1, 2. O le ā le vaaiga ua leva ona iai i tagata tapuaʻi o Ieova?

UA LOA ona faatalitali tagata tapuaʻi o Ieova i le faataunuuga o valoaga. O se faaaʻoaʻoga, na valoia e Ieremia o le a faatafunaina Iuta e ʻautau a Papelonia, ma o le mea lenā sa tupu i le 607 T.L.M. (Iere. 25:8-11) Na valoia e Isaia o le a toe faafoʻisia mai e Ieova ona tagata: “E fiafia i latou uma o ē e faatalitali iā te ia.” (Isa. 30:18) Na iai foʻi valoaga a Mika e faatatau i tagata o le Atua i aso anamua, o lea na ia faapea mai ai: “Ou te vaai atu pea iā Ieova.” (Mika 7:7) Ua leva foʻi ona faatalitali auauna a Ieova i le faataunuuga o valoaga e faatatau i le Mesia, po o le Keriso.—Luka 3:15; 1 Pete. 1:10-12. *

² Ua faapena foʻi ona faatalitali pea auauna a Ieova i aso nei i le faataunuuga o nisi valoaga e faatatau i le Mesia. E ala i le Malo faa-Mesia, o le a faamuta ai e Ieova mafatiaga uma o tagata e ala i le faaumatia o tagata amioleaga ae laveaʻiina ona tagata mai i le lalolagi o loo pulea e Satani. (1 Ioa. 5:19) O lea, seʻi tumau ona tatou mataala ma le mautinoa ua latalata mai le iʻuga o lenei faiga o mea.

3. O le ā le fesili e ono mapuna aʻe pe afai ua umi ona tatou faatalitali i le oo mai o le iʻuga?

 ³ Ua tepa taulaʻi atu auauna a Ieova i le faia o le finagalo o le Atua “i le lalolagi, e pei ona faia i le lagi.” (Mata. 6:10) Pe afai ua umi ona tatou faatalitali i le iʻuga o lenei faiga o mea, e tatou te ono taumānatu ai, ʻPe e iai ni māfuaaga talafeagai e tatou te faatalitali ai pea?’ Seʻi o tatou tilofaʻia ni māfuaaga.

4. O le ā se māfuaaga lelei e tatou te mataala ai pea?

⁴ Ua faailoa mai e le Tusi Paia la tatou vaaiga e tatau ona iai i le faaumatiaga o lenei faiga o mea o loo faaloloʻi mai. Na fetalai Iesu i ona soo: ʻIa faaauau ona outou mataala.’ (Mata. 24:42; Luka 21:34-36) Na fetalai mai Iesu ina ia faia faapea, ma o se māfuaaga lelei lea e tatou te faatalitali ai pea. Ua faataatia e le faalapotopotoga a Ieova se faaaʻoaʻoga i lenā tulaga. Ua lapataʻia pea i tatou i lomiga ina ia “faatalitali ma tāmau i mafaufau le oo mai o le aso o Ieova” ma tuu atu lo tatou faatuatuaga i folafolaga a le Atua i se lalolagi fou.—Faitau le 2 Peteru 3:11-13.

5. Aiseā ua matuā tāua ai le mataala i o tatou aso?

⁵ E ui lava sa talafeagai mo Kerisiano na soifua i le uluaʻi senituri ona faatalitali pea, ae ua sili atu ona tāua le faia faapea i aso nei. Aiseā? Talu ai o loo tatou ola i le vaitaimi o le faatasi mai o Keriso. Na vaaia le faailoga o lona faatasi mai talu mai le 1914. O vala eseese o le faailoga e aofia ai le leaga o le tulaga o le lalolagi, ma le talaʻiga o le Malo i le lalolagi aoao, o lona uiga ua tatou ola i “le taufaaiʻuiʻuga o le faiga o mea a le lalolagi.” (Mata. 24:3, 7-14) E leʻi taʻu maia e Iesu po o le ā le umi o lenā vaitaimi a o leʻi oo mai le iʻuga, o lea e matuā manaʻomia ai le mataala pea.

