1. O ā mea na tutupu i le 66 T.A.? (Tagaʻi i le ata i luga aʻe o le matua.)

SEʻI faapea na e ola o se Kerisiano i Ierusalema i le 66 T.A., i le tele o mea na tutupu ai. Muamua, na ave faamalosi e le kovana Roma o Florus taleni e 17 mai i foaʻi paia o le malumalu. Sa fouvale ai tagata Iutaia ma fasiotia ai fitafita Roma i Ierusalema, ma taumafai e tutoʻatasi mai iā Roma. Peitaʻi, na vave ona tali mai ai Roma. I totonu o le tolu masina, ua 300,000 fitafita ua iai i Ierusalema, lea na taʻitaʻia e le kovana o Roma i Suria o Sesetia Kalusi. Na vave ona ō atu fitafita i vaipanoa o Ierusalema, ae na sulufaʻi atu tagata tetee Iutaia i le malumalu. Na amata loa ona eli e ʻautau a Roma lalo o le pā na siʻo ai le lotoā o le malumalu. Na popole le aai atoa. O ā ni ou faalogona a o e vaaia na mea uma?

2. O le ā le gaoioiga na manaʻomia ona fai e Kerisiano i le 66 T.A., ma na faapefea ona tupu lenā mea?

² Ua e manatua fetalaiga a Iesu na faamauina e Luka: “Pe a outou iloa foʻi ua siʻosiʻomia Ierusalema e ʻautau, ona outou  iloa ai lea ua lata lona faatafunaina.” (Luka 21:20) Ae atonu e te taumānatu, ʻE faapefea ona ou usitaʻia faatonuga ua aumaia faatasi ma lenā lapataʻiga?’ Na fetalai foʻi Iesu: “O lea, o ē o i Iutaia ia sosola i mauga, o i latou o i totonu o le aai, ia ō ese, ma aua neʻi toe foʻi atu i le aai i latou o i tua.” (Luka 21:21) E faapefea ona e tuua Ierusalema ae o loo siʻomia e ʻautau? E iai se mea mataʻina na sosoo ai. Ua e vaai atu ua amata ona tuumuli ʻautau a Roma. E pei ona valoia, o le a “faapuupuuina” la latou osofaʻiga. (Mata. 24:22) O lea, ua maua le avanoa e te usitaʻia ai le faatonuga a Iesu. Ua faanatinati ona e sola atu i mauga i le isi itu o le vaitafe o le Ioritana, faatasi ma isi Kerisiano faamaoni mai i le aai ma vaipanoa na siʻomia ai. * O lea, i le 70 T.A., na ō mai ai se ʻautau fou a Roma ma faaumatia Ierusalema ma ona aai. Peitaʻi, ua faasaoina oe ona o lou usitaʻia o le faatonuga a Iesu.

3. O le ā ua toeitiiti ona fesagaʻia lea e Kerisiano, ma o le ā o le a iloiloina i lenei mataupu?

³ Ua toe o se aga ona tatou fesagaʻia lea o se tulaga faapena. E lē gata sa lapataʻia e Iesu Kerisiano e faatatau i le faaumatiaga o Ierusalema, ae sa ia faaaogā foʻi na mea e faailoa mai ai mea o le a tutupu pe a gāpā le “puapuaga tele.” (Mata. 24:3, 21, 29) Peitaʻi o le tala lelei, o le a faasaoina le “motu o tagata e toʻatele” mai i le faaumatiaga o lenei lalolagi. (Faitau le Faaaliga 7:9, 13, 14.) O le ā ua faailoa mai i le Tusi Paia e faatatau i na mea o le a tutupu? E tāua ona tatou iloa le tali o lenā fesili, auā o loo aofia ai lo tatou faaolataga. O lea, seʻi o tatou iloiloina pe e faapefea ona tatou aafia i nei mea mataʻina o le a tutupu i le lumanaʻi.

