parataiso faaleagaga, ua mafai ona iloa manino ai i latou ua mauaina le finagalo malie o le Atua, ma o loo auauna i aso nei i lona malumalu faaleagaga.—Mala. 3:18.

11. O le ā le faaeaga ua tatou maua i aso nei e fesootaʻi atu i le parataiso faaleagaga?

¹¹ Maʻeu lo tatou fiafia i le iloaina, talu mai le 1919 ua faataga e Ieova tagata lē lelei atoatoa e latou te galulue faatasi e atiaʻe, faamalosia, ma faalautele le parataiso faaleagaga i le lalolagi! Po o e mātauina lau vaega o loo fai i lenā galuega mataʻina? Pe e lē faamalosia ai oe e galulue ma Ieova e faamamalu le “mea e tū ai” ona aao?

12. O le ā ua tatou mautinoa ai i le faataunuuina o le Isaia 60:17? (Tagaʻi i le ata i luga aʻe o le matua.)

¹² Na valoia mai i le Tusi Paia suiga mataʻina i le vaega faalelalolagi o le faalapotopotoga a Ieova. (Faitau le Isaia 60:17.) Ua faitau talavou po o ē e fou mai i le upu moni i faamaoniga o lenei suiga, pe na latou faalogo ai mai i isi. Maʻeu se faaeaga mo uso ma tuafāfine na vāaitino i na suiga! E lētioa o latou mautinoa, ua taʻitaʻia ma faatonutonu e Ieova lana faalapotopotoga e ala mai i lana Tupu tofia. Ua tatou mautinoa uma e iai le faavae o lo tatou mautinoa. O le faalogo atu i a latou faamatalaga faagaeeloto e faamalosia ai lo tatou faatuatua ma le maufaatuatuaina o Ieova.

13. O le ā lo tatou tiute tauave e tusa ai o le Salamo 48:12-14?

¹³ E tusa po o le ā le umi talu ona tatou iai i le upu moni, ae e tatau lava ona tatou faailoa atu i isi le faalapotopotoga a Ieova. O se vavega le iai o se parataiso faaleagaga i le lotolotoi o se lalolagi leaga, piʻopiʻo, ma leai se alofa. E tatau ona tatou fiafia e faailoa atu i “tupulaga o loo fāi mai,” mea ofoofogia e faatatau i le faalapotopotoga a Ieova po o “Siona,” ma upu moni e faatatau i le parataiso faaleagaga.—Faitau le Salamo 48:12-14.

14, 15. O ā suiga na faia i le faalapotopotoga i vaitausaga o le 1970, ma ua faapefea ona maua ai aogā?

¹⁴ A o faagasolo tausaga, na mātauina ai e nisi ua matutua i le taimi lenei nisi o suiga i le faalapotopotoga, lea ua atili ai ona matagofie le vaega faalelalolagi o le faalapotopotoga a Ieova. E latou te manatua le taimi sa iai le auauna o le faapotopotoga, nai lo o le ʻautoeaina, le auauna o le lālā nai lo o le Komiti o le Lālā, faapea le taimi na aumai ai taʻiala mai i le peresitene o le Sosaiete o le Olomatamata, nai lo o le Vaega Pule o Molimau a Ieova. E ui e iai ē faamaoni sa fesoasoani i nei uso tuutoina atu, ae e toʻatasi lava le tagata sa gafa ma le faia o faaiʻuga i faapotopotoga, ofisa o lālā, ma le ofisa ulu. A o faagasolo vaitausaga o le 1970, na faia ai le suiga i le  tuuina atu o le tiute tauave o ovasia i se vaega o toeaina nai lo o se tagata se toʻatasi.

¹⁵ Pe na aogā nei suiga? O le tulaga moni lenā. Aiseā? Talu ai o nei suiga na faavae mai i le faatuputeleina o lo tatou malamalama i faatulagaga o loo i le Tusi Paia. Nai lo o le faia e se tagata se toʻatasi o faaiʻuga uma, ae ua mafai ona maua e le faalapotopotoga aogā mai i uiga lelei uma o toeaina, po o “meaalofa i tagata.”—Efe. 4:8; Faata. 24:6.

16, 17. O ā suiga na faia talu ai nei e sili ona e fiafia i ai, ma aiseā?

¹⁶ Seʻi mafaufau foʻi i nisi o suiga talu ai nei, e pei o le suia o foliga, o mataupu ma le auala e tufatufa ai a tatou lomiga. O se fiafiaga le ofoina atu i le faiva i le fanua o nei lomiga matagofie, e aogā ma faaosonaunau. Pe a tatou faaaogāina tomai faaonapōnei e pei o le upega tafaʻilagi o le jw.org e faasalalau atu ai le upu moni, e tatou te faaatagia atu ai le naunau o Ieova e maua e tagata o loo matuā manaʻomia le taʻitaʻiga i so o se vaipanoa.

¹⁷ E lē tatau ona tatou faagaloina foʻi le atamai o le suiga ua maua ai le afiafi e faia ai le Tapuaʻiga a le Aiga ma tele le taimi e faia suʻesuʻega a le tagata lava ia. E tatou te talisapaia foʻi suiga lelei i a tatou fonotaga ma tauaofiaga. E masani ona tatou faapea atu ua siitia lava le tulaga o nei faatasiga i tausaga taʻitasi. Ua tatou fiafia foʻi i le tele o toleniga ua tatou maua mai i aʻoga faatiokarate. O nei suiga uma, ua tatou mautinoa ai i le fesoasoani a Ieova. O loo faasolosolo pea ona ia faamatagofieina lana faalapotopotoga ma le parataiso faaleagaga lea o loo tatou olioli ai i le taimi lenei.

18, 19. E faapefea ona e saosaolaumea i le faamatagofieina o le parataiso faaleagaga?

¹⁸ O se faaeaga le faataga e Ieova o i tatou e faia so tatou sao i le faamatagofieina o lo tatou parataiso faaleagaga. E tatou te faia faapea e ala i le maelega e talaʻi le tala lelei o le Malo ma faia isi ma soo. O taimi uma e tatou te fesoasoani ai i se tasi e agaʻigaʻi i luma mo le tuuina atu faa-Kerisiano, o lenā ua tatou faalauteleina atu tuaoi o le parataiso faaleagaga.—Isa. 26:15; 54:2.

¹⁹ E mafai foʻi ona tatou atili faamatagofieina lo tatou parataiso faaleagaga, e ala i le faaleleia o o tatou lava uiga faa-Kerisiano. O le faia faapea, o le a atili ai ona tosina le vaai mai a tagata i lenei parataiso. E ese mai i lo tatou poto i le Tusi Paia, ae o lo tatou tulaga mamā ma o tatou uiga tauagafau e tosina mai ai tagata i le faalapotopotoga, ma liliu atu i le Atua ma Keriso.

20. O le ā lo tatou faanaunauga e tatau ona iai e tusa ai o le Faataoto 14:35?

²⁰ Maʻeu le fiafia o Ieova ma Iesu i le silasila mai i le matagofie o lo tatou parataiso faaleagaga i aso nei! O lo tatou fiafia i le faamatagofieina atili o le parataiso faaleagaga i aso nei, o le faaataga lenā o lo tatou olioli pe a tatou galulue e avea lenei lalolagi ma Parataiso i le lumanaʻi. Ia tatou manatua pea le Faataoto 14:35: “E fiafia le tupu i le auauna e gaoioi ma le tofā mamao.” Seʻi o tatou gaoioi pea ma le tofā mamao a o tatou galulue mamafa ai e faamatagofie lo tatou parataiso faaleagaga.