Ia Aʻoaʻo Lau Fanau

E Leʻi Faavaivai Mareko

NA TUSIA e Mareko se tasi tusi o tusi e fā o le Tusi Paia e faatatau i le soifuaga o Iesu. O le tusi e pito i sili ona puupuu o na tusi e fā, ma e sili ona faigofie pe a faitau. O ai Mareko? Pe na masani o ia iā Iesu?— * Seʻi o tatou iloilo po o ā tofotofoga faigatā na fesagaʻi ma Mareko, ma pe aiseā na leʻi faavaivai ai o ia i le avea ma se Kerisiano.

Na muaʻi taʻua le igoa o Mareko i le Tusi Paia, ina ua uma ona loka e le tupu o Herota Akeripa le aposetolo o Peteru i le falepuipui. I se tasi pō, na faasaʻoloto ai e se agelu Peteru, ma ia alu atu loa i le fale o Maria le tinā o Mareko, o lē na nofo i Ierusalema. Na tatala Peteru mai le falepuipui i le pe tusa o le sefulu tausaga talu ona mavae le fasiotia o Iesu i le Paseka i le 33 T.A.—Galuega 12:1-5, 11-17.

Aiseā na alu ai Peteru i le fale o Maria?— Atonu na ia iloa tagata o lona aiga, ma na ia iloa o loo faapotopoto soo o Iesu i le fale o Maria. Ua leva ona avea ma soo le tausoga o Mareko, o Panapa, talu mai le Tausamiga o le Penetekoso 33 T.A. O loo taʻua i le Tusi Paia na ia saunia se meaalofa o le agalelei mo soo fou i lenā taimi. Atonu la sa iloa e Iesu Mareko ma lona tinā o Maria, ma lo la tauaiga o Panapa.—Galuega 4:36, 37; Kolose 4:10.

Na tusia e Mareko i lana Evagelia e faapea, i le pō na puʻea ai Iesu, sa iai se tauleʻaleʻa na “pulupulu lona tino i se ʻie lino.” Ina ua maua e fili Iesu, ua faapea mai Mareko, na sola le tauleʻaleʻa. Pe e te iloa o ai lenā tauleʻaleʻa?— Ioe, atonu o Mareko! Ina ua ō ese Iesu ma ona aposetolo i le leva o le pō, ona pulou loa lea o Mareko i se ʻie lino ma mulimuli atu iā i latou.—Mareko 14:51, 52.

Sa tele avanoa e faatasi ai Mareko ma auauna a le Atua, ma molimau i mea lelei na tutupu e fesootaʻi ma le finagalo o le Atua. Atonu sa iai o ia i le taimi na liligi ifo ai le agaga paia i le Penetekoso 33 T.A., ma sa vavalalata la latou mafutaga ma auauna faamaoni a le Atua, e pei o Peteru. E lē gata i lea, sa la faatasi foʻi ma lona tausoga o Panapa, o lē na fesoasoani iā Saulo e ala i le faailoa atu o ia iā Peteru i le tolu tausaga mulimuli ane, ina ua uma ona faaali atu Iesu iā Saulo i se faaaliga. I ni tausaga mulimuli ane, ona alu lea o Panapa i Taso ina ia saʻili iā Saulo.—Galuega 9:1-15, 27; 11:22-26; 12:25; Kalatia 1:18, 19.

I le 47 T.A., na filifilia ai Panapa ma Saulo e faia le galuega faamisionare. Sa la ō ma ave Mareko, peitaʻi na toe tuua i laʻua e Mareko mo se māfuaaga e lē mailoa,  ma toe foʻi atu i lona aiga i Ierusalema. Sa ita tele Saulo, o lē na iloa i lona igoa Roma o Paulo, ma sa ia manatu i lea tulaga e tusa ua lē taulau Mareko.—Galuega 13:1-3, 9, 13.

