Le Auala ua Tatou Aafia ai i Aso Nei iā Litia Anamua

ATONU e te leʻi faalogo muamua lava i le malo sa iai anamua e igoa o Litia, e ono faateʻia la oe i lou iloa, o mea sa maua ai i lea vaipanoa, na suia ai le auala o faiga faapisinisi i le lalolagi. E maofa foʻi tagata faitau o le Tusi Paia i le iloa faapea, o le mea na muamua lava faia i Litia ua malamalama ai i se valoaga o le Tusi Paia na iso ai tagata i le fia iloa. O ā mea na faia i Litia? A o leʻi taliina lena fesili, e lelei ona tatou iloaina se mea e faatatau i le olaga ma le taimi o lenei emepaea ua toeitiiti galo atoatoa atu.

 Na pule tupu o Litia mai lo latou laumua o Sarataisa, i le itu i sisifo o le vaipanoa na taʻua i lenā taimi o Asia Itiiti, ae ua taʻua i le taimi nei o Take. Na faaputuina e le tupu mulimuli o Litia o Kose, le tele o ʻoa, ae peitaʻi i le pe tusa o le 546 T.L.M., na faoa ai lona emepaea e Kuresa le Sili mai Peresia. O Kuresa lava lenā na faatoʻilaloina le Emepaea o Papelonia i ni nai tausaga mulimuli ane ai.

O tagata faipisinisi o Litia, o i latou ia e faapea, sa uluaʻi faaaogāina tupe siliva. Ua loa ona faaaogā auro ma siliva e fai ma tupe, ae ona o le lē tutusa o le tetelē o fasi auro faapea ma mama, sa tatau la ona fua e tagata le mamafa o tupe i taimi uma lava e fai ai a latou fefaatauaiga. O se faataʻitaʻiga i Isaraelu, na faatau mai e le perofeta a le Atua o Ieremia se fanua, ona ia tusia lea e faapea: ‘Ona ou fuatia lea iā te ia o tupe, o sekeli ario e sefulu ma le fitu.’—Ieremia 32:9.

I Litia, na maua ai e i latou na soifua i le taimi o Ieremia se mea e faafaigofie ai a latou fefaatauaʻiga—o le faaaogāina lea o tupe siliva e iai faailoga i ona itu e lua. O uluaʻi tupe siliva a Litia sa faia mai i se paluga tuufaatasi o le auro ma le siliva e taʻua o le apa pupula. Ina ua avea Kose ma tupu, ona ia suia lea i tupe siliva lea e fai i le siliva ma le auro. Na fai e tagata Litia ni tupe siliva e fai mai i ni ituaiga uʻamea eseese se lua, lea e tusa e 12 tupe e maulalo lona aogā, e tutusa ma le tupe e tasi e fai mai i le uʻamea e sili atu lona aogā. Ae peitaʻi na faalētonu lenā faiga ona ua iai tupe taufaasesē lea e fai i le auro e palu faatasi ma ni uʻamea taugofie. Sa manaʻomia e tagata faatauʻoa se auala faigofie e fua i ai le telē o le auro o loo iai i ia tupe.

Na maua e tagata Litia se ituaiga o maa uliuli lea e taʻu o le maa Litia, e foʻia ai lea faafitauli. Pe a olo le tupe i le maa lamolemole lea, e mafai ona maua ai se maka po o se mailoga. Pe a faatusatusa la le lanu o le mailoga lea i lanu o mailoga ia e maua mai i nila e iai le auro, ona mafai lea ona iloa le telē o le auro o loo iai i lea tupe. O le faiga lenei, ina ua faaaogā e fua pe suʻeina ai tupe, na faigofie ai ona maua tupe saʻo. E faapefea i lo tatou iloa o nei maa e fua i ai tupe saʻo ona fesoasoani iā i tatou ia malamalama i le Tusi Paia?

Maa Faafaatusa a le Tusi Paia

A o faasolo ina taatele le suʻeina o le auro moni e ala i le faaaogā e tagata faioloa o le “maa” uliuli lenei, na iʻu ai ina faauiga le upu mo le maa lenei, i le fua e fua ai se mea. I Eleni, le gagana lea na tusia ai se vaega o le Tusi Paia, sa faatatau atu foʻi lea upu i le tigāina o tagata na tofotofoina e ala i le faapuapuagatiaina.

