NA OU fanau i Kuiniselani i Ausetalia i le 1955. E leʻi umi lava ae amata ona suʻesuʻe e loʻu tinā o Estelle le Tusi Paia ma Molimau a Ieova. Sa papatiso o ia i le tausaga na sosoo ai, ae na faatoʻā talia e loʻu tamā o Ron le upu moni ina ua mavae le 13 tausaga. Na ou papatiso i se nuu maotua i Kuiniselani i le 1968.

Talu mai lava a o oʻu laʻitiiti, ou te fiafia lava e faitau tusi ma ou te fiafia foʻi i gagana. Pe a alu se tafaoga a lo matou aiga, atonu e lē fiafia oʻu mātua pe a vāai mai o loo faitau aʻu tusi nai lo o le matamata i vaaiga matagofie. Sa aogā loʻu fiafia e faitau i laʻu aʻoga. I le aʻoga maualuga i Glenorchy i le motu o Tasmania, sa ou maua ai i le tele o faailoga tauaʻoaʻoga.

Peitaʻi, ua oo i le taimi ou te faia ai se filifiliga tāua. Po o le a ou taliaina se sikolasipi mo le iunivesite? E ui i loʻu fiafia tele e faitau tusi ma aʻoaʻoina mea, ae ou te lotofaafetai ona o le fesoasoani a loʻu tinā e faamalosia loʻu alofa mo Ieova. (1 Kori. 3:18, 19) Na malilie oʻu mātua e tuu laʻu aʻoga, ma amata laʻu paeonia iā Ianuari i le 1971 i le 15 o oʻu tausaga, ina ua maua laʻu tusi pasi o le school certificate.

 I le valu tausaga na sosoo ai, sa ou maua le faaeaga e paeonia ai i Tasmania. A o faagasolo lenā taimi, na ou faaipoipo ai i se tamaʻitaʻi aulelei mai i Tasmania o Jenny Alcock, ma e fā tausaga na ma auauna faatasi ai o ni paeonia faapito i oganuu maotua i Smithton ma Queenstown.

I le 1978, o le taimi muamua lea sa ma faimalaga atu ai i se tauaofiaga faavaomalo i Port Moresby i Papua Niu Kini. Ou te manatua pea loʻu faalogo i le lauga a se misionare i le gagana Hiri Motu. E ui ou te leʻi malamalama i ana faamatalaga, ae o lana lauga na faalaeiauina ai aʻu e avea o se misionare, aʻoaʻo nisi gagana, ma faia ni lauga faapena. O lea, na ou maua ai se auala e tuufaatasi ai loʻu alofa mo Ieova ma loʻu fiafia i gagana.

Na faateʻia i maʻua ina ua ma toe foʻi i Ausetalia, ae ua valaaulia e auauna o ni misionare i le motu o Funafuti i Tuvalu, lea na taʻua mumua o Ellice Islands. Sa ma taunuu i lo ma faaeaga fou iā Ianuari i le 1979. E na o le toʻatolu tagata talaʻi papatiso sa iai i Tuvalu.

E leʻi faigofie le aʻoaʻoina o le gagana Tuvalu. E pau le tusi sa maua o le “Feagaiga Fou.” E leai ni lomifefiloi po o ni aʻoga e aʻoaʻoina ai le gagana, o lea na ma filifili ai loa e aʻoaʻo ni upu e 10 i le 20 i aso taʻitasi. Peitaʻi, e leʻi umi ae ma iloaina, e ma te leʻi malamalama i upu na ma aʻoaʻoina. Nai lo o le fai atu i tagata e sesē faiga faaagaga, ae na ma fai atu iā i latou e aua neʻi faaaogāina tootoo ma fua e fua ai mea. Ae sa manaʻomia ona ma aʻoaʻoina le gagana ina ia faia ai suʻesuʻega faale-Tusi Paia ua amata. O lea na ma taumafai ai pea. I tausaga mulimuli ane, na faapea mai ai se tamaʻitaʻi sa matou suʻesuʻe: “Ua matou fiafia lava ua mafai ona oulua tautatala i la matou gagana. I le taimi muamua, e matou te leʻi malamalama iā oulua faamatalaga sa tau fai mai.”

I le isi itu, sa ma iai i se siʻomaga lelei e aʻoaʻo ai se gagana fou. Sa leai ni fale e mautotogi ai, o lea na matou nonofo ai ma se aiga Molimau i le nuu. Sa ma tautatala i taimi uma i le gagana ma faamasani i le olaga i le nuu. O lea na ma lē toe tautatala ai i le gagana Peretania mo ni nai tausaga, ae na avea le gagana Tuvalu ma la maʻua gagana autū.

