1. (a) O le ā le tofiga na tuuina atu e le Atua iā Atamu? (e) Talu mai lenā taimi, ua faapefea ona faaaogā e tagata o le Atua a latou gagana?

UA FOAʻI mai e Ieova le Atua i ana foafoaga le meaalofa e fesootaʻi ai. Ina ua tuu e le Atua Atamu i le faatoʻaga e nofo ai, ona ia tuu lea i ai se tofiga e aofia ai gagana, o le faaigoa lea o manu. Sa faaaogā ma le atamai e Atamu ona tomai e faaigoa ai manu. (Kene. 2:19, 20) Talu mai lenā taimi, o loo faaauau ona faaaogā e tagata o le Atua gagana ina ia viia ai Ieova ma faailoa atu lona finagalo i isi. I tausaga talu ai nei, o se tasi o auala mataʻina ua faaaogā ai gagana e faaauiluma ai le tapuaʻiga mamā, o le faaliliuina lea o le Tusi Paia.

2. (a) O ā taʻiala o loo mulimulitaʻia e le Komiti o le Tusi Paia o le Lalolagi Fou? (e) O le ā o le a iloiloina i lenei mataupu?

² E anoanoaʻi faaliliuga o le Tusi Paia, peitaʻi ua sili atu ona saʻo isi faaliliuga nai lo o isi. I vaitausaga o le 1940, na faavae ai e le Komiti o le Tusi Paia o le Lalolagi Fou taʻiala mo faaliliuga lea ua mulimulitaʻia e le silia i le 130 gagana. O taʻiala nei (1) O le faapaiaina o le suafa o le Atua, e ala i le toe faafoʻisia i le Tusi Paia. (Faitau le Mataio 6:9.) (2) Faaliliu i le upu i le  upu le feʻau i vaega e talafeagai ai, ae a lē mafai ona faaliliu lea o le uiga. (3) Ia faaaogāina se gagana faigofie e faalaeiau ai tagata e faitau. * (Faitau le Neemia 8:8, 12.) O lea, seʻi o tatou iloiloina le auala ua faatatau ai nei taʻiala i le lomiga o le 2013 lea ua toe teuteuina o le Faaliliuga a le Lalolagi Fou i le gagana Peretania ma isi gagana.

3, 4. (a) O fea e maua ai le Tetakalamatone? (e) O le ā ua faia e le tele o faaliliuga o le Tusi Paia i le suafa o le Atua?

³ Ua tusia le suafa o le Atua i mataʻitusi e fā i le gagana Eperu e taʻua o le Tetakalamatone. Ua maua le Tetakalamatone i le tele o manusikulipi tuai i le gagana Eperu, e pei o le Tusi Tāʻai o le Sami Mate. E maua foʻi i nisi o kopi o le Septuagint i le gagana Eleni. Na faia nei kopi i le 200 tausaga a o leʻi oo mai le Keriso, ma le 100 tausaga ina ua mavae atu Keriso. Ua maofa le toʻatele ina ua latou maua le suafa o le Atua i manusikulipi tuai.

⁴ E manino mai, e tatau ona iai le suafa o le Atua i le Tusi Paia. E ui i lea, ua aveesea e le tele o faaliliuga le suafa o le Atua. O se faaaʻoaʻoga, ina ua faatoʻā mavae le lua tausaga talu ona tatala le Tusi Paia o le Lalolagi Fou o Tusitusiga Eleni i le gagana Peretania, ae tatala loa le toe teuteuga o le American Standard Version. I la latou lomiga o le 1901 na faaaogā ai le suafa o le Atua. Peitaʻi, o le faaliliuga i le 1952 e leʻi faaaogāina ai. Aiseā? Na manatu na tagata faaliliu e “matuā lē talafeagai” ona faaaogāina le suafa o le Atua. O le mea foʻi lenā ua faia e le tele o faaliliuga i le gagana Peretania ma isi gagana.

