1, 2. Aiseā ua mataʻina ai le faiʻai o le tagata?

O LE gagana ua mafai ai e le tagata ona faitau, tusitusi, tautala, malamalama i upu, tatalo ma pese ai viiga o Ieova. E mataʻina nei vala uma ma e aofia ai vaega o o tatou faiʻai ma neula e fesootaʻi i ai, ia e lē o malamalama atoatoa i ai saienitisi. O le mataʻina o o tatou faiʻai, ua mafai ai ona tatou aʻoaʻoina gagana. Ua faapea mai se polofesa o gagana: “O se tasi o vala mataʻina o le olaga [o le tagata], o le tomai e mafai ai e a latou fanau ona aʻoaʻoina se gagana.”

² O le tomai o tagata e tautatala ai o se meaalofa mai i le Atua. (Sala. 139:14; Faaa. 4:11) E iai foʻi se isi vala e mataʻina ai o tatou faiʻai mai i le Atua. E ese mai i manu, ua foafoaina tagata “i le faatusa o le Atua.” E iai iā i latou le filifiliga saʻoloto, ma e mafai ona latou filifili e faaaogā o latou tomai o le tautala ina ia viia ai le Atua.​—Kene. 1:27.

3. O le ā le meaalofa matagofie ua aumaia e Ieova e faapotoina ai i tatou?

³ Ua foaʻi mai e le Atua o Lē na faavaeina gagana, le meaalofa matagofie o le Tusi Paia iā i latou e mananaʻo e faamamaluina o ia. Ua mafai ona maua le Tusi Paia atoa pe i vaega foʻi i le silia  i le 2,800 gagana. Pe a tatou manatunatu i tusitusiga paia, o le a faatumuina o tatou mafaufau i manatu o le Atua. (Sala. 40:5; 92:5; 139:17) O lea, e mafai ona e maua le fiafia i le manatunatu loloto i mea “e mafai ona faapotoina ai oe mo le faaolataga.”​—Faitau le 2 Timoteo 3:14-17.

4. O le ā le uiga o le manatunatu loloto, ma o ā fesili o le a tatou iloiloina?

⁴ O le manatunatu loloto e uiga atu i le taulaʻi o ou mafaufauga, po o le faaāta i lou mafaufau o se mea lelei po o se mea leaga. (Sala. 77:12; Faata. 24:1, 2) O mataupu e lua e sili ona lelei e manatunatu loloto i ai o Ieova le Atua, ma lona Alo o Iesu Keriso. (Ioa. 17:3) Ae atonu e tatou te taumānatu, o le ā le fesootaʻiga o le faitau ma le manatunatu loloto? O ā avanoa e mafai ona tatou manatunatu loloto ai, ma e faapefea ona avea o se mea e tatou te fiafia e fai?

5, 6. O le ā e fesoasoani iā te oe e faaleleia lou malamalamaga ma lou tomai e manatua ai mea o loo e faitauina?

⁵ E mafai ona faia e lou faiʻai mea mataʻina, ma o nisi taimi e te faia mea e aunoa ma ni au taumafaiga malolosi. O se faaaʻoaʻoga, e tatou te savavali, mānava, tiʻetiʻe uila, po o le tāina se tusi i se masini faaonapōnei, e aunoa ma le mafaufau i ai. O nisi taimi, o le mea lenā e tupu pe a tatou faitau. O lea, e tāua ai ona taulaʻi atu i le uiga o mea o loo tatou faitauina. Pe a māeʻa se palakalafa, pe a o leʻi amataina foʻi se tamaʻi ulutala fou i se lomiga, e mafai ona e mālōlō ma manatunatu i mea ua faatoʻā uma ona e faitauina, ina ia faamautinoa ua e malamalama lelei i ai. O le mea moni, o mea e faalavelave mai ma lou lē uaʻi atu atoatoa e mafai ona tafatafao solo ai lou mafaufau, ma lē maua ai aogā mai i mea o loo e faitauina. E faapefea ona ʻalofia lenā mea?

⁶ Ua maua mai suʻesuʻega a saienitisi, o le faitau leotele o upu a o fai au suʻesuʻega, e faigofie ai ona e manatuaina mea. E malamalama lelei Lē na foafoaina o tatou faiʻai i lenā mea. O le māfuaaga lea na ia faatonuina ai Iosua e faitau “lē leoa” Lana tusi o le Tulafono. (Faitau le Iosua 1:8.) O le faitau lē leoa o le Tusi Paia po o le faitauina lemū, e mafai ona iai se aafiaga i lou mafaufau. E fesoasoani foʻi lenā iā te oe e uaʻi atoatoa ai i mea o loo e faitauina.