4. O le ā e amata ai le puapuaga tele, ma e faapefea ona tupu lenā mea?

⁴ E faapefea ona amata le puapuaga tele? O loo maua i le tusi o Faaaliga le tali e ala i le faamatalaina o le faaumatiaga o “Papelonia le Aai Tele.” (Faaa. 17:5-7) Maʻeu le talafeagai ona faatusa o lotu sesē uma i se fafine talitane! Ua faitaaga taʻitaʻi lotu ma taʻitaʻi o lenei lalolagi amioleaga. Nai lo o le lagolagoina atoatoa o Iesu ma lona Malo, ae ua latou lagolagoina taʻitaʻi faaletagata, ma solia taʻiala a le Atua ina ia maua ai le malosiaga faapolotiki. Ua matuā tuufaafeagai lava ma le mamā o le ʻaufaauuina a le Atua, e pei o ni taupou. (2 Kori. 11:2; Iako. 1:27; Faaa. 14:4) Ae o ai o le a faaumatiaina lenei faalapotopotoga ua pei o se fafine talitane? O le a tuu e Ieova “lona finagalo” i loto o “seu e sefulu” o le “manufeʻai e lanu mūmū sesega.” O nei seu ua faaāta mai ai faigāmalo uma o loo lagolagoina Malo Aufaatasi, le faalapotopotoga lea ua faaāta mai ai le “manufeʻai e lanu mūmū sesega.”—Faitau le Faaaliga 17:3, 16-18.

5, 6. Aiseā e tatou te faapea atu ai o le a lē feoti tagata lotu uma pe a faaumatia Papelonia le Aai Tele?

⁵ Pe e mafai ona tatou faapea atu o le faaumatiaga o Papelonia le Aai Tele o le a faaumatia ai i latou uma sa auai i na lotu? E foliga mai e leai. Na faagaeeina le perofeta o Sakaria e tusi e faatatau i lenā taimi. Ua faapea mai le mau e faatatau iā i latou sa avea ma vaega o lotu sesē: “Ona ia faapea mai lea, ʻE lē o aʻu o se perofeta. O aʻu o le tagata e galueaʻiina le laueleele, auā na faatauina aʻu e se tagata e fai ma pologa talu mai loʻu tauleʻaleʻa.’ Ona fai atu lea o le tasi iā te ia, ʻO ā nei manuʻa e i lou tino i le vā o ou tauʻau?’ A ua faapea mai o ia, ʻO mea na, na ou lavea ai i le fale o ē e  alolofa mai iā te aʻu.’” (Saka. 13:4-6) O lea, e foliga mai e oo lava i nisi o taʻitaʻi lotu o le a tuua a latou lotu ma teena le avea o i latou ma vaega o na lotu sesē.

⁶ Ae o le a faapeʻī mai tagata o le Atua i lenā taimi? Na faapea mai Iesu: “O le mea moni, a lē faapuupuuina ia aso, e leai se tagata e faaolaina. Ae o le a faapuupuuina ia aso ona o ē ua filifilia.” (Mata. 24:22) E pei ona iloiloina, na “faapuupuuina” puapuaga i le 66 T.A. O lea, na mafai ai e ē “ua filifilia” po o le ʻaufaauuina ona sosola ese mai i le aai ma nuu na siʻomia ai. E faapena le auala o le a “faapuupuuina” ai le vaega muamua o le puapuaga tele ona o ē “ua filifilia.” O le a lē faatagaina “seu e sefulu” po o malo faapolotiki e faaumatia tagata o le Atua. Peitaʻi, o le a iai sina mapusaga.

7, 8. O le ā le avanoa o le a tulaʻi mai pe a māeʻa ona faaumatia lotu sesē, ma o le a faapefea ona ese mai tagata faamaoni o le Atua i lenā taimi?

⁷ O le ā o le a tupu pe a māeʻa ona faaumatia faalapotopotoga faalelotu uma? O le taimi lenā o le a iloa moni ai mea o loo i o tatou loto. O le toʻatele o tagata o le a sulufaʻi atu i faalapotopotoga faaletagata e pei o ni “papa o mauga.” (Faaa. 6:15-17) Peitaʻi i se tulaga faafaatusa, o le a sosola atu tagata o le Atua i le sulufaʻiga o le a saunia e Ieova. I le uluaʻi senituri, o le avanoa sa maua e lē o se taimi lenā na liliu ai tagata Iutaia e avea ma Kerisiano. Peitaʻi, o le taimi lenā na manaʻomia ai ona usiusitaʻi ma faia se gaoioiga a i latou ua uma ona avea ma Kerisiano. I se tulaga talitutusa, e tatou te lē faatalitalia o le a maua le tele o soo fou a o faagasolo le puapuaga tele. Nai lo o lea, o le avanoa lenā e faamaonia ai e tagata tapuaʻi moni lo latou alolofa mo Ieova ma lagolagoina uso o Keriso.—Mata. 25:34-40.