5. Aiseā e tāua ai le faatumauina o le suafa o le Atua i le Tusi Paia?

⁵ Aiseā e tāua ai le tusia po o le aveesea o le suafa o le Atua? E iloa e se tagata faaliliu tomai le faanaunauga o le tusitala, ma e aafia ai le tele o filifiliga i le faaliliuga. E tele fuaiupu o le Tusi Paia ua faailoa mai ai le tāua o le suafa o le Atua, faapea le faapaiaina o lea suafa. (Eso. 3:15; Sala. 83:18; 148:13; Isa. 42:8; 43:10; Ioa. 17:6, 26; Galu. 15:14) Sa faagaeeina e Ieova ē na tusiaina le Tusi Paia ina ia faaaogā lona suafa mo le faitau afe taimi i manusikulipi anamua. (Faitau le Esekielu 38:23.) O lea, o le aveesea e tagata faaliliu o le suafa o le Atua, o se lē faaaloalo lea i le tusitala o le Tusi Paia.

6. Aiseā ua faaopoopo ai e le toe teuteuga o le Faaliliuga a le Lalolagi Fou le suafa o le Atua i isi mau e ono?

⁶ Ua anoanoaʻi faamaoniga o le tatau ona iai o le suafa o le Atua i le Tusi Paia. O le toe teuteuga o le Faaliliuga a le Lalolagi Fou i le gagana Peretania i le 2013 ua faaaogāina ai le suafa o le Atua mo le 7,216 taimi, lea e 6 taimi e sili atu ai nai lo o le lomiga o le 1984. O mau nei e lima ua toe faaopoopo i ai le suafa o le Atua, o le 1 Samuelu 2:25; 6:3; 10:26; 23:14, 16. Ua toe tuu le suafa o le Atua i nei mau, ona o loo maua i nei mau e lima i le Tusi Tāʻai o le Sami Mate, lea e silia i le 1,000 tausaga talu ona iai nai lo o faaliliuga faa-Eperu a le ʻau Masoreta. O le isi mau ua faaopoopo i ai le suafa o le Atua o le Faamasino 19:18, ona o nisi suʻesuʻega faaopoopo i manusikulipi anamua.

7, 8. O le ā le uiga o le suafa o Ieova?

 ⁷ E matuā tāua le suafa o Ieova i Kerisiano moni. O le faaopoopoga o le toe teuteuga o le 2013 o le Faaliliuga a le Lalolagi Fou i le gagana Peretania, ua aumaia ai nisi faamatalaga fou i lenei tulaga. E malamalama le Komiti o le Tusi Paia o le Lalolagi Fou, o lenā suafa e faasino atu i le veape Eperu ha·wahʹ, o lona uiga “E Gaoioi o Ia e Tusa ai ma Tulaga Manaʻomia.” * I a tatou lomiga i le taimi ua mavae, sa faafesootaʻi atu lenā faamatalaga i le Esoto 3:14 lea e faapea mai: “E Avea Aʻu ma Lē Ou te Loto i Ai.” O lea, na faailoa mai ai i le lomiga o le 1984, o le uiga o le suafa o le Atua “E gaoioi o ia lava e avea ma Lē e faataunuuina ana folafolaga.” * Peitaʻi ua taʻua i le Faaopoopoga A4 o le toe teuteuga o le 2013: “O le suafa o Ieova e aofia ai lenā manatu, ae e lē na o le tau ina avea o ia ma lē e loto i ai. E aofia ai foʻi lona faapogaia o se mea e tupu e fesootaʻi i ana foafoaga, ma le faataunuuina o lona finagalo.”

⁸ Ua faapogaia e Ieova ana foafoaga e avea ma so o se tulaga ua ia finagalo i ai. O se faaaʻoaʻoga, na faapogaia e Ieova Noa e fausia le vaa, avea Pesaleli o se tufuga poto, avea Kitiona ma toa malosi, faapea le avea o Paulo ma aposetolo i nuu ese. E tāua tele le suafa o le Atua i ona tagata. O lea ua matuā faatāua ai e le Komiti o le Tusi Paia o le Lalolagi Fou le suafa o le Atua e ala i le lē aveesea mai i le Tusi Paia.

