“Na Ia Taʻitaʻia Aʻu i Ala o le Amiotonu”

Faamatalaina e Olga Campbell

Na faapea mai loʻu uso o Emila, “O le faaaʻoaʻoga lelei o se tagata, e pei lea o se logo e leo tele. Na e tāina le logo, ae ou tali atu.” Sa ia tusi e faamalō mai mo le 60 tausaga a o oʻu iai pea i le auaunaga faataimi atoa. Seʻi oʻu faamatala atu le amataga o loʻu olaga, ma le māfuaaga ua ou auauna faataimi atoa ai mo se taimi umi.

SA OU fanau iā Ianuari 19, 1927, i se aiga mai Ukraine e fai lafu manu e lata i Wakaw, Saskatchewan, i Kanata i sisifo tutotonu. O i maʻua ma loʻu tuagane masaga o Pili, e lona ono ma le fitu mai le fanau e toʻavalu. O i matou laiti e fesoasoani i loʻu tamā, o se tagata e galue malosi, i le faatoʻaga. E laʻitiiti lo matou fale sa tausia ai i matou e lo matou tinā, e ui e matuiā aafiaga o lona gugu lea na iʻu ina maliu ai. E 37 tausaga o loʻu tinā ae oti loa; ae faatoʻā 4 na o oʻu tausaga.

E ono masina talu ona oti loʻu Tinā ae toe faaipoipo loʻu Tamā. E leʻi toe sologa lelei mea i lo matou aiga, auā ua matou nonofo faatasi ma oʻu ʻafa uso e toʻalima! Sa ou taumafai e faaali le faaaloalo i loʻu tinā fai, ae sa faigatā i loʻu tuagane matua o Ioane ona fai lenā mea.

I tausaga e amata mai le 1930, na ma auai ai ma Pili i le aʻoga tulaga lua, lea sa mafai ona ma ō ese mai ai i vevesi i le fale. A o lata ina amata le Taua Lona Lua a le Lalolagi, sa matuā malosi le agaga lotonuu. Sa faamalosia e la matou faiaʻoga fou le faʻalo i le fuʻa, ae tasi se teineitiiti e leʻi auai i lenei faiga. Sa ula tamaiti iā te ia. Peitaʻi, na ou mātauina lona lototele, ma na ou fesili iā te ia pe aiseā na lē faʻalo ai. Na ia faapea mai o ia o se Tagata Aʻoga o le Tusi Paia, o le taʻu na taʻua ai Molimau a Ieova, ma e na o le Atua e auauna i ai.—Esoto 20:2, 3; Galuega 5:29.

Nofo Toʻatasi

I le 1943, na ou faigaluega ai i Prince Albert lea ou te utaina ai loli ma tiliva pusa vaiinu. Ona o loʻu naunau tele mo se taʻitaʻiga faaleagaga, sa faatau ai laʻu Tusi Paia, ae ona o le faigatā ona ou malamalama i ai na ou tagi ai ona o loʻu lē malamalama. Na o le pau le mea na ou malamalama i ai i le Tusi Paia, o le tatalo a le Alii.—Mataio 6:9-13.

I se tasi Aso Sa, na mimita le fafine mapolotu lea e ana le fale lea ou te nofo ai ma faapea mai, na ia tuleia ese mai le sitepu le “fafine o le Tusi Paia.” Sa ou faapea ifo, ‘⁠E ese lona agaleaga.’ I se isi Aso Sa mulimuli ane, na ou lē alu ai i le lotu ona sa ou maʻi ae ou nofo i le fale. O le aso lava lenā na toe asiasi atu ai le “fafine o le Tusi Paia.”

 Na ia fesili mai, “E te tatalo?”

Na ou tali atu, “I le tatalo a le Alii.”

A o ia faamalamalama mai le uiga o fetalaiga a Iesu, sa ou faalogologo atu ma le naunau. Na ia faamautinoa mai e toe foʻi mai i le Aso Lulu.

