Pe Ōgatusa le Evolusione ma le Tusi Paia?

PE FAAMATA na faaaogā e le Atua le evolusione e faia ai tagata mai manu? Pe na ia faatonuina ni meaola ninii e tuputupu aʻe ma avea ma iʻa ma faaauau ai ona maua mai ai manu e tuufua, ma manu o le vao, ona iʻu lea ina maua tagata mai manukī? O nisi saienitisi ma taʻitaʻi lotu e talitonu uma i le evolusione ma le Tusi Paia. Ua latou faapea mai o le tusi o Kenese i le Tusi Paia o se talafaatusa. Atonu o loo e taumānatu, ‘Pe talafeagai ma le Tusi Paia le tala e faapea na tupuga mai tagata i meaola?’

O le malamalama i le mea na tatou tupuga mai ai, e matuā tāua lea i lo tatou iloa po o ai i tatou, o fea o le a tatou ō i ai, ma o le ā le auala e ao ona tatou ola ai. Seʻi vaganā ua tatou iloa le mea na tatou tupuga mai ai, ona faatoʻā tatou malamalama lea i le māfuaaga ua lē aveesea ai e le Atua mafatiaga, faapea ana fuafuaga mo tagata i le lumanaʻi. E lē mafai ona iai sa tatou faiā lelei ma le Atua pe a tatou lē mautinoa, o ia Lē na foafoaina mea uma. Seʻi o tatou iloiloina le faamatalaga a le Tusi Paia e faatatau i le mea na tupuga mai ai tagata, o lona tulaga i le taimi nei, ma lona lumanaʻi. Ona tatou malamalama ai lea pe tutusa le evolusione ma le Tusi Paia.

A o Tasi le Tagata

Ua faapea mai i latou e lagolagoina le evolusione, na oo ina tupuga mai tagata mai meaola, ma e teena ai le manatu e toʻatasi le tagata na iai. Peitaʻi, e ese le manatu o loo i le Tusi Paia. O loo faapea mai na tatou tupuga mai i le tagata e toʻatasi, o Atamu. O loo taʻua i le Tusi Paia Atamu o se tagata moni na soifua. O loo taʻua mai ai igoa o lana avā ma nisi o lana fanau. O loo faamatala auʻiliʻili mai ai ana mea na fai, o ana faamatalaga, le taimi na ola ai, ma le taimi na oti ai. E leʻi manatu Iesu ua na o tagata e lē lava aʻoaʻoga e fetaui i ai lenei tala. Na ia fetalai atu i taʻitaʻi lotu popoto e faapea: “Tou te leʻi faitau ea o lē na faia i laʻua i le amataga, na ia faia i laʻua o le tane ma le fafine?” (Mataio 19:3-5) Na toe taʻua ai e Iesu upu e faatatau iā Atamu ma Eva, lea o loo tusia i le Kenese 2:24.

O Luka o se tusitala o le Tusi Paia ma talafaasolopito, ma na ia faailoa mai, o Atamu o se tagata moni lava e pei o Iesu. Sa suʻe e Luka le gafa o Iesu lea e tau atu iā Atamu. (Luka 3:23-38) E lē gata i lea, ina ua lauga atu le aposetolo o Paulo i le aofia, lea na iai ma le ʻaufaifilosofia o ē na aʻoaʻoina i aʻoga Eleni taʻutaʻua, na ia faapea atu: “O le Atua na faia le lalolagi ma mea uma lava o i ai . . . na ia faia foʻi nuu uma mai le tagata e toʻatasi, ina ia nonofo i le fogāeleele uma o le lalolagi.” (Galuega 17:24-26) E manino mai, ua aʻoaʻo e le Tusi Paia, na tatou tupuga mai i le “tagata e toʻatasi.” Pe fetaui faamatalaga a le Tusi Paia e tusa ai o le amataga o tagata ma le evolusione?

 Lē Lelei Atoatoa le Tagata

O loo faapea mai le Tusi Paia, na lelei atoatoa le uluaʻi tagata na faia e Ieova. E lē mafai e le Atua ona faia se mea e lē lelei atoatoa pe faalētonu foʻi. Na faapea mai le tala o le foafoaga: “Ona faia lea e le Atua o le tagata i lona faatusa . . . Ua silasila atu le Atua i mea uma ua na faia, faauta foʻi, ua matuā lelei lava.” (Kenese 1:27, 31) E faapeʻī le tagata e lelei atoatoa?

