A O FAAGASOLO tausaga, sa toe teuteuina le Tusi Paia o le Faaliliuga a le Lalolagi Fou i le gagana Peretania i le tele o taimi, peitaʻi e tele lava suiga sa faia i le 2013. O se faaaʻoaʻoga, e pe ā ma le 10 pasene ua faaitiitia ai upu Peretania i lenei faaliliuga. O nisi o faaupuga autū o le Tusi Paia ua toe teuteuina. O nisi o mataupu ua tusia e pei o ni solo, ma ua faaopoopo nisi faamatalaga pito i lalo e faamanino atili ai. E lē mafai ona talanoaina i lenei mataupu suiga uma, ae seʻi o tatou iloiloina nisi o suiga autū.

O ā nisi o faaupuga autū i le Tusi Paia ua suia? Na taʻua i le mataupu ua mavae atu le suia o faaupuga mo le upu “Seoli” ma le “Heitisi.” Ae e iai foʻi nisi upu ua toe fetuunaʻi.

O se faaaʻoaʻoga o le upu “faasatauro” (impale) ua suia nei i le ʻtutuʻi i luga o le laau,’ e ʻalofia ai le manatu sesē e faatatau i le auala na fasiotia ai Iesu. (Mata. 20:19; 27:31) O le upu “poula” (revelries) ua suia nei i “patī lē taupulea” lea e faigofie ona malamalama ai i aso nei. (Kala. 5:19-22) Ua suia le “alofa agalelei” (loving kindness) i le faaupuga “alofa faamaoni.” O lea ua maua ai le uiga o le upu i le Tusi Paia lea e masani ona faaaogā faatasi ma le “faamaoni.”—Sala. 36:5; 89:1.

O nisi faaupuga sa tasi lava le auala e faaliliu ai, ae o lea ua faaliliu nei e tusa ma manatu o loo siʻomia ai. O se faaaʻoaʻoga, o le upu Eperu ʽoh·lamʹ, lea sa faaliliuina “mai i le vavau e oo i le faavavau,” e iai le manatu o le faavavau. Seʻi mātau le auala ua aafia ai le faaliliuina o le Salamo 90:2 ma le Mika 5:2.

O le upu Eperu ma le upu Eleni sa faaliliuina ai le “seed” (fatu) lea e tele ina maua i mau, e mafai ona faasino atu i fatu o laau po o fanau a tagata (offspring). I lomiga muamua o le New World Translation i le gagana Peretania ma isi gagana, e masani ona faaaogā le upu “seed,” e pei o le Kenese 3:15. Peitaʻi, e lē o toe taatele i le gagana Peretania le faaaogāina o le upu “seed” (fatu), pe a faasino atu i fanau a tagata. O lea, ua faaaogā ai i le lomiga ua toe teuteuina le upu “offspring”  (fanau) i le Kenese 3:15 ma isi mau. (Kene. 22:17, 18; Faaa. 12:17) O isi mau e faaaogā ai lenei upu, ua faaliliu e tusa ai ma le siʻomaga o le mau.—Kene. 1:11; Sala. 22:30; Isa. 57:3.

Aiseā ua suia ai nisi o faaupuga sa faaliliu saʻo i le upu i le upu? O loo taʻua i le Faaopoopoga A1 i le toe teuteuga o le 2013, o se faaliliuga lelei o le Tusi Paia e “mafai ona faailoa le uiga tonu o se manatu pe afai o le faaliliu o le upu i le upu o le a lē manino ai le uiga.” Pe a manino se alagāupu i se gagana, ona faaliliu saʻo lea i le upu i le upu. O se faaaʻoaʻoga, o le faaupuga ʻsuʻesuʻeina le fatu’ (fpl) o loo i le Faaaliga 2:23 e manino i le tele o gagana. Peitaʻi, i le fuaiupu lava lenā o loo taʻua ai le ʻsuʻesuʻeina o fatu gaʻo,’ (fpl) e lē faigofie ona malamalama ai. O lea ua suia ai “fatu gaʻo” i faalogona loloto, lea e maua ai le uiga moni o le manatu. E faapena foʻi le Teuteronome 32:14, o le alagāupu “le fatu gaʻo lololo o saito” (the kidney fat of wheat) e sili ona manino pe a faaliliu o “saito e sili ona lelei.” O le tulaga foʻi lenā i le faaupuga “e leʻi peritomeina le laugutu,” (fpl) e lē manino i le tele o gagana, lea ua suia nei i le faaupuga “e faigatā ona ou tautala.”—Eso. 6:12.

