Tausia Aʻe o Fanau i se Lalolagi Tuufau

PO UA e vaai i se tamaitiiti o loo tauanau ona mātua e faatau se meataalo e la te lē o mananaʻo e faatau? Ia po o se tamaitiiti foʻi o loo manaʻo e tamoʻe solo ma taalo, ae o loo fai atu ona mātua, “Nofo filemu”? E mafai ona e iloa mai i tulaga e pei ona taʻua, e manaʻo le matua ia fai le mea e lelei ai le tamaitiiti. Ae i le isi itū, ua masani ona tuu e le matua le tamaitiiti e fai le mea e loto i ai. Ona o le tagitagi atu ma le faatauanau atu a le tamaitiiti, ua suia ai le leai a mātua i le ioe.

E toʻatele mātua e foliga mai e talitonu o le tausiga lelei faamātua, o le faia lea e toetoe lava o mea uma e mananaʻo ai a latou fanau. O se faaaʻoaʻoga, i le Iunaite Setete, sa faatalanoa ai ni tamaiti e 750, e i le va o le 12 i le 17 tausaga le matutua. Ina ua fesiligia po o le ā e latou te fai pe a fai atu o latou mātua e leai, e lata i le 60 pasene le aofaʻi o tamaiti na fai mai, e toe fai atu ma toe fai atu. E tusa ma le 55 pasene na faapea mai, o le auala lea e ioe mai ai o latou mātua. Atonu e manatu o latou mātua e faapea o lenā faatagaga, e faaalia ai lo latou alolofa, ae po o le tulaga moni lenā?

Seʻi tomānatu i le faataoto poto lenei mai le Tusi Paia: “O lē ua faapelepele i lana auauna e afua mai ina o itiiti, mulimuli ane e fai o ia ma sē e lē loto faafetai.” (Faataoto 29:21, NW) O le mea moni, e lē o se auauna le tamaitiiti. Ae, pe e te lē ioe ea, o loo faatatau atu foʻi le mataupu silisili lenei i le tausia aʻe o fanau? O le fai faamatanana o tamaiti, e ala i le faia o mea uma lava e mananaʻo ai, e ono faapogaia ai i latou e tutupu aʻe ma avea ma ē e “lē loto faafetai”—e matananana, e loto malosi, ma e leai se loto talisapaia.

Peitaʻi ane, ua fautuaina mātua i le Tusi Paia: “Aʻoaʻo ia i le tama e tusa ma lona ala.” (Faataoto 22:6) O mātua atamamai e latou te utagia lenei poloaʻiga, e ala i le faataatitia atu o ni tulafono talafeagai e manino, ma ia faaauau pea ona fai. E latou te lē faafenumiaʻia le alofa ma uiga tuufau; e latou te lē faia foʻi mea e mananaʻo ai tamaiti ona o le limalalaʻu, le faatauanau soo atu, pe ona o le faalilii. Nai lo lea, e latou te ioe i upu poto a Iesu e faapea: “A ia avea la outou upu, o le Ioe, ia Ioe; ma le Leai, ia Leai.” (Mataio 5:37) O le ā la e aofia ai i le aʻoaʻoina o fanau? Seʻi o tatou iloiloina se talafaatusa uigā.

“E Pei o Ū Fanafana i le Lima”

Ua faataʻitaʻia mai e le Tusi Paia le faiā a mātua ma fanau, i se auala e faamamafa mai ai le manaʻomia e le tamaitiiti o le taʻitaʻiga a mātua. Ua faapea mai le Salamo 127:4, 5: “E pei o ū fanafana i le lima o le toa, e faapea lava atalii o tauleleʻa. Amuia le tagata ua tumu ai lana utu.” O  lona uiga ua faatusaina tamaiti i ū fanafana, ae faatusaina mātua i se toa. E pei lava ona iloa e le tagata fanafana ū e faapea, o le a lē faafuaseʻi ona tau tonu le ū i le mea e fana i ai, ua faapena foʻi ona iloa e mātua alolofa e faapea, o le tausia aʻe o se tamaitiiti, e manaʻomia ai ona mafaufau lelei ma fai ni taumafaiga. E latou te mananaʻo i a latou fanau ia ausia se “sini,” o se olaga e faamalieina ma fiafia, ma ia avea o ni tagata matutua e faamoemoeina. E latou te mananaʻo ia faia e a latou fanau ni filifiliga saʻo, ia atamamai ma ʻalofia faafitauli e lē manaʻomia, ma ia ausia sini aogā. Peitaʻi, e ao i mātua ona faia ni taumafaiga atili pe afai latou te mananaʻo ia taulau nei mea.

