O se Atua e Finagalo Malie e Faamagalo
Ia Mafuta Atu i le Atua
O se Atua e Finagalo Malie e Faamagalo
“LE ALII e, [Ieova] o oe e lelei, ma ua e faamagalo sala.” (Salamo 86:5) O na upu faamāfanafana loto, ua faamautinoa mai ai iā i tatou, o Ieova o le Atua e aao māfola ma e faamagalo sala. O le mea na tupu i le olaga o le aposetolo o Peteru, ua faaalia manino mai ai e “matuā faamagaloina” e Ieova agasala.—Isaia 55:7.
O Peteru o se tasi o aumea aupito sili ona vavalalata a Iesu. Ae peitaʻi, i le pō mulimuli o Iesu i le lalolagi, na lolo atu ai Peteru ona o le fefe i tagata ma faia ai se agasala matuiā. I le lotoā lea e latalata i le mea na faamasinoina ai e lē tusa ma le tulafono Iesu, na faafiti faatolu ai Peteru i luma o tagata na te lē iloa Iesu—e leʻi faatasi ae e faatolu. Ina ua uma ona faafitia faatolu ma le maumauaʻi e Peteru lona iloa o Iesu ona “faliu mai [lea o] le Alii ma silasila mai iā Peteru.” (Luka 22:55-61) Pe mafai ona e faaata i lou mafaufau lagona o Peteru, ina ua tepa taulaʻi atu Iesu iā te ia? Ina ua ia iloa le matuiā o lana agasala, “Ona tagi masūsū lea o ia.” (Mareko 14:72) Atonu na taumānatu le aposetolo ua salamō, po ua avea lona faafitia faatolu o Iesu, ma mea ua lē toe mafai ai ona ia maua le faamagaloga a le Atua.
Ina ua mavae le toetū o Iesu, ona la talanoa lea ma Peteru, ma e lē taumatea na aveesea ai so o se lē mautonu pe na faamagaloina le agasala a Peteru. E leʻi faia e Iesu ni upu inainā, e na te leʻi tuuaʻia foʻi Peteru. Nai lo lenā, na ia fesili atu iā Peteru: “Pe e te alofa iā te aʻu?” Na tali Peteru: “Ioe le Alii e, ua e silafia ou te alofa faapelepele iā te oe.” Ona tali atu lea o Iesu: “Ia e fafaga i aʻu tamaʻi mamoe.” Na toe fesili faalua atu Iesu, ma toe aumai foʻi le tali lava lea e tasi a Peteru, ae atonu ua faamamafa mai. Ona fetalai atu lea o Iesu: “Ia e leoleo i aʻu tamaʻi mamoe.” Ona toe fai atu faatolu lea e Iesu o le fesili lava lea e tasi: “Pe e te alofa faapelepele iā te aʻu?” Ua “oo ina tigā Peteru” ma faapea atu: “Le Alii e, ua e silafia mea uma; ua e silafia foʻi ou te alofa faapelepele iā te oe.” Na fetalai Iesu: “Ia fafaga i aʻu tamaʻi mamoe.”—Ioane 21:15-17.
Aiseā na fesili ai Iesu i fesili e na te silafia lelei tali? E silafia lelei e Iesu loto o tagata, o lea na silafia lelei e Iesu e alofa Peteru iā te ia. (Mareko 2:8) O le faia o na fesili, na tuu atu ai e Iesu iā Peteru se avanoa e faamautinoa faatolu ai lona alofa. O le tali atu a Iesu: “Fafaga i aʻu tamaʻi mamoe. . . . leoleo i aʻu tamaʻi mamoe. . . . fafaga i aʻu tamaʻi mamoe,” na faamautinoa atu ai i le aposetolo, o loo faatuatuaina pea o ia. O lea, na faatonuina e Iesu Peteru e fesoasoani e tausia se meatotino e aupito sili ona tāua—o soo pele o Iesu pei o ni mamoe. (Ioane 10:14, 15) E mautinoa le toʻafilemu o faalogona o Peteru i lona iloa, o loo faatuatuaina pea o ia e Iesu!
E manino, na faamagalo e Iesu lona aposetolo ua salamō. Ona e faaatagia atoatoa e Iesu uiga ma ala o lona Tamā, e tatou te manatu la ua faamagaloina foʻi e Ieova Peteru. (Ioane 5:19) E matuā finagalo malie Ieova e faamagaloina tagata, o ia o le Atua e alofa mutimutivale ma “faamagalo sala” a se tagata agasala ua salamō. Pe lē o se manatu faamāfanafana loto ea lea mo i tatou?