7. O le ā le taimi sili e manatunatu loloto ai i le Afioga a le Atua? (Tagaʻi i le ata i luga aʻe o le matua.)

⁷ Atonu e lē tele ni a tatou taumafaiga e fai pe a faitau, ae e manaʻomia le uaʻi atu atoatoa pe a manatunatu loloto. O le māfuaaga lenā e faigofie ai i faiʻai o tagata lē lelei atoatoa ona tosina atu e faia se mea faigofie. O lea, o le taimi sili e manatunatu loloto ai, pe afai ua e mālōlō ma o loo toʻafilemu lou siʻomaga e aunoa ma ni mea e faalavelave mai. Sa iloa e le faisalamo, o le taimi sili e manatunatu loloto ai pe a taoto i lona moega i le pō. (Sala. 63:6) Sa lelei atoatoa le mafaufau o Iesu, ae sa ia iloa le aogā o le iai i se nofoaga toʻafilemu e tatalo ma manatunatu loloto ai.​—Luka 6:12.

8. (a) O le ā se isi mea e mafai ona tatou manatunatu loloto ai e ese mai i le Tusi Paia? (e) O ā faalogona o Ieova pe a tatou talanoa e faatatau iā te ia?

⁸ O le mafaufau i mea o loo faitauina i le Tusi Paia, o se tasi lea o auala tāua e manatunatu loloto ai, ae e iai foʻi isi auala. O se faaaʻoaʻoga, pe a e vaai i le ofoofogia o le foafoaga, ia mafaufau i ai. E mautinoa o le a uunaʻia ai oe e vivii atu iā Ieova i lona lelei, ma faailoa atu lou lototalisapaia i sau uō o loo oulua faatasi. (Sala. 104:24; Galu.  14:17) Pe e tāua iā Ieova na manatunatuga? E maua le tali i lana Afioga. E tusa ai ma nei aso e gata ai, ua Ia folafola mai: “I lea taimi, e fetautalatalaaʻi ai i latou o ē e matataʻu iā Ieova, e taʻitasi ma lana uō, ma e uaʻi mai pea Ieova ma faafofoga mai i ai. Ona amata ai lea ona tusia le tusi e faamanatu ai i ona luma mo i latou o ē e matataʻu iā Ieova, ma ē e manatunatu i lona suafa.”​—Mala. 3:16.

9. (a) O le ā na faalaeiauina e Paulo Timoteo e manatunatu i ai? (e) E faapefea ona tatou faatatauina le fautuaga a Paulo pe a sauniuni mo le faiva?

⁹ Na faalaeiauina Timoteo e le aposetolo o Paulo ina ia “manatunatu” i aafiaga o lana tautala, amio, ma lana aʻoaʻo atu. (Faitau le 1 Timoteo 4:12-16.) E pei o Timoteo, e tele galuega faaleagaga e tatou te mafaufau i ai. O se faaaʻoaʻoga, e manaʻomia ona tatou manatunatu loloto a o sauniuni e fai se suʻesuʻega faale-Tusi Paia. Pe a mafaufau i tagata suʻesuʻe taʻitasi, e manaʻomia ona tatou manatunatu i se fesili po o se talafaatusa e fesoasoani iā te ia e agaʻigaʻi ai i luma. O le faaalu o le taimi e faia ai faapea, e mafai ona faafouina ma faamalosia ai lo tatou faatuatua. O le a fesoasoani e faia ai a tatou suʻesuʻega faale-Tusi Paia i se auala lelei ma aasa. E faapena foʻi pe a sauniunia o tatou loto mo le faiva i le fanua. (Faitau le Esera 7:10.) O le faitauina o se mataupu i le tusi o le Tusi Paia o le Galuega, o le a ʻmumū ai e pei o se afi’ lo tatou maelega i le faiva. O le manatunatu loloto i mau o le Tusi Paia e tatou te mananaʻo e faaaogā i lenā aso, ma lomiga ua tatou fuafua e ofoina, o le a fesoasoani i le faataunuuina o lo tatou faaeaga. (2 Timo. 1:6) Ia mafaufau i tagata i le oganuu ma mataupu o le a latou fiafia mai ai. O na sauniuniga uma o le a uunaʻia ai i tatou e molimau atu i se auala lelei e  ʻfaaalia ai le agaga ma le mana’ o le Afioga a le Atua.​—1 Kori. 2:4.