O le ā e manaʻomia ina ia tau tonu ai le ū i le mea o fana i ai? E tatau ona saunia lelei le ū, ia lelei ona puipuia, ma ia taʻi saʻo i le faailoga. E faapena foʻi ona manaʻomia ona saunia lelei fanau, ia puipuia, ma ia taʻitaʻia ina ia taulau le faagasologa o o latou olaga seʻia oo ina matutua. Seʻi o tatou talanoa auauaʻi i vala e tolu o le tausia aʻe o fanau.

Lelei Ona Saunia le Ū

Sa lelei ona saunia ū ia na faaaogā e tagata fanafana ū i taimi o le Tusi Paia. Atonu sa fai le ū i se laau e māmā, ma sa fai lava e le tagata ia, ina ia saʻo lelei. Sa tatau ona maai le mata o le ū. Ae i le isi itū o le ū, sa faapipii ai fulu ina ia lelei ma saʻo ai le alu a le ū pe a oo ina faamamulu.

E mananaʻo mātua ia pei a latou fanau o na ū e saʻo lelei—e saʻo mea latou te faia, ma e lē see ese mai ai. O lea la, pe afai e latou te atamamai, o le a lē tauaso la le latou vaai i ni vaivaiga matuiā o fanau, ae o le a latou fesoasoani ma le alolofa i a latou fanau, ina ia faaleleia nei vaivaiga ma manumalo mai ai. O le a tele ni galuega faapena e fai ina ia tausia lelei ai le tamaitiiti, auā “ua fusifusia le valea i le loto o le tama.” (Faataoto 22:15) O le māfuaaga lea ua fautuaina ai e le Tusi Paia mātua ina ia aʻoaʻi a latou fanau. (Efeso 6:4) Ioe, e tāua tele le matafaioi o loo faatino e aʻoaʻiga, i le fafauina aʻe ma le faamalosia o le mafaufau ma uiga o se tamaitiiti.

E lētioa a faapea mai le Faataoto 13:24: “O lē ua tuuna lana sasa, ua ʻinoʻino o ia i lona atalii; a o lē ua alofa iā te ia, ua saʻili le aʻoaʻiga mo ia.” I lenei mataupu, o le upu sasa, ua faaalia ai le auala e fai ai e mātua faasaʻoga, po o le ā lava le auala e faasaʻo ai. E taumafai se matua e faasaʻo le sesē lea na faia e ala i le avatu ma le agalelei o aʻoaʻiga, auā afai o le a mau na mea sesē i le loto o le tamaitiiti, o le a iʻu ina faapogaia ai le tele o mafatiaga i lona olaga pe a oo ina matua. O le mea moni, o se lē alofa pe a lē aʻoaʻia le tamaitiiti; ae o le tuuina atu o aʻoaʻiga, o se auala alofa.

O se matua alofa e fesoasoani foʻi i le tamaitiiti ia malamalama i māfuaaga ua faatulaga ai ni tulafono. O aʻoaʻiga e lē gata e aofia ai le tuuina atu o faatonuga ma le faia o faasalaga, ae sili atu ona tāua, o le fesoasoani lea i le tamaitiiti ina ia malamalama i le māfuaaga o na faatonuga. Ua taʻua i le Tusi Paia e faapea: ‘O le atalii mafaufau, e anaana o ia i le tulafono.’—Faataoto 28:7.

E fesoasoani fulu manu ia e faapipii e se tagata fanafana ū i ana ū, ina ia saʻo lelei ai le alu a le ū pe a ia fanaina atu. O le a faapena foʻi ona tāmau pea i mafaufau o tamaiti, aʻoaʻoga o le Tusi Paia mai Lē na Faavaeina aiga, e tusa lava foʻi pe ua latou tuua le aiga, ae o le a maua mai ai aogā a o faagasolo le olaga. (Efeso 3:14, 15) E faapefea la ona faamautinoa e mātua ua tāmau i loto o a latou fanau nei aʻoaʻoga?

Seʻi mātau le faatonuga a le Atua na avatu i mātua Isaraelu i taimi o Mose: “Ia i ai foʻi i lou loto o upu nei ou te fai atu ai iā te oe i le aso nei. Ia e matuā aʻoaʻo soo ai i lau fanau.” (Teuteronome 6:6, 7) O lona uiga e lua ni mea e manaʻomia ona fai e mātua. Muamua, e ao ona latou aʻoaʻoina le Afioga a le Atua ma faatatau i o latou olaga, o lona uiga ia latou naunau i tulafono a le Atua. (Salamo 119:97) Ona mafai lea ona latou faatatauina le vaega lona lua o le mau—ia “matuā aʻoaʻo soo” a latou fanau i tulafono a le Atua. O lona uiga e ao i mātua ona tāmau i loto o a latou fanau, le tāua o na tulafono e ala i le aʻoaʻo ma le uigā ma ia toe taʻua soo.

