Ua Fesili Mai le ʻAufaitau

Aiseā ua Lē Taofia ai e le Atua Puapuaga?

E lē o le Atua ua māfua ai puapuaga o tagata. Ua faapea mai le Tusi Paia: “E mamao ma le Atua ona ia amioleaga.” (Iopu 34:10) O lea la, o ai le pogai autū o puapuaga?

Na taʻua e Iesu Satani o le “pule o le lalolagi.” (Ioane 14:30) E moni, o Ieova o le Pule Silisili Ese Aoao. O le a lē taitai ona ia lafoaʻia lona tulaga o le Pule Silisili Ese Aoao. Peitaʻi, ua faataga e le Atua Satani e na te pulea le toʻatele o tagata mo sina taimi.—1 Ioane 5:19.

O le ā le ituaiga pule e iai Satani? Talu mai le taimi na ia uluaʻi fesootaʻi ai ma tagata, na avea ai Satani ma fasioti tagata, ma o sē e pepelo. E foliga mai ua matuā leaga aafiaga o mea ua faia e Satani i tagata. Na tuuaʻia o ia e Iesu i upu nei: “O ia o le fasioti tagata talu le amataga, e leʻi tumau lava ia i le upu moni, auā e lē o i totonu iā te ia le upu moni. Pe a tautala o ia i tala pepelo, e tautala o ia e tusa ma lona lava manatu, auā o ia o sē e pepelo ma le tamā o le pepelo.” (Ioane 8:44) Na fetalai foʻi Iesu e faapea o tagata na saʻili e fia fasioti iā te ia, o fanau a Satani, le uluaʻi fasioti tagata. Na latou faia i latou lava ma fanau a Satani e ala i le faia o mea na ia faia. Ua fetaui lenā ma le faaupuga e faapea, e soo lava le atalii i lona tamā.

O loo uunaʻia pea e Satani uiga fia fasioti tagata i loto o tagata. O se faaaʻoaʻoga, na taʻua e R. J. Rummel, o se polofesa ua litaea i le Iunivesite o Hawaii, U.S.A. e faapea, i se fua faatatau mai le 1900 i le 1987, na fasiotia e nisi faiga malo tagata e 169,198,000 a o faia taua faapolotiki, fasiotiga tagata i tagata o se ituaiga, ma le fasiotia o tagata e aunoa ma se māfuaaga. E lē o aofia ai lenā aofaʻi o tagata ua maliliu, i le faitau sefulu miliona o tagata na fasiotia i taua i lenā lava taimi.

Pe afai e lē o le Atua le pogai o puapuaga, ae aiseā la ua ia lē taofia ai? Talu ai o loo manaʻomia pea ona foʻia finauga i le pule silisili ese, o finauga i le saʻo ma le sesē, lea ua umi se taimi o manaʻomia ona foʻia. Seʻi o tatou tilofaʻia se tasi o na finauga.

I le amataga o le talafaasolopito o le tagata, na mulimuli atu ai Atamu ma Eva iā Satani. Na la teena le pule a le Atua ma filifili ai e pule iā i laʻua lava, ae o le mea moni na la lolo atu i le pule a le Tiapolo.—Kenese 3:1-6; Faaaliga 12:9.

O le faamasinotonu o Ieova na manaʻomia ai ona tuu se taimi e faamaonia ai le saʻo ma le lē saʻo o lenei finauga. O le ā le iʻuga lea ua manino mai nei? Ua na o puapuaga ua iʻu iai pulega a tagata i lalo o taaʻiga a Satani. E manino mai, a o faagasolo taimi, o le tuu e le Atua o se taimi, ua aogā i tagata. E faapefea? Ua maua ai le avanoa mo i latou ua suʻesuʻeina faamaoniga ma talitonu i ai, ina ia faaalia ai lo latou lotomalilie e pulea i latou e le Atua. Ua iai le faamoemoe e ola e faavavau i latou ua aʻoaʻoina ma ola e tusa ai ma taʻiala a le Atua.—Ioane 17:3; 1 Ioane 2:17.

E moni o loo pulea e Satani le lalolagi i le taimi nei. Peitaʻi, e mo sina taimi puupuu, auā ua toe o se aga ona faaaogā lea e Ieova o lona Alo e ‘faalēaogāina galuega a le Tiapolo.’ (1 Ioane 3:8) O le a faamālōlō e Iesu loto mafatia o tagata, ma toe faaleleia tulaga leaga i olaga o tagata e ala i le taʻitaʻiga a le Atua. O le a ia toe faatutū aʻe i luga o le lalolagi le faitau piliona o tagata, na mafatia ma maliliu a o faagasolo senituri.—Ioane 11:25.

O le toetū o Iesu o se faataʻitaʻiga lea o le manumalo o le Atua i galuega a le Tiapolo—o se faailoga lea o mea o loo i le lumanaʻi mo tagata ua filifili i le pule a le Atua. (Galuega 17:31) Ua fesoasoani le Tusi Paia ia tatou malamalama i lenā taimi i le lumanaʻi, e ala i upu faamāfanafana nei: “E faatasi foʻi le Atua ma i latou [tagata]. E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”—Faaaliga 21:3, 4.