9. O le ā se tasi o māfuaaga autū ua faaliliuina ai se Tusi Paia i le tele o gagana?

⁹ Ua faamamaluina le suafa o le Atua i le silia i le 130 gagana o le Faaliliuga a le Lalolagi Fou, e ala i le faatumauina o le suafa o le Atua e pei ona iai i tusitusiga paia. (Faitau le Malaki 3:16.) I sona faaeseesega, o le tele o faaliliuga o le Tusi Paia ua aveesea ai le suafa paia o le Atua, ae sui i le taʻu “Alii” po o se igoa o se isi atua. O se tasi lea o māfuaaga autū, ua matuā faamautinoa ai e le Vaega Pule a Molimau a Ieova ua maua e le toʻatele o tagata se Tusi Paia e faamamaluina ai le suafa o le Atua.

10, 11. O ā nisi faafitauli na tulaʻi mai ina ua amata le Faaliliuga a le Lalolagi Fou i isi gagana?

¹⁰ O le faaliliuina o tusitusiga paia i le tele o gagana ua tulaʻi mai ai le tele o faafitauli. O se faaaʻoaʻoga i le taimi ua teʻa, sa mulimuli le Faaliliuga a le Lalolagi Fou faa-Peretania i isi faaliliuga faa-Peretania i le faaaogāina o le upu Eperu o le “Seoli,” i mau e pei o le Failauga 9:10. Sa feagai tagata faaliliu ma le faafitauli lenei: Ua masani le toʻatele o le ʻaufaitau i le upu “Seoli” ma e latou te manatu o se nofoaga lea e faapuapuagatia ai tagata i le afi. O le māfuaaga lea, ua faataga ai le ʻaufaaliliu e faaaogā le upu “Tuugamau” e faaliliu ai le upu Eperu “Seoli” ma le upu Eleni “Heitisi.”

¹¹ O le upu Eperu neʹphesh ma le upu Eleni psy·kheʹ e faigatā ona faaliliu i nisi gagana. Aiseā? Talu ai pe a faaliliu nei upu i isi gagana, e masani ona faasino atu i se agaga po o se vaega o le tagata e ola pea pe a oti. O lea, ina ia ʻalofia lenā faafitauli, ua faataga ai le ʻaufaaliliu e faaliliu le upu  neʹphesh ma le psy·kheʹ e tusa ai ma le siʻomaga o se fuaiupu. O nei faamatalaga o loo maua i le Faaopoopoga i le itulau e 208 o le tusi O ā Aʻoaʻoga Moni a le Tusi Paia? O loo maua i faaopoopoga i lalo o mau o le Tusi Paia ni faamatalaga e faatatau i upu Eperu ma upu Eleni, ina ia faigofie ai ona faitau ma malamalama i le Tusi Paia.

12. O ā nisi suiga ua faia i le toe teuteuga i le lomiga o le 2013? (Tagaʻi i le mataupu “Le Toe Teuteuga i le 2013 o le Faaliliuga a le Lalolagi Fou” o loo i lenei lomiga.)

¹² Na tulaʻi mai pea fesili mai i le ʻaufaaliliu ma iloa ai e iai nisi vaega o le Tusi Paia o loo iai ni faafitauli. O lea iā Setema 2007, na faamaonia ai e le Vaega Pule le toe teuteuina o le Tusi Paia faa-Peretania. Na iloilo e le komiti le faitau afe o fesili mai le ʻaufaaliliu o le Tusi Paia a o faia lea teuteuga. Ua suia faaupuga tuai i le gagana Peretania, lea ua sili ai ona faigofie ona faitau ma malamalama ai, ae o loo tumau pea le saʻo aʻiaʻi. O faaliliuga ua uma ona fai i isi gagana, ua faaleleia atili ai le Tusi Paia faa-Peretania.—Faata. 27:17.

