Ia Aʻoaʻo Lau Fanau

O Timoteo—E Sauni ma Lotomalie e Auauna Atu

“UA E sauni?” Ua fai atu lenā fesili iā te oe?—O le tagata lea e faia le fesili, o loo fia iloa po ua e sauniuni. O se faaaʻoaʻoga, atonu o loo uiga le tala a le tagata: ‘Po ua iai au tusi aʻoga? Po ua faitau au lesona?’ E pei ona o le a tatou vaai nei i ai, sa sauni Timoteo.

Sa lotomalie foʻi Timoteo. Pe e te silafia le uiga o lenā mea?—Ina ua valaaulia Timoteo e auauna i le Atua, sa iā te ia le uiga o se tasi o auauna a le Atua, lea na faapea mai: “O aʻu lenei, inā auina atu aʻu.” (Isaia 6:8) Ona sa sauni ma lotomalie o ia e auauna atu, na maua ai e Timoteo se olaga e tumu i le fiafia. Pe e te fia faalogo i ai?

Na fanau Timoteo i Lusa lea e faitau selau maila le mamao mai Ierusalema. O le tinā o Timoteo o Eunike, a o le tinā o Eunike o Loi, o ni tagata aʻoga lelei tele o le Tusi Paia. E amata mai lava i le taimi a o pepe Timoteo, na la aʻoaʻoina o ia e faatatau i le Afioga a le Atua.—2 Timoteo 1:5; 3:15.

I le pe tusa o le va o le 13-19 tausaga o Timoteo, na asiasi atu ai le aposetolo o Paulo i Lusa i lana uluaʻi malaga talaʻi umi, ma na la ō faatasi ma Panapa. E foliga mai o le taimi lena ua avea lona tinā, ma le tinā o lona tinā ma Kerisiano. Pe e te fia iloa faaletonu na fesagaʻi ma Paulo ma Panapa?—O tagata na lē fiafia i Kerisiano na latou tauʻaia Paulo i maa, ma paʻū ai i lalo, ma toso ese o ia i fafo o le aai. Na latou manatu ua oti Paulo.

O i latou na talitonu i mea na aʻoaʻoina e Paulo na ō ane ma siʻosiʻoina o ia, ona tū lea o ia i luga. I le aso na sosoo ai, na tuua ai loa e Paulo ma Panapa lenā aai, ae e leʻi umi ae la toe foʻi atu i Lusa. Ina ua la toe foʻi atu, na faia e Paulo se lauga ma faapea atu i soo: “E tatau ona tatou sao atu i le malo o le Atua i le tele o puapuaga.” (Galuega 14:8-22) Pe e te iloa le uiga o le tala a Paulo?—O lona uiga o le a faapogaia e isi faalavelave mo i latou e auauna i le Atua. Na tusi mulimuli atu Paulo iā Timoteo: “E sauāina i latou uma e naunau e ola ma le faamaoni i le Atua.” (2 Timoteo 3:12; Ioane 15:20)

 Ina ua tuua e Paulo ma Panapa Lusa, ona la toe foʻi atu lea i o la aiga. I ni masina mulimuli ane, na tofia ai loa e Paulo ia Sila e la te malaga faatasi, ona la toe foʻi atu lea e faamalosi i soo fou i nofoaga na asiasi atu i ai Paulo. Ina ua la oo atu i Lusa, sa matuā fiafia Timoteo ina ua toe vaai iā Paulo! Ae na atili ai le fiafia o Timoteo ina ua valaaulia o ia e faimalaga faatasi ma Paulo ma Panapa. Na talia e Timoteo le valaaulia. Na sauniuni ma lotomalie o ia e alu.—Galuega 15:40–16:5.

Na faimalaga faatasi i latou e toʻatolu, na savavali i le tele o maila, ona latou malaga lea i se vaa. Ina ua latou tuua le vaa, ona latou savavali lea i Tesalonia i Eleni. O inā e toʻatele tagata na avea ai ma Kerisiano. Ae o isi na feita ma fai sa latou kegi. Na lamatia le ola o Paulo, Sila ma Timoteo, ona latou tuua lea o lea aai ae agaʻi atu i Perea.—Galuega 17:1-10.

Sa popole Paulo i tagata talitonu fou i Tesalonia, ona ia toe auina atu lea o Timoteo i inā. Pe e te silafia le māfuaaga?—Na faamatala mulimuli ane e Paulo i Kerisiano i Tesalonia: ‘⁠Ina ia faamausalī ai outou ma faamāfanafanaina ai neʻi iai se tasi e faavaivai.’ Pe e te iloa le māfuaaga na auina atu ai e Paulo Timoteo i se tofiga faigatā?—O le taimi lea e leʻi iloa tele e tagata tetee Timoteo, ma sa sauni o ia e alu. E manaʻomia le lototele i le tofiga lenei! O le ā le iʻuga o lana faigāmalaga? Ina ua toe foʻi atu Timoteo iā Paulo, na ia taʻu atu iā Paulo le faatuatua tele o tagata Tesalonia. O lea na tusi atu ai Paulo iā i latou: ‘ua faamāfanafanaina i matou ona o outou,’ (1 Tesalonia 3:2-7)

Na galulue faatasi Paulo ma Timoteo i le isi sefulu tausaga. Ona faafalepuipuiina lea o Paulo i Roma, ona alu atu lea o Timoteo lea faatoʻā tatala mai lava i le falepuipui ina ia faatasi ma Paulo. A o iai Paulo i le falepuipui, na ia tusia se tusi i uso i Filipi, atonu na ia faaaogā Timoteo e fai ma ana failautusi. Na taʻua e Paulo: ‘Ou te faamoemoe ou te vave auina atu Timoteo iā te outou auā e lē o iā te aʻu se tasi e mafaufau lelei e pei o ia, na te tausia faamaoni mea e manuia ai outou.’—Filipi 2:19-22; Eperu 13:23.

Maʻeu le faafiafiaina ai o Timoteo i na upu! Na oo ina alofa tele Paulo iā Timoteo ona o lona sauni, ma lotomalie e auauna atu. E matou te faamoemoe e te faia foʻi faapena.

Fesili:

• O fea na ola aʻe ai Timoteo, ma o le ā na tupu ina ua faatoʻā asiasi atu Paulo i inā?

• O le ā na faia e Timoteo ina ua valaaulia e faimalaga ma Paulo ma Sila?

• Na faapefea ona faaalia e Timoteo le lototele, ma aiseā na alofa tele ai Paulo iā te ia?

[Ata i le itulau 24]

O le ā na tupu?