O le ā le Amataga o le Tagata?

AISEĀ E TĀUA AI LE TALI? E toʻatele tagata ua aʻoaʻoina e faapea e leʻi faia e se tasi i tatou, o lona uiga na teʻi lava ua tatou iai i le lalolagi. Na latou faapea mai o se faasologa o mea na tutupu faafuaseʻi, o le evolusione ua māfua ai ona iai le tagata ma iai ona faalogona, le poto, ma ni mafaufauga i le uiga moni o le olaga.

Ae seʻi mātau foʻi: Pe ana fai na foafoaina i tatou e le evolusione, o le a pei la le tagata o se tasi e mātuaoti. O le a leai sē e sili ona atamai e fesili i ai tagata, o lona uiga e leai se tasi o le a fesoasoani mai e foʻia o tatou faafitauli. O le a tatou faalagolago ai la i le poto o tagata e taofia ai mala faalenatura, foʻia feteenaʻiga faapolotiki, ma fesoasoani iā i tatou e foʻia o tatou lava faafitauli.

Po o mafai e le poto o tagata ona aumaia le toʻafilemu o le mafaufau? Afai e leai, o lona uiga la, e iai se tasi e sili atu lona atamai. O lenā manatu e lē gata ina manaia i le faalogo a tagata, ae ua talafeagai foʻi.

Le Manatu o le Tusi Paia

O loo taʻua i le Tusi Paia, o tagata na faia e le Atua. E leʻi foafoaina i tatou e le tulaga lē alofa ma lē aogā o le evolusione. Ae o i tatou o le fanau a le Tamā e alofa ma atamai. Seʻi tagaʻi foʻi i faamatalaga manino nei i le Tusi Paia.

Kenese 1:27. “Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laʻua o le tane ma le fafine.”

Salamo 139:14. “Ou te vivii atu iā te oe, auā na faia aʻu e ala ai ona mataʻutia ma ofo tele ai; o mea na e faia, o mea mamana ia; ua ou matuā iloa e aʻu nei mea.”

Mataio 19:4-6. “Tou te leʻi faitau ea o lē na faia i laʻua i le amataga, na ia faia i laʻua o le tane ma le fafine, ma na ia fetalai atu, ‘O le mea lea e tuua ai e le tane lona tamā ma lona tinā, ma nonofo faatasi ma lana avā, ona avea ai  lea o i laʻua ma tino e tasi’? O lea ua lē toe toʻalua ai, ae ua avea i laʻua ma tino e tasi. O ē ua faatasia e le Atua, aua neʻi tuueseeseina e se tagata.”

Galuega 17:24, 25. “O le Atua o lē na faia le lalolagi ma mea uma ua iai, o Ia lea o le Alii o le lagi ma le lalolagi, e lē afio o ia i malumalu e faia e lima, e lē o lima foʻi o tagata e auauna ai iā te ia e peiseaʻī ua mativa o ia i se mea, auā ua ia foaʻi mai lava i tagata uma le ola, ma le mānava, ma mea uma lava.”

Faaaliga 4:11. “Ieova e, lo matou Atua, ua tatau ona e mauaina le viiga, ma le mamalu, ma le mana, auā na e faia mea uma lava, ma o lou finagalo foʻi ua iai nei mea ma ua faia ai.”

Le Auala e Aumaia ai e Manatu o le Tusi Paia le Toʻafilemu

O le tatou iloaina ua ‘maua e aiga uma i le lalolagi o latou igoa’ mai le Atua, e suia ai o tatou manatu i isi tagata. (Efeso 3:15) E mafai foʻi e lenā malamalamaga ona aafia ai le auala e manatu ai iā i tatou lava ma o tatou faafitauli. O le a aafia o tatou mafaufau i vala nei.

Pe a fesagaʻi ma filifiliga faigatā, e tatou te lē soona popole ai i manatu feteenaʻi o tagata. Ae o le a tatou faalagolago ma le mautinoa i le fautuaga a le Tusi Paia. Aiseā? Ona o “Tusitusiga Paia uma e mai le agaga o le Atua, ma e aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu, ina ia matuā agavaa ai le tagata o le Atua, e lava saunia mo galuega lelei uma.”—2 Timoteo 3:16, 17.

E moni o le faia o mea o loo fai mai ai le Tusi Paia, e aofia ai taumafaiga ma le pulea o i tatou lava. Ae o nisi taimi o fautuaga a le Tusi Paia e manaʻomia ai ona tatou gaoioi i ni auala e foliga mai e ese mai i faanaunauga o o tatou loto. (Kenese 8:21) Peitaʻi, afai e tatou te ioe na foafoaina i tatou e le Tamā alofa o i le lagi, o le mea moni e mafai ona faapea atu e na te silafia le ala saʻo e tatou te savavali ai. (Isaia 55:9) Na taʻu mai ma le mautinoa e Lana Afioga iā i tatou e faapea: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” (Faataoto 3:5, 6) Pe a tatou faatatauina lenā fautuaga, o le a aveesea le soona popole pe a tatou fesagaʻi ma tofotofoga ma ni filifiliga.

Pe a fesagaʻi ma le faailoga tagata, o le a tatou lē mafatia ona o le manatu faatauvaa o isi iā i tatou, faapea e leai so tatou tāua pe a faatusatusa atu i tagata o le isi atunuu po o nisi tū ma aganuu a tagata. Ae o le a tatou atiaʻe ai se uiga o le fiafia iā i tatou lava. Aiseā? Auā o lo tatou Tamā, o Ieova le Atua, e lē ‘faailoga tagata, ae o lē e mataʻu iā te ia i nuu uma lava, ma fai le amiotonu, e talia e ia.’—Galuega 10:34, 35.

O le a lē mafai ai foʻi ona tatou faaalia le faailoga tagata ma faasesē ai la tatou vaaiga i isi. O le a tatou iloa ai e leai se uunaʻiga e manatu fia sili ai i isi tagata, ona o le Atua na ‘faia nuu uma mai le tagata e toʻatasi, ina ia nonofo i le fogāeleele uma o le lalolagi.’—Galuega 17:26.

E mafai ona toʻafilemu le mafaufau pe a tatou iloa e iai Lē na faia i tatou, ma e manatu mai o ia iā i tatou. Ae e tele mea e tatau ona fai ina ia tumau pea lenā toʻafilemu.

[Faamatalaga faaopoopo i le itulau 4]

Pe na tupuga mai tagata i le evolusione?

[Ata i le itulau 5]

E mafai ona tatou maua le toʻafilemu i le iloaina e manatu mai Lē na faia i tatou