E manino mai, e oo lava foʻi i aso nei, e tāua tele ona aʻoaʻoina taʻiala o le Tusi Paia, ma faaaogā aʻoaʻiga alofa e toe faasaʻo ai ni mea sesē matuiā. E aogā tele nei auala ina ia saunia ai na fanau pele e pei o ni “ū fanafana,” a o faasolo atu ina matutua.

 Le Puipuiga o le Ū

Seʻi o tatou toe foʻi i le talafaatusa o loo faamauina i le Salamo 127:4, 5. Manatu i le tagata fanafana ū ua ‘tumu lana utu’ i ana ū. Pe afai ua uma ona saunia lelei ū, sa tatau loa la ona puipuia lelei. O le māfuaaga lea sa ave ai e le tagata fanafana ū ana ū i se utu, ia aua ai neʻi faaleagaina pe gaui. O le itu e mataʻina ai, ona o loo faavaloaga ona taʻua le Mesia i le Tusi Paia o se ū fanafana ua faapupulaina, ma ua ‘faalilo i le utu’ a lona Tamā. (Isaia 49:2) Ioe, sa puipuia e Ieova le Atua, o le Tamā e sili ona alofa, lona Alo pele o Iesu mai le tele o mea leaga seʻia oo lava i le taimi atofaina e maliu ai le Mesia e pei ona valoia. E oo lava foʻi i lenā taimi, sa puipuia e le Atua lona Alo ia lē tumau ai pea ona maliu, e ala i lona toe faatūina o ia ma le saogalemu ina ia soifua ai i lagi e faavavau.

E faapena foʻi ona mananaʻo mātua alolofa, e puipui fanau mai mea e lamatia ai mai lenei lalolagi lē mamā. Atonu e faasā e mātua ni mea e lamatia ai fanau, ina neʻi afāina i ni aafiaga mataʻutia. O se faaaʻoaʻoga, o ni mātua e atamamai, e manatu mamafa tele i le mataupu silisili lenei: “O aumea leaga e faaleagaina ai mea lelei ua masani ai tagata.” (1 Korinito 15:33) E lē taumatea, o le puipuia o fanau mai le aumea ma tagata e lē amanaʻia tapulaa tau amio a le Tusi Paia, o le a taofia ai talavou mai le faia o le tele o mea sesē, e ono afāina ai o latou ola pe iʻu foʻi ina maliliu ai.

Atonu e lē o taimi uma e talia ai e tamaiti le puipuiga a mātua. O le mea moni, o nisi taimi e latou te teena ai lau puipuiga, auā o le puipuia o lau fanau o le a tele ai lava ina e faapea atu, e leai. Ua taʻua e se tusitala o tusi e faatatau i le tausia o tamaiti e faapea: “E ui lava e lē o taimi uma e latou te faaalia mai ai, pe atonu foʻi e lē faafetai mai iā te oe i lenā taimi, ae e mautinoa e manaʻomia moni lava e fanau le puipuiga a o latou mātua, ma ia saunia ni taʻiala e manino ma puipuia ai lo latou lumanaʻi. E mafai ona tatou faia faapea e ala i le avea ma se matua e manatu mamafa i lana tiute, ma o sē e na te faatulaga tapulaa tau amio a le tamaitiiti.”

Ioe, o le puipuia o lau fanau mai so o se mea e ono popole ai, ma saʻoloto mai le faaleagaina, po o lo latou tulaga mamā i luma o le Atua, o se auala sili lea ona tāua e faaalia ai lou alofa iā i latou. A o latou tuputupu aʻe, o le a latou manino i māfuaaga na ala ai ona fai tulafono, ma o le a latou talisapaia lau puipuiga alofa.

 Le Taʻiina o le Ū

Seʻi mātau foʻi, ua faatusa e le Salamo 127:4, 5 le matua i se “toa.” Po o lona uiga la e na o se tamā e mafai ona taulau i le faatinoina o le matafaioi a se matua? E leai. O le mea moni, o le mataupu silisili o loo i lenei talafaatusa, e faatatau uma atu i tamā ma tinā—faapea ma mātua nofo toʻatasi. (Faataoto 1:8) O le faaupuga “toa” ua faaalia ai e faapea, sa matuā manaʻomia le tele o le malosi ina ia fana atu ai le ū mai le ʻaufana. I taimi o le Tusi Paia, o nisi taimi e faaaogā ai le apamemea e ufitia ai le ʻaufana, ma na faapea mai e ‘loloʻu e le fitafita le ʻaufana,’ atonu e ala i le taofi o le ʻaufana i lona vae ona mafai lea ona faapipii le manoa i le ʻaufana. (Ieremia 50:14, 29) E manino mai, na alu ai le malosi ma taumafaiga ina ia memeʻi ai i tua lenā manoa, ma mafai ai ona fana atu na ū i le mea tonu e fana agaʻi i ai!

