Mo le ʻAufaitau

E MATOU te fiafia e faailoa atu iā te outou e faapea, e amata atu i lenei lomiga, o le a iai ni suiga i Le Olomatamata. Ae seʻi faailoa muamua atu mea e lē suia.

O loo tumau pea le igoa o lenei mekasini, o Le Olomatamata Faasilasilaina le Malo o Ieova. O lona uiga, o le a faaauau pea ona viiaina e Le Olomatamata Ieova o le Atua moni, ma faamāfanafanaina tagata i le tala lelei o lona Malo. O loo iloiloina i le mataupu o loo i le itulau e 5 e oo i le itulau e 9, po o le ā le uiga o lenā Malo, ma po o afea foʻi o le a oo mai ai. E lē gata i lea, o le a faaauau pea ona atiaʻe e Le Olomatamata le faatuatua o le ʻaufaitau iā Iesu, lagolagoina upu moni o le Tusi Paia, ma faamatalaina le uiga o mea o loo tutupu i le lalolagi e tusa ai ma valoaga o le Tusi Paia, e pei ona faia e lenei mekasini mo le tele o tausaga.

Ae o ā la suiga o le a iai? Seʻi faamatala atu nisi o suiga fou matagofie o le a iai i le lomiga o loo tusia ai le aso 1 o masina taʻitasi. *

O le a lomia mataupu eseese i masina taʻitasi, ina ia faalaeiauina ai tagata e mafaufau loloto. I le mataupu “Pe na E Iloa?,” o le a aumaia ai faamatalaga auʻiliʻili e faaalia ai uiga o tala o loo i le Tusi Paia. O le a faamatilatila i le mataupu “Ia Mafuta Atu i le Atua,” le lesona tatou te aʻoaʻoina mai ni mataupu o le Tusi Paia e faatatau iā Ieova. O le a iloiloina i le mataupu “Ua Fesili Mai le ʻAufaitau,” tali o fesili masani mai le Tusi Paia. O se faaaʻoaʻoga, e toʻatele tagata ua tomānatu e faapea, “Po o i Lou Loto le Malo o le Atua?” O le a maua le tali i le itulau e 13.

Ua fuafuaina le tele o mataupu masani ina ia aogā mo aiga. I le mataupu “O Auala e Maua ai le Fiafia i le Aiga,” lea e faafā ona maua i le tausaga, o le a faailoa mai ai le tulaga moni o faafitauli i aiga ma le auala e fesoasoani ai le Tusi Paia e foʻia na faafitauli. O le a auauaʻi atu i masina taʻitasi ia mataupu nei, “Ia Aʻoaʻo Lau Fanau,” lea e ao ona faitau e mātua ma a latou fanau, ma le mataupu “Mo le ʻAutalavou,” lea e iai se mataupu o suʻesuʻega faale-Tusi Paia mo talavou.

O le a iai foʻi ni mataupu faaopoopo e faafā ona maua i le tausaga. O le a faalaeiauina i tatou e le mataupu “Ia Faaaʻoaʻo i lo Latou Faatuatua,” ina ia mulimuli i faaaʻoaʻoga a tagata o loo taʻua i le Tusi Paia. A e tagaʻi i le itulau e 18 e oo i le itulau e 21 o lenei mekasini, o le a e faitau ai i le tala e faalaeiau ai e uiga i le perofeta o Elia, ma le auala e tatou te faaaʻoaʻo ai i lona faatuatua. I le mataupu “O se Tusi Mai . . . ” o le a faamatala ai tala mai i misionare po o isi, o loo i vaega eseese o le lalolagi. O le a faamatalaina e le mataupu “Le Mea e Tatou te Aʻoaʻoina Mai iā Iesu,” ia aʻoaʻoga faavae o le Tusi Paia i se auala faigofie.

E matou te mautinoa o le a faaauau pea ona fiafia i latou mai vaipanoa eseese e faitau i Le Olomatamata, o ē naunau ma fia iloa aʻoaʻoga a le Tusi Paia. E matou te faamoemoe o le a fesoasoani lenei lomiga, e faamalieina lou galala mo upu moni o le Tusi Paia.

O Ē LOMIA

[Faaopoopoga i lalo]