10. O ā nisi avanoa e mafai ona tatou manatunatu loloto ai i mea faaleagaga?

¹⁰ Pe e iai ni taimi e te faia ai faamaumauga o lauga i le lautele, fonotaga ma tauaofiaga? O le autaluina o na faamaumauga, e maua ai avanoa lelei e manatunatu loloto ai i mea ua e aʻoaʻoina mai i le Afioga a le Atua ma lana faalapotopotoga. E tatou te maua faamatalaga fou i mekasini o Le Olomatamata ma le Ala Mai! i masina taʻitasi, ma lomiga e tatala i tauaofiaga. Pe a e faitauina le Yearbook, e maua aogā pe a manatunatu loloto i tala taʻitasi o mea na tutupu. O le faia faapea o le a pāʻia ai lou loto. Atonu e te manaʻo e vase ni manatu autū, pe tusi ni au faamatalaga i tala ane o le palakalafa, lea o le a fesoasoani i sau toe asiga, se asiasiga faaleoleo mamoe, po o sau lauga i le lumanaʻi. Ae o le vala e sili ona tāua, o le faaalu o se taimi e manatunatu loloto ai a o faitau lomiga faale-Tusi Paia, o le a maua le avanoa e ave ai i fale manatu na e faitauina, ma tatalo iā Ieova e faafetai ai mo mea lelei ua e aʻoaʻoina.

11. O le ā le vala autū e tatau ona tatou manatunatu loloto i ai, ma aiseā? (Tagaʻi foʻi i le faaopoopoga.)

¹¹ O le vala autū e tatau ona tatou manatunatu loloto i ai, o le Afioga faagaeeina a le Atua. Seʻi faapea ua faasā ona iai sau Tusi Paia. * Peitaʻi, e lē mafai ona taofia ai oe mai i le manatunatu loloto i mea o loo e manatuaina, e pei o se mau e te fiafia i ai, po o upu foʻi o pese o le Malo. (Galu. 16:25) E mafai foʻi ona fesoasoani le agaga o le Atua e toe faamanatu atu mea lelei na e aʻoaʻoina.​—Ioa. 14:26.

12. O le ā se faasologa lelei e mafai ona faitau ai le Tusi Paia?

¹² Ia faatulaga nisi aso o le vaiaso e faitau ma manatunatu loloto ai i le faitauga Tusi Paia i vaiaso taʻitasi i le Aʻoga o le Faiva Faatiokarate. Ae e mafai ona faatulaga nisi aso e manatunatu loloto ai i fetalaiga ma gaoioiga a Iesu. O tusi a Evagelia e faatatau i le olaga ma le faiva a Iesu, o isi ia tusi lauiloa o le Tusi Paia. (Roma 10:17; Epe. 12:2; 1 Pete. 2:21) Ua maua foʻi e tagata o le Atua se lomiga, ua faasolosolo lelei ai ona faamatala mea na tutupu iā Iesu a o iai i le lalolagi. O se meafaigaluega aogā, aemaise pe a faitau ma manatunatu loloto i tala a Evagelia o loo i mataupu taʻitasi.​—Ioa. 14:6.

13, 14. Aiseā e tāua ai iā i tatou ona manatunatu pea i mea faaleagaga, ma o le ā e uunaʻia i tatou e fai?

¹³ O le manatunatu loloto i mea faaleagaga e fesoasoani i le tuputupu aʻe o se Kerisiano ia matua faaleagaga. (Epe. 5:14; 6:1) E lē mafai ona tumau le malosi o le faatuatua o se tasi, pe a itiiti le taimi e mafaufau ai iā Ieova ma Iesu. E iai lenā tagata i se tulaga lamatia o le tafetafea ese po o le tuulafoaʻia o le upu moni. (Epe. 2:1; 3:12) Na lapataʻi mai Iesu pe a tatou lē faalogo pe talia le Afioga a Ieova ma se “loto mamā ma lelei,” o le a tatou lē “tausi” i ai. O le a faigofie foʻi ona tatou ʻtosina atu i popolega, ma le tamaoaiga, ma fiafiaga o lenei olaga, ona lē oo lea ina matua o latou fua.’​—Luka 8:14, 15.

¹⁴ O lea, ia faaauau ona tatou manatunatu loloto i le Afioga a le Atua. O le faia  faapea, o le a tatou faaatagia atu ai le mamalu ma uiga o Ieova e pei ona faailoa mai i le Tusi Paia. (2 Kori. 3:18) Maʻeu se faaeaga matagofie! O le faatuputeleina o lo tatou poto i le Atua, ma faaatagia atu lona mamalu, o ni faaeaga tautele ma e lē mafai ona gata mai lo tatou aʻoaʻoina pea o le auala e faaaʻoaʻo ai i lo tatou Tamā alofa i le lagi.​—Fai. 3:11.