Ina ua toe foʻi mai le fafine lea ou te nofo ai, sa ou faamatala atu ma le fiafia e faatatau i le “fafine o le Tusi Paia,” o se sui o Molimau a Ieova. Na faateʻia aʻu i lana tali mai, na ia faapea mai, “A toe sau loa le fafine Molimau i le Aso Lulu, o le a ou tulia uma oulua mai loʻu fale!”

Sa ou saʻilia i lo matou vaipanoa le fafine Molimau lea e suafa iā Rampel. Na ou maua o ia, ma taʻu i ai le faafitauli, ma ou talosaga atu e faamalamalama mai le Tusi Paia. E foliga mai ua ma iloiloina le Kenese e oo i le Faaaliga! Sa ia faatusaina o matou vaitaimi i aso o Noa, ina ua faaumatia e le Atua le lalolagi amiolētonu, ae laveaʻiina Noa ma lona aiga i se lalolagi mamā.—Mataio 24:37-39; 2 Peteru 2:5; 3:5-7, 12.

Na faapea mai Rampel, “E foliga mai ua e taliaina aʻoaʻoga a le Tusi Paia o le mea moni lava lea. Ua toe lua vaiaso faia se fonotaga a Molimau a Ieova, ma e tatau ona e papatiso ai.” Na alu lenā pō ou te lē moe i loʻu mafaufau i mea ua ou aʻoaʻoina. E foliga mai o se laasaga tāua tele le papatisoga. Peitaʻi, na ou manaʻo lava e auauna i le Atua! E ui e lē telē soʻu malamalama i le Tusi Paia, ae sa ou papatiso i le 16 o oʻu tausaga, iā Oketopa 15, 1943.

Siitia Mai i Sisifo i Sasaʻe o Kanata

Na talosaga mai loʻu tuagane o Fereti pe mafai ona ou faigaluega i le faamamāina o lona fale fogāfale tolu i le aai o Toronto i Kanata i sasaʻe, iā Novema. Na ou malie i ai, ona sa ou manatu o le a tele ai loʻu saʻolotoga e tapuaʻi atu ai iā Ieova. Ae ou te leʻi alu i loʻu tuagane, sa ou asiasi muamua i loʻu uso o Ana lea sa nofo lata mai i Saskatchewan. Sa faateʻia aʻu ina ua la faapea mai ma Toli le ma uso matua, o loo latou suʻesuʻeina le Tusi Paia ma Molimau a Ieova, ma ia augani mai e fai saʻu suʻesuʻega. Ae na ou faateʻia foʻi i laʻua i loʻu faapea atu, o aʻu o se Molimau papatiso!

Na ma ō ma loʻu uso laʻitiiti o Emili i le nofoa afi i Toronto. Na faafeiloaʻi i maʻua e Pili i le fale e faatali ai nofoa afi, ma matou ō loa i le fale lea latou te nonofo ai ma Fereti ma Ioane. Na ou fesili atu iā Fereti po o ai isi o loo nonofo i le fale. Na ia faapea mai, “E te lē talitonu i le mea lea. E te manatua Alex Reed lea e sau mai lo tatou nuu? O la e nofo i le fogāfale i luga, ma ua tau leaga lona ulu auā o loo ia suʻesuʻe ma Tagata Aʻoga o le Tusi Paia!” Sa ou matuā fiafia lava.

Sa ou alu e vaai Alex, ma fai se fuafuaga e ma te ō i le sauniga i lenā pō. Sa ou naunau ou te amata auai loa i sauniga a o leʻi taumafai oʻu tuagane e taofia aʻu. E leʻi leva, ae amata loa ona ou alu i le galuega talaʻi mo le taimi muamua, e ui e leʻi faia lelei saʻu suʻesuʻega o le Tusi Paia. E ese loʻu fiafia e talanoa ma tagata Ukraine, ona o le gagana lea na ou aʻoaʻoina a o ou laʻitiiti.