13. O ā faalogona o le toʻatele e faatatau i le toe teuteuga o le 2013?

¹³ O ā faalogona o le toʻatele e faatatau i le lomiga ua toe teuteuina o le Faaliliuga a le Lalolagi Fou i le gagana Peretania? E faitau afe tusi na lafo mai e uso ma tuafāfine i le ofisa ulu o Molimau a Ieova e faailoa mai ai lo latou lotofaafetai. Na tusi mai se tasi o tuafafine: “O le Tusi Paia e tai pei o se pusa o loo faatumulia i ʻoa tautele. O le manino o le faitau i afioga a Ieova i le toe teuteuga o le 2013, e faatusaina i le iloiloina o ʻoa taʻitasi, faapea o latou lanu ma le matagofie. Ua faaliliuina le Tusi Paia i se gagana faigofie ua fesoasoani iā te aʻu e iloa lelei ai Ieova, lea e pei o se tamā o loo ia opoina aʻu ma faitau mai nei upu matagofie.”

14, 15. O ā faalogona o tagata e faatatau i le Faaliliuga a le Lalolagi Fou i isi gagana?

¹⁴ Ua faaalia foʻi e i latou e tautatala i isi gagana le lotofaafetai mo le Faaliliuga a le Lalolagi Fou. Ua faapea mai se tamāloa mai i Sofia i Bulgaria, e faatatau i le faaliliuga i le gagana Bulgaria: “Sa ou faitau i le Tusi  Paia i le tele o tausaga, ae ou te leʻi faitau i se faaliliuga e faigofie ona ou malamalama ma pāʻia ai loʻu loto.” Ua faapea mai foʻi se tuafafine mai i Alapania: “E ese le matagofie o le Afioga a le Atua i le gagana Alapania. Maʻeu se faaeaga o le talanoa mai o Ieova iā i matou i la matou lava gagana!”

¹⁵ O le tele o atunuu e taugatā ma faigatā ona maua se Tusi Paia. O lea, o se faamanuiaga le mauaina o se Tusi Paia. Ua faapea mai se lipoti mai i Rwanda: “Ua umi se taimi e lē agaʻigaʻi i luma le toʻatele o tagata e suʻesuʻe ma uso, ona e leai ni a latou Tusi Paia. E latou te lē gafatia le faatauina o Tusi Paia a lotu. E masani foʻi ona latou lē malamalama lelei i le uiga o mau, ua faigatā ai ona latou agaʻigaʻi i luma.” Na suia le tulaga o mea ina ua maua le Faaliliuga a le Lalolagi Fou i lenā gagana. Ua faapea mai se aiga i Rwanda e iai ni talavou se toʻafā: “E matou te faafetai iā Ieova ma le pologa faamaoni ma le faautauta mo lenei Tusi Paia. E matou te matuā matitiva ma e leai se tupe e faatau ai Tusi Paia a sui taʻitasi o le aiga. Ae o lea ua tofu a le tagata ma lana Tusi Paia. E faaalia lo matou lotofaafetai iā Ieova, e ala i le faitau faatasi o se aiga le Tusi Paia i aso taʻitasi.”

16, 17. (a) O le ā le finagalo o Ieova mo ona tagata? (e) O le ā ua tatou maumauaʻi e fai?

¹⁶ O le a maua le toe teuteuga o le Faaliliuga a le Lalolagi Fou i isi gagana i le lumanaʻi. O loo taumafai Satani e taofia lenei galuega, ae ua tatou iloa e finagalo Ieova ina ia faalogo ona tagata a o ia fetalai mai iā i latou i se gagana manino ma faigofie. (Faitau le Isaia 30:21.) Ua lata mai le taimi “o le a tumu le lalolagi i le poto e uiga iā Ieova e pei ona ufitia o le ilititai i le suāsami.”—Isa. 11:9.

¹⁷ Seʻi o tatou maumauaʻi e faaaogā meaalofa lelei uma mai iā Ieova, e aofia ai lenei faaliliuga ua faamamaluina ai lona suafa. Ia tatou faatagaina Ieova e talanoa mai iā i tatou i aso taʻitasi e ala mai i lana Afioga. O loo faaauau ona ia faalogologo lelei mai i a tatou tatalo uma. O lenei fesootaʻiga o le a fesoasoani iā i tatou e iloa lelei ai Ieova ma faatuputeleina lo tatou alofa mo ia.—Ioa. 17:3.