Aiseā ua suia ai faaupuga “atalii o Isaraelu” ma “atalii ua leai ni tamā” agaʻi i faaupuga “fanauga a Isaraelu” ma “fanau ua leai ni tamā”? I le faa-Eperu, e iai upu e faaeseese ai alii ma tamaʻitaʻi. Peitaʻi, e iai nisi upu e patino atu i alii ae e mafai ona aofia ai alii ma tamaʻitaʻi. O se faaaʻoaʻoga, o manatu o loo siʻomia ai nisi fuaiupu e mafai ona faasino atu “atalii o Isaraelu” i tane ma fafine, o lea ua suia ai loa i le faaupuga “fanauga a Isaraelu.”—Eso. 1:7; 35:29; 2 Tu. 8:12.

E faapena foʻi le upu Eperu “atalii” i le Kenese 3:16, na faaliliuina i le upu “fanau” i isi uluaʻi teuteuga o le Faaliliuga a le Lalolagi Fou. Ae i le Esoto 22:24, o loo faaaogā ai lava le upu lea e tasi, ae ua toe fetuunaʻi nei ma e faapea lona faitauina: “O outou fanau [Eperu, “atalii”] ua leai ni tamā.” O le faatatauina o lenā taʻiala i isi vala, ua suia ai le faaupuga “tama ua leai sona tamā,” i le faaupuga “fanau ua leai se tamā” po o “sē e mātuaoti.” (Teu. 10:18; Iopu 6:27) E faapena foʻi le faaliliuga i le Septuagint i le gagana Eleni. O lea ua faaaogā ai foʻi le faaupuga “aso o lou talavou,” nai lo o “aso o lou tauleʻaleʻa” i le Failauga 12:1.

Aiseā ua faafaigofie ai le faaliliuina o le tele o veape i le gagana Eperu? O veape autū i le gagana Eperu, e faailoa mai ai se gaoioiga o loo faaauau ona fai, po o se gaoioiga ua māeʻa foʻi ona fai. I lomiga ua mavae o le New World Translation e masani ona faaaogā faaupuga e faaeseese ai nei veape. O se faaaʻoaʻoga, mo gaoioiga o loo faaauau ona fai e faaaogā faaupuga e pei o le “pea,” po o le “o loo.” * Ae e faaaogā faaupuga e pei o le “e moni,” e faamatala ai se gaoioiga ua māeʻa ona fai.

I le toe teuteuga o le 2013, ua lē toe faaaogāina faaupuga e faamatala ai veape, seʻi vaganā ua manaʻomia. O se faaaʻoaʻoga, e lē manaʻomia ona faamamafa pea le fetalaiga a le Atua “Ia iai le malamalama.” O lea i le toe teuteuga, ua faaaogā ai  le faaupuga “na fetalai” e lē o se gaoioiga o loo faaauau ona fai. (Kene. 1:3) Peitaʻi, e iai faamaoniga sa faaauau ona valaau mai Ieova iā Atamu, o lea ua faamatilatila ai i le Kenese 3:9 le “valaau mai pea” o le Atua iā Atamu. O lea ua faafaigofie le auala e faaliliu ai veape, ua uaʻi atu i le gaoioiga nai lo o le faamatilatila o le faaauau po o le māeʻa o lenā gaoioiga. O lenei faiga ua atagia mai ai le pupuu o faamatalaga i le gagana Eperu.

Aiseā ua faatulaga ai o ni solo le tele o mataupu? O le tele o vaega o le Tusi Paia sa tusia o ni solo. O gagana i aso nei, o le auala e tusia ai solo e tutusa faaleoga o upu i faaiʻuga o laina. Ae o solo i le gagana Eperu, o le vala e sili ona tāua o le auala e faatutusa ma faaeseese ai manatu. O solo i le gagana Eperu, e lē tāua le tutusa o faaleoga o faaiʻuga o laina, peitaʻi o le auala e faatulaga lelei ai manatu.