E leʻi umi ae amata ona fiafia le toʻatele i le upu moni. Ae o le a faapefea ona matou suʻesuʻe? E leai ni lomiga i la latou gagana. O le a  faapefea ona faia a latou lava suʻesuʻega? O ā pese o le a latou pepese ai i sauniga, o lomiga e latou te faaaogāina, ma o le a faapefea foʻi ona latou sauniuni mo sauniga? O le a faapefea ona latou agaʻigaʻi i luma ma papatiso? Na manaʻomia e nei tagata lotomaulalo meaʻai faaleagaga i la latou gagana. (1 Kori. 14:9) Sa ma taumānatu, ʻPo o le a mafai ona maua ni lomiga i le gagana Tuvalu, o se gagana e na o le pe ā ma le 15,000 tagata e tautatala ai?’ Na tali mai Ieova i na fesili ma faamaonia mai ai vala nei e lua: (1) e finagalo o ia e folafola atu lana afioga “i motu mamao,” ma lona (2) e finagalo o ia e sulufaʻi atu i lona suafa i latou e vāai maulalo i ai le lalolagi.—Iere. 31:10; 1 Kori. 1:28.

I le 1980, na tofia ai i maʻua e le ofisa o le lālā e galulue o ni ē e faaliliu, o se galuega na manatu e ma te lē agavaa ai. (1 Kori. 1:28, 29) Muamua, sa ma faatauina mai se tamaʻi masini lomitusi mai i le malo, e lolomi ai lomiga mo sauniga. Sa ma faaliliuina foʻi i le gagana Tuvalu ma lomia i lenei masini le tusi O le Upu Moni e Taʻitaʻi ai i le Ola Faavavau. Ou te manatua le malosi o le manogi o le vaitusi, ma le tele o taumafaiga e lolomi uma ai nei lomiga, e ui i le vevela o le tau. E leʻi iai foʻi se eletise i lenā taimi.

Sa avea o se luʻi le faaliliu i le gagana Tuvalu, auā e lē tele ni tusi e mafai ona fesoasoani iā i maʻua. Peitaʻi, i nisi taimi na maua se fesoasoani mai i se auala e leʻi faatalitalia. I se tasi o taeao, na sesē le fale na ou afea, o se tagata e tetee i le upu moni. O le fale lea o se tamāloa sa faiaʻoga, sa vave ona ia faapea mai sa lē tatau ona afea lona fale. Ae na ia faapea mai: “E tasi le mea ou te fia taʻu atu. E tele ina eseese a outou faaliliuga ma le auala e masani ona tautatala ai tagata Tuvalu.” Sa ou fesili i isi, ma na latou faapea mai e saʻo le tamāloa. O lea, na ma faia ai fetuunaʻiga. Peitaʻi, sa ou maofa i le auala na fesoasoani mai ai Ieova e ala mai i se tagata tetee o loo ia faitau i a tatou lomiga.

 O le lomiga muamua i le gagana Tuvalu sa tufaina i le lautele, o le valaaulia mo le Faamanatuga. Na sosoo ai ma le Tala o le Malo Nu. 30, lea na tatalaina faatasi ma le faa-Peretania. Maʻeu se fiafiaga i le mauaina e tagata o lomiga i la latou lava gagana! Na faasolosolo lava ona lomia isi polosiua ma isi tusi i le gagana Tuvalu. I le 1983, na amata ai ona lomia e le lālā a Ausetalia le Olomatamata e 24 itulau mo le taʻitolu masina, lea na mafai ai ona matou suʻesuʻeina le pe ā ma le fitu palakalafa i vaiaso taʻitasi. O le ā le tali mai a tagata? Talu ai e fiafia tagata Tuvalu e faitau, o lea na matuā lauiloa ai a matou lomiga. O taimi uma lava e taunuu ai ni lomiga fou e faasilasila lava i tala fou i le leitiō a le malo, ma o nisi taimi sa avea ma tala autū. *

Sa amata faaliliuga i le tusitusi. Mulimuli ane, sa tā manusikulipi i laau lomitusi, ma sa tāina ma toe tā i le tele o taimi a o leʻi lafo atu e lolomi i Ausetalia. I se tasi taimi, na tofia ai e le lālā ni tuafāfine se toʻalua e tā uma nei manusikulipi i le komepiuta, e ui e la te lē malamalama i le gagana Tuvalu. Pe a māeʻa, ona faatusatusa lea o a laʻua galuega, ma o le mea e mataʻina ai ona e tau leai ni mea sesē. Pe a māeʻa lenā ona toe lafo mai lea iā i matou i le meli e toe siaki, ona toe lafo lea i le lālā e lolomi.