⁸ E ui e tatou te lē malamalama atoatoa i mea o le a tutupu i lenā taimi o tofotofoga, ae e tatou te faatalitalia le manaʻomia ona faia o ni faataulaga. I le uluaʻi senituri, na tatau ona tuua e Kerisiano a latou meatotino ma tumau i faigatā ina ia faasaoina ai. (Mare. 13:15-18) Po o le a tatou lotomalilie e tuua a tatou meatotino ina ia tumau ai ona tatou faamaoni? Po o le a tatou nofosauni e faia so o se mea e faamaonia ai lo tatou faamaoni iā Ieova? Pe a mafaufau i ai, e na o i tatou o le a mulimuli i le faaaʻoaʻoga a le perofeta o Tanielu, o le faaauau ona tapuaʻi i le Atua e tusa po o le ā le mea e tupu.—Tani. 6:10, 11.

9, 10. (a) O le ā le feʻau o le a faalauiloa atu e tagata o le Atua i lenā taimi? (e) O le ā le auala o le a tali mai ai fili o tagata o le Atua?

⁹ E lē o se taimi lea e talaʻi atu ai le “tala lelei o le malo,” auā ua māeʻa le taimi e talaʻi atu ai lenā feʻau. Ua oo mai le taimi o le “iʻuga.” (Mata. 24:14) Peitaʻi, o le a folafola atu e tagata o le Atua se feʻau faaoosala. O lenei vala atonu o le a aofia ai le faalauiloaina atu o le oo mai o le iʻuga atoatoa i le lalolagi leaga a Satani. Ua faatusa e le Tusi Paia lenei feʻau i ni uatoʻa: Ua “toʻulu ifo lea mai i le lagi i luga o tagata o le uatoʻa tetele, e tusa o se taleni le mamafa o le uatoʻa e tasi, ma ua fai upuleaga ai tagata i le Atua ona o le mala o le uatoʻa, auā o se mala e matuā tele lava.”—Faaa. 16:21.

¹⁰ O le a faalogo o tatou fili i lenei feʻau malosi. Na faagaeeina le perofeta o Esekielu e faamatala le gaoioiga o le a faia e Koku o Makoku, po o le tuufaatasiga o atunuu: “O le fetalaiga lenei a le Alii Pule Silisili Ese o Ieova, ʻI lea aso, e tutupu ai manatunatuga  i lou loto, ma o le a e mafaufau ai e fafau se mea leaga; o le a e fai ane: “O le a ou alu atu e faasagatau i le laueleele ua iai nuu e lē o puipuia. Ou te alu aʻe iā i latou o loo toʻafilemu, ma nonofo ma le saogalemu, o i latou uma ua nonofo e aunoa ma ni pā puipui, ma e leai foʻi ni o latou laau faalava ma faitotoʻa.” E te manatu e ave le tele o le vete ma faoa le tele o mea, ma sii aʻe lou lima e faasagatau i nofoaga sa faatafunaina ae ua toe ʻaināina, ma faasagatau i tagata ua toe aoaoina mai i nuu, o ē ua tele o latou tamaoaiga ma oloa, o i latou o loo nonofo i le ogatotonu o le lalolagi.’” (Eseki. 38:10-12) I se tulaga faaleagaga, o le a tutū matilatila ese tagata o le Atua e pei o loo tutū “i le ogatotonu o le lalolagi.” Peitaʻi, o le a naunau atunuu e osofaʻi le ʻaufaauuina a Ieova ma a latou aumea.

11. (a) O le ā e tatau ona tatou manatua e tusa ma le faagasologa o mea o le a tutupu a o faagasolo le puapuaga tele? (e) O le a faapefea ona tali atu tagata i faailoga o le a tutupu i le lagi?

¹¹ A o tatou iloiloina le mea o le a sosoo ai, e manaʻomia ona tatou manatua e lē o faamatalaina i le Tusi Paia le faagasologa tonu o mea o le a tutupu. E foliga mai o le a tutupu nisi mea a o faagasolo ona tutupu nisi mea. Na taʻua e Iesu i lana valoaga i le taufaaiʻuiʻuga o lenei faiga o mea: “E iai foʻi faailoga i le lā, le masina, ma fetu, e atuatuvale foʻi atunuu o le lalolagi ma fememeaʻi i latou ona o le ū o le sami ma le sousou. E matapogia foʻi tagata ona o le fefefe ma faatalitali i mea e oo mai i le lalolagi uma, auā e lūlūina mea malolosi i le lagi. Ona latou vaaia lea o le Atalii o le tagata o loo sau i le ao ma le mana ma le mamalu tele.” (Luka 21:25-27; faitau le Mareko 13:24-26.) Po o le faataunuuina o lenei valoaga o le a aofia ai ni faailoga ma mea mataʻutia o le a tutupu moni i le lagi? Seʻi o tatou faatali i le mea o le a tupu. Peitaʻi, po o le ā lava le tulaga, ae o nei faailoga o le a tetemū ma faapopoleina ai fili o le Atua.