Ona la o tagata e pule i le falepuipui o i latou ia e faapuapuagatiaina pagota, o le upu e maua mai le “maa” lea e suʻe ai le auro sa faatatau atu foʻi i leoleo o le falepuipui. O loo tusia foʻi i le Tusi Paia le talafaatusa a Iesu i se auauna lē loto faafetai ma na tuuina atu o ia “i leoleo o le falepuipui,” pe i nisi faaliliuga, “o tagata e faia faasalaga.” (Mataio 18:34) E tusa ai ma lenei faamatalaga, na faapea le faamatalaga a le The International Standard Bible Encyclopaedia: “Atonu o le faafalepuipuiina lava ia e manatu i ai o se ‘faapuapuagatiaina” (e pei lava ona manino mai o le tulaga lenā), ma o “tagata e faia faasalaga” o i latou o leoleo o le fale puipui.” Ua fesoasoani lea e faamatalaina ai se mau o le Tusi Paia e foliga mai e ese.

Ua Malamalama se Mea na Iso Ai

Ua leva ona iso tagata faitau o le Tusi Paia i le tulaga moni e oo iā Satani. Ua faapea mai le Tusi Paia: “Ua lafo foʻi le Tiapolo . . . i le lepa afi ma le teiō, o le mea lenā o loo iai le manu feʻai  ma le perofeta pepelo; ma e faapuapuagatia ai i latou i le ao ma le pō e faavavau, faavavau lava.” (Faaaliga 20:10) O le mea moni, o le tuuina atu e Ieova o se tasi e faapuapuagatia i lona olaga atoa, e feteenaʻi ma le alofa o le Atua ma lona faamasinotonu. (Ieremia 7:31) E lē gata i lea, ua taʻua e le Tusi Paia le ola e faavavau o se meaalofa, ae lē o se faasalaga. (Roma 6:23) E manino mai la, o loo tusia le Faaaliga 20:10 i se gagana faafaatusa. E faafaatusa le manu feʻai ma le lepa afi. (Faaa. 13:2; 20:14) Pe faafaatusa foʻi la le faapuapuagatiaina? O le ā atonu e uiga i ai lenei faaupuga?

E pei ona tatou vaaia, o le upu Eleni mo le “faapuapuagatia” e sau mai le upu mo le “maa” uliuli lea e fua ai le telē o le auro i se mea, ma e mafai ona faasino atu i le faapuapuagatiaina i se falepuipui. O lea la, o le faapuapuagatiaina o Satani e faavavau e mafai ona faasino atu i lona tuuina e faavavau i se falepuipui e mautinoa lona lē toe alu ese ai—o lona faaumatiaga lea.

Ua fesoasoani foʻi le fua lenei a tagata Litia ina ia tatou malamalama ai i se isi mea e faatatau i le “faapuapuagatia” e faavavau o Satani lea e ōgatasi ma le alofa o le Atua. I nisi gagana a taʻu se “maa” e fua ai le auro o loo uiga atu i se faiga masani e iloilo ai le lelei o se mea. O se faaaʻoaʻoga, i le faa-Peretania, a taʻu se “maa e fua ai le auro” o loo uiga atu i se “fua po o se faatulagaga e iloa ai le lelei o se mea po o lona tulaga moni o loo iai.” O le “faapuapuagatia” la e faavavau o Satani, o lona uiga o lona faasalaga, lea o le a avea o se fua e faavavau e mafai ona faaaogā pe a tulaʻi mai so o se ituaiga tetee iā Ieova i le lumanaʻi. O le a lē toe manaʻomia ona faatagaina se luʻi i le pule a Ieova mo se taimi umi e faamaonia ai e sesē lē o loo ia faia le luʻi.

O le malamalama la i le māfuaaga na faaaogā ai e tagata faioloa i so o se mea le maa e fua i ai mea pei ona faia e tagata i Litia, ma le malamalama i le faaupuga faafaatusa o lenā faiga, ua malamalama ai i le mea o le a tupu iā Satani. O lona iʻuga o le a avea o se maa po o se faavae o le faasalaga lea o le a lē manaʻomia ai e le Atua ona toe faapalepale i ni tulaga tetee.—Roma 8:20.

[Faamatalaga faaopoopo i le itulau 23]

O le faapuapuagatia faafaatusa o Satani o lona uiga, o lona iʻuga o le a avea o se maa po o se faavae e fua i ai mea e faavavau

[Faafanua i le itulau 21]

(Tagaʻi i le lomiga mo le ata atoa)

Sami Uliuli

LITIA

SARATAISA

Sami Metitirani

[Ata i le itulau 21]

TOEGA O MEA I SARATAISA ANAMUA

[Ata i le itulau 22]

Sa faaaogā i aso anamua fua e fua ai le mamafa o tupe

[Ē Ana le Ata]

E. Strouhal/Werner Forman/Art Resource, NY

[Ata i le itulau 22, 23]

Ua oo mai lava i aso nei le faaaogāina o le maa e suʻe ai le tulaga moni o se mea

[Ē Ana le Ata]

Coins: Courtesy Classical Numismatic Group, Inc.; touchstone: Science Museum/Science & Society Picture Library

[Ē Ana le Ata i le itulau 21]

Electrum coin: Courtesy Classical Numismatic Group, Inc.