O se Tusi Mai le Dominican Republic

“Ou te Leʻi Iloaina Muamua Lea Ituaiga Alofa”

O LE taimi muamua lea ua fai ai se lauga mai le Tusi Paia a Niurka i le faapotopotoga. Sa ia sauniuni e ala i le tusia o ana tala e fai i le gagana a tauaso, ona aʻo faatauloto lea o lana lauga. Sa ou fesoasoani iā te ia i le taulimaina o lana lauga mai le pulelaa, ma na avea aʻu ma se tagata e fia aʻoaʻoina upu moni o le Tusi Paia. Na faaaogā se mea faaleoteleleo e na te lagonaina mai ai loʻu leo. Ina ua māeʻa, na faaalia le talisapaia o le aofia e ala i le patipati, ma sa ia lagonaina ai le leo o lo latou patipati ona o le leotele. Na faaalia lona fiafia tele e ala i si ana ataata. Sa ou fiafia foʻi. O se faamanuiaga le avea ma se misionare!

Ou te manatua le uluaʻi taimi na ma feiloaʻi ai ma Niurka. Ua tusa nei ma le lua tausaga. Pe tusa o le afa itula o alu laʻu taavale i auala pefu, a o auai i le talaʻiga, ma ina ua taunuu, o le taimi muamua lea na ou vaai ai iā Niurka. O loo ia nofonofo i le polotito o se fale e faia i laupapa, ma e elea ona apa. E mafai ona lagonaina leo o lapiti, oti ma taʻifau. Na ou vaaia le lē fiafia o Niurka i le auala na ia nofo ai. E foliga matua atu i ona tausaga lea ua 34.

Sa ou paʻi atu i lona tauau, ae na ia liliu mai ma ou iloa ai e tauaso o ia, ma e 11 tausaga o tauaso. Sa ou talanoa leo tele atu i lona taliga e faailoa atu ai aʻu ma laʻu paga o loo ma talaʻi. E leʻi leva, ae ma iloa o loo aafia Niurka i le maʻi e taʻua o le Marfan syndrome, lea ua māfua ai ona tele mafatiaga ua oo iā te ia. E ogaoga le tulaga o le maʻi suka o Niurka, lea e tatau ai ona vaavaai lelei le maualuga o le suka i lona toto.

Ina ua ou tuu atu le Tusi Paia i lona lima, na ia iloa le Tusi Paia, ma ia faapea mai, e ese lona fiafia e faitau a o leʻi tauaso. E faapefea nei la ona ou aʻoaʻo si nei tagata ina ia iloa upu moni o loo i le Afioga a le Atua? Talu ai ua ia iloa mataʻitusi, sa ou amata aʻoaʻoina o ia e ala i le tuuina o ni mataʻitusi uga i lona lima. E leʻi leva ae ia mātauina mataʻitusi. E ala i lona tago mai i faailoga na ou faia, sa ia aʻoaʻoina le fesootaʻiga o nei mataʻitusi i le gagana Amerika lea e faia ai tāga. Na faasolosolo ona ia aʻoaʻo isi faailoga. Ona e faatoʻā ou aʻoaʻoina foʻi lea ituaiga gagana, e umi se taimi e manaʻomia ou te sauni ai mo se lesona. Peitaʻi, ona na ma tau fai tinoū ma Niurka, o lea na vave ai ona ma mauaina le tomai i le gagana e fai ai tāga.

Na agaʻigaʻi pea i luma taumafaiga a Niurka, ina ua foaʻi atu e se faalapotopotoga tumaʻoti ni ana mea faalogo. Sa matuā aogā  nei mea faalogo iā te ia. Ona o le tele o tausaga ua tauaso ai ma lē lelei lana faalogo, ua faaesea mai ai o ia i le tele o tagata. Ae sa toe faaolaola e le agaga o Ieova lona mafaufau ma lona loto, e ala i le faatumuina lea i le poto, faamoemoe, ma le alofa. E leʻi leva, ae mafai e Niurka ona savali solo i lona vaipanoa e ala i le faaaogā o se tootoo ofe, e talaʻi atu ai upu moni o le Tusi Paia i isi.

O loo faia e Niurka se suʻesuʻega faale-Tusi Paia a le uso a lona tinā, ma ona tausoga e toʻalua. E lava sauniuni Niurka e ala i le taulotoina o lesona taʻitasi a o leʻi taitai oo i ai. E faitau e ana tagata aʻoga o le Tusi Paia palakalafa, ae faitau mai e Niurka le fesili mai lana tusi mo tagata tauaso. E faamatala e le paga a Niurka le tali e ala i le tautala atu i lona taliga, po o le faia foʻi o ni faailoga i luga o lona lima.

E fesoasoani ma faalaeiau le faapotopotoga atoa iā Niurka. E fesoasoani nisi uso Kerisiano e ave Niurka i sauniga ma fonotaga. Ae fesoasoani isi iā te ia i le talaʻiga. Na faapea mai Niurka iā te aʻu: “Ou te leʻi iloaina muamua lea ituaiga alofa.” O loo faamoemoe Niurka e papatiso i le isi tauaofiaga itumalo o sosoo mai.

Ina ua matou afe atu i le auala e nofo ai Niurka, o loo ia nofonofo i le polotito ma ataata. Na ou fesili atu, pe aiseā ua ataata ai. Na ia faapea mai: “Sa ou mafaufau i le lumanaʻi pe a avea le lalolagi ma parataiso, ma sa ou faaata i loʻu mafaufau o loo oʻu iai i inā.”

[Ata i le itulau 25]

O Niurka ma nisi sui o la matou faapotopotoga i luma o le Maota mo Sauniga

[Ata i le itulau 25]

E faasoa atu e Niurka i isi mea ua ia aʻoaʻoina