Ua Faaalia le Mana o le Atua i Fetu

“Seʻi tetepa aʻe i luga, ma outou vāai, po o ai ea ua na faia nei mea? Na te taʻitaʻiina mai a latou ʻau ua faitauina; na te valaau iā te i latou uma i o latou igoa; ona o le tele o lona malosi ma lona mana tele; e leai so latou e lē iloa.”—ISAIA 40:26.

O LO tatou lā, e tai pei lava lona telē o se fetu. Ae ui i lea, e 330,000 taimi e sili atu ai ona telē le lā nai lo le lalolagi. O le tele o fetu e latalata mai i le lalolagi e laiti i le lā. Ae o isi fetu, e pei o le fetu e taʻu o le V382 Cygni, a itiiti mai e 27 taimi e telē atu ai nai lo o le tatou lā.

O le ā le tele o le vevela e aumai e lo tatou lā? Seʻi manatu i le vevela o se afi e tatau ona iai pe afai e sefulu maila lou mamao ese mai lenā afi, ae o loo e faalogoina pea le vevela. E tusa ma le 93 miliona maila le mamao o le lā mai le lalolagi. Peitaʻi, e mafai ona mafoʻe le paʻu o lou tino i le vevela o le lā i se aso mugālā! Ae o le mea e ofo ai, ona e pe tusa e na o le tasi vaepiliona o le vevela o le lā e oo mai i le lalolagi. Ae ua lava lea vaega itiiti o le malosi o le lā, e mafai ai ona faatumauina le ola i totonu o le paneta lenei.

O le mea moni, ua fuafuaina e saienitisi e faapea o le vevela atoa lea e maua mai i lo tatou lā, e mafai ona faatumauina ai le ola i totonu o le pe tusa o le 31 tiliona paneta e pei o le lalolagi. Ia po o se isi fua faatatau o lenei mea, ua faapea mai le Space Weather Prediction Center (SWPC) Web site: Pe afai e tatou te maua le malosi atoa o le lā mo le na o le tasi le sekone, e mafai ona maua e le Iunaite Setete, “le malosi faaeletise e ola ai mo le isi 9,000,000 tausaga, pe a fua i le aofaʻi o le malosi faaeletise lea o loo latou faaaogāina i le taimi nei.”

O le malosi o le lā lea e sau mai i lona ogatotonu—o ni mea mataʻutia e tutupu lea e nuti ai atoma ma maua mai ai le tele o le vevela. E telē tele le lā ma e matuā māfiafia lona ogatotonu, lea e alu ai le faitau miliona o tausaga ina ia aumai i luga le vevela lea e maua i le ogatotonu o le lā. O loo taʻua i le SWPC Web site, “Pe afai o le a taofia nei ona toe aumai e le lā le vevela, e 50,000,000 tausaga o le a faaauau ai pea ona lagonaina le vevela i le Lalolagi, faatoʻā mātauina lea o aafiaga o le lē toe mauaina o se vevela mai le lā!”

Seʻi manatu i le mea lenei: Pe a e vaavaai atu i le lagi i se pō maninoa, e te vaai atu i le faitau afe o fetu, ma e aumai e na fetu taʻitasi se malosiaga tele e pei foʻi o lo tatou lā. Ma i le fua faatatau a saienitisi, e faitau piliona ma piliona fetu i le vateatea!

O fea e ō mai uma ai nei fetu? Ua iloa nei e le toʻatele o tagata suʻesuʻe e iai māfuaaga ua latou lē malamalama ai pea, i le faafuaseʻi ona iai o le vateatea i le pe tusa o le 14 piliona tausaga ua mavae. Ua faapea mai le Tusi Paia: “Na faia e le Atua le lagi ma le lalolagi i le amataga.” (Kenese 1:1) E aunoa ma se faalētonu, o Lē na foafoaina fetu e mafai ona faamatalaina o Lē e ‘tele lona mana.’—Isaia 40:26.

Le Auala e Faaaogā ai e le Atua Lona Mana

E faaaogā e Ieova le Atua lona mana e faamalosia ai i latou o ē faia lona finagalo. O se faaaʻoaʻoga, na faaaogā e le aposetolo o Paulo lona taimi atoa e aʻoaʻo ai isi e faatatau i le Atua. O Paulo o se tagata e pei foʻi o i tatou, ae sa ia faia  galuega e tele e ui lava i teteega matuiā. Aiseā? Sa ia iloa, na ia maua mai i le Atua le “mana lea e sili atu i le malosi o le tagata.”—2 Korinito 4:7-9.

E faaaogā foʻi e Ieova le Atua lona mana e faaumatia ai i latou, o ē e solia ma le loto i ai ana tapulaa tau amio. Sa faasino atu Iesu Keriso i le faaumatiaga o Sotoma ma Komoro, ma le Lolo i aso o Noa, o ni faaaʻoaʻoga o le auala e faaaogā ai e Ieova lona mana e faaumatia ai na o tagata amioleaga. Na valoia e Iesu ua toe o se aga ona faaaogā lea e Ieova o lona mana, e faaumatia ai i latou o ē e lē amanaʻia Ana tapulaa.—Mataio 24:3, 37-39; Luka 17:26-30.

E Faapefea Ona Aafia ai Oe?

Pe a uma ona mafaufau loloto i le mana o Ieova lea e faaalia mai e ala i fetu, atonu o le a pei ou lagona o le tupu o Tavita, o lē na faapea mai: “A ou vaai atu i lou lagi, o le galuega a ou tamatamaʻi lima, o le masina atoa ma fetu na e faia; se ā ea le tagata e te manatu mai ai iā te ia; ma le atalii o le tagata e te asiasi mai ai iā te ia?”—Salamo 8:3, 4.

Ioe, ua tatou iloa lo tatou faatauvaa pe a faatusatusa atu i le vavaloloa o le vateatea. Peitaʻi, e lē tatau ona lofitūina ai i tatou ona o le mana o le Atua. Sa faagaeeina e Ieova le perofeta o Isaia e tusia upu faamāfanafana nei: “Na te avatua le malosi i ē ua vaivai; a o ē ua leai se malosi, na te faatuputele i ai le malosi. E vaivai ma tigāina tama matutua; o tauleleʻa foʻi, e paʻuʻū lava i latou; a o ē faatalitali iā Ieova, e toe faafouina lo latou malosi; latou te sii aʻe apaʻau e pei o aeto; latou te femoʻei, a e lē vaivai; latou te savavali, a e lē tigāina.”—Isaia 40:29-31.

Pe afai e te naunau e fai le finagalo o le Atua, e te mautinoa o le a ia foaʻi mai lona agaga paia, e fesoasoani iā te oe e faaauau ai pea ona fai lona finagalo. Peitaʻi, e ao ona e ōle atu mo le agaga paia. (Luka 11:13) E mafai ona e onosaia so o se faigatā e ala i le lagolagosua a le Atua, ma e maua le malosi e fai ai le mea ua tonu.—Filipi 4:13.

[Faamatalaga faaopoopo i le itulau 7]

E mafai ona e maua le malosi e fai ai le mea ua tonu, e ala i le lagolagosua a le Atua

[Ata i le itulau 7]

Mai le itu agavale i luga: Whirlpool galaxy, Pleiades star cluster, Orion Nebula, Andromeda galaxy

[Ata i le itulau 7]

E 330,000 taimi e sili atu ai ona telē le lā nai lo o le lalolagi

[Ē Ana le Ata i le itulau 7]

Faaputuga fetu: NASA, ESA ma AURA/Caltech; o isi fetu o i luga aʻe: National Optical Astronomy Observatories