Se Talosaga ua Faia i le Lalolagi Atoa

SEʻI mafaufau foʻi i le faitau miliona ma miliona o tagata ua tutusa uma le mea o loo talosaga ai. O loo latou tatalo atu i le pule silisili ese i le aoao o mea, e tali mai i se talosaga faapitoa. Ae peitaʻi, e toʻaitiiti i latou e malamalama i le mea o loo latou talosaga atu ai. Ae o tupu moni lenā mea i aso nei? Ioe, loo tupu i aso uma. O le ā le mea o loo mananaʻo i ai nei tagata? Ua latou talosaga ia oo mai le Malo o le Atua!

E tusa ma le 37,000 lotu ua faapea mai o Kerisiano, ua talitonu o loo avea Iesu ma o latou Taʻitaʻi. E sili atu ma le 2 piliona le aofaʻi o tagata o loo auai i nei lotu. O le toʻatele o i latou e masani ona tatalo i le Tatalo a le Alii. Pe e te masani i lea tatalo? Sa aʻoaʻo e Iesu lenā tatalo i ona soo, ma e faapea: “Lo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.”—Mataio 6:9, 10.

Ua faitau selau nei tausaga o faia pea ma le naunau e tagata tapuaʻi nei upu i taimi o tapuaʻiga. Ua latou faatauloto foʻi ona faia lenā tatalo i le taimi o lotu a aiga, ma tatalo a le tagata lava ia, i taimi e sologa lelei ai ma taimi foʻi e lē sologa lelei ai. Ua latou tatalo i lea tatalo ma le lotoatoa, ma le faatauanau. O nisi ua na ona latou taulotoina ae leai ma se uiga o lenā tatalo iā i latou. Ae e lē na o tagata lotu e faapea mai o Kerisiano, o loo faamoemoe ma tatalo ia oo mai le Malo o le Atua.

O le Tatalo Foʻi Lenā a Isi Lotu

E iai se tatalo a tagata lotu Iutaia e fai i aso faisoo, pe fai foʻi i le taimi e maliu ai se tasi o le aiga. E masani ona faia i taimi e faavauvau ai, e ui lava e lē o taʻua ai le oti ma le mafatia. O loo faapea le tatalo: “Talosia ia faavaeina lona [Atua] malo a o e ola . . . , ia vave ona oo mai.” * O se isi tatalo na faia i sunako i aso anamua, na taʻua ai le faamoemoe o le Malo o le Mesia, o lē e mai le gafa o Tavita.

Ua fiafia nisi e lē o ni Kerisiano i le manatu  faapea e iai le Malo o le Atua. E tusa ai ma le tusi The Time of India, na faapea mai se taʻitaʻi lotu i Initia sa taʻutaʻua i le senituri lona 19, o lē sa suʻesuʻeina vala e tutusa ai lotu Hinitū, Musalimi, ma le faa-Kerisiano e faapea: “E lē mafai ona oo mai le malo o le Atua seʻiloga e autasi tapuaʻiga mai atunuu i sasaʻe ma atunuu i sisifo.” Na tusia foʻi e se pule o se aʻoga Musalimi i Strathfield i Ausetalia, i se nusipepa e faapea: “E pei ona talitonu uma i ai le ʻau Musalimi, ou te talitonu foʻi o le a toe afio mai Iesu ma faavae le Malo moni o le Atua.”

E mautinoa lava, e faitau piliona tagata o loo faamoemoe ma tatalo mo le Malo o le Atua. Ae seʻi mātau se mea mataʻina o loo tupu.

E pei ona e iloa o matou o Molimau a Ieova, o ē lomia lenei mekasini, o loo ō atu i aiga taʻitasi ina ia talanoa ma tagata i le Tusi Paia. O loo matou faia lenei galuega i le lalolagi atoa, i atunuu e 236 ma gagana e sili atu i le 400, i le taimi na tusia ai lenei mataupu. O le autū o la matou talaʻiga, o le Malo o le Atua. Seʻi mātau foʻi, o le ulutala o lenei mekasini, o Le Olomatamata Faasilasilaina le Malo o Ieova. E masani ona matou fesili i tagata po o latou tatalo mo lea Malo. O le toʻatele e faapea mai, ioe. Ae pe a fesili atu po o le ā lenā Malo, e toʻatele e fai mai, “Ou te lē iloa,” pe e lē manino ma lē mautonu foʻi la latou tali.

Aiseā e tatalo ai le toʻatele o tagata i le Malo o le Atua, ae e latou te lē iloa po o le ā lona uiga? Pe ona o le Malo o le Atua o se mataupu e faigatā ona malamalama i ai? E leai, e lē o se mataupu e faigatā ona malamalama i ai, auā o loo matuā manino le faamatalaina e le Tusi Paia o lenā Malo. E lē gata i lea, o le a e maua e ala i le feʻau mai le Tusi Paia e faatatau i le Malo, se faamoemoe moni i nei taimi o faafitauli. I le mataupu o loo sosoo mai, o le a tatou iloa ai le auala o loo faamatala ai lenā faamoemoe i le Tusi Paia. O le a tatou iloa ai foʻi po o afea o le a taliina ai le tatalo a Iesu, ina ia oo mai le Malo.

[Faaopoopoga i lalo]