Se Tusi Mai Ausetalia

“O le a Ou Faitauina i le Pō Nei i Tafatafa o le Afi”

A TAʻU loa nuu maotua o Ausetalia, na pau le mea e oso mai i lou manatu o vaipanoa laulautoafa ma le naumati, e vevela le tau, ma e leʻi taitai ainā o loo valevalenoa pea le tele o nei laufanua. Peitaʻi, pe tusa ma le 180,000 tagata o loo aināina lenei vaega maotua o Ausetalia, e tusa lenā o le pasene e 1 o le faitau aofaʻi o le atunuu.

A o oʻu laʻitiiti, sa ō oʻu mātua, o ni Molimau a Ieova, ma ave aʻu i le talaʻiga i nuu maotua. Sa faaosofia loʻu naunau fiailoa i le matagofie o lona telē ma le gaoā. Na ou fiafia foʻi ona o le malolosi ma le faigofie o olaga o tagata o loo nonofo i lea vaipanoa. I le taimi nei, ua iai loʻu toʻalua ma laʻu fanau laiti e toʻalua, e 10 ma le 12 tausaga, ua ou manaʻo la ia latou oo i le fiafia lava lea e tasi na ou tofo i ai.

Ua Tapena le Malaga

Sa muamua ona matou fuafuaina le aofaʻi atoa o le tupe o le a faaalu i le malaga. O le ā le mamao e matou te gafatia ona malaga ai? O le ā le umi e matou te ō ese ai? Sa iai se ulugalii ma ni faifeʻau faataimi atoa se toʻalua mai le matou faapotopotoga, na ofo mai e matou te ō faatasi. Na matou malilie uma i le taimi e alu ai le malaga—o le ogatotonu o le tausaga i le taimi e mālōlō ai aʻoga. Ona matou tusi atu lea i le ofisa o le lālā o Molimau a Ieova i Sini i Ausetalia, ma talosaga atu mo se oganuu e matou te galulue ai. Na valaaulia i matou e talaʻi i se oganuu maotua e lata i Goondiwindi, o se nuu maotua pe tusa ma le 250 maila i sisifo o Brisbane, le mea e matou te nonofo ai.

Na matou iloa o loo iai se faapotopotoga toʻaitiiti o Molimau a Ieova i Goondiwindi. Sa avea lenei mea o se faamanuiaga faaopoopo. O le feiloaʻi ma uso ma tuafāfine Kerisiano, o le tumutumuga aupito sili lea o la matou malaga. Na matou faafesootaʻi le faapotopotoga ma taʻu atu iai le matou asiasiga. O lo latou tali fiafia mai ua matou iloa ai, o loo latou faatalitali ma le naunautaʻi mai i lo matou taunuu atu.

A o toeitiiti oo i le taimi e matou te ō ese ai, sa faapotopoto le matou vaega ma talanoa i le auala e talaʻi atu ai le tala lelei o le Malo o le Atua i tagata e nonofo i nuu maotua. Sa faapitoa ona matou mananaʻo e faaaloalogia tū ma aganuu a so o se tagata Apoliki e matou te feiloaʻi i ai. O se faataʻitaʻiga, o nisi ituaiga e vāai i lo latou laueleele e na o i latou lava e nonofo ai. O se lē faaaloalo la pe a ulu atu i lo latou nuu ae e leʻi valaauliaina.

Ua Alu le Malaga

Ua oo mai nei le aso e alu ai le matou malaga. Na faatumulia a matou taavale e lua iā i matou ma uta o le matou malaga, ma matou agaʻi atu loa i Goondiwindi. Na matou ui atu i laufanua ua uma ona faatoʻa, ae a o matou agaʻi atu i Goondiwindi, na matou ui atu i ni togāvao o loo i ai ni iūkalipi tetele e tutū taʻitasi solo ai. O se aso maninoa, na susulu manaia mai le lā, ma māfanafana ai le tau malūlū. I ni itula mulimuli ane, na matou taunuu ai i Goondiwindi ma nonofo i ni potu mautotogi i se nofoaga e paka ai taavale toso i le pō.

 I le aso na sosoo ai, le Aso Sa, na susulu matagofie mai le lā ma matou mānavaina le ea fou—o se tau lelei tele mo le talaʻiga. I le tau māfanafana i inei, e masani lava ona oo atu i le 100 tikeri Fahrenheit le vevela! Na muamua matou afea se nofoaga o loo iai se vaega toʻaitiiti o tagata Apoliki, pe tusa ma le 20 maila le mamao. Sa faasino matou iā Jenny, o se fafine ua matua ma ua sinā lona lauao, o ia lea o le taʻitaʻi o le nuu. Sa ia faalogo ma le totoʻa i la matou taulimaga faale-Tusi Paia ma talia fiafia le tusi, Ia Faalogo i le Faiaʻoga Sili. * Ona ia valaaulia lea o i matou e ō atu i totonu o le nuu e talaʻi i tagata uma.