E fiafia Pili e faitau le Olomatamata, lea e masani ona ou tuuina i lona potu. Ina ua siitia  atu Pili i British Columbia i Kanata i sisifo, sa ou lafo atu iā te ia se meaalofa, e maua ai sana tusiga o le Olomatamata. E ui o ia o se tagata e seāseā tautala, ae na tusi mai sana tusi e sefulu itulau e faaali mai ai lona lotofaafetai. Mulimuli ane, na tuuina atu lona ola iā Ieova, ma avea ai o se toeaina Kerisiano maelega. O se fiafiaga tele mo aʻu le avea o nai oʻu tei e toʻalima o Pili, Ana, Fereti, Toli, ma Emili, o ni tagata tapuaʻi tuuina atu a Ieova!

Na toe soloia e le malo o Kanata le sā na latou faia i le galuega a Molimau a Ieova iā Me 22, 1945. * O le mea moni, faatoʻā ou iloa e faasā le galuega ina ua ou faalogo i le faasilasilaga. Na ma filifili ma laʻu uō o Judy Lukus e galulue faataimi atoa o ni tagata talaʻi i Quebec lea e tautatala i le gagana Falani. Ina ua iloa e oʻu uso o Toli ma Emili la ma fuafuaga, na la filifili ai e talaʻi i Vancouver i British Columbia, i le isi itu o le atunuu.

E Lē Taliaina Nisi Lotu i Quebec

E lē na o le vaaiga na suia i Quebec. E matuiā teteega na fesagaʻi ma Molimau i la latou galuega talaʻi. * O se fiafiaga mo i matou le tufaina atu o le savali Quebec’s Burning Hate for God and Christ and Freedom Is the Shame of All Canada. O lenā feʻau malosi na faaalialia ai le lē fiafia o lotu i Molimau.

Mo le 16 aso, na matou amata i le lua i le vaveao, ma fai faananā le tuuina o savali i lalo o faitotoʻa. A o matou iai i se tasi o fale, na matou iloa ai ua ō mai leoleo. Na matou lalafi ma e leʻi maua i matou. I le aso na sosoo ai, na toe amata ai ona matou tufatufaina i alatetele le Olomatamata ma le Ala Mai! E tele taimi na taofia ai i matou e leoleo, ma ua galo pe faafia ona taofia la matou galuega. Ou te sauni pe a taofia aʻu e leoleo, ou te alu ai ma feaveaʻi laʻu pulumu fufulu nifo ma laʻu vali mata.

Iā Novema 1946, na asiasi mai ai Nathan Knorr, o lē na taʻimua i le galuega i le lalolagi aoao a Molimau a Ieova, mai Brooklyn i Niu Ioka. Na ia valaaulia le toʻa 64 o i matou o le ʻautalaʻi faataimi atoa i Quebec e auai i le Aʻoga Faale-Tusi Paia a le Olomatamata o Kiliata i Lansing i Saute, i Niu Ioka. E matuā tele lava o meaaʻoga na matou maua i lenā aʻoga Tusi Paia mo le lima masina. I le māeʻa o la matou faauuga iā Aukuso 1947, sa auina atu i matou i aai o Quebec auā le faatūina o ni faapotopotoga fou.

Se Auaunaga Faamalieina

E toʻafā i matou o tamaʻitaʻi talavou na auina atu i le aai o Sherbrooke. Sa matou maelega i le aʻoaʻoina o le gagana Falani, a o matou feoaʻi solo i lo matou oganuu. O nisi taimi pe a matou mālōlō i le aoauli, e leai se tupe e faatau ai se meaʻai, ona matou ō lea i le fale e suʻesuʻe atili. E atamai tele laʻu paga o Kay Lindhorst i le gagana. Na ia aʻoaʻo muamua mai le kalama faa-Peretania ina ia faigofie ai ona ou malamalama i le gagana Falani.

E lē galo iā te aʻu laʻu talaʻiga i Victoriaville, o se taulaga e 15,000 ona tagata. O se taulaga e tau lē malamalama ai tagata i le faa-Peretania, o le siʻomaga tonu lava lea e faaleleia ai le matou gagana Falani. E mataʻina le ma vaiaso muamua i inā. O so o se mea na matou ō ai e talia e tagata lomiga. Ina ua matou toe foʻi atu, ua tapunipuni uma faitotoʻa ma pupuni faamalama. O le ā le mea ua tupu?