15, 16. (a) E faapefea ona tatou maua aogā mai i le manatunatu loloto i mea faaleagaga? (e) Aiseā e faigatā ai i nisi taimi ona tatou manatunatu loloto, ae aiseā e tatau ai ona tatou maumauaʻi e faia faapea?

¹⁵ O le faaauau ona manatunatu loloto i mea faaleagaga, o le a faatumau ai lo tatou maelega i le upu moni. O le a avea i tatou ma puna o faalaeiauga i o tatou uso ma tagata fiafia e tatou te feiloaʻi ai i le faiva i le fanua. O le manatunatu loloto i le meaalofa silisili a le Atua, o le taulaga togiola a Iesu, o le a fesoasoani iā i tatou e faatāua la tatou faiā vavalalata ma lo tatou Tamā Paia o Ieova. (Roma 3:24; Iako. 4:8) O Mark, o se uso mai i Aferika i Saute na falepuipui mo le tolu tausaga ona o lona solitū faa-Kerisiano. Na ia faapea mai: “O le manatunatu loloto e mafai ona faatusa atu i le fiafia i se vaaiga matagofie. O le tele e tatou te manatunatu loloto ai, o le tele foʻi na o mea fou e tatou te iloaina e faatatau i lo tatou Atua o Ieova. Pe a ou lagona le lotovaivai ma le popole i le lumanaʻi, e faitau laʻu Tusi Paia ma manatunatu loloto i se mau. Ou te lagona ai le toʻafilemu.”

¹⁶ Ua tumu le lalolagi i aso nei i faatosinaga, ua matuā faigatā ai i nisi taimi ona manatunatu i mea faaleagaga. Ua faapea mai Patrick, o se uso faamaoni i Aferika: “O loʻu mafaufau e tai pei o se pusa meli e tumu i faamatalaga eseese, o faamatalaga e manaʻomia ma lē manaʻomia, lea e tatau ona faavasega i aso taʻitasi. Pe a iloiloina oʻu mafaufauga, e masani ona iai oʻu ʻpopolega.’ O lea ou te tatalo iā Ieova ina ia aveese nei popolega. E ui e manaʻomia ona faaalu ai sina taimi a o leʻi amata ona manatunatu loloto i mataupu faaleagaga, ae ua atili ai ona ou māfana atu iā Ieova. O lea, ua mafai ona ou malamalama lelei ai i le upu moni.” (Sala. 94:19) E maua aogā e i latou e “iloiloina Tusitusiga Paia i aso taʻitasi” ma manatunatu loloto i ai.​—Galu. 17:11.

17. E faapefea ona e maua le taimi e manatunatu loloto ai?

¹⁷ E fealapō isi i le taeao e faitau, manatunatu ma tatalo. O nisi e latou te faia faapea i mālōlōga i le aoauli. Atonu e faia faapea e nisi i le afiafi pe a o leʻi momoe foʻi. Ae e fiafia nisi e faitau le Tusi Paia i le taeao ma le pō a o leʻi mālōlō. E latou te ʻfaitau i ai i le ao ma le pō’ po o le faia lea e lē aunoa. (Iosua 1:8) O le vala tāua, ia faatau mai le taimi mai i mea e lē tāua, ina ia manatunatu loloto ai i le Afioga a le Atua i aso taʻitasi.​—Efe. 5:15, 16.

18. O le ā ua folafola mai i le Tusi Paia iā i latou e manatunatu loloto i le Afioga a le Atua, ma taumafai e faatatau?

¹⁸ Ua folafola mai pea i le Afioga a le Atua faamanuiaga e maua e i latou e manatunatu loloto i ai, ma taumafai e faatatau. (Faitau le Salamo 1:1-3.) Na fetalai Iesu: “Amuia i latou e faalogo i le afioga a le Atua ma tausi i ai!” (Luka 11:28) O le vala e sili ona tāua, o le manatunatu loloto i mea faaleagaga i aso taʻitasi, o le a fesoasoani iā i tatou e faamamaluina Lē na foafoaina o tatou faiʻai. O le a ia tauia i tatou e ala i le maua o le fiafia i le taimi lenei, ma le ola e faavavau i lana lalolagi fou amiotonu.​—Iako. 1:25; Faaa. 1:3.