6. Aiseā e tatou te faatalitalia ai o le a sili atu ona leaga le tulaga o le lalolagi a o lata atu i le iʻuga?

⁶ E tatou te ono fesili: Pe e faasino atu “le taufaaiʻuiʻuga o le faiga o mea a le lalolagi” i le lumanaʻi pe a oo ina sili atu ona leaga le tulaga o le lalolagi? Ua faailoa mai e le Tusi Paia o le a faateteleina le amioleaga i “aso e gata ai.” (2 Timo. 3:1, 13; Mata. 24:21; Faaa. 12:12) O lea, e tatou te faatalitalia o le a faasolosolo pea ina leaga le tulaga o le lalolagi.

7. O le ā ua faaalia e le Mataio 24:37-39 e faatatau i le tulaga o le lalolagi i aso e gata ai?

⁷ Ae pe e te manatu o le a matuā ogaoga le leaga o le tulaga o le lalolagi a o leʻi oo mai “le puapuaga tele”? (Faaa. 7:14) O se faaaʻoaʻoga, pe e te manatu o le a iai taua i atunuu uma, leai ni meaʻai ma o le a mamaʻi tagata i aiga uma? Pe afai e moni lenā tulaga, o le a faigofie ona iloa e tagata ua taunuu valoaga a le Tusi Paia, e oo foʻi iā i latou e lē talitonu i le Tusi Paia. Peitaʻi, na fetalai Iesu o le toʻatele o tagata o le a lē “ano” i lona faatasi mai, o le a latou faia pea mea masani o le olaga seʻia oo ina tuai. (Faitau le Mataio 24:37-39.) Ua faaalia mai e le Tusi Paia e lē matuā ogaoga le leaga o le tulaga o le lalolagi a o leʻi gāpā le puapuaga tele.—Luka 17:20; 2 Pete. 3:3, 4.

8. O le ā ua iloa e i latou e usiusitaʻi i le fautuaga a Iesu ʻia faaauau ona mataala’?

⁸ I se isi itu, e tatau ona matuā matilatila le faataunuuina o le faailoga, ina ia iloa ai e i latou o loo usiusitaʻi i le fautuaga a Iesu ʻia faaauau ona mataala.’ (Mata. 24:27, 42) O le mea lenā na tupu  talu mai le 1914. Talu mai lenā taimi, ua faataunuuina vala eseese o le faailoga. E mautinoa ua tatou ola nei i “le taufaaiʻuiʻuga o le faiga o mea a le lalolagi,” o se vaitaimi patino e aofia ai ma le faaumatiaga o lenei faiga amioleaga o mea.

9. O ā ni māfuaaga e tatau ai ona tatou faatalitali pea i le iʻuga o lenei faiga o mea?

⁹ Aiseā e tatau ai i Kerisiano i aso nei ona faatalitali pea? O lo tatou usiusitaʻi iā Iesu Keriso, e tatou te faia ai faapea. E lē gata i lea, ua tatou vaaia le faailoga o lona faatasi mai. E lē faavaea lo tatou faatalitali i le talitonu i upu uma e tatou te faalogo ai, ae o faamaoniga maumaututū mai le Tusi Paia e manaʻomia ai ona tatou mataala, ma faatalitali i le iʻuga o lenei faiga amioleaga o mea.

10, 11. (a) Aiseā na fetalai atu ai Iesu i ona soo ina “ia faaauau ona mataala”? (e) O le ā na fetalai ai Iesu i ona soo e fai pe a lē vave oo mai le iʻuga e pei ona latou manatu ai? (Tagaʻi i le ata i luga aʻe o le matua.)

¹⁰ O le toʻatele o i tatou o loo mataala pea faaleagaga mo le tele o tausaga. O lea, seʻi aua neʻi avea le umi o le taimi e mou atu ai lo tatou faatalitali. E manaʻomia ona tatou sauni mo le afio mai o Iesu o se Faaoosala, e faaumatia lenei faiga o mea. Manatua na lapataʻia e Iesu ona soo: “Ia vaavaai pea, ia mataala pea, auā tou te lē iloa le taimi atofaina. Ua faatusaina i se tagata na alu malaga i nuu mamao ua tuua lona fale, ma tuu atu le pule i ana pologa, e tofu i latou ma galuega, ma faatonuina le leoleo faitotoʻa e faaauau ona mataala. O lea, ia faaauau ona mataala, auā tou te lē iloa pe e sau afea le matai o le aiga, po o le afiafipō, po o le vaeluapō, po o le vivini o moa po o le taeaopō; ina neʻi taunuu faafuaseʻi mai o ia ma maua mai outou o loo momoe. A o aʻu upu ou te fai atu ai iā te outou, ou te fai atu ai foʻi i tagata uma, Ia faaauau ona mataala.”—Mare. 13:33-37.