I isi lomiga tuai o le New World Translation sa faatulaga o ni solo tusi o Salamo ma le Faataoto, ina ia iloa ai e tatau ona usu pe faitau leotele i aso anamua. O lenei auala ua fesoasoani tele e manatua ai manatu pe a faitauina. I le toe teuteuga o le 2013, ua faatulaga o ni solo le tusi o Faataoto, Pese a Solomona ma le tele o mataupu o isi tusi faavaloaga a le Tusi Paia, ina ia iloa ai sa tusia nei vaega o ni solo, ma faamatilatila ai le auala e tutusa ma eseese ai manatu. O se faaaʻoaʻoga i le Isaia 24:2, o laina taʻitasi e iai se faaeseesega, ma e fesootaʻi laina taʻitasi ina ia faamatilatila ai le manatu, e leai se tasi e ʻaloese mai i le faamasinoga a le Atua. O le tusia o na fuaiupu i le auala faafatusolo, ua iloa ai e le tagata faitau, e lē o tau ina toe taʻua e se tusitala o le Tusi Paia ni manatu, ae ua faatulaga i le auala faafatusolo ina ia faamatilatila ai le feʻau a le Atua.

E lē matuā manino lelei le eseesega o le auala masani e tusia ai faamatalaga ma le auala e tusia ai solo i le gagana Eperu. O lea, e eseese ai faaliliuga o Tusi Paia po o le fea vaega e tusia o se solo. E tāua ai le faautaga loloto a le tagata faaliliu i le filifilia o fuaiupu e lomia o se solo. O nisi fuaiupu e tai pei o ni solo i le auala e faaupu ma faamatala ai ina ia faamatilatila ai se manatu.

O se tasi o vala fou o le Outline of Contents, ua matuā aogā e iloa ai ua suia le tagata o loo tautala i solo anamua, e pei o le Pese a Solomona.

Ua faapefea i suʻesuʻega i manusikulipi o uluaʻi gagana ona aafia ai lenei toe teuteuga? O le uluaʻi Faaliliuga a le Lalolagi fou i le gagana Peretania, sa faavae mai i faaliliuga faa-Eperu a le ʻau Masoreta faapea faaliliuga i le gagana Eleni a Wescott ma Hort. O loo agaʻigaʻi pea i luma suʻesuʻega o manusikulipi anamua o le Tusi Paia, ma malamalama ai i uluaʻi tusitusiga mo nisi o fuaiupu o le Tusi Paia. Ua mafai ona maua kopi o le Tusi Tāʻai o le Sami Mate, ma ua suʻesuʻeina foʻi nisi manusikulipi i le gagana Eleni. Ua mafai ona maua i komepiuta nisi kopi fou o manusikulipi, ma faigofie ai ona iloa le eseesega o manusikulipi, ma iloa ai po o le fea tusitusiga Eperu po o tusitusiga Eleni e sili ona maufaatuatuaina. Ua faaaogā lelei e le Komiti o le Tusi Paia o le Lalolagi Fou nei vaega uma e iloilo ai nisi o fuaiupu, ma faia ai nisi o suiga.

O se faaaʻoaʻoga, e tusa ai ma le 2 Samuelu 13:21 i le tusitusiga Eleni o le Septuagint, o loo iai faaupuga nei: “Ua ia lē faatigā i faalogona o Amanono lona atalii, auā ua ia alofa iā te ia, ona o ia o lona atalii ulumatua.” I isi lomiga na muamua atu a le New World Translation e lē o aofia ai upu nei ona e lē o iai i tusitusiga a le ʻau Masoreta. Peitaʻi, o loo maua nei upu i le Tusi Tāʻai o le Sami Mate, lea ua faaaofia ai loa i le lomiga ua toe teuteuina o le 2013. O le māfuaaga foʻi lea ua toe tuu ai le suafa o le Atua i isi mau e lima o le tusi Muamua a Samuelu. O le suʻesuʻeina foʻi o tusitusiga Eleni ua suia ai foʻi le faatulagaina o manatu i le Mataio 21:29-31. O lea, ua faavae na suiga mai i le tele o faamaoniga mai i manusikulipi nai lo o le pipii pea i se faaliliuga autū o tusitusiga Eleni.

O nisi nei o suiga ua matuā faigofie ai ona faitau ma malamalama i latou e vaai i le Faaliliuga a le Lalolagi Fou o se meaalofa mai i le Atua o fesootaʻiga.