Ina ua toe foʻi mai le la malaga faamisionare, sa faamatala atu e Paulo ma Panapa iʻuga fiafia o le la galuega. (Galuega 14:24-28) I ni masina mulimuli ane, na la filifili ai e toe foʻi e asia soo fou na la talaʻi i ai. Na manaʻo Panapa e ō ma Mareko, ae e te iloa o le ā le manatu o Paulo?— Na ia manatu “e lē tatau,” ona e leʻi leva atu ona tuua i laʻua e Mareko ae toe foʻi i lona aiga. E mautinoa na matuā faanoanoa lava Mareko i le mea na sosoo ai.

Na feteenaʻi Paulo ma Panapa, ma ina ua uma se ‘feitagaʻiga ma se fefinauaʻiga,’ ona la ō eseese ai lea. Na ō Panapa ma Mareko e talaʻi i Kuperu, ae na filifilia e Paulo Sila, ma toe asiasi atu i soo fou e pei ona sa la fuafua muamua e fai. Sa tatau ona tigā Mareko ona o le faapogaia o le faafitauli i le va o Paulo ma Panapa.—Galuega 15:36-41.

E tatou te lē iloa pe aiseā na toe foʻi ai Mareko i lona aiga. Atonu na iai se māfuaaga tatau. Ae po o le ā lava le māfuaaga, na mautinoa lelei e Panapa o le a lē toe tupu lea tulaga. Ma e saʻo lava, o le tulaga lenā na iai, auā e leʻi faavaivai Mareko. Na mulimuli ane la galulue ma Peteru i le galuega faamisionare i Papelonia, e mamao ese mai lona aiga. E lē gata i lea, na momoli mai alofaaga o Peteru mai i inā, ma ia faapea mai: “Faapea foʻi ma Mareko loʻu atalii.”—1 Peteru 5:13.

 Maʻeu se faiā vavalalata faaleagaga na iai iā Peteru ma Mareko, ona sa la auauna faatasi i le Atua! E manino lenei tulaga pe a tatou faitau i le Evagelia a Mareko. O loo faaalia mai ai i inā mea na mātauina muamua e Peteru i le faiva a Iesu, ma toe taʻua ai e Mareko mea na faamatala atu e Peteru iā te ia e faatatau i mea na ia molimauina. O se faaaʻoaʻoga, ia faatusatusa faamatalaga e faatatau i se matagi malosi i le Sami o Kalilaia. O loo taʻua e Mareko nisi faamatalaga e tusa ai o le vaega o le vaa na moe ai Iesu ma le mea na aluga ai, o mea e mātauina e se tagata faifaiva e pei o Peteru. Seʻi o tatou faitau faatasi i lenei tala ma faatusatusa nei tala o le Tusi Paia o loo i le Mataio 8:24; Mareko 4:37, 38; ma le Luka 8:23.

Mulimuli ane, ina ua faafalepuipui Paulo i Roma, sa ia faamalō atu iā Mareko ona o lona lagolagosua faamaoni. (Kolose 4:10, 11) Ma ina ua toe faafalepuipui foʻi Paulo i inā, sa ia tusi atu iā Timoteo ma fai atu e ō atu ma Mareko, auā na ia faamatalaina o ia e faapea: “E aogā o ia iā te aʻu i le auaunaga.” (2 Timoteo 4:11) Ioe, sa maua e Mareko ni faaeaga faapitoa e auauna ai i le Atua, ona sa leʻi faavaivai o ia!

Fesili:

• O fea sa nofo ai Mareko, ma aiseā ua e ioe ai sa masani o ia iā Iesu?

• O ai tonu lava sa fesoasoani iā Mareko ma lagolagoina o ia?

• O le ā na ono faapogaia ai Mareko e faavaivai?

• E faapefea ona tatou iloa na mulimuli ane toe fiafia Paulo iā Mareko?

[Faaopoopoga i lalo]

[Ata i le itulau 25]

Pe e te iloa o ai lenei tauleʻaleʻa? O le ā o loo tupu iā te ia, ma aiseā?

[Ata i le itulau 26]

O ā faamanuiaga na maua e Mareko ona o le lē faavaivai?