O le tagata e lelei atoatoa, e iai le saʻolotoga ma e mafai ona ia faaata atu uiga o le Atua i se auala lelei atoatoa. O loo faapea mai le Tusi Paia: “Na faia e le Atua le tagata e amiotonu, a o i latou ua saʻiliʻili i latou i togafiti e tele.” (Failauga 7:29) Na filifili Atamu e fouvale i le Atua. Ona o le fouvale o Atamu, na lē toe lelei atoatoa ai o ia ma tuufaasolo mai ai i ana fanau. Ona ua lē lelei atoatoa le tagata, o lea ua tatou malamalama ai i le māfuaaga e fai ma tatou lē fiafia ai, e ui e mananaʻo e fai le mea saʻo. Na faapea mai Paulo: “Auā o le mea ou te loto i ai, o le mea lea ou te lē faia, a o le mea ou te ʻinoʻino i ai, o lea ou te faia.”—Roma 7:15.

E tusa ai ma le Tusi Paia, o le tagata lelei atoatoa, e ola e faavavau ma lelei atoatoa lona soifua mālōlōina. E atagia mai i le fetalaiga a le Atua iā Atamu, ana usiusitai le uluaʻi tagata i le Atua, semanū e lē oo le oti iā te ia. (Kenese 2:16, 17; 3:22, 23) Ana faapea e silafia e Ieova le oo ane i le tagata se faanaunauga e fouvale ma faapea o le a mamaʻi, semanū na te lē faailoa mai ua “lelei” le tulaga o ana foafoaga. Ua tatou malamalama ai, e ui e ofoofogia le auala na faia ai le tagata, ae e ono lē atoatoa lona malosi pe maua foʻi i maʻi, ona ua le lē lelei atoatoa. O lea la, e lē talafeagai le evolusione ma le Tusi Paia. O loo faapea mai le evolusione o loo faasolosolo ina lelei le tulaga o le tagata, ae o loo faapea mai le Tusi Paia o loo faasolosolo ina leaga atili tulaga ma tino o tagata, o ē na tupuga mai i se tagata e lelei atoatoa.

E lē talafeagai foʻi le manatu e faapea na faatonutonuina e le Atua le evolusione e faia ai tagata ma le manatu o loo i le Tusi Paia e faatatau i uiga o le Atua. Ana fai e faatonutonuina e le Atua le evolusione, o lona uiga la, o ia na taʻitaʻia tagata i lo latou tulaga faalētonu ma lē fiafia. Peitaʻi o loo faapea mai le Tusi Paia e faatatau i le Atua: “O le Papa, e sao lava lana galuega; auā e tonu ona ala uma lava; o le Atua faamaoni, e lē o iā te ia se amiolētonu, o le amiotonu ma le amio saʻo lava ia. Ua leaga i latou, e lē o lana fanau, a o lo latou ila.” (Teuteronome 32:4, 5) O lea la, o puapuaga o loo fesagaʻi ma tagata, e lē mai le faatonuina e le Atua o le evolusione e faia ai le tagata. Ae o le iʻuga lea o le fouvale o le tagata e toʻatasi i le Atua, lea ua ia melea ai lona lelei atoatoa faapea foʻi ma le lelei atoatoa o lana fanau. O lea ua uma ona tatou iloiloina Atamu, ae seʻi o tatou iloiloina nei Iesu. Pe fetaui faamatalaga a le evolusione ma le Tusi Paia e faatatau iā Iesu?

 Pe Mafai Ona E Talitonu i le Evolusione, Faapea ma le Faa-Kerisiano?

“Na maliu Keriso mo a tatou agasala.” E pei ona e silafia, o se tasi na o aʻoaʻoga faavae a Kerisiano. (1 Korinito 15:3; 1 Peteru 3:18) Ina ia iloa pe aiseā e lē talafeagai ai lenā faamatalaga ma le evolusione, e ao ona tatou malamalama muamua i le māfuaaga ua faapea mai ai le Tusi Paia o tatou o tagata agasala, ma aafiaga o le agasala iā i tatou.

Ua tatou agasala uma auā e lē mafai ona tatou faataʻitaʻi atoatoa i uiga mataʻina o le Atua, e pei o le alofa ma le faamasinotonu. O lea la, ua faapea mai le Tusi Paia: “Ua agasala tagata uma lava, ma ua lē ausia le mamalu o le Atua.” (Roma 3:23) O loo aʻoaʻo e le Tusi Paia ua māfua ona maliliu tagata ona o le agasala. Ua faapea mai le 1 Korinito 15:56, “O le tui e iʻu i le oti o le agasala lea.” O le māfuaaga autū o maʻi, o le agasala tuufaasolo. Na faailoa atu e Iesu e iai se sootaga i maʻi ma lo tatou tulaga agasala. Na ia fetalai atu i se pipili, “Ua faamagaloina au agasala,” ona mālōlō ai lea o le tamāloa.—Mataio 9:2-7.

