Ua Puipuia Aiā Tatau a i Latou na Sauāina

IĀ Me 3, 2007, na faia ai e le Faamasinoga o Aiā Tatau i Europa, i Strasbourg, Falani, se faaiʻuga e autasi uma ai e lagolagoina Molimau a Ieova o loo i le atunuu o Georgia. Ua faaalia i le Faamasinoga le sauāina o Molimau a Ieova i inā, ma le lē amanaʻiaina o lo latou saʻolotoga e tapuaʻi ai. Na aʻoaʻia foʻi i le Faamasinoga, le faigāmalo muamua a Georgia ona o le leai o sa latou mea na faia iā i latou na sauāina Molimau a Ieova. Aiseā ua faia ai lenei faaiʻuga?

Iā Oketopa 17, 1999, na faatasitasi ai le toʻa 120 o tagata o le Faapotopotoga a Molimau a Ieova o Gldani, i le taulaga o Tbilisi, e fai ai la latou tapuaʻiga. Ae faafuaseʻi ona osofaʻi atu se vaega o tagata i totonu o le faatasiga, lea o loo taʻitaʻia e se faifeʻau Orthodox ua faateʻa mai i lona tofi, e igoa iā Vasili Mkalavishvili. Na faaaogā e nei tagata ni laupapa malō ma uʻamea e sasaina ai ē na auai i le faatasiga, ma e toʻatele na faamanuʻalia, o nisi na tugā tele o latou manuʻaga. O se tasi o tuafafine na leaga ai lava lona mata ona o na osofaʻiga. E itiiti mai le 16 i latou na manaʻomia ona ave i le falemaʻi. Ina ua ō atu Molimau a Ieova i le ofisa o leoleo mo se fesoasoani, na latou feiloaʻi ai ma le taʻitaʻi o leoleo, o lē sa faapea mai e sili atu ona leaga sauāga e na te faia iā i latou. Na puʻe e se tasi o lea vaega le osofaʻiga na latou faia, ma na mulimuli ane faaalia i le televise a le atunuu, ma faaali manino mai ai i latou na faia lea osofaʻiga. *

Sa ave ni tagi a Molimau na sauāina i le malo, ae e leʻi iai se mea na faia i nei tagata sauā. O le tamāloa leoleo lea na tofia e suʻesuʻeina le mea na tupu, na fai mai, ona o ia o se tagata e lotu Orthodox, e faigatā ona ia lē faaituʻau e tusa o lea mataupu. O le leai o se gaoioiga a leoleo ma le malo agaʻi i na tagata, ua atili uunaʻia ai pea nei tagata mapolotu e faia i le silia atu ma le selau nisi osofaʻiga faapea.

O lea la, iā Iuni 29, 2001, na tusia ai e Molimau a Ieova se talosaga i le Faamasinoga o Aiā Tatau i Europa. * Na lauina le iʻuga o le Faamasinoga iā Me 3, 2007, lea na faailoa manino mai ai faamatalaga e uiga i le osofaʻiga ma taʻusalaina ai leoleo ma alii o le malo o Georgia, ona o le leai o so latou mea na faia e tusa ma na faiga. Na taʻua i le Faamasinoga: “O le faigāmalo. . . na iai so latou tiute o le vave lea ona gaoioi e vaai pe saʻo faamatalaga” e uiga i le osofaʻiga. Na taʻua i le faaiʻuga a le Faamasinoga e faapea, “O le lē gaoioi o le pulega a le malo e taofia nei faiga, e lē gata e faaitiitia ai le talitonuina e tagata o taʻiala ma le tonu o tulafono, ae faapea foʻi le tausisi o le malo i pulega o tulafono.”

Na faaiʻu le Faamasinoga i le faapea mai: “O le osofaʻiga iā Oketopa 17, 1999 agaʻi iā i latou na talosaga, ua avea ma sauāga muamua e pito i sili ona leaga agaʻi i Molimau a Ieova, ma o le lē taofia e le malo o na sauāga, ua tatala ai le avanoa e salalau atu ai le sauāina o lotu i totonu o Georgia e le vaega lava lea na osofaʻia Molimau.”

O le iʻuga, ua puipuia aiā tatau a ē na sauāina, ma na faatonuina le malo o Georgia e totogi mea na faaleagaina, faapea ma le totogiina o le faamasinoga, i le faapotopotoga a Gldani. Ua matuā fiafia Molimau a Ieova i Georgia ona ua faaitiitia sauāga i inā, ma ua latou fiafia tele ona ua mafai e le faaiʻuga a le Faamasinoga ona faatumauina lo latou aiā e fai ai la latou tapuaʻiga ma le filemu. Ona o lenā tulaga, ua latou faafetaia ai lo latou Tamā o i le lagi, o Ieova le Atua, o lē na puipuia ma taʻitaʻia i latou a o feagai ma nei tofotofoga.—Salamo 23:4.

[Faaopoopoga i lalo]