Sa taufetuli atu tamaiti o le nuu e muamua iā i matou ma faailoa atu la matou asiasiga. Sa faalologo ma le faaaloalo tagata o aiga uma na matou feiloaʻi i ai, ma latou talia lomiga faale-Tusi Paia. E leʻi umi ae uma a matou lomiga, ma o le taimi lea ua tatau ona matou toe foʻi i le taulaga mo le sauniga a le faapotopotoga. A o matou leʻi ō ese ma le nofoaga, sa matou folafola atu iā i latou e leʻi mafai ona matou talanoa i ai, o le a matou toe foʻi mai e asi i latou.

Sa vavaō le Maota mo Sauniga i lenā aoauli i talanoaga fiafia ma i latou e leʻi leva ona feiloaʻi a ua avea nei o ni uō. E toʻa 25 Molimau a Ieova i le faapotopotoga lea o loo latou talaʻia ma le faamaoni le feʻau o le Malo i tagata pe tusa ma le 11,000, o loo salalau solo i le 11,500 kilomita faatafafā i nuu i tua. Na faapea mai se tasi Molimau loto faafetai, “Faafetai lava mo a outou taumafaiga ina ia ō mai ma fesoasoani mai iā i matou.” Ina ua uma se sauniga faagaee loto, sa matou mālōlō loa mo sina taumafataga. A o matou leʻi momoe i lenā pō, sa matou fafagaina manu e taʻu o le possum, sa tataa solo i le mea na matou momoe ai i le nofoaga e paka ai taavale toso.

“I Tafatafa o le Afi”

I aso e lua na sosoo ai, sa asiasi atu ai loa taavale a matou vaega e lua i nisi o aiga o loo nonofo solo i le tuaoi o Kuiniselani i New South Wales. O le tele o lea vaega o le atunuu, i nuu maotua, sa i ai ni togāvao mātūtū o iūkalipi ua pepē, ma ni fanua mutia o loo aai ai mamoe ma povi. Sa matou vaaia ni kagalu i le auala, o loo tutū o latou taliga ina ua faalogo mai o matou ō atu. Sa matou vaaia foʻi ni manu e taʻu o le emu o feoaʻi solo ai i ia laueleele.

I le aoauli o le Aso Lua, na matou fetaiaʻi ai ma se solo tele o se lafu povi o loo savavali lemū mai i le auala. O loo taumafai tagata faigaluega e vaaia lafu manu e aveese atu lenei lafumanu mai lea vaipanoa, aemaise lava i taimi o lāmala. E leʻi umi ae matou tau i se tagata e tausia manu o loo tiʻetiʻe mai i lana solofanua. Ina ua uma ona ou faatū le taavale i autafa o le auala, sa ou oso i fafo ma faamalō atu. Na faapea mai le tamāloa, “Mālō!” Sa tū mai le tamāloa faatasi ma lana taʻifau e tuli ai povi, ma mā talanoa.

Ina ua uma ona talanoa mo sina taimi puupuu e faatatau i le lāmala, ona amata loa lea ona ou talanoa e faatatau i la matou feʻau mai le Tusi Paia. Na faapea mai le tamāloa, “Ou te leʻi toe faalogo lava i se mea e tasi mai le Tusi Paia talu mai le taimi a o oʻu laʻitiiti!” Sa ia manatu o taʻitaʻi lotu le faapogai o amioga leaga i le lalolagi. Ae peitaʻi, sa iai pea ona uiga faaaloalo mo le Tusi Paia. Ina ua uma se talanoaga manaia i le Tusi Paia, ona ou ofo lea i ai o le tusi, O ā Aʻoaʻoga Moni o le Tusi Paia? * Sa tago mai uu mau atu le tusi, ua tuu i le taga o lona ofu ma faapea mai, “Pe afai o loo taʻu mai ai iā te aʻu aʻoaʻoga a le Tusi Paia, o le a ou faitauina i le pō nei i tafatafa o le afi.”

Toe Foʻi le Malaga

I lenā pō i le Maota mo Sauniga, sa matou faamatala atu i o matou uso ma tuafāfine faaleagaga mea na tutupu i le matou talaʻiga. Sa latou faamautinoa mai o le a latou toe foʻi e asi tagata fiafia na matou feiloaʻi i ai. Ina ua uma le sauniga, sa matuā faigatā ona matou faamavae. Sa i ai se noataga māfana o le alofa iā i matou. Sa faatamaoaigaina i matou uma i a matou fetufaaʻiga o faalaeiauga faaleagaga.—Roma 1:12.

Na matou toe foʻi i le aso na sosoo ai. O le mafaufau pea i le matou malaga, ua matou ioe ai e faapea sa matuā faamanuia Ieova i a matou taumafaiga. Sa faafouina faaleagaga i matou. Ina ua matou taunuu i le fale, sa ou fesili atu i laʻu fanau: “O fea le isi mea tou te mananaʻo e ō i ai mo le isi a tatou mālōlōga? Tou te fia ō i luga o mauga?” Na latou tali mai, “Leai Tamā, tatou toe ō e talaʻi i nuu maotua.” Na ioeina e laʻu avā lo la manatu e ala i le faapea mai: “E saʻo, tatou ō i inā. O le mālōlōga pito sili lenā ona lelei!”

[Faaopoopoga i lalo]