Na lapataʻia e patele tagata e aua neʻi faalogo iā i matou. A o matou ō atu i lea fale i lea fale, na mulimuli mai tamaiti ma tauʻai mai maa ma polo e faia i le kiona. E ui i na tulaga, ae toʻatele lava na fia faalogo i le feʻau mai le Tusi Paia. I le amataga, na o le pō lava e faataga ai i  matou e asia i latou. A o alualu i luma lo latou malamalamaga o le Tusi Paia, na iʻu ina faia i soo se taimi, e ui i le lē fiafia mai o tuaoi.

I tausaga o le 1950, na matou toe asiasi ma oʻu uso i Wakaw. Na faamatala atu mea na tutupu iā i matou i le sauniga a le faapotopotoga. Mulimuli ane, na faapea mai le toeaina taʻimua, “O le a matuā fiafia lo outou tinā pe a toetū mai, ma iloa ua avea lana fanau ma Molimau a Ieova!” Na faapea mai lea toeaina, na fai le suʻesuʻega faale-Tusi Paia a lo matou tinā a o leʻi maliu. Na matou fetagisi ina ua iloa na talia e lo matou tinā upu moni o le Tusi Paia, lea e mautinoa lava e na te faasoaina mai pe ana lē vave ona maliu.

Faaipoipoga ma le Auaunaga Fai Faatasi

Na ou feiloaʻi iā Merton Campbell i le 1956, o se Molimau na falepuipui mo le 27 masina a o faagasolo le Tāua Lona Lua a le Lalolagi, ona o lona solitū o se Kerisiano. Ua toeitiiti atoa le sefulu tausaga o auauna i le ofisa ulu o Molimau a Ieova i Brooklyn. E tele uiga lelei faaleagaga o Merton, ma na ou iloa o le a avea o ia ma se tane lelei. Na ma fetusiaʻi mo ni nai masina, ma na atili alofa ai le tasi i le isi.

Na ma faaipoipo ma Merton iā Setema 24, 1960. O se faamanuiaga loʻu nofo mo le 47 tausaga ma se tamāloa e malosi faaleagaga! E 58 tausaga o galue Merton i le Matagaluega o Auaunaga, lea e tuuina atu le fesoasoani ma taʻiala i faapotopotoga o Molimau a Ieova i le Iunaite Setete. E sili atu i le 30 tausaga o oʻu galue i Brooklyn i le faamatagofieina o potu tali malo, ma faasolo ifo lea i Maota mo Fonotaga i Niu Ioka. I le 1995, na siitia ai i maʻua ma Merton i le Nofoaga mo Aʻoaʻoga a le Olomatamata i Patterson, pe ā ma le 70 maila i mātū o Niu Ioka.

Ina ua ou tuua lo matou aiga i le 12 o oʻu tausaga, na mamao mai loʻu mafaufau o le a iai se aso o le a ou faatasi ai i se aiga faaleagaga lea e aofia ai ma oʻu tei. O loo ou naunau atu i se taimi i le lalolagi fou a le Atua, lea o le a matou toe faatasi ai ma loʻu Tinā ma taʻu atu i ai mea na tutupu a o ia faatalitali i le toetū, aemaise le tausia e Ieova le Atua o manaʻoga faaleagaga o lana fanau. O se fiafiaga le ‘⁠taʻitaʻia’ o i matou e Ieova i “ala o le amiotonu”!—Salamo 23:3.

[Faaopoopoga i lalo]

[Ata i le itulau 27]

O oʻu mātua ma le fale na matou nonofo ai ma nai oʻu tei e toʻafitu

[Ata i le itulau 29]

O aʻu paga i le talaʻiga i Ottawa, 1952

[Ata i le itulau 29]

O nai oʻu tei (mai le agavale i le taumatau) Ana, Malia, Fereti, Toli, Ioane, o aʻu, Pili, ma Emili

[Ata i le itulau 29]

Maʻua ma Merton i aso nei