Pe E te Manatua?
Pe na e faitauina māeʻaeʻa lomiga fou o Le Olomatamata? Seʻi vaai pe mafai ona e taliina fesili o loo mulimuli mai:
Pe a oo mai le iʻuga, o ā tulaga o le a faamutaina?
O le a faamutaina pulega lē taulau a tagata, o taua, ma faiga lē tonu. O le a faaumatia foʻi lotu ua tuulafoaʻia le Atua ma tagata, faapea ma tagata faalēmataʻu.—5/1, itu. 3-5.
O ai Koku o Makoku o loo taʻua i le tusi o Esekielu?
E lē o faasino atu iā Satani. Peitaʻi, e foliga mai o loo faasino atu Koku o Makoku i le tuufaatasiga o atunuu uma, o ē o le a taumafai e tafiesea tagata o le Atua a o leʻi gāpā Amaketo.—5/15, itu. 29-30.
O ā vala e ono e fesoasoani i se tasi e maua ai le fiafia a o faasolo ina matua?
Ua taʻua i le Tusi Paia o le (1) lotomaulalo (2) paleni, (3) saʻo le vaai, (4) limafoaʻi, (5) faaleuō, ma le (6) lotofaafetai. O le faaalia o nei uiga e fesoasoani i se tasi ina ia maua le fiafia a o faasolo ina matua.—6/1, itu. 8-10.
E faapefea i vavega a Iesu ona faaalia ai lona limafoaʻi?
I se faaipoipoga i Kana, na liua ai e Iesu le pe ā ma le 100 kalone vai (380 L) e avea ma uaina. I se tasi taimi, na ia faia se vavega ma fafaga ai tagata e toʻa 5,000. (Mata. 14:14-21; Ioa. 2:6-11) Sa ia faaaʻoaʻo i lona Tamā i le faaalia o le limafoaʻi.—6/15, itu. 4-5.
Pe e mafai e tagata e lē lelei atoatoa ona faafiafia le Atua?
Sa faia e tane e pei o Iopu, Lota ma Tavita ni mea sesē. Na salamō ma suia o latou ala, ma mananaʻo e auauna i le Atua. Na finagalo malie le Atua iā i latou ma e faapena foʻi i tatou.—7/1, itu 12-13.
Po o le faaumatiaga o Papelonia le Aai Tele o le a faaumatia ai i latou uma sa auai i lotu sesē?
E foliga mai e leai. Ua faaalia mai e le Sakaria 13:4-6 e oo lava i nisi o taʻitaʻi lotu o le a tuua a latou lotu ma teena le avea o i latou ma vaega o na lotu sesē.—7/15, itu. 15-16.
Aiseā na ioe ai Parako e alu e tau ae seʻi vaganā ua la ō faatasi ma Tepora?
O Parako o se tagata faatuatua. E leʻi talosaga atu o ia iā Ieova mo nisi auupega, ae na ia manaʻo ia iai se sui o Ieova e faamalosia o ia ma lana ʻautau. (Faama. 4:6-8; 5:7)—8/1, itu. 13.
O ā ni mea e mafai ona mafaufau loloto i ai se Kerisiano?
O nisi o mea e mafaufau loloto i ai o foafoaga a Ieova, le tāua o le Afioga faagaeeina a le Atua, le faaeaga o le tatalo, ma lana sauniuniga alofa o le togiola.—8/15, itu. 10-13.
E faapefea i le ʻalofia o aumea leaga ona aafia ai se tuugātala?
E tatou te lē agaleaga i tagata lē talitonu. Ae e tatou te solia taʻiala a le Atua pe afai e tuutala ma se tasi e leʻi tuuina atu iā te ia ma faamaoni i ana tapulaa. (1 Kori. 15:33)—8/15, itu. 25.
Na faapefea ona mou atu le faatuatua o Peteru, ma o le ā na fesoasoani e toe maua ai lona faatuatua?
O le faatuatua o Peteru na savali ai i le sami agaʻi iā Iesu. (Mata. 14:24-32) Ae o le vaai atu i le matagi na fefe ai Peteru. Sa ia taumafai e toe taulaʻi atu iā Iesu ma talia lana fesoasoani.—9/15, itu. 16-17.
Ua taʻua i le Galuega 28:4 na mafaufau tagata Melita o le aposetolo o Paulo o se fasioti tagata. Aiseā na latou manatu ai faapena?
Ina ua ū e se gata feʻai Paulo, atonu na latou faia se faaiʻuga sesē e faapea o loo faasalaina o ia e Dike, o le atua fafine o le faamasinotonu.—10/1, itu. 9.
O le ā le lesona e tatou te maua mai i le pupū o Mareta i le tele o mea e fai?
Sa faalavelavea Mareta i le sauniunia o se taumafataga telē. Na fetalai atu Iesu ua filifilia e lona uso le mea lelei, o le faalogologo i ana aʻoaʻoga. E tatau ona tatou mataala neʻi faalavelavea a tatou faasologa faaleagaga ona o mea e lē tāua.—10/15, itu. 18-20.