Manaʻomia se Laveaʻiga!

NA FAAFUASEʻI ona lofia i vai se nofoaga e eli ai le koale e lata i Pittsburgh, i Pennsylvania i le Iunaite Setete. E toʻaiva tamāloloa eli koale na poloka i se avanoa itiiti, e tusa ma le 240 futu (73 mita) le maualalo. Ae i le tolu aso mulimuli ane, na mafai ona toe ave aʻe saogalemu uma i luga. Na faapefea ona laveaʻiina i latou?

Na faaaogā faafanua o le maina ma se tamaʻi masini faatekinisi o ona pō nei, e vili ai se pu e 30 inisi (65 senitimita) lona lautele, ma tuutuu ai i lalo se pusa i le mea o loo feomaʻi faatasi ai tamāloloa. Na auauaʻi ona avaʻe i luga mai le mea na semanū e tanumia ai. Sa latou matuā fiafia lava ma faafetai ona ua laveaʻiina i latou.

Atonu o le a lē tupu i le toʻatele o i tatou se tulaga faapena, pe lamatia foʻi o tatou ola ona o se faalavelave mataʻutia. Peitaʻi, talu ai e leai se isi e sao mai maʻi, le ola matua, ma le oti, tatou te manaʻomia la se laveaʻiga. Na faapea mai Iopu, le augātamā faamaoni: “O le tagata ua fanau mai i le fafine, ua saasaa ona aso, mona ua tumu i le atuatuvale. E tupu aʻe o ia e pei o le fuga, a e salaeseina; e mavae atu foʻi o ia e pei o le ata, ma ua lē tumau.” (Iopu 14:1, 2) Ua tusa ma le 3,500 tausaga talu ona tusia na upu, ae o loo moni pea, auā o ai o i tatou o mafai ona sao mai le oti? Po o fea lava o tatou nonofo ai, ma po o le ā foʻi le vaavaaia lelei o lo tatou soifua mālōlōina, ae o loo manaʻomia pea ona laveaʻi i tatou mai mafatiaga, le ola matua, ma le oti.

O loo galulue malolosi saienitisi ma isi tagata ina ia faafualoaina le soifua o le tagata mai le mea o loo iai nei. E iai se faalapotopotoga e faapea mai o lona sini, o le “aveesea lea o le toʻatugā o le oti faafuaseʻi” ma “ia fesoasoani i ona sui ia taulau i le mauaina o le ola e lē mafai ona oti.” Peitaʻi, e lē mafai e le poto faasaienisi faatasi ai ma le manaʻo o le tagata, ona faaumiumiina le ola o le tagata nai le 70, po o le 80 tausaga lea na taʻua e Mose i le 3,500 tausaga ua tuanaʻi.—Salamo 90:10.

E tusa pe e te ioe i manatu o Iopu e uiga i le ola ma le oti pe leai, ae e mautinoa lava, a o faasolo tausaga, e sau le taimi e ‘⁠te mavae atu ai e pei o se ata,’ ma e malaga mamao ese ai mai uō, aiga, le mea na e soifua ai, ma au mea na fai, talu ai lava le oti. Na tusi Solomona, le tupu poto anamua o Isaraelu e faapea: “O ē ua ola, ua latou iloa e oti i latou; a o ē ua oti, latou te lē iloa se mea; ua leai foʻi se toe totogi iā te i latou; auā ua faagalogaloina i latou.”—Failauga 9:5.

O le tulaga faanoanoa e pei ona fai mai ai le Tusi Paia, o lea o loo pule le oti, “e pei o se tupu” sauā i tagata. Ioe, e manaʻomia ona laveaʻiina tagata mai le fili autū, o le oti. (Roma 5:14; 1 Korinito 15:26) E lē mafai e tagata ua toleni faapitoa ma a latou meafaigaluega ona latou aumaia se laveaʻiina tumau mo oe. Ae o le ituaiga laveaʻiina lenā e mafai ona fai e Ieova le Atua, o Lē na faia le tagata.

[Ē Ana le Ata i le itulau 3]

Ata na puʻeina e Gene J. Puskar-Pool/Getty Images