12, 13. (a) O le ā o le a tupu pe a afio mai Iesu i le “mana ma le mamalu tele”? (e) O le a faapefea ona tali atu tagata o le Atua i lenā taimi?

¹² O le ā o le a tupu pe a afio mai Iesu i le “mana ma le mamalu tele”? O le taimi lea o le a maua ai e ē faamaoni le taui, ae faasala i latou e lē faamaoni. (Mata. 24:46, 47, 50, 51; 25:19, 28-30) I le tusi o Mataio, na faaiʻu e Iesu le faamatalaina o le faailoga i le faamatalaina o le talafaatusa i mamoe ma ʻoti i le faapea mai: “Pe a taunuu le Atalii o le tagata i lona mamalu, ma agelu uma faatasi ma ia, ona tiʻetiʻe ai lea o ia i lona nofoālii mamalu. E faapotopotoina foʻi atunuu uma i ona luma, ona tuueseeseina lea e ia o tagata, e pei ona tuueseeseina e se leoleo mamoe o mamoe ma ʻoti. Ona ia tuuina lea o mamoe i lona itu taumatau, a o ʻoti i lona itu tauagavale.” (Mata. 25:31-33) O le ā le faamasinoga o le a faalauiloa atu i mamoe ma ʻoti? Na faaiʻu le talafaatusa i upu nei: “Ona ō atu ai lea o i latou nei [po o ʻoti] i le faaumatiaga e faavavau, a o ē e amiotonu e ō atu i le ola e faavavau.”—Mata. 25:46.

¹³ O le a “taufaitagituʻi” ʻoti pe a latou iloa o le a ʻfaaumatia e faavavau’ i latou. (Mata. 24:30) Ae o le a faapefea ona tali atu uso o Keriso ma a latou aumea faamaoni i lenā taimi? O lo latou faatuatua atoatoa iā Ieova le Atua ma lona Alo o Iesu Keriso, o le a latou utagia ai le faatonuga a Iesu: “Pe a amata ona tutupu o nei mea uma, ia tutū i luga ma ia ea i luga o outou ulu, auā ua latalata ona laveaʻiina outou.” (Luka 21:28) O le a tatou mautinoa e laveaʻiina i tatou.

14, 15. O le ā le galuega o le aoaoina e fai pe a māeʻa le amataga o le osofaʻiga a Koku o Makoku, ma o le a faapefea ona tupu lenā mea?

¹⁴ O le ā o le a tupu pe a amata le osofaʻiga a Koku o Makoku i tagata o le Atua? Na faamatalaina e Mataio ma Mareko le mea o le a tupu: “Ona ia [le Atalii o le tagata] aauina atu lea o agelu e latou te aoaoina mai o ē ua filifilia mai i matāmatagi e fā, e mai i le tuluʻiga o le lalolagi e oo atu i le tuluʻiga o le lagi.” (Mare. 13:27; Mata. 24:31) O lenei galuega o le aoaoina e lē o faasino atu i le uluaʻi aoaoina o le ʻaufaauuina, pe e faasino atu foʻi i le faamaufaailoga faaiʻu o le vaega totoe o le ʻaufaauuina. (Mata. 13:37, 38) O lenā faamaufaailoga o le a tupu a o leʻi gāpā le puapuaga tele. (Faaa. 7:1-4) O lea, o le ā lenei galuega o le aoaoina lea na taʻua e Iesu? O le taimi lea o le a maua ai e le vaega totoe o le 144,000 lo latou taui faalelagi. (1 Tesa. 4:15-17; Faaa. 14:1) O le a tupu lenā mea i se taimi pe a māeʻa le amataga o le osofaʻiga a Koku o Makoku. (Eseki. 38:11) O le a faataunuuina ai loa le fetalaiga lenei a Iesu: “I lenā taimi e susulu atu ai o ē e amiotonu, e pei o le malamalama o le lā i le malo o lo latou Tamā.”—Mata. 13:43. *

¹⁵ Po o le uiga o lenei mea o le a siitia aʻe le ʻaufaauuina? O le tele o lotu ua faapea mai o Kerisiano, e manatu o le a siitia aʻe Kerisiano i le lagi i o latou tino faaletino. E latou te manatu foʻi e vaaia e mata le toe afio mai o Iesu e pulea le lalolagi. Peitaʻi, o loo faaalia manino mai i le Tusi Paia e lē vaaia le toe afio mai o Iesu: “Ona iloa ai lea i le lagi o le faailoga o le Atalii o  le tagata” ma o le a afio mai Iesu i “ao o le lagi.” (Mata. 24:30) E lē gata i lea, “e lē mafai ona fai le malo o le Atua ma tofi o i latou ua iai tino aano ma toto.” O lea, o i latou uma o le a aveina aʻe i le lagi, e tatau ona “suia” muamua i latou uma, “e vave lava e pei o le emo o le mata, i le taimi e ili ai le pū mulimuli.” * (Faitau le 1 Korinito 15:50-53.) O lea, e tatou te lē faaaogāina le upu “siitiaga” ona e fesootaʻi atu i aʻoaʻoga sesē a lotu. Peitaʻi, o le a aoaoina le vaega totoe o le ʻaufaauuina faamaoni i se taimi vave.