Ua suia le tulaga o mea. O le taimi nei ua faia faaliliuga a vaega faaliliu i le komepiuta. O le tuufaatasia o faaliliuga ua faia i ofisa faaliliu lava ia, ona lafo atu lea o faila i lālā o loo lomia ai e ala i le Initaneti. Ua lē toe manaʻomia ona faanatinati atu i fale meli e lafo ni manusikulipi.

A o faagasolo tausaga, na ma maua ma Jenny le tele o faaeaga i le Pasefika. Sa tofia i maʻua e galulue i le lālā i Samoa i le 1985. Sa ma fesoasoani ai i galuega faaliliu i le gagana Samoa, Toga, Toelau, faapea galuega sa faaauau ona ma faia i le gagana Tuvalu. * I le 1996, sa tofia ai i maʻua i lea lava galuega i le lālā i Fiti, lea sa ma fesoasoani ai i le galuega faaliliu i le gagana Fiti, Nauru, Tuvalu, Kiripati, ma le gagana Rotuma.

Ou te maofa pea i le maelega o i latou o loo faaliliuina a tatou lomiga. E lē o se galuega faigofie. Peitaʻi, ua taumafai nei auauna faamaoni e faaatagia mai le faanaunauga o Ieova e faaoo atu le tala lelei i “nuu uma, ma ituaiga uma, ma gagana uma, ma tagata uma.” (Faaa. 14:6) O se faaaʻoaʻoga, ina ua faatulaga le faaliliuina o le uluaʻi mekasini o le Olomatamata i le gagana Toga, na ou talanoa ai i toeaina uma i Toga ma fesiligia po o ai e mafai ona toleni e avea ma faaliliu. Na faapea mai se toeaina e lelei lana galuega o se inisinia, o le a faamavae i le aso e sosoo ai ma amata ai loa ona galue o se faaliliu. Maʻeu le faamāfanafanaloto o lea vala, auā o ia o se tane tausi aiga, ma e lē iloa po o le a faapefea ona tausia lona aiga. Peitaʻi, na tausia e Ieova o ia ma lona aiga, ma na ia tumau i le galuega faaliliu mo le tele o tausaga.

 Ua faaatagia mai e na tagata faaliliu faamaoni le vaaiga a le Vaega Pule, o ē manatu mamafa i manaʻoga faaleagaga o tagata e tautatala i gagana e lē taatele. O se faaaʻoaʻoga, na tulaʻi le fesili po o aogā pea taumafaiga e faaliliu ai lomiga i le gagana Tuvalu. Sa matuā faalaeiauina aʻu i le tali mai a le Vaega Pule: “E leai se māfuaaga o le a lē toe faaauau ai galuega faaliliu i le gagana Tuvalu. E ui e lē toʻatele nisi e tautatala i le gagana Tuvalu pe a faatusatusa i isi gagana, peitaʻi o loo manaʻomia pea ona oo atu le tala lelei i tagata i a latou lava gagana.”

I le 2003, na ma siitia ai ma Jenny mai i le Matagaluega Faaliliu i le lālā i Fiti agaʻi i le Vaega mo Faaliliuga i Patterson i Niu Ioka. E foliga mai o se moomooga ua faataunuuina. Na avea i maʻua ma vaega o i latou o loo fesoasoani e faaleleia le faaliliuina o a tatou lomiga i le tele o gagana. I le pe ā ma le lua tausaga na sosoo ai, na ma maua ai le faaeaga o le asiasi i atunuu eseese e faia toleniga mo le ʻaufaaliliu.

Seʻi oʻu toe foʻi nei i le folasaga le na taʻua i le amataga. E oo ane i le 2000, ua silafia e le Vaega Pule le manaʻomia ona faamalosia o vaega faaliliu i le lalolagi aoao. Peitaʻi, o le toʻatele o le ʻaufaaliliu e leʻi mauaina se toleniga. I le māeʻa ai o le folasaga i le Komiti o Tusitusiga lea na ou taʻua, ona faamaonia lea e le Vaega Pule se polokalame e toleni ai le ʻaufaaliliu i le lalolagi aoao. Sa aofia ai le aʻoaʻoina o le malamalamaga i le gagana Peretania, o metotia i le faaliliu, ma le galulue faatasi o se vaega.