O ā aogā o le maliu o Iesu mo i tatou? Ua faatusa e le Tusi Paia Atamu iā Iesu: “E pei ona oti uma lava iā Atamu, e faapena foʻi ona toe faaolaina uma lava e ala i le Keriso.” (1 Korinito 15:22) Na totogi e Iesu a tatou agasala lea na tuufaasolo mai iā Atamu e ala i le faataulagaina o lona ola. O lea la, o i latou e faatuatua iā Iesu ma gauaʻi iā te ia, o le a latou maua le mea na melea e Atamu, le faamoemoe o le ola e faavavau.—Ioane 3:16; Roma 6:23.

Po o e manino la i le lē talafeagai o le faatusatusa o le evolusione i le Faa-Kerisiano? Afai tatou te lē talitonu ua tatou “oti uma lava iā Atamu,” e faapefea la ona tatou faamoemoe e “faaolaina uma lava e ala i le Keriso”?

Aiseā e Tosina ai Tagata i le Evolusione

O loo faailoa mai e le Tusi Paia le māfuaaga ua taatele ai aʻoaʻoga e pei o le evolusione. Ua faapea mai: “Auā e iai le taimi e latou te lē toe taliaina ai aʻoaʻoga aogā, ae e tusa ai ma o latou lava tuʻinanauga, e latou te aoaoina aʻoaʻo mo i latou ina ia faalogo o latou taliga i mea e logolelei iā i latou lava; e liliu ese foʻi o latou taliga mai le upu moni, ae e liliu atu i tala sesē.” (2 Timoteo 4:3, 4) E ui e tele vala faasaienisi o le evolusione, ae e faavaeina ana aʻoaʻoga i faiga a lotu. Ona e pei e iai se fiafia o nei tagata i le Atua pe a lē sui i le upu lea e aʻoaʻoina e le evolusione se vaaiga ese i le olaga ma se uiga e ese mai i le Atua. E faigofie ona tosina tagata i nei talitonuga, o faanaunauga manatu faapito ma le fiatutoʻatasi. O le toʻatele e talitonu i le evolusione, e faapea mai foʻi e talitonu i le Atua. Peitaʻi, latou te talitonu e leʻi faia e le Atua mea, e na te lē faalavelave i olaga o tagata, ma na te lē faamasinoina tagata. O se talitonuga e manaia i le faalogo a tagata.

O i latou e aʻoaʻoina le evolusione, e masani ona uunaʻia, e lē i faamatalaga maufaatuatuaina ae e “tusa ai ma o latou lava tuʻinanauga,” atonu ina ia fiafia ai iā i latou tagata faasaienisi lea e faavaeina a latou aʻoaʻoga i le evolusione. O Michael Behe, o se polofesa o lē na faaaluina le tele o tausaga o lona olaga e suʻesuʻeina ai sela o tagata, ma na ia faapea mai e lē faavaea manatu o i latou o loo aʻoaʻoina le evolusione. Pe mafai ona amata le evolusione mai ni vaega aupito i ninii o sela? Na tusi o ia e faapea: “E lē faavaeina mai i le faasaienisi le evolusione e faatatau i sela. E leai se lomiga po o se tusi faasaienisi o faamatala mai ai le evolusione e faatatau i sela i so o se taimi, pe faapea na tupu po o le a tutupu foʻi. . . . E faatigā taliga aʻoaʻoga a Darwin i le evolusione o sela auā e lē moni.”

Afai e lē lava faamaoniga e lagolago ai le evolusione, aiseā la ua soona faailoa atu ai manatu o nei tagata? Na faapea mai Behe: “O le toʻatele o tagata, e aofia ai ē faaaloalogia ma saienitisi lauiloa, e lē mananaʻo e talitonu e iai se tasi na faia mea uma.”

Ua tosina atu i aʻoaʻoga a le evolusione le toʻatele o faifeʻau, o ē e faafoliga i le vaaiga a tagata e peiseaʻī e atamamai. Ua pei i latou o tagata  ia na faamatala e le aposetolo o Paulo i lana tusi i Kerisiano i Roma. Na tusi Paulo e faapea: “Auā o mea e mafai ona latou iloa e uiga i le Atua, ua faailoa atu e le Atua iā i latou . . . O ona uiga lē vaaia, ua vaaia lava ia talu ona faia le lalolagi, ona ua mafai ona vaaia i mea na faia, e oo foʻi i lona mana e faavavau ma lona tulaga o le Atua, o lea ua lē mautali ai i latou. E ui lava ina latou iloa le Atua, ae latou te leʻi faamamaluina o ia pe faafetaia foʻi o ia, ua faavaleaina o latou mafaufau ma ua faapouliuligia o latou lotomaaa. Ua vālea i latou e ui ina manatu ua popoto i latou.” (Roma 1:19-22) E faapefea ona e ʻalofia le faasesēina o oe e aʻoaʻo pepelo?