16, 17. O le ā e tatau ona tupu a o leʻi faia le faaipoipoga a le Tamaʻi Mamoe i le lagi?

¹⁶ O le taimi lava e iai le ʻaufaauuina uma i le lagi, ona amata loa lea o sauniuniga faaiʻu o le faaipoipoga a le Tamaʻi Mamoe. (Faaa. 19:9) Peitaʻi, e iai se isi mea e tupu a o leʻi faia lenā faatasiga fiafia. Manatua foʻi, a o leʻi aoaoina le vaega totoe o le 144,000 i le lagi, o le a osofaʻia e Koku tagata o le Atua. (Eseki. 38:16) O le ā o le a tupu ona o lenei mea? O le a foliga mai e pei e leai se puipuiga o tagata o le Atua i le lalolagi. O le a latou usitaʻia le faatonuga na tuuina mai i aso o le tupu o Iosefatu: “E tou te lē tau i lenei taua. Inā tutū ia outou ma tutumau, ma vāai i le faaolataga a Ieova iā te outou. Iuta ma Ierusalema e, aua tou te fefefe pe atuatuvale.” (2 No. 20:17) Peitaʻi, o le a ese le tulaga i le lagi. I le taimi o le a iai le ʻaufaauuina uma i le lagi, ua faapea mai le Faaaliga 17:14 e faatatau i fili o tagata o le Atua: E “latou te tau ma le Tamaʻi Mamoe, ae e manumalo le Tamaʻi Mamoe iā i latou, auā o ia o le Alii o alii ma le Tupu o tupu. O i latou ua faatasi ma ia o ē ua valaauina, ma ua filifilia, ma faamaoni e manumalo foʻi i latou.” O le a ō mai faatasi Iesu ma le 144,000 o ē o le a latou pule faatasi i le lagi, ina ia laveaʻi tagata o le Atua i le lalolagi.

¹⁷ O lenā laveaʻiga o le a gāpā ai le taua o Amaketo, lea o le a faamamalu ai le suafa paia o Ieova. (Faaa. 16:16) I lenā taimi, o le a ʻō atu i le faaumatiaga e faavavau’ i latou e pei o ni ʻoti. O le a faamamāina le lalolagi mai i ē amioleaga, ma o le a faasaoina le motu o tagata e toʻatele mai i le vaega faaiʻu o le puapuaga tele. Pe a māeʻa sauniuniga uma, ona faataunuu loa lea o le tumutumuga o le tusi o Faaaliga, o le faaipoipoga lea a le Tamaʻi Mamoe. (Faaa. 21:1-4) * O le a maua e i latou uma o le a ola i le lalolagi le finagalo malie o le Atua, faapea faaaliga silisili o lona alofa. Maʻeu le matagofie o le ʻaiga o lenā faaipoipoga! Pe e tatou te lē tulimataʻia ea lenā taimi?—Faitau le 2 Peteru 3:13.

18. O le ā e tatau ona tatou maumauaʻi e fai, a o tulimataʻia mea mataʻina o le a tutupu?

¹⁸ A o tulimataʻia nei mea mataʻina o le a tutupu i le lumanaʻi, o le ā e tatau ona tatou faia i le taimi lenei? Na faagaeeina le aposetolo o Peteru e tusi: “Talu ai o le a mavae atu nei mea uma, ia outou manatunatu pe e faapeʻī la outou amio e tatau ona iai, e tusa ai ma amioga paia ma galuega o le faamaoni i le Atua, a o faatalitali ma tāmau i mafaufau le oo mai o le aso o Ieova, . . . O le mea lea le ʻaupele e, a o outou faatalitali i nei mea, ia outou finafinau ai ina ia maua mai outou e ia, e leai so outou ila, e lē ponā, ma e filemu.” (2 Pete. 3:11, 12, 14) O lea, seʻi o tatou maumauaʻi nei e faatumau lo tatou mamā faaleagaga, a o lagolagoina le Tupu o le Filemu.