O ā iʻuga o le faatāuaina o le galuega faaliliu? Ua faaleleia le faaliliuina o lomiga. Ua faateleina foʻi gagana ua lomia ai nei a tatou lomiga. I le taimi sa ma taunuu ai i la maʻua uluaʻi tofiga o ni misionare i le 1979, e na o le 82 gagana sa lomia ai le Olomatamata. O le tele o gagana e faatoʻā maua pe a māeʻa le tele o masina talu ona maua le gagana Peretania. Peitaʻi, i le taimi lenei ua silia i le 240 gagana ua lomia ai Le Olomatamata, ma ua tele ina maua faatasi ma le gagana Peretania. Ua eseese auala ua maua ai meaʻai faaleagaga i le silia i le 700 gagana. O le moomooga lenei sa iai i le tele o tausaga ua mavae.

I le 2004, na faia ai e le Vaega Pule se isi faaiʻuga iloga, ia vave le faaliliuina o le Tusi Paia. I nai masina mulimuli ane, na avea ai le faaliliuina o le Tusi Paia ma vaega masani o galuega faaliliu, lea ua mafai ona maua ai le Faaliliuga a le Lalolagi Fou i le tele o isi gagana. I le 2014, ua mafai ona maua ai lenei faaliliuga o le Tusi Paia atoa po o se vaega foʻi i le 128 gagana, e aofia ai ma gagana i le Pasefika i Saute.

O se tasi o vala iloga o loʻu olaga o le maua lea o le faaeaga e auai i le tauaofiaga i Tuvalu i le  2011. Sa aafia le atunuu atoa mo ni masina i le lāmala, ma na toetoe lava a tolopō ai le tauaofiaga. Peitaʻi, i le afiafi na ou taunuu ai, sa matuā maligi ai timuga ma faataunuuina ai le tauaofiaga. Sa ou mauaina le faaeaga tautele o le tatalaina lea o le Tusi Paia o le Lalolagi Fou o Tusitusiga Eleni i le gagana Tuvalu, o le gagana laʻitiiti lava lea ua mauaina lenei meaalofa matagofie. I le iʻuga o le tauaofiaga na toe maligi ai timuga. Sa fiafia le toʻatele i le faaiʻuga o le polokalame ona ua maua vai faaletino faapea ma vai faaleagaga.

E faanoanoa ona sa maliu Jenny, o laʻu paaga faamaoni mo le silia i le 35 tausaga, ae e na te leʻi molimauina lenā tulaga mataʻina. Sa ia tauivi ma le kanesa o le susu mo le sefulu tausaga, ma na maliu o ia i le 2009. Pe a toe faatūina mai o ia, e mautinoa lona fiafia pe a faalogo i le tatalaina o le Tusi Paia i le gagana Tuvalu.

Talu mai lenā taimi, ua toe faamanuiaina aʻu e Ieova i se isi paaga lalelei, o Loraini Sikivou. Sa galulue faatasi Loraini ma Jenny i le Peteli i Fiti, ma na galue foʻi Loraini o se faaliliu i le gagana Fiti. O lea ua ou toe mauaina se avā faamaoni, ma o loo ma auauna nei iā Ieova, ma fiafia faatasi i gagana.

Pe a toe tepa i tausaga ua mavae, e faalaeiauina aʻu pe a vaai i le alofa o lo tatou Tamā o Ieova, o loo faaauau ona ia tausia manaʻoga o tagata e tautatala i gagana taatele ma gagana e lē taatele. (Sala. 49:1-3) Sa ou vaaia lona alofa i le sagisagi fiafia o tagata i le uluaʻi taimi e latou te maua ai a tatou lomiga i a latou lava gagana, po o le pepese foʻi i viiga o Ieova i le gagana e pāʻia ai o latou loto. (Galu. 2:8, 11) Ou te manatua pea faamatalaga a Saulo Teasi, o se uso matua i Tuvalu. I le māeʻa ai ona ia usuina se pese o le Malo i lana lava gagana, na ia faapea mai: “E tatau ona e fai i le Vaega Pule e sili atu ona logolelei nei pese i le gagana Tuvalu nai lo o le faa-Peretania.”

Talu mai Setema i le 2005, na ou maua ai se faaeaga e leʻi faatalitalia, o le auauna o se sui o le Vaega Pule o Molimau a Ieova. Ua ou lē toe galue nei o se faaliliu, ae ou te faafetai iā Ieova ona o lona faatagaina pea o aʻu e fesoasoani i le galuega faaliliu i le lalolagi aoao. O se fiafiaga le iloa o loo manatu mamafa Ieova i manaʻoga faaleagaga o tagata uma, e oo lava i motu i le lotolotoi o le Vasa Pasefika. Ua moni ai upu a le faisalamo: “Ua fai Ieova ma tupu! Inā olioli ia le lalolagi. Ia fiafia foʻi le tele o motu.”—Sala. 97:1.