Pe na E Iloa?

O anafea na asiasi atu ai ē saʻili faailoga i fetu iā Iesu?

Ua tatou iloa mai le evagelia a Mataio, na ‘ō mai ē saʻiliʻili i fetu mai sasaʻe’ e asiasi iā Iesu ma avatu i ai meaalofa. (Mataio 2:1-12) E lē iloa pe toʻafia le ʻausaʻiliʻili i fetu po o “makoi” na asiasi atu i le tamaitiiti o Iesu, ma e leai foʻi ni faamaoniga maumaututū mo le talitonuga e faapea e toʻatolu i latou na ō atu; ma e lē o iai foʻi o latou igoa i le Tusi Paia.

Na fai mai le New International Version Study Bible e faatatau i le Mataio 2:11: “E tuufaafeagai ma le manatu taatele, e leʻi asiasi atu Makoi iā Iesu i le falepovi i le pō na fanau ai, e pei ona faia e leoleo mamoe. Na latou asiasi atu i nai masina mulimuli ane ina ua avea o ia ma ‘tamaitiiti’ i lona ‘fale.’” E faamaonia lea manatu ona ua saʻilia e Herota lenei tamaitiiti ina ia fasiotia, na ia faatonuina ai le fasiotia o tama uma e i Peteleema ma ona tuaoi e fua i ē ua lua tausaga ma ē pito ane i ai. Sa ia uaʻi atu i lenā tupulaga e ala i le “fua i le taimi na taʻu mai e i latou e saʻiliʻili i fetu.”—Mataio 2:16.

Pe ana asiasi atu le ʻau Makoi iā Iesu i le pō na fanau ai ma avatu i ai auro ma isi meaalofa taugatā, semanū e lē avatu e Maria ni tamaʻi lupe e lua, i le 40 aso mulimuli ane ai, ina ua ia tuuina atu Iesu i le malumalu i Ierusalema. (Luka 2:22-24) O se faatulagaga lea i le Tulafono mo ē matitiva ma e lē gafatia le tau o le tamaʻi mamoe. (Levitiko 12:6-8) O lea la, semanū e aogā nei meaalofa taugatā i le faatupeina o le malaga a le aiga o Iesu i Aikupito.—Mataio 2:13-15.

Aiseā na tuu ai e Iesu ia mavae aso e fā ona faatoʻā taunuu ane lea i le tuugamau o Lasalo?

E foliga mai o le mea lenā na fuafuaina e Iesu. Aiseā e tatou te faapea atu ai? Tagaʻi i le tala o loo faamauina i le mataupu e 11 o le Ioane.

Ina ua maʻi tigāina Lasalo o lē sa nofo i Petania ma o ia o se uō a Iesu, na faafesootaʻi e ona tuafafine Iesu i le mea ua tupu. (Fuaiupu 1-3) O le taimi lenā pe ā ma le lua aso taunuu Iesu i Petania. (Ioane 10:40) Na oti Lasalo i le taimi na maua ai e Iesu le feʻau. O le ā le mea na faia e Iesu? Sa ‘⁠ia nofo ai pea i le mea o loo iai mo aso e lua,’ ona faatoʻā malaga atu lea mo Petania. (Fuaiupu 6, 7) O lea la, ona e lua aso na faatali ai, ma e lua foʻi aso na malaga atu ai, o lona uiga la na faatoʻā taunuu o ia i le tuugamau i le mavae o aso e fā talu ona maliu Lasalo.—Fuaiupu 17.

Peitaʻi e leʻi leva atu ona faatū e Iesu ni tagata se toʻalua, o lē tasi na faatoʻā oti lava, a o le isi na toe faatū i se taimi mulimuli ane o le aso lava lea na oti ai. (Luka 7:11-17; 8:49-55) Pe faamata e na te mafaia ona faatūina se tagata ua fā aso talu ona oti ma ua amata ona manogi? (Fuaiupu 39) Na faapea mai se tasi o lomifefiloi o le Tusi Paia, na iai se talitonuga o tagata Iutaia “e leai se faamoemoe mo se tagata ua fā aso talu ona oti; ua amata ona pala o le tino, ma ua alu ese le agaga lea e faapea na fealualuaʻi solo i luga o le tino mo aso e tolu.”

Afai na masalosalo se tasi na iai i le tuugamau, o lea o le a latou molimauina le malosi atu o le mana o Iesu nai lo le oti. A o tulaʻi Iesu i luma o le tuugamau ua tatalaina, na ia tagiauē ma faapea atu: “Lasalo e, inā sau ia i fafo. Ona sau ai lea i fafo o le tagata na oti.” (Fuaiupu 43, 44) O le toetū, o le faamoemoe moni lea mo ē ua maliliu, ae lē o le talitonuga e faapea e ola pea le agaga pe a oti se tasi.—Esekielu 18:4; Ioane 11:25.