¹¹ O le iloaina na amata ona faatasi mai Keriso i le 1914, na sauniuni ai soo o Iesu ina neʻi vave oo mai le iʻuga. Na latou faia faapea e ala i le faateleina o la latou galuega talaʻi. Na faaalia e Iesu atonu e tuai mai i le taimi e ʻvivini ai moa po o le taeaopō.’ Pe afai e tupu lenā mea, o le a faapefea ona tali atu ona soo? Na ia fetalai: “Ia faaauau ona mataala.” O le umi ona faatalitali, e lē faapea ai ua tolopō le iʻuga pe e lē oo mai foʻi.

12. O le ā na fesili atu ai Sapakuka iā Ieova, ma o le ā Lana tali?

¹² Seʻi manatu i le perofeta o Sapakuka, na faatonuina e valoia le faaumatiaga o Ierusalema. A o leʻi faia faapea e Sapakuka, ua leva ona avatu e isi perofeta lapataʻiga e faatatau i le faatafunaina o le aai. O le leaga o le tulaga o le aai, ʻua siʻomia lē ua amiotonu e lē ua amioleaga, ma ua faia le faamasinoga faapiʻopiʻo.’ E lē o se mea la e faateʻia ai le fesili o Sapakuka e faapea: “Ieova e, o le ā le umi ou te alaga atu ai mo se fesoasoani?” Nai lo o le tali saʻo o lenā fesili, na faamautinoa atu e Ieova i lana perofeta faamaoni, “e lē faatuai mai” le faaumatiaga e pei ona valoia. Na fetalai atu le Atua iā Sapakuka “ia faatalitali pea i ai.”—Faitau le Sapakuka 1:1-4; 2:3.

13. O ā mafaufauga na ono oo iā Sapakuka, ma aiseā e lē atamai ai na mafaufauga?

¹³ Seʻi faapea na lotovaivai Sapakuka ma mafaufau faapea: ʻUa leva na ou faalogo i le faaumatiaga o Ierusalema. O le a faapefea nei pe afai o loo mamao lava? E  lē talafeagai ona faia pea valoaga e peiseaʻī o le a faafuaseʻi ona faaumatia le aai. E sili pe a tuu atu i nisi e latou te valoiaina le faaumatiaga.’ Pe ana faapea na mafaufau faapena Sapakuka, atonu e leiloa ai lona tulaga lelei i luma o Ieova, ma fano ai lona ola i le faaumatiaga o Ierusalema e ʻautau a Papelonia.

14. Aiseā e tatou te lotofaafetai ai ona o le lapataʻia e Ieova o i tatou ina ia faatalitali pea?

¹⁴ I le lalolagi fou, o le a tatou manatunatu ai i le faataunuuina moni o valoaga uma e fesootaʻi atu i le taufaaiʻuiʻuga o lenei faiga o mea. O le manatunatu loloto i le faataunuuga o valoaga, o le a atili faamalosia ai lo tatou mautinoa iā Ieova ma ana folafolaga ia o le a faataunuuina. (Faitau le Iosua 23:14.) E mautinoa lo tatou lotofaafetai i le Atua, o lē ua ia tuu ʻtaimi po o taimi atofaina i lana lava pule,’ ma ua lapataʻia i tatou ina ia mataala auā “ua lata mai le iʻuga o mea uma lava.”—Galu. 1:7; 1 Pete. 4:7.

15, 16. Aiseā e tatau ai ona tatou faia le mea sili i le talaʻiga i lenei taimi o le iʻuga?