I se tulaga talitutusa, o le tausia aʻe o fanau e manaʻomia ai ni taumafaiga tele. E lē mafai e le fanau ona tausia aʻe i latou lava, e pei lava foʻi ona lē otometi ona mafai e le ū ona oo atu i le mea o loo taulaʻi e fana atu i ai. Ae pagā lea, e toʻatele mātua i aso nei e foliga mai ua lē mananaʻo e fai taumafaiga o loo manaʻomia ina ia taulau ai i le tausia aʻe o fanau. Ua latou filifili i le auala faigofie. Ua latou tuu i televise, o le aʻoga, ma uō a tamaiti e aʻoaʻo ai a latou fanau i le mea ua saʻo ma sesē, o tapulaa, ma faiga tau feusuaʻiga. Ua latou tuu i a latou fanau e fai so o se mea e mananaʻo ai. Ma pe a faigatā ona fai atu leai, ona tau lava lea ina latou faapea atu ioe—ma e masani lava ona fai faamolemolega i a latou faaiʻuga i le faapea mai, e lē mananaʻo e faatigā i faalogona o a latou fanau. Peitaʻi o le mea moni, o lo latou faatuutuu lenā o le a oo ai ni aafiaga tumau i a latou fanau.

O le tausia aʻe o fanau e lē o se galuega faigofie. E mautinoa e manaʻomia ni taumafaiga se tele ina ia faatino ai ma le lotoatoa lenā galuega, faapea le taʻitaʻiga a le Afioga a le Atua, peitaʻi, e lē mafaatusalia ona taui e maua mai ai. Na taʻua i le mekasini e faaigoaina Parents e faapea: “Ua iloa mai suʻesuʻega, o tamaiti sa tausia aʻe e mātua e alolofa ma manatu mamafa i o latou tiute—o ē e lagolagosua i a latou fanau ae e taofimau i tapulaa—e lelei o latou tulaga i le aʻoga, e lelei ona atiaʻe o latou tomai e feagai ai ma isi, e lelei o latou faalogona e faatatau iā i latou lava, ma e sili atu ona fiafia nai lo o tamaiti e lologofie o latou mātua pe soona ʻinaʻinā foʻi.”

Ae e iai se isi taui e sili atu. Na tatou muaʻi iloiloina le vaega muamua o le Salamo 22:6: “Aʻoaʻo ia i le tama e tusa ma lona ala.” O loo faaauau le mau i upu faafiafia loto nei: “A oo ina toeaina lava o ia, e lē teʻa ese ai.” Po o le uiga o lenei faataoto faagaeeina o le a taulau manuia ai pea i taimi uma? E leai. O loo i lau tama le filifiliga saʻoloto, ma o le a ia tuputupu aʻe ma fai ana lava faaiʻuga. Peitaʻi, ua aumaia e lenei mau i mātua se faamautinoaga alofa. O le ā lenā faamautinoaga?

Pe afai e te aʻoaʻo lau fanau e tusa ai ma fautuaga a le Tusi Paia, o lenā ua e faavaeina ni tulaga aupito sili ona lelei e aumaia ai se iʻuga mataʻina—le vaai atu ua tuputupu aʻe ma le fiafia lau fanau, ua faamalieina, ma o ni tagata matutua e galulue mamafa. (Faataoto 23:24) O lea la, ia lelei ona saunia na “ū fanafana” tāua, ia puipuia i latou, ma ia e matuā galue i le faatonutonuina o i latou. Ma o le a lē taitai ona e faanoanoa ai i le faia faapea.

[Ata i le itulau 13]

Po o faaalia ai se alolofa o mātua i a latou fanau, pe afai e la te faia mea uma lava e latou te mananaʻo ai?

[Ata i le itulau 15]

O se matua alofa e na te faamatala atu māfuaaga ua faia ai ni tulafono i le aiga

[Ata i le itulau 15]

O mātua lelei e latou te puipui a latou fanau, mai mea e lamatia ai mai lenei lalolagi lē mamā

[Ata i le itulau 16]

O le tausia aʻe o fanau e lē o se galuega faigofie, ae e lē mafaatusalia ona taui e maua mai ai