Faatuatua i le Atua e Faavae i Mea Moni?

E faamamafa e le Tusi Paia le tāua o faamaoniga pe a faamatala le faatuatua. O loo faapea mai: “O le faatuatua, o le faatalitali lea ma le mautinoa i mea ua faamoemoe i ai, o le faamaoniga manino lea o mea moni e ui ina e lē o vaaia.” (Eperu 11:1) E ao ona faavae le faatuatua moni i le Atua i faamaoniga lea e faaalia ai le iai o lē na Foafoaina mea. Ua faailoa mai e le Tusi Paia le mea e te maua mai ai faamaoniga.

Na faagaeeina Tavita o se tusitala o le Tusi Paia e tusi e faapea: “Ou te vivii atu iā te oe, auā na faia aʻu e ala ai ona mataʻutia ma ofo tele ai.” (Salamo 139:14) E tatou te maofa i le atamai o Lē na faia i tatou, pe a faaalu se taimi e manatunatu ai i le ofoofogia o le auala na faia ai o tatou tino ma isi meaola. Na fuafuaina uma le faagaoioiga o le faitau afe o vaega eseese o o tatou tino. E lē gata i lea, o le maopoopo ma le saʻo o le faagasologa o le vateatea. Na faapea mai ai Tavita: “Ua tala mai e le lagi le mamalu o le Atua; ua faaalia foʻi e le va nimonimo le galuega a ona aao.”—Salamo 19:1.

E anoanoaʻi faamaoniga mai le Tusi Paia e faatatau i Lē na faia mea uma. Pe a faaalu se taimi e suʻesuʻe ai le maufaatuatuaina o tusi e 66 o loo iai, le uiga ese o tapulaa tau amio o loo iai, ma le faataunuuina o valoaga, o le a aumaia ai iā te oe le anoanoaʻi o faamaoniga e faapea, o lona tusitala o ia Lē na faia mea uma. O le malamalama i aʻoaʻoga a le Tusi Paia, o le a atili ai ona e mautinoa i le Tusi Paia, o le Afioga a Lē na faia mea uma. O se faaaʻoaʻoga, pe a e malamalama i aʻoaʻoga a le Tusi Paia i le pogai o puapuaga, le Malo o le Atua, le lumanaʻi o tagata, ma le auala e maua ai le olioli, o le a e molimauina le atamai o le Atua. E ono tutusa lua faalogona ma Paulo ina ua ia tusi mai e faapea: “Maʻeu le tele o le tamaoaiga, ma le poto atoa ma le silafaga a le Atua! E lē masuʻesuʻeina ana faamasinoga, ma e lē mafai foʻi ona iloa ona ala!”—Roma 11:33.

A o e iloiloina faamaoniga ma tuputupu aʻe lou faatuatua, o le a e mautinoa e faapea, a o e faitauina le Tusi Paia, e tusa ua e faalogologo atu i Lē na Foafoaina mea. Ua fetalai mai o ia: “O aʻu lava, na ou faia le lalolagi, ma aʻu faia tagata o i ai; o aʻu, o oʻu lava lima na fofola ai le lagi, ma aʻu pule i ʻau uma o i ai.” (Isaia 45:12) E mautinoa lava o le a e lē salamō i lau filifiliga o le faamautinoa iā te oe, o Ieova o ia Lē na faia mea uma lava.

[Faamatalaga faaopoopo i le itulau 14]

Na faapea atu le aposetolo o Paulo i tagata popoto o Eleni: ‘Na faia foʻi e le Atua nuu uma mai le tagata e toʻatasi’

[Faamatalaga faaopoopo i le itulau 15]

Ua faaalia e le evolusione le tagata e pei o se meaola o loo agaʻigaʻi i luma. Ae o loo faaalia mai e le Tusi Paia, ua faasolosolo ina leaga le tagata lea na tupuga mai i se tagata lelei atoatoa

[Faamatalaga faaopoopo i le itulau 16]

“E lē faavaeina mai le faasaienisi le evolusione e faatatau i sela”

[Faamatalaga faaopoopo i le itulau 17]

E tatou te maofa i le ofoofogia ma le atamai o galuega a Lē na faia i tatou