¹⁵ E tatou te faatalitalia o le a faamanatu mai pea e le faalapotopotoga a Ieova, e tatau ona tatou auauna i le Atua ma se uiga faanatinati. Ua saunia na faamanatuga e lē gata ia tatou pisi ai pea i le auaunaga i le Atua, ae e fesoasoani foʻi iā i tatou e iloa o loo faataunuuina i le taimi lenei le faailoga o le faatasi mai o Keriso. O le ā le auala atamai e gaoioi ai i le taimi lenei o loo tatou ola ai? Ia saʻili muamua pea le Malo ma le amiotonu a le Atua, e ala i le maelega e talaʻi le tala lelei!—Mata. 6:33; Mare. 13:10.

¹⁶ Na faapea mai se tuafafine: ʻO le talaʻia o le tala lelei o le Malo, e mafai ona tatou fesoasoani e faasaoina ai tagata mai i le faaumatiaga o le lalolagi o loo fotuaʻi mai.’ E iai sona malamalamaga i le tāua o le faasaoina o tagata, auā na faasaoina i laʻua ma lana tane mai i se mala mataʻutia, ina ua goto le meli o le Wilhelm Gustloff i le 1945. E ui lava i le mataʻutia o lenā mala, ae na sesē le vaai a isi i le mea e tāua moni. Na manatua e le tuafafine le tagi tauvalaau a se tasi fafine e faapea: “Aʻu atopaʻu! Aʻu atopaʻu! Auoi a ta mama ma a ta tautaliga! Ua leiloloa aʻu mea!” I sona eseesega, o nisi tagata na lotofesoasoani ma lamatia o latou ola a o taumafai e laveaʻi tagata ua paʻuʻū i le sami aisā. E pei o na tagata lē manatu faapito, e tatou te faia le mea sili e fesoasoani ai i tagata. E faanatinati la tatou  galuega talaʻi ma fesoasoani i isi ina ia faasaoina mai le mala mataʻutia o loo faaloloʻi mai a o leʻi tuai.

17. O ā ni māfuaaga e tatou te talitonu ai e mafai ona oo mai le iʻuga i so o se taimi?

¹⁷ Ua faaalia i mea ua tutupu i le lalolagi, ua faataunuuina nei valoaga a le Tusi Paia, ma ua toeitiiti faaumatia lenei faiga amioleaga o mea. O lea, e lē tatau ona tatou manatu o loo telē se taimi o totoe ona faataunuuina lea o le Faaaliga 17:16, lea o le a osofaʻia ai e “le manufeʻai” ma “seu e sefulu” ia Papelonia le Aai Tele, o le emepaea o lotu sesē uma. Aua neʻi galo o le a tuuina e le Atua “i o latou loto” ina ia faia lenā gaoioiga, ma e mafai ona tupu faafuaseʻi i so o se taimi. (Faaa. 17:17) Ua matuā latalata mai lava le iʻuga o lenei faiga o mea. E tatau ai la ona tatou utagia le lapataʻiga a Iesu: “Ia outou uaʻi atu iā te outou lava, ina neʻi faamamafaina o outou loto i le ʻai tele, ma le inu tele ma le popole i mea o le olaga nei, neʻi oo faafuaseʻi mai lenā aso iā te outou e pei o se mailei.” (Luka 21:34, 35; Faaa. 16:15) O lea, seʻi o tatou auauna iā Ieova ma se uiga faanatinati, e mautinoa o le a ia “gaoioi mo lē e faatalitali atu pea iā te ia.”—Isa. 64:4.

18. O le ā le fesili o le a iloiloina i le mataupu o loo sosoo mai?

¹⁸ A o tatou faatalitali i le iʻuga o lenei faiga amioleaga o mea, seʻi o tatou utagia upu faagaeeina a le soo o Iuta: “Le ʻaupele e, ia atiaʻe iā te outou i lo outou faatuatua e sili ona paia, ma tatalo i le agaga paia. Ia outou faatumau iā te outou i le alofa o le Atua, a o faatalitali atu i le alofa mutimutivale o lo tatou Alii o Iesu Keriso, lea e iʻu ai i le ola e faavavau.” (Iuta 20, 21) E faapefea ona faaalia o loo tatou faatalitali ma tepa taulaʻi atu i le folafolaga a le Atua i se lalolagi fou? O le a iloiloina lenā fesili i le mataupu o loo soosoo mai.